Le na le Mabaka a ho Thaba

HO TLOHA ka sele e nyenyane haholo ho ea lihlopheng tse khōlō le tse khōlōhali tsa linaleli, ho bonahala tlhophiso pōpong. Sena hase makatse, kaha ’Mōpi “hase Molimo oa ho hloka taolo.” (1 Bakor. 14:33) Tokisetso ea Molimo ea borapeli le eona ea hlolla. Nahana ka seo Jehova a se entseng. O hlophisitse libōpuoa tse bohlale tse limilione tse makholo tse nang le boikhethelo le tse momahaneng borapeling bo hloekileng—e leng batho ba lefatšeng hammoho le mangeloi—hore e be mokhatlo o le mong oa bokahohle. Seo se hlolla hakaakang!

Iseraeleng ea boholo-holo, karolo e lefatšeng ea mokhatlo oa Molimo e ne e emeloa ke Jerusalema, moo tempele ea Jehova e neng e le hona teng le moo morena eo a mo tlotsitseng a neng a lula teng. Moiseraele e mong ea neng a le kholehong Babylona o ile a hlalosa tsela eo a ikutloang ka eona mabapi le motse o halalelang ka tsela ena: “Leleme la ka le ke le khomarele mahalapeng a ka, haeba nke ke ka u hopola, haeba nke ke ka etsa hore Jerusalema e phahamele ka holim’a lebaka la ka la sehlooho la ho thaba.”—Pes. 137:6.

Na ke tsela eo u ikutloang ka eona ka mokhatlo oa Molimo kajeno? Na o u thabisa ho feta ntho leha e le efe e ’ngoe? Na bana ba hao ba utloisisa histori ea karolo e lefatšeng ea mokhatlo oa Molimo le mosebetsi oo o o etsang? Na baa utloisisa hore ke karolo ea mokhatlo oa lefatše ka bophara oa bara ba motho oa Lipaki Tsa Jehova? (1 Pet. 2:17) E ka ba hantle ha le ka sebelisa litlhahiso tse latelang Borapeling ba Lelapa ba mantsiboea e le hore lelapa la hao le ka ananela mokhatlo oa Jehova haholoanyane.

Pheta se Etsahetseng “Matsatsing a Khale”

Selemo se seng le se seng, malapa a Baiseraele a ne a kopana e le hore a keteke Paseka. Ha mokete oo o ne o thakholoa, Moshe o ile a laela sechaba a re: “Etlare haeba mora oa hao a u botsa hamorao, a re, ‘See se bolela’ng?’ joale u tla re ho eena, ‘Jehova o re ntšitse Egepeta, ntlong ea makhoba, ka letsoho le matla.’” (Ex. 13:14) Tsela eo Jehova a neng a sebelisana le Baiseraele ka eona e ne e sa lokela ho lebaloa. Ha ho pelaelo hore bo-ntate ba bangata ba Baiseraele ba ile ba latela taelo ea Moshe. Meloko e itseng hamorao, Moiseraele e mong o ile a rapela, a re: “Molimo, re utloile ka litsebe tsa rōna, baholo-holo ba rōna ba re phetetse mosebetsi oo u ileng ua o etsa matsatsing a bona, matsatsing a khale.”—Pes. 44:1.

Histori ea Lipaki Tsa Jehova ea se etsahetseng ka lilemo tse ka bang 100 tse fetileng e ka ’na ea bonahala e le ea “matsatsing a khale.” U ka etsa joang hore liketsahalo tsee e be tsa sebele ho bana ba hao? E le ho finyella seo, batsoali ba bang ba sebelisa buka ea Lipaki tsa Jehova—Baboleli ba ’Muso oa Molimo, Buka ea Selemo, lipale tsa bophelo tse hatisitsoeng limakasineng tsa rōna, hammoho le litlaleho tse ling tsa histori ea puso ea Molimo, ho akarelletsa le DVD ea rōna e ncha e buang ka batho ba Molimo ba mehleng ea kajeno. Livideo tse buang ka ho hlorisoa ha barab’abo rōna linaheng tseo e neng e le tsa Soviet Union le Jeremane ea Manazi li ruta malapa hore a tšepe Jehova nakong ea liteko. Akarelletsa boitsebiso bo joalo nakong ea Borapeli ba lōna ba Lelapa ba mantsiboea. Seo se tla tiisa tumelo ea bana ba hao ha ba tobana le liphephetso tse behang botšepehi ba bona tekong.

