“Re Batla Hore re Tle re re, ‘E!’”
“Re Batla Hore re Tle re re, ‘E!’”
OFISI ea lekala ea Lipaki Tsa Jehova Nigeria e sa tsoa amohela lengolo, leo karolo e ’ngoe ea lona e reng:
“Mora oa rōna, Anderson, o hlokahetse a le lilemo li 14. O ne a hōlisa likhoho tse peli pele a hlokahala. O ne a batla ho li rekisa ebe o romela chelete eo ofising ea lekala e le monehelo oa mosebetsi oa boboleli oa lefatše ka bophara. Empa o ile a hlokahala pele likhoho tseo li rekisoa.
“Kaha e ne e le takatso ea hae, re le batsoali ba hae re hōlisitse likhoho tseo ’me ra li rekisa. Re le romella chelete ena e le monehelo o entsoeng ke Anderson. Ka lebaka la tšepiso ea Jehova, re kholisehile hore haufinyane haholo—re tla boela re bona Anderson. Re batla hore re tle re re, ‘E!’ ha a re botsa hore na re phethahalitse takatso ea pelo ea hae. Ha e le hantle, re lebeletse ka thabo ho bona eseng Anderson feela empa ho bona le ‘leru le leholo la lipaki’ tse tla tsosoa bafung.”—Baheberu 12:1; Johanne 5:28, 29.
Joalokaha lengolo le ka holimo le bontšitse ka ho hlaka, ho lumela tsohong ea bafu ke tšepo e matlafatsang Bakreste ba ’nete. Malapa a mang a limilione a tla thaba hakaakang ha le ’ona ho tšoana le lelapa labo Anderson, a amohela baratuoa ba ’ona bao a neng a arohantsoe le bona ke lefu leo e leng sera!—1 Bakorinthe 15:24-26.
Lentsoe la Molimo le fana ka tšepo ena e tšelisang ea hore bafu ba tla tsosoa e le e ’ngoe ea lintho tse babatsehang tse tla etsahala haufinyane lefatšeng le lecha la ho loka tlas’a ’Muso oa Molimo. (2 Petrose 3:13) Bibele ha e bua ka seo Molimo a tlang ho se etsetsa batho ka nako eo, e re: “O tla hlakola meokho eohle mahlong a bona, lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng. Lintho tsa pele li fetile.”—Tšenolo 21:4.