“Mehlolo” e ’Meli Kopanong e le ’Ngoe ea Georgia

KETSAHALO e ke keng ea lebaloa, e ileng ea tšoauoa ka “mehlolo e “’meli,” e etsahetse naheng ea Georgia ka 2006. Ka matsatsi a mararo ho tloha ka la 7 ho ea ho la 9 July, Kopano ea Setereke ea Lipaki Tsa Jehova ea “Topollo e Atametse!” e ile ea tšoareloa libakeng tse fapaneng tse tšeletseng naheng eo. E ne e le mokete oa moea o ileng oa thabeloa ke batho ba fetang 17- 000.

Ka January 2006, ho ile ha etsoa boiteko ba ho fumana sebaka seo ho sona ho ka bokanang batho ba baloang ka likete motseng o ka sehloohong oo ho neng ho lokiselitsoe hore ho tšoareloe kopano ho oona oa Tbilisi, e leng motse-moholo oa Georgia. Lipuo li ne li tla fetisetsoa libakeng tse ling tsa kopano ka mehala ea thelefono.

Ka lilemo tse ngata tse fetileng, tokoloho ea borapeli e ’nile ea fumanoa hanyane ka hanyane Georgia. Kahoo, ho sa tsotellehe khanyetso e neng e tletse hohle nakong e fetileng, Lipaki li ile tsa tsoela pele, li kholisehile hore sebaka sa kopano se tla fumanoa motse-moholo. Batho ba Georgia ke batho ba botsoalle le ba amohelang baeti ka mofuthu. Leha ho le joalo, batho ba bang ba boholong ba leeme haholo litabeng tsa bolumeli. Na ba ne ba tla tlohela maikutlo a bona ebe ba lumella Lipaki hore li hire sebaka sa kopano?

Barab’abo rōna ba Komiti ea Kopano ba ile ba ea mabaleng a fapa-fapaneng a lipapali le liholong tse khōlō tsa lipapali. Baokameli ba ne ba tšepisa hore ho ka sebelisoa libaka tsa bona empa ba hana ho tsoa ka ntlha ha barab’abo rōna ba kōpa matsatsi a tobileng a ho hira sebaka se itseng. Kahoo, komiti ena e ile ea makala ha baokameli ba holo ea Sehlopha se Letsang ’Mino oa Classic sa Tbilisi ba lumela hore ba tla hirisetsa Lipaki Tsa Jehova holo ea bona. Holo ena ea ’mino e bohareng ba motse, moo ho tšoareloang liketsahalo tse hlaheletseng haholo teng.

 Kaha komiti ena e ne e tsositsoe molota ke hore boiteko ba eona bo qetelletse bo atlehile, e ile ea qala ho hlophisetsa kopano ea Tbilisi, hammoho le likopano tsa litoropong tse ling tse khōlō le tse nyenyane ka har’a naha, ho akarelletsa Tsnori, Kutaisi, Zugdidi, Kaspi le Gori. Ho ile ha etsoa mosebetsi o moholo oa ho hokahanya libaka tsena tsa kopano ka mehala ea thelefono hore ho tle ho mameloe lenaneo ka nako e tšoanang. Lintho tsohle li ne li loketse hore kopano ena e qale. Ho sa lebelloa, beke feela pele kopano e qala, baokameli ba holo eo ba ile ba koenehela tumellano ea ho hirisa holo. Ha baa ka ba fana ka lebaka.

“Mohlolo” oa Pele

Ebe barab’abo rōna ba ne ba tla etsa joang ha nako e se e ile tjee? Ntho feela eo ba neng ba ka e etsa e ne e le hore ba lebe Marneuli, e leng mapolasi a hōle le Tbilisi ka lik’hilomithara tse 40. Likopano tse ngata tse khōlō li ’nile tsa tšoareloa moo setšeng sa lelapa le leng la Lipaki Tsa Jehova. Sebaka sena seo ho tšoareloang likopano ho sona e ne e le serapa se seholo. Lilemong tse fetileng tse leshome, e bile sona sebaka feela seo liphutheho tsa Tbilisi li neng li ka tšoarela likopano ho sona. Leha ho le joalo, Marneuli e boetse ke sebaka seo Lipaki Tsa Jehova li ’nileng tsa hlaseloa ka mabifi ke mahoohoo ho sona.

Lekhetlo le leng leo ka lona Lipaki li ileng tsa hlaseloa ke ka la 16 September, 2000. Mapolesa a motse oa Marneuli a ile a thiba litsela ho sitisa Lipaki ho fihla sebakeng sa kopano. Ka mor’a moo ho ile ha latela libese tse tletseng litlokotsebe tse etelletsoeng pele ke Vasili Mkalavishvili, moprista oa kereke ea Orthodox ea tlositsoeng setulong. Ba ile ba emisa likoloi tse nyenyane le libese tse eang kopanong ea Marneuli, ba ntša batho ba bangata ba neng ba e-ea kopanong ka likoloing, ’me ba ba khakhatha, ’me bapalami ba bang bona ba ile ba amohuoa thepa, ho akarelletsa Libibele le lingoliloeng tsa Bibele.

