Nka Thusa Bana ba ka Joang Hore ba Rutehe e le Kannete?

THUTO ea ngoana e ka tšoantšoa le leeto le thabisang le hoja le e-na le mathata. Ke leeto leo u le tsamaeang le bana ba hao. Ua ba khothatsa ’me u ba tataisa ka lerato, u ba thusa hore ba tsoele pele tseleng ea bophelo. Ho na le lintho tse ngata haholo tseo ba lokelang ho ithuta tsona!

E le hore bana ba atlehe e le kannete ba be ba thabe bophelong, ho hlokahala hore ba ithute melao-motheo ea boitšoaro le ea moea, ba khone ho khetholla se nepahetseng le se fosahetseng. Haeba ba ka tseba Jehova ba ba ba mo rata, ba tla be ba fumane thuto e putsang e le kannete le thupelo ea ka ho sa feleng. Joaloka motsoali, ke uena ea ikarabellang haholo-holo mabapi le lintho tseo bana ba hao ba ithutang tsona le tabeng ea hore na ba nka lintho tseo e le tsa bohlokoa hakae ’me ba li utloisisa hakae.

Mathata a teng leetong lena. Bana ba susumetsoa habonolo ke lintho tse hlahang ka ntle ho lelapa, ba ka ithuta lintho tse ngata tse sa lokang. Re phela lefatšeng le busoang ke Satane Diabolose. (1 Johanne 5:19) O thahasella thuto ea bana ba hao, le hoja eena a e thahasella ka mabaka a fosahetseng. Satane ke tichere e tletseng maqiti eo e leng khale e li bona—leha ho le joalo, ke tichere e khopo haholo. Le hoja a iketsa eka ke “lengeloi la leseli,” leseli leo a fanang ka lona lea thetsa le bile le khahlanong le Lentsoe la Jehova le thato ea hae. (2 Bakorinthe 4:4; 11:14; Jeremia 8:9) Diabolose le bademona ba hae ke litsebi tsa ho qhekella, ba khothalletsa boithati, ho se tšepahale, le boitšoaro bo hlephileng.—1 Timothea 4:1.

U ka etsa’ng ho sireletsa bana ba hao hore ba se ke ba thetsoa? U ka ba ruta joang hore ba amohele lintho tsa ’nete tseo e bileng e leng tsa bohlokoa? Mohato oa bohlokoa ke hore uena ka bouena u itlhahlobe. Ho hlokahala hore u behe mohlala o motle. Ke habohlokoa hore u amohele boikarabelo ba hao ba hore u koetlise bana ba hao ’me u iphe nako ea ho etsa joalo. Leha ho le joalo, pele re hlahloba lintlha tsena, a re fumaneng motheo oa thuto ea bohlokoa.

Motheo oa Thuto ea ’Nete

Re ka ithuta ho Morena Solomone oa Iseraele, eo e leng e mong oa banna ba bohlale ka ho fetisisa ba kileng ba phela. Bibele e re: “Molimo a tsoela pele ho fa Solomone bohlale le kutloisiso ka tekanyo e khōlō haholo le pelo e pharaletseng, joaloka lehlabathe le lebōpong la leoatle. Bohlale ba Solomone bo ne bo le boholo ho feta bohlale ba baahi bohle ba Bochabela le ho feta bohlale bohle ba Egepeta.” Solomone “o ne a khona ho bua maele a likete tse tharo, ’me lipina tsa hae tsa e-ba sekete le metso e mehlano.” O ne a tseba lintho tse ngata haholo ka limela le liphoofolo. (1 Marena 4:29-34) Morena Solomone o ile a boela a tsamaisa mesebetsi ea kaho Iseraele, ho akarelletsa le oa ho haha tempele ea Jehova e ntle haholo Jerusalema.

Lintho tseo Solomone a ileng a li ngola, tse kang tse bukeng ea Moeklesia, li bontša hore o ne a utloisisa sebōpeho sa motho hantle. Molimo o ile a mo bululela hore a bontše motheo oa thuto ea ’nete. Solomone o ile a re: “Ho tšaba Jehova ke tšimoloho ea tsebo.” Hape morena enoa ea bohlale o ile a re: “Ho tšaba Jehova ke qalo ea bohlale, ’me ho tseba Ea Halalelang ka ho Fetisisa ke kutloisiso.”—Liproverbia 1:7; 9:10.

