Letšolo la Moloko oa Batho la ho Khahlisa Molimo

“HA HO mohla ho kileng ha e-ba le mokhatlo leha e le ofe oa batho oo ho oona Molimo a sa kang a ba le karolo e itseng, hangata e le ea laolang bokahohle kapa e le ’Mōpi. Sena ke ’nete esita le lichabeng tse ikhethetseng ho se lumele ho Molimo.” Mantsoe ana a boletsoe ke John Bowker bukeng ea hae e bitsoang God—A Brief History. Ka tsela e itseng, letšolo la ho fumana Molimo le ho amoheloa ke eena e ’nile ea e-ba karolo e tloaelehileng ea boitšoaro ba batho. Lefatšeng lohle, batho ba bangata ba na le takatso e tiileng ea ho khahlisa Molimo. Ho hlakile hore tsela eo ba lekang ho etsa sena ka eona e fapana ho ea ka litumelo tsa bona.

Ba bang ba lumela hore se hlokahalang hore motho a amoheloe ke Molimo ke hore feela a itšoare hantle. Ba bang ba nahana hore ho ka khoneha hore Molimo a ba amohele haeba ba etsa mesebetsi e itseng e thusang mafutsana. Hape, mekete ea bolumeli le meetlo ke lintho tsa bohlokoa ho batho ba limilione.

Ka lehlakoreng le leng, ho na le ba lumelang hore Molimo o sebakeng seo ho leng thata ho fihla ho sona—o hōle haholo kapa o tšoarehile haholo ka litaba tse ling hoo a se nang nako ea batho feela ba tloaelehileng. Ho tlalehoa hore rafilosofi oa Greece ea boholo-holo Epicurus o ne a lumela hore ‘melimo e hōle haholo hore e ka ntša batho kotsi ka tsela leha e le efe.’ Leha ho le joalo, batho ba bangata ba nahanang joalo ke batho ba bolumeli. Mohlomong ba bang ba bona ba bile ba etsa mahlabelo le ho etsa meetlo e itseng ba tšepile hore ba tla khutsisa baholo-holo ba bona ba shoeleng.

Uena u re’ng? Na ka sebele Molimo o ela hloko boiteko ba rōna ba ho leka hore a re amohele? Na ho ka khoneha hore re ame pelo ea Molimo le ho mo khahlisa?

 [Tlhaloso ea Moo Setšoantšo se Nkiloeng Teng e leqepheng la 2]

COVER: Courtesy of ROE/Anglo-Australian Observatory, photograph by David Malin