Leha ho le joalo, ho bua molebe ka histori ho ka ’na ha tena bacha kapele. Kahoo lumella bana ba hao hore ba kenye letsoho. Ka mohlala, u ka ’na ua re mora oa hao a khethe naha eo a e thahasellang, a batlisise histori ea eona ea puso ea Molimo le hore a bolelle lelapa tse ling tsa lintlha tseo a li fumaneng. E ka ’na eaba phuthehong ea  habo lōna ho na le Bakreste ba tšepahetseng ka nako e telele, bao le ka ’nang la ba mema hore ba kopanele le lōna borapeling ba lelapa ba mantsiboea. Mohlomong morali oa hao a ka ba botsa lipotso, a kōpe hore ba phete liphihlelo tseo ba bileng le tsona. Kapa u ka re ngoana oa hao a toroee litšoantšo tsa liketsahalo tsa bohlokoa tsa puso ea Molimo, tse kang ho hahoa ha lekala, kopano ea machaba, kapa ho sebelisa keramafono tšebeletsong ea ntlo le ntlo.

Ithute Kamoo ‘Karolo ka ’Ngoe e Etsang Mosebetsi oa Eona’ Kateng

Moapostola Pauluse o ile a bapisa phutheho ea Bokreste le “’mele oohle, o kopantsoeng hammoho ke lenonyello le leng le le leng le o tšehetsang, [o] hōlang le ho ikaha ka lerato, ha karolo ka ’ngoe e ntse e etsa mosebetsi oa eona.” (Baef. 4:16, New International Version) Ha re ithuta kamoo ’mele oa motho o sebetsang kateng, seo se etsa hore re ananele ’Mōpi oa rōna re be re mo hlomphe. Ka tsela e tšoanang, ha re hlahloba kamoo phutheho ea lefatše lohle e sebetsang kateng, re hlolloa ke “bohlale ba Molimo bo fapa-fapaneng haholo.”—Baef. 3:10.

Jehova o hlalosa kamoo mokhatlo oa hae o sebetsang kateng, ho akarelletsa le karolo ea oona e leholimong. Ka mohlala, o re bolella hore o ile a fa Jesu Kreste tšenolo pele, eaba eena o “roma lengeloi la hae ’me [o] e hlahisa ka lipontšo ka lona ho lekhoba la hae Johanne, ea ileng a paka.” (Tšen. 1:1, 2) Haeba Molimo o senola kamoo karolo e sa bonahaleng ea mokhatlo oa hae e sebetsang kateng, na o ne a ke ke a batla hore re utloisise kamoo ‘karolo ka ’ngoe e etsang mosebetsi oa eona’ kateng lefatšeng?

Ka mohlala, haeba phutheho ea habo lōna e tla tloha e eteloa ke molebeli oa potoloho, ho ka ba joang ha lelapa la lōna le ka tšohla mesebetsi ea balebeli ba tsamaeang le litlhohonolofatso tseo ba bang le tsona? Ba thusa e mong le e mong oa rōna joang? Lipotso tse ling tse ka ’nang tsa akarelletsoa ke tsena: Ke hobane’ng ha e le habohlokoa hore re tlalehe tšebeletso ea tšimo? Mokhatlo oa Molimo o tšehetsoa joang ka lichelete? Sehlopha se Busang se hlophisitsoe joang, hona se fana ka lijo tsa moea joang?

Ha re utloisisa kamoo batho ba Jehova ba hlophisitsoeng kateng, re rua molemo ka litsela tse ka bang tharo: Re ananela haholoanyane batho ba sebetsang ka thata molemong oa rōna. (1 Bathes. 5:12, 13) Re susumelletseha ho tšehetsa litokisetso tsa puso ea Molimo. (Lik. 16:4, 5) Qetellong, re tšepa haholoanyane batho ba eteletseng pele ha re bona hore liqeto le litokisetso tseo ba li etsang li thehiloe Mangolong.—Baheb. 13:7.

“Hlahlobang Litora Tsa Eona Tsa Bolulo”

“Potang Sione, ’me le tsamaee ho pholletsa le eona, le bale litora tsa eona. Behang lipelo tsa lōna ho ’mōtōmōtō oa eona. Hlahlobang litora tsa eona tsa bolulo, e le hore le ka ho pheta molokong oa ka moso.” (Pes. 48:12, 13) Mona mopesaleme o ne a khothalletsa Baiseraele hore ba hlahlobisise Jerusalema. Nahana feela hore na malapa a Baiseraele a neng a ile a ea motseng o halalelang meketeng ea selemo le selemo ’me a ile a bona tempele e majabajaba a ne a hopola lintho tsa bohlokoa hakaakang! E tlameha ebe ba ile ba susumelletseha hore ba li ‘phetele moloko oa ka moso.’