Sebaka sena sa kopano sa Marneuli se ile sa boela sa hlaseloa ke mokhopi oa batho ba ka bang 60. Lipaki tse ka bang 40 li ile tsa lemala. Mora e mong oabo rōna o ile a hlajoa ka thipa sefubeng. Bahlaseli ba bang ba ntša lithunya tse kamotsoeng melomo tseo ba ileng ba thunyetsa moeeng ka tsona ka bohale. E mong oa bona o ile a supa mong’a sebaka ka sethunya ’me a laela hore a mo fe chelete le mabenyane. Mahoohoo a ile a phenyekolla ntlo ea hae, e neng e le ka lehlakoreng le leng la setša, eaba a utsoa thepa ea hae ea bohlokoa. Ha a qeta ho pshatla lifensetere tsohle tsa ntlo, a ile a chesa lingoliloeng tsa Bibele le libenche tse neng li etselitsoe kopano. Ho ile ha senngoa lingoliloeng tsa boima bo etsang tone le halofo. Ho e-na le hore mapolesa a neng a le teng a thibele tlōlo ena ea molao,  a ile a kopanela pefong e neng e etsetsoa Lipaki. *

Komiti ea Kopano ha ea ka ea sebetsana feela le taba ea hore ho ne ho ka ’na ha tsoha morusu empa e ile ea boetse ea sebetsana le hore na batho ba 5 000 ba tla fella joang sebakeng seo ka tloaelo ho lulang batho ba 2 500. Ebe bothata boo bo ne bo ka rarolloa joang ka nako e khutšoanyane hakaalo? E ile eaka ke mohlolo ha beng ba mapolasi a bapileng le eo ba tla ho barab’abo rōna ’me ba ba bolella hore ba ka ba hirisetsa masimo a bona.

Ho fetola lirapa tseo sebaka se loketseng kopano e ile ea e-ba mosebetsi o boima. Boemo ba leholimo bo ile ba thatafatsa litaba haholo—pula e ile ea na beke kaofela pele ho kopano. Ho ne ho lenngoe litapole masimong ao a baahelani, ’me li ne li lokela ho chekoa. Taba ea pele, baithaopi ba ile ba phutheha har’a pula eo ea litloebelele ho tla cheka litapole. Ka mor’a moo ho ile ha tlosoa literata tsa bona eaba ho hlongoa lipalo tse tla tšoara marulelo a sireletsang bamameli letsatsing le puleng. Ho ne ho hlokahala hore ho etsoe libenche tse eketsehileng, ’me ho ne ho hlokahala hore ho hlongoe libuela-hōle tse ling. Baithaopi ba ile ba sebetsa bosiu le motšehare, ba bang ba bile ba tela boroko, ho etsa mesebetsi eohle e hlokahalang ea mapolanka.

Motho e mong le e mong o ne a ipotsa: “Ho tla etsahala joang haeba pula e ka na nakong ea kopano? Na bamameli ba tla tetebela seretseng ebe baa nyamela?” Ho ile ha rekoa joang bo thibang mongobo fatše. Qetellong, letsatsi le ile la chaba! Matsatsing a mararo a kopano, mabala a kopano a ne a apesitsoe ke botle le mofuthu oa khanya ea letsatsi.

Ha batho ba tlileng kopanong ba fihla, ba ile ba bona botle bo makatsang. Naha e khutsitseng e ile ea bonahala eka ke tlhase feela ea lefatše le lecha. Bamameli ba lutseng hamonate ba ne ba pota-potiloe ke lifate tsa lifeiga le tsa litholoana tse ling hammoho le masimo a poone le a tamati. Sethaleng ka morao ho ne ho khabisitsoe ka makala a sefate sa morara. Nakong ea lenaneo, hangata bamameli ba ne ba utloa mekoko e llang kapa lithole tse kakatletsang ha ho ntse ho bokelloa mahe a tsona. Ho ne ho e-na le marata a tloaelehileng libakeng tsa mahaeng, empa ho bamameli marata ana e ne e le mololi o tsoang ka litsebe. Ho e-na le ho eba litsebe, bamameli ba ne ba sa a natse le ho a natsa, hobane ba ne ba mametse ka hloko lenaneo le monate la Bibele. Leha ho le joalo, lintho tsena e ne e se tsona feela tse tla hopoloa ka kopano ena.

“Mohlolo” oa Bobeli

Qetellong ea lenaneo la Labohlano hoseng, bamameli ba ile ba hlolloa ha Geoffrey Jackson  oa Sehlopha se Busang sa Lipaki Tsa Jehova, a lokolla Bibele e feletseng ea Phetolelo ea Lefatše le Lecha ea Mangolo a Halalelang ka Segeorgia. * Ba bangata ba neng ba hloletsoe ba ile ba sekisa meokho. Lelapa le leng le ile la re ka thabo: “Ha re ome mathe ha re leboha mohlolo ona—ke mohlolo oa Jehova. Mosebetsi o moholo hakaale ka nako e khutšoanyane hakana!”