Haeba re tšaba Molimo, re mo tšaba ka tsela e nang le tlhompho ’me ha re batle ho mo halefisa. Rea hlokomela hore ke eena Ea Phahameng  ka ho Fetisisa le hore re ikarabella ho eena. Ba bang ba ka ’na ba nahana hore batho ba hlokomolohang Molimo eo bophelo ba rōna bo itšetlehileng ka eena ba bohlale, empa bohlale bo joalo ke “booatla ho Molimo.” (1 Bakorinthe 3:19) Bana ba hao ba hloka thuto e thehiloeng ‘bohlaleng bo theohang holimo.’—Jakobo 3:15,17.

Ho tšaba ho halefisa Jehova ho amana haufi-ufi le ho mo rata. Jehova o batla hore bahlanka ba hae ba mo tšabe ba be ba mo rate. Moshe o ile a re: “Uena Iseraele, Jehova Molimo oa hao o batla eng ho uena haese hore u tšabe Jehova Molimo oa hao, e le hore u tsamaee litseleng tsohle tsa hae le ho mo rata le ho sebeletsa Jehova Molimo oa hao ka pelo ea hao eohle le ka moea oa hao oohle; hore u boloke litaelo tsa Jehova le litaelo tsa hae tse hlomamisitsoeng tseo ke u laelang tsona kajeno, molemong oa hao?”—Deuteronoma 10:12, 13.

Haeba re ruta bana ba rōna hore ba tšabe Jehova ba be ba mo hlomphe, re tla be re rala motheo oa thuto e tla etsa hore bana ba rōna ba hlalefe e le kannete. Ha ba ntse ba haha motheong oo, ba tla ananela ’Mōpi oa bona haholoanyane, eo e leng Mohloli oa tsebo eohle ea ’nete. Sena se tla thusa bana ba rōna hore ba utloisise seo ba ithutang sona, ba se ke ba etsa liqeto tse fosahetseng. Ba tla ba le matla a “ho khetholla se nepahetseng le se fosahetseng.” (Baheberu 5:14) Hape motheo o joalo o tla ba thusa hore ba lule ba ikokobelitse ’me ba qobe ho etsa se sebe.—Liproverbia 8:13; 16:6.

Bana ba Hao ba U Shebile!

Leha ho le joalo, re ka thusa bana ba rōna joang hore ba rate Jehova ba be ba mo tšabe? Karabo ea potso ena e fumanoa Molaong oo Jehova a ileng a o fa sechaba sa Iseraele ka moprofeta Moshe. Batsoali ba Baiseraele ba ile ba bolelloa sena: “U rate Jehova Molimo oa hao ka pelo ea hao eohle le ka moea oa hao oohle le ka mafolofolo a hao ’ohle. Mantsoe ana ao ke u laelang ’ona kajeno a be pelong ea hao; u a rute mora oa hao ka ho pheta-pheta ’me u bue ka ’ona ha u lutse ka tlung ea hao le ha u tsamaea tseleng le ha u robetse le ha u tsoha.”—Deuteronoma 6:5-7.

Litemana tsena li ruta batsoali lithuto tsa bohlokoa. E ’ngoe ea tsona ke hore: Joaloka motsoali, u lokela ho beha mohlala o motle. E le hore u rute bana ba hao hore ba rate Jehova, uena ka bouena u lokela ho rata Molimo, ’me mantsoe a hae a be pelong ea hao. Ke hobane’ng ha see e le sa bohlokoa hakaale? Hobane ke uena tichere e khōlō ea bana ba hao. Seo ba ithutang sona mohlaleng oa hao se tla ba ama ka botebo. Ha ho letho le susumetsang bophelo ba ngoana ho feta mohlala oa batsoali.

Lintho tseo u li labalabelang, lintho tseo u li nkang e le tsa bohlokoa, le lintho tseo u li thahasellang ha li bonahale feela ka seo u se buang empa li bonahala le ka seo u se etsang. (Baroma 2:21, 22) Ho tloha boseeng, bana ba ithuta ka ho sheba batsoali ba bona ka hloko. Bana ba lemoha lintho tseo batsoali ba li nkang e le tsa bohlokoa, ’me hangata ke tsona lintho tseo le bona ba li nkang e le tsa bohlokoa. Haeba u rata Jehova e le kannete, bana ba hao ba tla lemoha  sena. Ka mohlala, ba tla bona hore ’malo oa Bibele le ho ithuta eona ke tsa bohlokoa ho uena. Ba tla hlokomela hore u etelletsa mesebetsi e amanang le ’Muso pele bophelong ba hao. (Matheu 6:33) Ho ba teng kamehla libokeng tsa Bokreste le ho kopanela mosebetsing oa boboleli ba ’Muso ho tla ba bontša hore ho etsetsa Jehova tšebeletso e halalelang ke ntho ea bohlokoa ka ho fetisisa ho uena.—Matheu 28:19, 20; Baheberu 10:24, 25.

