Ho Rorisa Jehova Sekolong

HO POTA lefatše, Lipaki Tsa Jehova tse nyenyane li fumana menyetla ea ho rorisa Molimo sekolong—ka lipuo le ka boitšoaro ba tsona. Hlokomela liphihlelo tse ling tse bontšang cheseho ea tsona ea bocha.

Ngoanana e mong e monyenyane oa Paki Greece o ne a fuoe mosebetsi oa ho ngola tlaleho e mabapi le tšilafalo ea sepaka-paka. Ka mor’a ho sheba Watch Tower Publications Index, o ile a fumana boitsebiso ba bohlokoa makasineng ea Tsoha!, eo qetellong ea moqoqo oa hae a ileng a e bontša e le mohloli oa boitsebiso ba hae. Mosuoe oa hae o ile a mo bolella hore oo e bile o mong oa meqoqo e monate ka ho fetisisa eo a neng a kile a e bala. Hamorao mosuoe oa hae o ile a sebelisa boitsebiso boo ka katleho seminareng e ’ngoe. Kahoo morali eo oabo rōna e monyenyane o ile a etsa qeto ea ho fa mosuoe oa hae litokollo tse eketsehileng tsa Tsoha! ho akarelletsa le e neng e e-na le letoto la lihlooho tse reng “Matichere—Re ka Etsa’ng Ntle ho ’Ona?” Hamorao mosuoe eo o ile a babatsa makasine ea Tsoha! ka pel’a sehlopha, eaba liithuti tse ling li qala ho kōpa limakasine tsa Tsoha! Morali eo oabo rōna o ne a lokela ho tlisa limakasine tsa Tsoha! sekolong e le hore liithuti tseo li ka bala litokollo tse ling.

Naheng ea Benin, Afrika, mocha e mong oa Mokreste o ile a tobana le khatello e sa tloaelehang. Joalokaha e le tloaelo, batsoali ba bana ba bangata sekolong sa habo ba ile ba ikopanya e le hore ba hire batho ba neng ba thusa bana ba sekolo ka lithuto tse thata e le ho ba lokisetsa litlhahlobo. Leha ho le joalo, batho bao ba ile ba khetha ho ba thusa ka Moqebelo hoseng. Mocha eo oa Paki o ile a ipuella ka ho re: “Moqebelo hoseng ke nako eo ka eona phutheho eohle e bolelang hammoho. Ke nako e ’natefelang ka ho fetisisa bekeng, ’me e ke ke ea mpheta ka lebaka leha e le lefe!” Ntate oa hae, eo e leng motsoali a le mong, ebile e le Paki, o ile a lumellana le eena eaba o leka ho bua le sehlopha se seng sa batsoali le batho bao ba thusang bana e le hore ba fetole kemiso eo. Leha ho le joalo, kaofela ba ile ba hana. Ngoanana eo e monyenyane o ile a khetha hore a ke ke a thusoa ke batho bao. Ho fapana le moo, o ile a kopanela le phutheho ea habo boboleling. Bana bao a neng a bala le bona ba ile ba mo soma, ba mo bolella hore a khaotse ho ea paka a be a lahle le Molimo oa hae. Ba ne ba kholisehile hore o tla feila litlhahlobo. Leha ho le joalo, eitse ha sephetho se tsoa, sehlopha se neng se thusoa se ne se feitse litlhahlobo, ha morali’abo rōna e monyenyane eena a ne a pasitse. Ha ho potang hore litšomo li ile tsa fela. Joale liithuti li se li re ho eena, “U tsoele pele ho sebeletsa Molimo oa hao.”

Rephabliking ea Czech, ngoanana ea lilemo li 12 o ne a lokela ho lokisetsa tlaleho e mabapi le buka. ’Mè oa hae o ile a mo khothalletsa ho sebelisa buka ea Motho e Moholo ka ho Fetisisa ea Kileng a Phela. O ile a qala tlaleho ea hae ka lipotso tsena: “Le nahana joang? Motho e moholo ka ho fetisisa ea kileng a phela ebe e ka ba mang?” O ile a ba hlalosetsa ka Jesu, ka bophelo ba hae ha a le lefatšeng le ka lithuto tsa hae. Eaba o tšohla khaolo e reng “Thuto ea ho Tšoarela.” Mosuoe oa hae o ile a khotsa a hloletsoe: “Ena ke tlaleho e nkang maemo a pele eo nkileng ka e utloa ho uena!” eaba o thabela ho amohela buka eo. Bana ba bang ba sekolo le bona ba ne ba e batla. Letsatsing le hlahlamang, ngoanana eo o ile a thabela ho ba abela libuka tse 18.

Bacha ba joalo ba fumana thabo e khōlō ka ho rorisa Jehova sekolong. Kaofela ha rōna re lokela ho etsisa cheseho ea bona ea bocha.