Ba Qala ka ho Lelekoa, ba Qetella ka ho Amoheloa

LILEMONG tse seng kae tse fetileng, Santiago le mosali oa hae, Lourdes, ba ile ba fallela motseng o motle oa Huillcapata, Peru, ho ea bolella batho ba moo molaetsa oa Bibele o fanang ka tšepo. Leha ho le joalo, moprista e mong o ile a fihla ka potlako a tsoa Cuzco eaba o epa pitso. Moprista eo o ile a bolella baahi ba moo hore boteng ba Lipaki Tsa Jehova bo tla etsa hore ba oeloe ke lefu le bolaeang la seoa le hore ho tla khetheha lehloa le lengata ’me le bolaee mehlape ea bona le be le senye le lijalo tsa bona.

“Boprofeta” bona bo ile ba susumetsa batho ba bangata, ’me ho ile ha feta likhoeli tse ngata motseng oo ho se motho ea lumelang ha Santiago le Lourdes, ba mo kōpa hore a ithute Bibele le bona. Miguel, e leng ofisiri ea ’muso eo e neng e bile e le motlatsi oa ’musisi, o ne a leleka Santiago le Lourdes seterateng, a ba fereletsa ka majoe. Empa kamehla ba ne ba bontša khotso, ’me ba itšoara joaloka Bakreste.

Ka mor’a nako, batho ba bang ba motse ba ile ba lumela ho ithuta Bibele. Esita le eena Miguel o ile a fetola boikutlo ba hae. O ile a qala ho ithuta le Santiago, a tlohela ho noa ho tlōla, ’me ea e-ba motho oa khotso. Qetellong, Miguel, mosali oa hae le ba babeli ba barali ba hae, ba ile ba amohela ’nete ea Bibele.

Kajeno, ho na le phutheho e hōlang ea Lipaki Tsa Jehova motseng ona. Miguel o thabela hore boholo ba majoe ao a neng a fereletsa Santiago le Lourdes ka ’ona a ile a ba fosa, ’me o ba leboha ka mohlala oa bona o motle oa khotso.

[Litšoantšo tse leqepheng la 32]

Botho ba khotso ba Santiago le Lourdes (holimo) bo ile ba fetola Miguel (ea ka letsohong le letona)