Lipotso Tse Tsoang ho Babali

Re ka ithuta eng thibelong e ho Exoda 23:19 e reng: “U se ke ua pheha potsanyane ka lebese la ’m’a eona”?

Taelo ena ea Molao oa Moshe, e hlahang ka makhetlo a mararo ka Bibeleng, e ka re thusa hore re utloisise se lokileng mahlong a Jehova, qenehelo ea hae le mosa oa hae. E boetse e hatisa kamoo a nyonyang borapeli ba bohata kateng.—Exoda 34:26; Deuteronoma 14:21.

Ho pheha potsanyane ka lebese la ’m’a eona ho ne ho sa tl’o lumellana le tlhophiso ea lintho eo Jehova a e entseng. Jehova o lokiselitse lebese la pōli hore le matlafatse potsanyane ’me le e hōlise. Kamoo setsebi se seng se bolelang kateng, ho pheha potsanyane ka lebese la ’m’a eona, ho ne ho tla bontša “ho eisa kamano eo Molimo a e thehileng le ho e hlohonolofatsa pakeng tsa pōli le potsanyane.”

Ho feta moo, ba bang ba nahana hore ho belisa potsanyane ka lebese la ’m’a eona e ne e le mokhoa oa bohetene oa ho bitsa pula. Haeba boemo e ne e le bona boo, thibelo ena e ne e tla sireletsa Baiseraele mekhoeng ea bolumeli e se nang kelello le e sehlōhō ea lichaba tse neng li ba potolohile. Molao oa Moshe o ne o hlile o thibela Baiseraele ho tsamaea ka melao ea lichaba tseo.—Levitike 20:23.

Ntho ea ho qetela eo re e bonang molaong ona ke qenehelo e mofuthu eo Jehova a nang le eona. Ha e le hantle, Molao o ne o e-na le litaelo tse tšoanang le ena tse hanelang ho tšoara liphoofolo ka sehlōhō ’me li ne li sireletsa linthong tse sa lumellaneng le tlhaho. Ka mohlala, Molao o ne o akarelletsa taelo ea hore ho se ke ha etsoa sehlabelo ka phoofolo ntle leha e bile le ’m’a eona ka matsatsi ao e ka bang a supileng, ho se ke ha bolaoa phoofolo le lelinyane la eona ka letsatsi le le leng le hore ho se ke ha nkoa nonyana le mahe a eona kapa malinyane a eona ka sehlaheng.—Levitike 22:27, 28; Deuteronoma 22:6, 7.

Ho hlakile hore Molao e ne e se feela letoto la litaelo tse rarahaneng le lithibelo. Molemo o mong oa molao ke hore melao-motheo ea oona e re thusa ho itšoara ka tsela e phahameng e bonahatsang e le kannete litšobotsi tse babatsehang tsa Jehova.—Pesaleme ea 19:7-11.

[Tlhaloso ea Moo Setšoantšo se Nkiloeng Teng e leqepheng la 31]

© Timothy O’Keefe/Index Stock Imagery