Lipotso Tse Tsoang ho Babali

Na Mokreste a ka fa mosebeletsi oa ’muso chelete kapa mpho bakeng sa litšebeletso, kapa na seo se tla talingoa e le tjotjo?

Hohle moo Bakreste ba lulang teng, ba batla ho bontša bohlale bo sebetsang ha ba sebetsana le maemo a sebaka seo ba leng ho sona, ba hopotse hore se amohelehang se bile se le molaong naheng e ’ngoe e ka ’na ea e-ba ntho e sa amoheleheng kahohle le tlōlo ea molao e tšabehang naheng e ’ngoe. (Liproverbia 2:6-9) Ke ’nete hore Mokreste o lokela ho lula a hopotse hore mang kapa mang ea batlang ho ba “moeti tenteng ea [Jehova]” o lokela ho hana tjotjo.—Pesaleme ea 15:1, 5; Liproverbia 17:23.

Tjotjo ke eng? Ho latela The World Book Encyclopedia, “tjotjo e bolela ho fa kapa ho tšepisa ho fa . . . motho ea tšebeletsong ea sechaba ntho e itseng ea bohlokoa, ’me eena ka lehlakoreng la hae a hlompholle mosebetsi oa hae kapa molao e le hore mofani a rue molemo.” Kahoo, ho sa tsotellehe hore na motho o lula hokae, ke ho ntša tjotjo ho fa moahloli kapa lepolesa chelete kapa mpho e le hore ho khopamisoe toka kapa ho e fa mohlahlobi hore a iphapanyetse phoso kapa tlōlo e itseng. E boetse ke ho ntša tjotjo ho sebelisa mpho hore motho a sebeletsoe ka tsela e itseng e khethehileng, joaloka ho bitsoa pele ho ba bang kapa ho ba eta pele moleng. Mokhoa o joalo le oona o ne o tla bontša ho hloka lerato.—Matheu 7:12; 22:39.

Ka mohlala, na e tla be e le ho ntša tjotjo ho fa mosebeletsi oa sechaba mpho kapa chelete e le hore motho a sebeletsoe ka molao kapa hore a qobe ho tšoaroa ka leeme? Ka mohlala, linaheng tse ling, ba molaong ba ka ’na ba e-ba lesisitheho ho ngolisa bana sekolong, ho amohela motho sepetlele, kapa ho otla litokomane tsa ho eta ka setempe ho fihlela ba fuoe chelete e itseng. Kapa ba ka ’na ba lieha ho sebetsa likōpo tsa ho nchafatsa lilaesense kapa mangolo a tumello.

Mekhoa ea ho fana ka mpho bakeng sa tšebeletso le boikutlo bo bang teng ka kakaretso li fapana ho ea ka libaka. Moo litefo tse joalo li tloaelehileng kapa li lebeletsoeng, Bakreste ba bang ba ka ’na ba nka hore hafeela ba sa tlōle molao, ha baa kheloha melao-motheong ea Bibele ha ba fa motho oa molao mpho bakeng sa tšebeletso e le hore a phethe mosebetsi oa hae. Linaheng tse ling, batho ba ka ’na ba talima tefo e joalo e le feela maoto a lipere a ekelletsang mosebeletsi oa ’muso moputso oa hae oo bonneteng o leng monyenyane. Hopola hore ho na le phapang pakeng tsa ho fana ka mpho hore u sebeletsoe ka molao le ho ntša tjotjo hore u etsetsoe ntho e seng molaong.

Ka lehlakoreng le leng, esita le moo ho fana ka limpho tse joalo ho tloaelehileng, ba bang ba Lipaki Tsa Jehova ba ’nile ba hana ho li fa bahlahlobi, basebeletsi ba ’muso ba lefisang lekhetho la thepa kapa ba bang. Ka lebaka la hore moo Lipaki li lulang teng li tsebahala ka ho sebelisa letsoalo la tsona le ka botšepehi, ka linako tse ling li tšoaroa ka tsela eo batho ba bangata ba tšoaroang ka eona hafeela ba ile ba lefa.—Liproverbia 10:9; Matheu 5:16.

Ha re akaretsa taba re re, mohlanka e mong le e mong oa Jehova o lokela ho iketsetsa qeto ea hore na o tla fana ka mpho e le hore a sebeletsoe ka molao kapa a qobe ho tšoaroa ka leeme. Ka holim’a tsohle, o lokela ho nka tsela e tla etsa hore a ’ne a be le letsoalo le letle, e sa tlisetseng lebitso la Jehova thohako le e sa khopiseng ba bang.—Matheu 6:9; 1 Bakorinthe 10:31-33; 2 Bakorinthe 6:3; 1 Timothea 1:5.