Morali e mong oabo rōna oa toropong ea Tsalendjikha ea neng a mametse lenaneo ka thelefono o ile a re: “Ke haelloa ke mantsoe a ho hlalosa kamoo ke ileng ka thaba kateng ha re amohela Bibele e feletseng. Ke batla ho le leboha ka kopano ena e babatsehang ea matsatsi a mararo. Ka sebele e ne e le ketsahalo ea bohlokoa.” Setho sa lelapa le leng la phutheho e ’ngoe e iphaphathileng le Leoatle le Letšo, Georgia bophirimela, se ile sa re: “Ho tla fihlela joale re ne re e-na le Bibele e le ’ngoe feela ka lapeng, empa hona joale boneng ba rōna e mong le e mong o na le Phetolelo ea Lefatše le Lecha. Hona joale e mong le e mong ho rōna a ka ithuta Bibele a le mong.”

Leha ho le joalo, bamameli ba ne ba sa tsebe hore ho ile ha e-ba le mathata. Ka mohlala, le hoja Phetolelo ea Lefatše le Lecha e feletseng e ile ea hatisoa le ho romeloa Georgia ka nako bakeng sa kopano eo, ba tšoereng Lekala la Thepa e Kenang le e Tsoang ba ile ba hanela Bibele ena hore e kene ka har’a naha. Barab’abo rōna ba ile ba ipiletsa Ofising ea Monamoli. Monamoli enoa o ile a khona ho fumana tumello ea hore Libibele tsena li lokolloe ka nako bakeng sa kopano ea setereke. O bile a romela mothusi oa hae kopanong ea Marneuli hore a fumanele ofisi ea bona Libibele.

Tumeliso e Mofuthu ea Segeorgia

Kopano ea setereke ea Marneuli e ne e le ketsahalo ea bohlokoa ho Lipaki Tsa Jehova tsa Georgia ka lebaka le leng hape. Setho sa Sehlopha se Busang sa Lipaki Tsa Jehova se ne se e-na le lipuo lenaneong. Bohle ba teng ba ne ba hloletsoe hoo ba neng ba batla ho se lumelisa ka tsela ea habo bona e mofuthu eo ba e tloaetseng. Mor’abo rōna Jackson o ile a tlameha ho ema le ho lumelisa bara le baralib’abo ka lihora pele ho kopano, nakong ea kopano le ka mor’a kopano, empa o ne a thabetse ho etsa seo ba se batlang.

Qetellong ea kopano e ’ngoe e neng e tšoaretsoe Georgia (United States) ka 1903, mora e mong oabo rōna o ile a re: “Le hoja ke le mofutsana, nke ke ka nka sekete sa lidolara ha motho a mpha sona hore ke mo fe melemo eo ke e fumaneng kopanong ena.” Lilemo tse fetang tse lekholo hamorao, Lipaki tse neng li le teng kopanong ena ea bohlokoa e neng e tšoeroe lehlabuleng la 2006 naheng ea Georgia, li ile tsa ikutloa ka tsela e tšoanang.

[Mongolo o botlaaseng ba leqephe]

[Lebokose le leqepheng la 19]

“E Monyenyane” o Eketsehile

Mantsoe a Esaia 60:22 a phethahetse Georgia: “E monyenyane o tla fetoha ba sekete, ’me ea fokolang e be sechaba se matla. ’Na, Jehova, ke tla ho potlakisa ka nako ea teng.” Ka lilemo tse ka tlaase ho tse 20, palo ea bahoeletsi ba ’Muso ba Georgia e eketsehile ho tloha ho ba ka tlaase ho ba 100 ho ea ho ba ka bang 16 000. Baboleli bana ba chesehang ba Lentsoe la Molimo ba khanna lithuto tsa mahae tsa Bibele tse ka bang 8 000 beke le beke—sena ke sesupo sa hore keketseho e tla ba khōlō Georgia.

[Setšoantšo se Qanollang/Limapa tse leqepheng la 16]

(Ha u batla ho bona boitsebiso bo hlophisitsoeng hantle, sheba sengoliloeng)

RUSSIAN FEDERATION

GEORGIA

⇨ Zugdidi

⇨ Kutaisi

Marneuli ⇨ Gori

⇨ Kaspi

⇨ Tsnori

TBILISI

TURKEY

ARMENIA

AZERBAIJAN

[Tlhaloso ea Moo Setšoantšo se Nkiloeng Teng]

Globe: Based on NASA/Visible Earth imagery

[Setšoantšo se leqepheng la 16]

Seemahale sa Tbilisi

[Setšoantšo se leqepheng la 17]

Kopano ea Marneuli e ne e hokahantsoe le libaka tse ling tse hlano ka cell phone

[Setšoantšo se leqepheng la 18]

Ba neng ba le teng kopanong ba ile ba thaba le ho makala ha ho lokolloa “Phetolelo ea Lefatše le Lecha” ka Segeorgia