Lengolo le Eang ho Noe

“NOE ea ratehang, ke balile ka uena ka makhetlo a mangata ka Bibeleng le kamoo u ileng ua haha areka eo uena le lelapa la hao le ileng la bolokoa ka har’a eona nakong ea Moroallo.”

Ke kamoo moroetsana e mong ea lilemo li 15 ea bitsoang Minnamaria a ileng a qala lengolo la hae kateng leo a neng a le isa tlhōlisanong ea ho ngola ea barutoana ba lilemo li 14 ho ea ho ba lilemo li 21. Tlhōlisano eo e ne e hlophisitsoe ke ba lefapha la litšebeletso tsa poso ea Finland, Mokhatlo oa Mesuoe ea Sefinishe le Mokhatlo oa Lingoliloeng Tsa Sefinishe. Bahlōlisani ba ne ba lokela ho ngola lengolo le thehiloeng bukeng e itseng. Le ne le ka ’na la ngolloa mongoli oa buka eo kapa motho eo ho buuoang ka eena ho eona. Mesuoe e ile ea hloaea mangolo a fetang 1 400 a barutoana ba bona eaba ba a romela ho sehlopha sa baahloli ba tlhōlisano eo. Joale sehlopha seo se ile sa khetha lengolo la pele le monate ka ho fetisisa, eaba a leshome a latelang a fumana moputso oa bobeli, a leshome a latelang a fumana moputso oa boraro. Minnamaria o ile a thaba haholo ha lengolo la hae le hlaha sehlopheng sa boraro sa a fumaneng moputso.

Ke hobane’ng ha Minnamaria, morutoana ea ka tlaase ho lilemo tse 20, a ile a ngola lengolo la hae ka Noe ea phetseng lilemong tse ka bang 5 000 tse fetileng? O re: “Ntho ea pele e ileng ea tla kelellong ea ka ke Bibele. Ke tloaetse batho bao ho buuoang ka bona ka Bibeleng haholo. Ke balile ka bona haholo hoo ho ’na ba bonahalang joaloka eka baa phela. Ke ile ka khetha Noe hobane bophelo ba hae bo ne bo thahasellisa bo bile bo fapane le ba ka.”

Minnamaria o phethela lengolo la hae le eang ho Noe ka mantsoe a reng: “U sa ntse u le mohlala oa tumelo le oa ho mamela. Tsela ea hao ea bophelo e susumetsa bohle ba balang Bibele hore ba nke bohato ka tumelo ea bona.”

Lengolo lena la ’mali e monyenyane oa Bibele le bontša hantle hore ka sebele ho batho ba baholo le ba banyenyane, Bibele ‘ea phela ’me e fana ka matla.’—Baheberu 4:12.