Hempe e Entsoeng ka Boea le ho ba Motho oa Moea

MORENA LOUIS IX oa Fora o ne a apara hempe ena. Ha Sir Thomas More a ntse a ithutela molao a sa le mocha, hempe ena e ne e mo thusa hore a lule a falimehile ka lihora tse 19 ho isa ho tse 20 ka letsatsi, ka likhoeli tse ngata. Ha e le hantle, ho boleloa hore Sir More o ile a e apara boholo ba nako bophelong bohle ba hae. Ha Thomas Becket, e leng Moarekabishopo oa Canterbury, a ne a bolaeloa ka Kerekeng e Khōlō ea Canterbury, ho ile ha fumanoa hempe ena ka tlas’a liaparo tsa hae ho sa lebelloa. Ke eng eo batho baa kaofela ba hlahelletseng ba neng ba tšoana ka eona? Ba ne ba tšoana ka ho hlokofatsa nama ea bona ka hempe ena e entsoeng ka boea.

Hempe ena e ne e le seaparo se hoashang se entsoeng ka boea bo sa ohloang ba pōli ’me e ne e aparoa holim’a letlalo e le hore e ka etsa hore letlalo le hlohlone le ho le utloisa bohloko, ’me ho etsa joalo ho ne ho le bohloko haholo. Ho feta moo, hempe ena e ne e le selao sa linta. Ho boleloa hore Thomas Becket o ne a apara hempe ea hae e entsoeng ka boea, le borikhoe bo bokhutšoanyane ba boea, ho fihlela e “nyeunya linta.” Ka mor’a lekholo la bo16 la lilemo, batho ba bang ba ne ba khetha ho apara hempe e entsoeng ka terata e tšesaane e nang le metsu, ho e-na le ho apara hempe ea boea ba pōli. Hempe ea mofuta ona, e ne e utloisa motho ea e apereng bohloko le ho feta.

Ho ea ka buka e ’ngoe e hlalosang mantsoe, morero oa hempe ena e entsoeng ka boea, joaloka mefuta e meng ea ho itlhokofatsa, e ne e le “ho laola litakatso tsa boetsalibe tsa nama le ho khothalletsa bophelo ba ho khahlisa Molimo haholoanyane.” Seaparo sena e ne e se feela sa batho ba itšoarang ka thata; batho feela ba tloaelehileng, ho akarelletsa le ba leng maemong a phahameng, le bona ba ne ba se apara. Esita le kajeno, malumeli a mang a ntse a khomaretse mokhoa ona.

Na ho apara hempe e entsoeng ka boea kapa ho mamella mefuta e sa tšoaneng ea ho itšotla ho etsa hore motho a rate lintho tsa moea? Che, ho ba motho oa moea ha hoa itšetleha ka mekhoa e joalo. Ha e le hantle, moapostola Pauluse o ile a nyatsa taba ea “tšoaro e mpe ea ’mele.” (Bakolose 2:23) * Ho fapana le moo, e le hore re tsepamise mehopolo linthong tsa moea le ho rata Molimo e le kannete, re lokela ho batla tsebo ea Molimo ka ho khothalla ho ithuta Lentsoe la hae le ka ho sebelisa tsebo eo bophelong ba rōna.

[Mongolo o botlaaseng ba leqephe]

[Litlhaloso Tsa Moo Litšoantšo li Nkiloeng Teng tse leqepheng la 32]

King Louis IX, top: From the book Great Men and Famous Women; Thomas Becket, center: From the book Ridpath’s History of the World (Vol. IV); Thomas More, bottom: From the book Heroes of the Reformation, 1904