Nahana ka mofumahali oa Sheba, eo qalong a neng a belaella litlaleho tse mabapi le tsela e babatsehang eo Solomone a neng a busa ka eona hammoho le bohlale ba hae bo boholo. Ke eng e ileng ea mo kholisa hore lintho tseo a neng a li utloile e ne e le ’nete? O ile a re: “Ha kea ka ka beha tumelo mantsoeng a bona ho fihlela ke tlile e le hore mahlo a ka a ka bona.” (2 Likron. 9:6) Ha e le hantle, seo re se bonang ka ‘mahlo a rōna’ se ka re ama haholo.

U ka thusa bana ba hao joang hore ba bone lintho tse hlollang tsa mokhatlo oa Jehova ka ‘mahlo a bona’? Haeba ho e-na le ofisi ea lekala ea Lipaki Tsa Jehova haufi le moo le lulang, etsang boiteko ba ho e etela. Ka mohlala, naheng ea habo Mandy le Bethany, Bethele e bohōle ba lik’hilomithara tse ka bang 1 500 le sebaka seo ba hōletseng ho sona. Leha ho le joalo, hangata batsoali ba bona ba ne ba hlophisa maeto a ho ea teng ho ea bona sebaka, haholo-holo ha barali ba bona ba ne ba ntse ba hōla. Ba re: “Pele re etela Bethele, re ne re nahana hore batho ba teng ba ne ba se na nako ea ho soasoa le hore e ne e le  sebaka sa batho ba baholo feela. Empa re ile ra kopana le bacha ba neng ba sebeletsa Jehova ka thata ba bile ba thabela seo! Re ile ra hlokomela hore mokhatlo oa Jehova o ne o se sebakeng seo re neng re lula ho sona feela, ’me kamehla ha re ne re etela Bethele seo se ne se re matlafatsa moeeng.” Ho bonela mokhatlo oa Molimo haufinyane ho ile ha susumelletsa Mandy le Bethany hore ba qale ho bula maliboho ’me ba ile ba ba ba memeloa hore ba sebeletse Bethele ka nakoana.

Re na le tsela e ’ngoe ea ho “bona” mokhatlo oa Jehova, e leng tsela e neng e le sieo Iseraeleng ea boholo-holo. Lilemong tsa morao tjena, batho ba Molimo ba ’nile ba fumana livideo le li- DVD tse buang ka lintho tse fapa-fapaneng mabapi le mokhatlo oa Molimo tse kang: Jehovah’s Witnesses—Organized to Share the Good News, Our Whole Association of Brothers, To the Ends of the Earth le ea United by Divine Teaching. Ha uena le ba lelapa la hao le bona mosebetsi o matla o etsoang ke basebeletsi ba Bethele, basebetsi ba liphallelo, baromuoa le barab’abo rōna ba hlophisang likopano, ruri lipelo tsa lōna li tla tlala kananelo bakeng sa mokhatlo oa barab’abo rōna oa lefatšeng ka bophara.

Phutheho e ’ngoe le e ’ngoe ea batho ba Molimo e phetha karolo ea bohlokoa tabeng ea ho ruta litaba tse molemo le ho tšehetsa Bakreste ba sebakeng seo e leng ho sona. Leha ho le joalo, behella nako ka thōko ea hore uena le lelapa la hao le hopole “mokhatlo oohle oa barab’abo lōna lefatšeng.” Sena se tla u thusa se be se thuse le bana ba hao hore le lule le “tiile tumelong,” le hlokomela hore le na le mabaka a ho thaba.—1 Pet. 5:9.

 [Lebokose/Setšoantšo se leqepheng la 18]

Mokhatlo oa Molimo—Sehlooho sa Bohlokoa Seo ho ka Ithutoang ka Sona

Re na le lintho tse ngata tse ka thusang batho bohle hore ba ithute histori ea mokhatlo oa Jehova le tsela eo o sebetsang ka eona. Lipotso tse latelang li ka ’na tsa u thusa hore u qale:

☞ Mosebetsi oa balebeli ba tsamaeang ba kajeno o qalile joang?—Lipaki Tsa Jehova—Baboleli ba ’Muso oa Molimo, leqepheng la 222-227.

☞ Ke eng e neng e ikhetha ka “Letsatsi la Bana” Kopanong ea Puso ea Molimo ea 1941?—Lipaki Tsa Jehova—Baboleli ba ’Muso oa Molimo, leqepheng la 86, 88.

☞ Sehlopha se Busang se etsa liqeto joang?—“Ho Paka ka ho Phethahetseng” ka ’Muso oa Molimo, leqepheng la 108-114.