Phetolelo e “Ipabolang”

HO LATELA khakanyo e ’ngoe, ho hatisitsoe liphetolelo tse ncha tsa Senyesemane tsa Mangolo a Segerike a Bakreste tse 55 pakeng tsa selemo sa 1952 le sa 1990. Khetho ea bafetoleli ea mantsoe e entse hore ho se ke ha e-ba le liphetolelo tse peli tse tšoanang hantle. E le hore a hlahlobe ho tšepahala ha mosebetsi o entsoeng ke bafetoleli bao, Jason BeDuhn, moprofesa oa boemo bo bohareng oa lithuto tsa bolumeli Univesithing ea Northern Arizona, e Flagstaff, Arizona, U.S.A., o ile a hlahloba ’me a bapisa ho nepahala ha liphetolelo tse khōlō tse robeli, tse kopanyelletsang Phetolelo ea Lefatše le Lecha ea Mangolo a Halalelang, e hatisitsoeng ke Lipaki Tsa Jehova. Phello e bile efe?

Le hoja a sa ka a lumellana le mantsoe a mang a sebelisitsoeng phetolelong eo, BeDuhn o ile a re Phetolelo ea Lefatše le Lecha ke phetolelo e “ipabolang, e molemo haholo” le “e tsitsitseng ka ho lumellana” ho feta liphetolelo tse ling tseo a li hlahlobileng. BeDuhn o ile a phethela ka ho re, ka kakaretso, Phetolelo ea Lefatše le Lecha “ke e ’ngoe ea liphetolelo tsa Senyesemane tse nepahetseng ka ho fetisisa tsa Testamente e Ncha tse fumanehang kajeno” le “e nepahetseng ka ho fetisisa liphetolelong tseo e bapisitsoeng le tsona.”—Truth in Translation: Accuracy and Bias in English Translations of the New Testament.

BeDuhn o ile a boela a hlokomela hore bafetoleli ba bangata ba ne ba qobellehile “ho beha taba ka mantsoe a mang kapa ho eketsa seo Bibele e se bolelang ka morero oa ho khotsofatsa babali ba kajeno ka seo ba batlang hore Bibele e se bue le seo ba hlokang hore e se bue.” Ka lehlakoreng le leng, BeDuhn o ile a hlokomela hore Phetolelo ea Lefatše le Lecha e fapane, ka lebaka la ‘ho nepahala ha eona haholoanyane e le phetolelo ea lentsoe ka lentsoe le e hlokolosi ea lipolelo tsa pele tsa bangoli ba Testamente e Ncha.’

Joalokaha Komiti ea Phetolelo ea Bibele ea Lefatše le Lecha e lumela selelekeleng sa phetolelo eo, ke “boikarabelo bo tebileng haholo” ho fetolela Mangolo a Halalelang ho tloha lipuong tsa ’ona tsa pele ho a tlisa puong ea kajeno. Komiti eo e tsoela pele ho re: “Bafetoleli ba buka ena, ba tšabang le ba ratang Mongoli oa Bomolimo oa Mangolo a Halalelang, ba ikutloa ba e-na le boikarabelo bo khethehileng ho Eena bakeng sa ho fetisa mehopolo ea hae le lipolelo tsa hae ka mokhoa o nepahetseng kahohle kamoo ho ka khonehang kateng.”

Ho tloha ha e qala ho hatisoa ka 1961, Phetolelo ea Lefatše le Lecha ea Mangolo a Halalelang e se e fumaneha ka lipuo tse 32, ho kopanyelletsa le likhatiso tse peli ka Braille. Mangolo a Segerike a Bakreste a Phetolelo ea Lefatše le Lecha, kapa “Testamente e Ncha,” a fumaneha ka lipuo tse ling tse 18 ho kopanyelletsa le khatiso e le ’ngoe ka Braille. Re u mema hore u bale Lentsoe la Molimo phetolelong ena e “ipabolang” ea kajeno, eo mohlomong e leng teng ka puo ea heno.