Etsa Hore ho Thuisa e be Ntho e Thabisang

BATHO BA BANG ba nka ho thuisa e le ntho e thata. Mohlomong ba ho nka e le mosebetsi o thata o hlokang hore ba tsepamise mohopolo haholo nthong e itseng. Hape batho ba joalo ba ka ’na ba ikutloa ba le molato ha ba sa thuise, haholo-holo ha ba bala kamoo ho thuisa ho leng bohlokoa kateng. (Bafilipi 4:8) Leha ho le joalo, ho thuisa linnete tseo re ithutileng tsona ka Jehova, ka litšobotsi tsa hae tse babatsehang, ka lintho tse hlollang tseo a li entseng, ka lintho tseo a li hlokang ho rōna, le ka morero oa hae o khanyang e lokela ho ba tsela e thabisang haholo eo re qetang nako ea rōna ka eona. Hobane’ng?

Jehova Molimo ke ’Musi ea Phahameng ka ho Fetisisa oa bokahohleng ’me o ntse a sebetsa hore a phethahatse morero oa hae o moholo. (Johanne 5:17) Leha ho le joalo, o ela hloko lintho tseo morapeli e mong le e mong oa hae a li nahanang a khutsitse. Mopesaleme Davida o ne a tseba sena ’me o ile a bululeloa hore a ngole mantsoe a latelang: “Jehova, u ntlhahlobisisitse ka hohle, ’me ua ntseba. U tseba ho lula ha ka le ho ema ha ka. U etse hloko monahano oa ka u le hōle.”—Pesaleme ea 139:1, 2.

Mantsoe ana a mopesaleme a ka ’na a utloahala a tepeletsa ha motho a nahana ka ’ona ka lekhetlo la pele. A ka ’na a nahana a re, ‘Le hoja Molimo a le “hōle,” o bona ntho e ’ngoe le e ’ngoe e mpe eo ke e nahanang.’ Ka sebele, ho molemong oa rōna hore re ele hloko hore Molimo o bona menahano ea rōna e sa lokang. Seo se ka re thusa hore re loantše menahano e fosahetseng ’me, ha menahano e joalo e hlaha, re e bolelle Molimo, re kholisehile hore o tla re tšoarela ka lebaka la tumelo ea rōna sehlabelong sa Jesu sa thekollo. (1 Johanne 1:8, 9; 2:1, 2) Leha ho le joalo, re lokela ho hopola hore Jehova o hlahloba barapeli ba hae ka tsela e ntle. O re ela hloko ha re nahana ka eena ka mokhoa o tletseng teboho.

U ka ’na ua botsa: “Na kannete Jehova o ela hloko lintho tsohle tse ntle tseo barapeli ba hae ba limilione ba li nahanang?” E, ka sebele o li ela hloko. Jesu o ile a totobatsa kamoo Jehova a re ratang kateng ha a ne a re Jehova o ela hloko esita le lirobele tse nyenyane, eaba o phaella ka ho re: “Le ba bohlokoa ho feta lirobele tse ngata.” (Luka 12:6, 7) Lirobele ha li nahane ka Jehova. Kahoo haeba Jehova a li tsotella, e tlameha ebe rōna o re tsotella haholo ebile oa thaba ha e mong le e mong oa rōna a nahana ka lintho tse mo khahlisang! Joaloka Davida, re ka rapela re kholisehile ra re: “Ho thuisa ha pelo ea ka e ke e be [ho] khahlisang ka pel’a hao, Jehova Lefika la ka le Molopolli oa ka.”—Pesaleme ea 19:14.

Bopaki bo bong hape ba hore ruri Jehova o amehile ka lintho tseo barapeli ba hae ba tšepahalang ba li thuisang bo fumanoa mantsoeng a bululetsoeng a moprofeta Malakia. Ha a bua ka mehla ea rōna, o ile a bolela esale pele a re: “Ka nako eo ba tšabang Jehova ba buisana, e mong le e mong le motsoalle oa hae, ’me Jehova a ’na a ela hloko le ho mamela. Buka ea khopotso ea qala ho ngoloa ka pel’a hae bakeng sa ba tšabang Jehova le bakeng sa ba nahanang ka lebitso la hae.” (Malakia 3:16) Ho hopola hore Jehova o ntse a re ‘etse hloko’ ha re nahana ka eena ka sebele ho ka etsa hore re thabele ho nahana ka lintho tse mo khahlisang. Ka hona, e se eka re ka lumellana le mantsoe a mopesaleme ea ileng a ngola a re: “Ka sebele ke tla thuisa ka mosebetsi oohle oa hao, ke tla nahanisisa ka mesebetsi ea hao.”—Pesaleme ea 77:12.