Lipotso Tse Tsoang ho Babali

Na Ezekiele 18:20, e bolelang hore “mora a ke ke a jara letho ka lebaka la phoso ea ntat’ae,” e hanyetsa Exoda 20:5, e bolelang hore Jehova o tlisa “kotlo bakeng sa liphoso tsa bo-ntate ho bara”?

Ha li hanyetsane. Polelo e ’ngoe e tobisitsoe tabeng ea hore motho ka mong oa ikarabella, ’me e ’ngoe e lumela ’nete ea hore phoso ea motho e ka ’na ea e-ba le liphello tse amang litloholo tsa hae.

Taba eo ho buuoang ka eona ho Ezekiele khaolo ea 18 e bontša hore ho hatisoa taba ea hore motho ka mong oa ikarabella. Temana ea 4 e re: “Moea o etsang sebe—ke oona o tla shoa.” Ho tla etsahala’ng ka motho ‘ea lokileng le ea phethisisang toka le ho loka’? “O tla tsoela pele a phela.” (Ezek. 18:5, 9) Kahoo, ha motho e mong le e mong a fihla lilemong tsa ho ikarabella, o ahloloa “ho ea ka litsela tsa hae.”—Ezek. 18:30.

Molao-motheo ona o bonahala tabeng ea Molevi ea bitsoang Kora. Nakong ea leeto la Baiseraele lefeelleng, Kora ha aa ka a hlola a khotsofalla boikarabelo boo a neng a e-na le bona. Kaha Kora o ne a leka ho inkela mesebetsi ea boprista, eena le ba bang ba ile ba fetohela baemeli ba Jehova, e leng Moshe le Arone. Jehova o ile a bolaea Kora le lequloana la hae la marabele ka lebaka la hore ka boikhohomoso ba ile ba batla  mosebetsi ona—e leng tlotla e neng e sa ba lokela. (Num. 16:8-11, 31-33) Leha ho le joalo, bara ba Kora ha baa ka ba kenya letsoho bofetoheling boo. Molimo ha aa ka a ba jarisa molato oa sebe sa ntat’a bona. Kaha ba ile ba tšepahala ho Jehova, ha baa ka ba bolaoa.—Num. 26:10, 11.

Empa re ka re’ng ka temoso e ho Exoda 20:5, eo e leng karolo ea Melao e Leshome? Le hona mona, nahana ka taba eo ho buuoang ka eona. Jehova o ile a theha selekane sa Molao le sechaba sa Iseraele. Ka mor’a hore Baiseraele ba utloe litaelo tse tsamaeang le selekane seo, ba ile ba bua pontšeng ba re: “Sohle seo Jehova a se buileng re ikemiselitse ho se etsa.” (Ex. 19:5-8) Ka hona, sechaba sohle se ile sa ba le kamano e khethehileng le Jehova. Kahoo, mantsoe a ho Exoda 20:5 a ne a tobisitsoe haholo-holo sechabeng sohle.

Ha sechaba sa Iseraele se ne se lula se tšepahala ho Jehova, se ne se rua molemo se bile se fumana mahlohonolo a mangata. (Lev. 26:3-8) Ka lehlakoreng le leng, ha sechaba sa Iseraele se ne se furalla Jehova ’me se latela melimo ea bohata, o ne a sa se hlohonolofatse a bile a sa se sireletse; se ne se hlaheloa ke tlokotsi. (Baahl. 2:11-18) Ke ’nete hore ho na le ba bang ba ileng ba lula ba tšepahala ba ba ba boloka litaelo tsa Molimo le hoja sechaba se ne se rapela melimo ea litšoantšo. (1 Mar. 19:14, 18) Ho ka etsahala hore ebe ba neng ba tšepahala ba ile ba thulana le mathata ka lebaka la libe tsa sechaba, empa Jehova o ile a ba bontša mosa o lerato.

Ha Baiseraele ba ne ba tlōla melao-motheo ea Jehova pepenene hoo lebitso la hae le neng le nyelisoa har’a lichaba, Jehova o ile a etsa qeto ea ho otla sechaba sa hae ka ho se lumella hore se isoe botlamuoeng Babylona. Ho hlakile hore kotlo eo e ile ea akarelletsa batho ka bomong le sechaba sa hae ka kakaretso. (Jer. 52:3-11, 27) Ka sebele, Bibele e bontša hore molato oa sechaba sa Iseraele o ne o le moholo hoo meloko e meraro, e mene kapa e fetang moo, e ileng ea angoa ke liphoso tsa baholo-holo ba eona, feela joalokaha Exoda 20:5 e bolela.

Lentsoe la Molimo le boetse le na le litlaleho tsa malapa a ileng a angoa ke boitšoaro bo bobe ba batsoali. Moprista ea Phahameng Eli o ile a khopisa Jehova ka hore a lumelle bara ba hae “ba se nang molemo” le ba boitšoaro bo bobe hore ba lule e le baprista. (1 Sam. 2:12-16, 22-25) Kaha Eli o ile a hlompha bara ba hae ho feta Jehova, Molimo o ile a laela hore lelapa la Eli le tlosoe bopristeng bo phahameng, e leng se ileng sa etsahala ho tloha ka setloho-tloholoana sa hae, Abiathare. (1 Sam. 2:29-36; 1 Ki. 2:27) Molao-motheo o ho Exoda 20:5 o boetse o hlakisoa ke mohlala oa Gehazi. O ile a sebelisa boemo ba hae hampe ba hore ebe e ne e le mohlanka oa Elisha, ka hore a ithuise ka ho folisoa ha Naamane, Molaoli oa Mabotho oa Syria. Jehova o ile a sebelisa Elisha hore a phatlalatse kahlolo ena: “Lepera la Naamane le tla khomarela ho uena le bana ba hao ho isa nakong e sa lekanyetsoang.” (2 Mar. 5:20-27) Kahoo, litloholo tsa Gehazi li ile tsa angoa ke litholoana tsa phoso ea hae.

Kaha Jehova ke ’Mōpi ebile ke Ea Fanang ka Bophelo, o na le tokelo e feletseng ea ho etsa qeto ea hore na kotlo e lokileng le e loketseng ke efe. Mehlala e boletsoeng ka holimo e bontša hore bana kapa litloholo li ka ’na tsa angoa ke litholoana tse bosula tsa sebe sa baholo-holo ba tsona. Leha ho le joalo, Jehova “o utloa mohoo oa ba hlorileng,” ’me batho ba kōpang thuso ho eena ka tieo ba ka fumana mohau oa hae ba ba ba imoloha.—Jobo 34:28.

[Setšoantšo se leqepheng la 29]

Kora le lequloana la hae la marabele ba ile ba jarisoa molato oa liketso tsa bona