Liliba Tse ke Keng Tsa Boloka Metsi
Liliba Tse ke Keng Tsa Boloka Metsi
MEHLENG ea Bibele, liliba e ne e le likoti tsa maiketsetso tseo morero oa tsona o ka sehloohong e neng e le ho boloka metsi. Ka linako tse ling, Naheng e Tšepisitsoeng e ne e le tsona feela mehloli ea bohlokoa ea phepelo ea metsi.
Ha moprofeta Jeremia a ne a tlaleha phatlalatso ea Molimo, o ile a bua ka liliba ka kutloisiso ea tšoantšetso ’me a re: “Ho na le lintho tse peli tse mpe tseo sechaba sa ka se li entseng: Se ntlohetse, ’na mohloli oa metsi a phelang, e le hore se ichekele liliba, liliba tse phatlohileng, tse ke keng tsa boloka metsi.”—Jeremia 2:13.
Kaha Baiseraele ba ne ba furalletse Jehova, Molimo oa bona—“mohloli oa metsi a phelang”—ba ne ba entse lilekane tse sa tšepahaleng tsa sesole le lichaba tsa bahetene le ho rapela melingoana e se nang thuso, ea bohata. Ho latela papiso eo Jeremia a e sebelisitseng, litšabelo tse joalo tseo ba neng ba li tšepile li ile tsa fetoha liliba tse lutlang, tse neng li se na matla leha e le afe a ho sireletsa kapa a ho boloka.—Deuteronoma 28:20.
Na ho na le ntho eo re ithutang eona mohlaleng oo oa histori? Joalokaha ho ile ha etsahala mehleng ea Jeremia, Jehova, Molimo oa bosafeleng, e ntse e le eena feela Mohloli oa metsi a fanang ka bophelo. (Pesaleme ea 36:9; Tšenolo 4:11) Batho ba ka fumana bophelo bo sa feleng ho tsoa ho eena feela ka Mora oa hae, Jesu Kreste. (Johanne 4:14; 17:3) Leha ho le joalo, ho tšoana le batho ba mehleng ea Jeremia, kajeno matšoele a batho a khetha ho hana esita le ho nyatsa lentsoe la Molimo le ngotsoeng ka Bibeleng. Ho e-na le hoo, ba tšepa litharollo tsa nakoana tsa lipolotiki, mabaka a batho a lefeela, menahano le lifilosofi tsa batho tse sa hlompheng Molimo. (1 Bakorinthe 3:18-20; Bakolose 2:8) Ho hlakile hore na ke mang eo batho ba lokelang ho mo tšepa. U tla tšepa mang? Na u tla tšepa Jehova, “mohloli oa metsi a phelang,” kapa u tla tšepa “liliba tse phatlohileng, tse ke keng tsa boloka metsi”?
[Setšoantšo se leqepheng la 32]
Seemahale se senyenyane sa entsoeng ka letsopa sa ’mè oa melimotsana se ileng sa fumanoa lebitleng le leng la Moiseraele
[Tlhaloso ea Moo Setšoantšo se Nkiloeng Teng]
Photograph taken by courtesy of the British Museum