Jara Boikarabelo ba Hao

Thuto e ’ngoe eo batsoali ba ka ithutang eona ho Deuteronoma 6:5-7 ke hore: Ke boikarabelo ba hao hore u rute bana ba hao. Sechabeng sa Jehova sa boholo-holo, batsoali ke bona ba neng ba ruta bana ba bona. Ho Bakreste ba lekholong la pele la lilemo, batsoali ba ne ba ntse ba phetha karolo ea bohlokoa mabapi le ho ruta bana ba bona. (2 Timothea 1:5; 3:14, 15) Ha moapostola Pauluse a ngolla Bakreste ba bang, o ile a bontša hore bo-ntate haholo-holo ba lokela ho ‘tsoela pele ho hōlisa [bana ba bona] ka taeo le kelello e laoloang ke Jehova.’—Baefese 6:4.

Kaha batsoali ba imetsoe ke boikarabelo ba letsatsi le letsatsi, ba imetsoe ke mosebetsi le lintho tse ling tse jang nako, ba ka ’na ba lekeha hore ba itlhohlolle boikarabelo ba ho ruta bana ba bona ’me ba bo behe mahetleng a ba bang ba kang matichere le batho ba hlokomelang bana. Leha ho le joalo, ha ho motho ea ka nkang sebaka sa motsoali ea lerato, ea tsotellang. Le ka mohla u se ke ua khella fatše bohlokoa ba hao le tšusumetso eo u nang le eona. Haeba u hloka thuso, khetha ka bohlale, empa le ka mohla u se ke ua nyahlatsa boikarabelo bona ba hao bo halalelang.

Qeta Nako U Koetlisa Bana ba Hao

Thuto e ’ngoe hape eo batsoali ba e fumanang ho Deuteronoma 6:5-7 ke hore: Ho koetlisa bana ho hloka nako le boikitlaetso. Batsoali ba Baiseraele ba ne ba lokela ho etsa hore linnete tsa Molimo li thopothele ho bana ba bona ka hore ba ba ‘rute tsona ka ho pheta-pheta.’ Lentsoe la mathomo la Seheberu le fetoletsoeng e le ‘ho ruta ka ho pheta-pheta’ le bolela ho “bua ntho ka makhetlo a mangata,” “ho bua ka eona khafetsa-khafetsa.” Ba ne ba lokela ho etsa sena letsatsi lohle, e, ho tloha hoseng ho fihlela ka shoalane, “ka tlung ea hao” le “tseleng.” Ho ruta bana le ho lokisa boikutlo ba bona le boitšoaro ba bona hore e be bo thabisang Molimo ho hloka nako le boikitlaetso.

Kahoo, u ka etsa’ng hore u thuse bana ba hao hore ba rutehe e le kannete? U ka etsa ho hongata. Ba rute ho rata Jehova le ho mo tšaba. Beha mohlala o motle. Jara boikarabelo ba hao ba ho ruta bana ba hao, ’me u iphe nako e hlokahalang hore u ba koetlise. Ha ua phethahala, ’me u tla etsa liphoso. Empa haeba ruri u leka ho etsa thato ea Molimo, mohlomong bana ba hao ba tla ananela boikitlaetso ba hao ba be ba rue molemo ho bona. Liproverbia 22:6 e re: “Koetlisa moshanyana ho ea ka tsela e mo loketseng; esita le ha a tsofala a ke ke a e kheloha.” Molao-motheo ona ke ’nete le baneng ba banana.

Thuto e tšoana le leeto le sa feleng. Haeba uena le bana ba hao le rata Molimo, ke leeto leo le tla ’ne le le thabele ka ho sa feleng. Sena ke hobane ho tla ’ne ho be le lintho tse ngata tseo re tla ithuta tsona ka Jehova le kamoo re ka phethang morero oa hae kateng.—Moeklesia 3:10, 11.

[Setšoantšo se leqepheng la 15]

Na u balla bana ba hao Bibele?

[Setšoantšo se leqepheng la 16]

Iphe nako ea ho ruta bana ba hao ka ’Mōpi