Na Mahlo a Molimo a U Talimile?

NA JEHOVA, ’Mōpi e Moholo o khona ho bona? E, ho joalo! Ka ho hlaka Bibele e re: “Ea etsang leihlo, na a ke ke a talima?” (Pesaleme ea 94:9) Jehova o bona ka tsela e chatsi ho feta batho. Ha a bone seo re leng sona ka ntle feela empa o bile ‘o hlahloba lipelo,’ ebile “o lekanya lipelo.” (Liproverbia 17:3; 21:2) E, o na le matla a ho hlahloba menahano ea rōna, se re susumetsang le litakatso tsa rōna tse ka hare-hare.

Jehova oa tseba ka mathata ao re ka ’nang ra thulana le ’ona bophelong ’me o arabela likōpo tsa rōna tse tiileng. Mopesaleme o ngotse tjena: “Mahlo a Jehova a talimile ba lokileng, o sekehela mohoo oa bona o kōpang thuso tsebe. Jehova o haufi le ba lipelo li robehileng; o pholosa ba sithabetseng moeeng.” (Pesaleme ea 34:15, 18) Ke ntho e khothatsang hakaakang ho tseba hore Jehova o utloisisa maemo a rōna le hore o mamela lithapelo tsa rōna tse tlohang botebong ba pelo!

Jehova Molimo o tseba le ka mesebetsi e etsetsoang mafifing. E, “lintho tsohle li hlobotse ’me li pepesitsoe phatlalatsa mahlong a eo re nang le boikarabello ho eena.” (Baheberu 4:13) Kahoo, ho sa tsotellehe hore na liketso tsa rōna li ntle kapa li mpe, Molimo o li bona kaofela. (Liproverbia 15:3) Ho tea mohlala, Genese 6:8, 9 e bolela hore ‘Noe o ile a fumana kamohelo mahlong a Jehova’ le hore “Noe o ne a tsamaea le Molimo oa ’nete.” Ka sebele Jehova o ile a amohela Noe a ba a mo hlohonolofatsa hobane Noe o ne a mo mamela a bile a latela melao-motheo e lokileng ea Molimo. (Genese 6:22) Batho ba mehleng ea Noe bona ba ne ba fapane le eena, ba ne ba le mabifi ba bile ba itšoere hampe. Hase hore Molimo o ne a sa bone boemo bona. O ile “a bona hore bobe ba motho bo bongata lefatšeng ’me tšekamelo eohle ea menahano ea pelo ea hae e mpe feela ka linako tsohle.” Qetellong, Jehova o ile a timetsa batho ba khopo empa o ile a boloka Noe le lelapa la hae ba phela.—Genese 6:5; 7:23.

Na Jehova o tla u amohela? Ruri mahlo a Jehova “a qamaka ho pholletsa le lefatše lohle hore a bontše matla a hae molemong oa bao lipelo tsa bona li feletseng ho eena.” (2 Likronike 16:9) Haufinyane o tla boela a tlose batho bohle ba khopo holim’a lefatše ’me a pholose bao lipelo tsa bona li ikokobelitseng.—Pesaleme ea 37:10, 11.