Seo re ka Ithutang Sona ka Boikhohomoso le Boikokobetso

KETSAHALO e ileng ea etsahala bophelong ba Morena Davida e totobatsa phapang e teng pakeng tsa boikokobetso ba ’nete le boikhohomoso bo khopo. E etsahetse ka mor’a hore Davida a hape Jerusalema ’me a e etse motse-moholo oa hae. Davida o ne a nka Jehova e le eena eo e neng e hlile e le Morena oa Iseraele, ka lebaka leo o ile a lokisetsa hore Areka, e neng e tšoantšetsa boteng ba Molimo, e tlisoe moo motse-moholo. Ketsahalo ena e ne e le ea bohlokoa haholo ho Davida hoo a ileng a bontša bohle kamoo a neng a thabile kateng, ha a ne a setse baprista ba neng ba jere Areka morao. Baahi ba Jerusalema ba ile ba bona morena oa bona “a tlōla-tlōla” a bile “a tjeka . . . ka matla a hae ’ohle.”—1 Likronike 15:15, 16, 29; 2 Samuele 6:11-16.

Leha ho le joalo, Mikale mosali oa Davida ha aa ka a kenella mokhoping oo o neng o thabile. O ile a shebella ka fensetere ’me ho e-na le hore a ananele tsela eo Davida a neng a rorisa Jehova ka eona, o ile “a qala ho mo nyelisa ka pelong ea hae.” (2 Samuele 6:16) Ke hobane’ng ha Mikale a ile a ikutloa ka tsela ee? Ho totobetse hore o ne a inkela holimo ka lebaka la hore e ne e le morali oa morena oa pele oa Iseraele, e leng Saule, le ka lebaka la hore joale e ne e le mosali oa morena oa bobeli oa Iseraele. Ho ka etsahala hore ebe o ne a lumela hore monna oa hae eo e neng e le morena, o ne a sa lokela ho itheolela boemong ba batho feela tjee ka ho keteka le bona ka tsela e mo tlosang seriti. Maikutlo a joalo a boikhohomoso a ile a bonahatsoa ke tsela eo a ileng a lumelisa Davida ka eona ha a khutlela hae. Ka ho phoqa o ile a re: “Morena oa Iseraele o ikentse ea khanyang hakaakang kajeno ha a ne a hlobola kajeno mahlong a makhabunyane a bahlanka ba hae, feela joalokaha e mong oa banna ba lithoto a hlobola ka ho feletseng!”—2 Samuele 6:20.

Davida o ile a etsa joang ha a nyatsuoa ka tsela ee? O ile a khalemela Mikale a mo bolella hore Jehova o ne a lahlile ntat’ae Saule, a khetha eena. Davida o ile a eketsa ka ho re: “Ke tla iketsa ea khelloang fatše le ho feta mona, ’me ke tla ba tlaase mahlong a ka; hammoho le makhabunyane ao u a boletseng, ke ikemiselitse ho itlotlisa hammoho le ’ona.”—2 Samuele 6:21, 22.

E, Davida o ne a ikemiselitse ho tsoela pele a sebeletsa Jehova ka boikokobetso. Boikutlo bona bo re thusa ho utloisisa hore na ke hobane’ng ha Jehova a ile a bitsa Davida “monna ea ratoang ke pelo ea ka.” (Liketso 13:22; 1 Samuele 13:14) Ha e le hantle, Davida o ne a latela mohlala o tsoileng matsoho oa boikokobetso o behiloeng ke Jehova Molimo ka boeena. Se thahasellisang ke hore mantsoe ao Davida a a sebelisitseng ha a ne a re ho Mikale, “ke tla ba tlaase,” a tsoa motsong oa leetsi la Seheberu leo hape le sebelisoang ho hlalosa tsela eo Molimo a talimang moloko oa batho ka eona. Le hoja Jehova e le Motho e moholo ka ho fetisisa bokahohleng, Pesaleme ea 113:6, 7 e hlalosa hore “o itheola boemong [ho theoha ha motho maemong a hae a holimo e le hore a sebetsane le batho ba maemong a tlaase] hore a talime leholimong le lefatšeng, o phahamisa ea tlaase lerōleng; o phahamisa ea futsanehileng sekoting sa molora.”

Kaha Jehova o ikokobelitse, ha ho makatse hore ebe o hloile “mahlo a iphahamisang” a batho ba ikhohomosang. (Liproverbia 6:16, 17) Ka lebaka la ho bontša mokhoa ona o mobe le ho hlompholla eo Molimo a neng a mo khethetse borena, Mikale o ile a tingoa tokelo ea ho tsoalla Davida mora. O shoele a se na ngoana. Ke thuto ea bohlokoa hakaakang ho rōna! Bohle ba batlang ho amoheloa ke Molimo ba tlameha ho mamela mantsoe a reng: “Itlameng ka ho ikokobetsa kelellong e mong ho e mong, hobane Molimo o hanyetsa ba ikhohomosang, empa o fana ka mosa o sa tšoanelang ho ba ikokobelitseng.”—1 Petrose 5:5.