‘Lintho Tseo a Ileng a li Etsa li Tsamaile Hammoho le Eena’

THEODORE JARACZ, eo e neng e le setho sa Sehlopha se Busang sa Lipaki Tsa Jehova, o ile a qeta tšebeletso ea hae lefatšeng ka Laboraro hoseng ka la 9 June, 2010. O ne a le lilemo li 84, ’me o siea mosali oa hae Melita, eo ba neng ba se ba e-na le lilemo tse 53 ba nyalane. O boetse o siea ausi oa hae hammoho le bachana ba bararo.

Mor’abo rōna Jaracz ea hlahetseng motseng oa Pike County, Kentucky, U.S.A., ka la 28 September, 1925, o ile a tšoantšetsa boinehelo ba hae ho Jehova a le lilemo li 15, ka la 10 August, 1941. Lilemo tse peli ka mor’a moo, ha a le lilemo li 17, e ile ea e-ba pula-maliboho oa kamehla, ’me a qala tšebeletso e telele ea nako e tletseng, e nkileng lilemo tse ka bang 67.

Ka 1946, ha Mor’abo rōna Jaracz a ne a le lilemo li 20, o ile a ea sehlopheng sa bosupa sa Sekolo sa Bibele sa Gileade sa Watchtower. Ha a qeta sekolong, Mor’abo rōna Jaracz o ile a sebeletsa e le molebeli ea tsamaeang sebakeng sa Cleveland, Ohio, United States. Ka 1951, o ile a romeloa lekaleng la Australia, moo a ileng a sebeletsa e le mohlanka oa lekala. Bukeng ea Selemo ea Lipaki Tsa Jehova ea 1983 (ea Senyesemane) ho ile ha tlalehoa hore Mor’abo rōna Jaracz “o ile a khothatsa barab’abo rōna haholo naheng eo kaha o ne a chesehela hore lintho li hlophisoe ka tsela ea puso ea Molimo a bile a etella pele hantle tšimong.”

Ka mor’a hore Mor’abo rōna Jaracz a khutlele United States, o ile a nyala Melita Lasko ka la 10 December, 1956. Ka mor’a hore ba nyalane, ba ile ba e-ba mosebetsing oa ho potoloha, moo ba ileng ba sebeletsa ka botšepehi lipotolohong le literekeng ’me ba tsamaea libakeng tse ngata tsa United States. Ho elella mafelong a 1974, Mor’abo rōna Jaracz o ile a mengoa hore e il’o ba setho sa Sehlopha se Busang sa Lipaki Tsa Jehova.

Re tla lula re hopola Mor’abo rōna Jaracz e le mohlanka oa Jehova ea inehetseng le ea tšepahalang, ea neng a etsa mesebetsi ea puso ea Molimo ka pelo ea hae eohle. O ne a rata mofumahali oa hae a bile a mo hlokomela ebile e le monna ea ratang lintho tsa moea, ea neng a ameha ka batho ba bang ho ipheta. (1 Bakor. 13:4, 5) Sena o ne a se bonahatsa ka ho ameha haholo ka hore batho bohle ba tšoaroe ka toka ba be ba bontšoe mohau. Ho phaella moo, lerato la hae le leholo le ho ameha ha hae ka batho ba bang li ne li bonahala ka mafolofolo a hae tšebeletsong ea tšimo.

Le hoja re saretsoe haholo ke ho lahleheloa ke setho sa lelapa la Bethele le sa mokhatlo oa bara ba motho oa lefatše lohle se neng se sebetsa ka thata, re thabela Mor’abo rōna Jaracz ka tšebeletso eo a e etselitseng Jehova ka botšepehi ka lilemo tse mashome. Re kholisehile hore o ‘tšepahetse esita le ho isa lefung, ’me o se a fumane moqhaka oa bophelo.’ (Tšen. 2:10) Re boetse re kholisehile hore ‘lintho tseo a ileng a li etsa li tsamaile hammoho le eena.’—Tšen. 14:13.