“U Mosali ea Khabane ka ho Fetisisa”

Mantsoe ana a thoriso a ne a lebisitsoe ho mosali e monyenyane oa Momoabe. E ne e le mohlolohali ea bitsoang Ruthe, ngoetsi ea mosali oa Moiseraele ea bitsoang Naomi. Ruthe o phetse Iseraele lilemong tse fetileng tse ka bang 3000 ha ho ne ho busa baahloli ’me o ile a iphumanela lebitso la hore o khabane ka ho fetisisa. (Ruthe 3:11) O ile a fumana lebitso lee le letle joang? Ke bo-mang ba ka ruang molemo mohlaleng oa hae?

Ruthe o ne a sa je “bohobe ba botsoa,” o ne a sebetsa nako e telele le ka thata ha a khoahlapisa masimong, a khothetse ka tsela e ileng ea etsa hore a babatsoe. Esita leha a ne a fuoa monyetla oa ho iphokoletsa mosebetsi, o ne a tsoela pele a sebetsa ka thata, a etsa ho fetang se lebelletsoeng. O ile a tšoaneloa ke tlhaloso ea Bibele ea mosali ea rorisoang, ea nang le bokhoni le ea mahlahahlaha.—Liproverbia 31:10-31; Ruthe 2:7, 15-17.

Litšoaneleho tsa Ruthe tsa moea—botho ba hae ba boikokobetso le ba boitelo le lerato la hae le tšepahalang—ke tsona tse neng li mo tumisitse haholo. O ile a tlohela batsoali ba hae le naha ea habo, ’me a khomarela Naomi, a e-na tebello e fokolang ea ho fumana tšireletseho e ka tlisoang ke lenyalo. Ho sa tsotellehe boemo bona, Ruthe o ile a bolela hore o lakatsa ho sebeletsa Jehova, Molimo oa ’m’ae matsale. Tlaleho ea Mangolo e hatisa bohlokoa ba hae ka ho bolela hore o ne a le “molemo ho [Naomi] ho feta bara ba supileng.”—Ruthe 1:16, 17; 2:11, 12; 4:15.

Le hoja metsoalle ea Ruthe ea batho e ne e mo rorisa hakaalo ka bokhabane ba hae bo fetisisang, ntho ea bohlokoa haholo ke tsela e ntle eo Molimo a neng a nka litšoaneleho tsa hae ka eona le ho mo putsa ha hae ka tokelo ea ho ba moholo-holo oa Jesu Kreste. (Matheu 1:5; 1 Petrose 3:4) Ruthe ke mohlala o motle hakaakang ho basali ba Bakreste le ho bohle ba bolelang hore ba rapela Jehova!