Seboka sa Bohlokoa ka ho Fetisisa Historing

“HA SEBOKA sena se fela, le tla re, ‘Ruri seboka sena sa selemo le selemo e ne e le sa bohlokoa ka ho fetisisa historing ea puso ea Molimo!’” Stephen Lett oa Sehlopha se Busang sa Lipaki Tsa Jehova o ile a bua mantsoe ao, ha a ne a etsa hore bamameli ba lebelle se neng se tl’o etsahala ka tjantjello e khōlō. Ba ne ba tlile sebokeng sa selemo le selemo sa bo126 sa Watch Tower Bible and Tract Society of Pennsylvania, se neng se tšoeroe ka la 2 October, 2010, Holong ea Kopano ea Lipaki Tsa Jehova e Jersey City, New Jersey, U.S.A. Ke lintlha life tse bileng ka sehloohong ketsahalong ee ea bohlokoa historing?

Puong ea hae e bulang, ka cheseho Mor’abo rōna Lett o ile a tšohla boitsebiso bo mabapi le koloi ea Jehova ea leholimo, e hlalosoang bukeng ea Bibele ea Ezekiele. Koloi ena e khōlō, e khanyang, e tšoantšetsa mokhatlo oa Molimo, o laoloang ke Jehova ka botlalo. Mor’abo rōna Lett o ile a re karolo ea oona e leholimong, e entsoeng ka libōpuoa tsa moea, e matha ka lebelo la lehalima—e leng lebelo leo Jehova a nahanang ka lona. Karolo e lefatšeng ea mokhatlo oa Jehova Molimo le eona ha ea ema nģ’a e le ’ngoe. Mor’abo rōna Lett o ile a bua ka lintho tse ’maloa tse thabisang tse etsahetseng lilemong tsa morao tjena karolong e bonahalang ea mokhatlo oa Molimo.

Ka mohlala, makala a mangata a ntse a kopanngoa, e leng se tla etsa hore batho ba bangata ba neng ba sebetsa malapeng a Bethele linaheng tseo ba tsepamise likelello mosebetsing oa boboleli. Mor’abo rōna Lett o ile a khothalletsa bamameli hore ba tsoele pele ho rapella Sehlopha se Busang, e leng baemeli ba sehlopha sa lekhoba, hore se se ke sa tsoela pele se tšepahala feela, empa se boele se be bohlale kapa se be masene.—Mat. 24:45-47.

Litlaleho Tse Khothatsang le Lipuisano Tse Thabisang

Tab Honsberger, ea sebeletsang Komiting ea Lekala, Haiti, o ile a fana ka tlaleho e amang maikutlo ea se ileng sa etsahala ka mor’a hore ho be le tšisinyeho ea lefatše ka la 12 January 2010, e ileng ea bolaea batho ba ka bang 300 000. O ile a bontša hore baruti ba ne ba bolella batho hore Molimo o ne a otla batho bao ba hlasetsoeng ke koluoa hobane ba ne ba se na tumelo empa o ne a sireletsa ba lokileng. Leha ho le joalo, linokoane tse likete tse fumanoeng li le molato tsona li ile tsa lokoloha ha mabota a chankana a ne a lihuoa ke tšisinyeho eo ea lefatše. Kahoo, baahi ba bangata ba Haiti ba tšepahalang ba fumana matšeliso ka hore ba ithute ’nete mabapi le hore na ke hobane’ng ha nako eo re phelang ho eona e tletse likhathatso hakana. Mor’abo rōna Honsberger o ile a qotsa mantsoe a mor’abo rōna e mong ea tšepahalang oa Haiti ea ileng a hlokahalloa ke mosali koluoeng eo, ha a ne a re: “Ke ntse ke tšolla likhapha le kajeno. Ha ke tsebe hore na ke tla lla ho fihlela neng, empa kea thaba ha ke bona lerato leo mokhatlo oa Jehova o mpontšang lona. Ke na le tšepo ’me ke ikemiselitse ho thusa ba bang hore le bona ba be le eona.”

 Mark Sanderson, eo hona joale e seng e le setho sa lelapa la Bethele ea Brooklyn, o ile a fana ka tlaleho ea naha ea Philippines. Mor’abo rōna Sanderson eo e neng e le setho sa Komiti ea Lekala naheng eo, o ne a thabile ha a bua ka litlhōrō tse 32 tse latellanang tsa manane a baboleli ba ’Muso tseo ba ileng ba e-ba le tsona le ka tsela eo lenane la liithuti tsa Bibele le fetang hōle la bahoeletsi kateng. O ile a bua ka mora e mong oabo rōna ea bitsoang Miguel eo setloholo sa hae se ileng sa bolaoa. Miguel o ile a sebetsa ka thata ho tiisa hore ’molai eo oa ahloloa ’me o kenngoa chankaneng. Hamorao, ha Miguel a ntse a bolela litaba tse molemo chankaneng o ile a kopana le ’molai eo. Le hoja Miguel a ne a tšohile, o ile a bua le eena ka bonolo le ka mosa. Qetellong o ile a ithuta Bibele le monna eo ea ileng a amohela seo a neng a ithuta sona ’me a qetella a rata Jehova. Hona joale o se a kolobelitsoe. Miguel ke motsoalle oa hae oa hlooho ea khomo ’me o ntse a leka ho thusa mora eo oabo e mocha hore a lokolloe kapele chankaneng. *

Karolo e latelang lenaneong e ne e le puisano e buang ka lipale tsa bophelo, e neng e tsamaisoa ke Mark Noumair, eo e leng morupeli Lefapheng la Likolo Tsa Puso ea Molimo. O ile a buisana le banyalani ba tšeletseng—Alex le Sarah Reinmueller, David le Krista Schafer hammoho le Robert le Ketra Ciranko. Alex Reinmueller, eo e leng mothusi oa Komiti ea Khatiso, o ile a bolela kamoo a ileng a emela ’nete kateng ha a ne a bula maliboho Canada a le lilemo li 15 feela, ’me hangata a sebetsa a le mong. Ha a botsoa hore na ke mang ea ileng a mo thusa haholo ha a le Bethele, Mor’abo rōna Reinmueller o ile a bua ka banna ba bararo ba tšepahalang, a bontša kamoo e mong le e mong oa bona a mo thusitseng ho hōla moeeng kateng. Mosali oa hae Sarah, o ile a bua ka setsoalle sa hae le morali e mong oabo rōna ea ileng a emela tumelo ea hae ka hore a mamelle ka lilemo tse mashome lichankaneng tsa Chaena. Sarah o ile a re o ithutile ho tšepa Jehova ka hore a rapele.

David Schafer, eo e leng mothusi oa Komiti ea Thuto, o ile a thoholetsa ’mè oa hae ka ho ba le tumelo e matla ’me a bua le ka barab’abo rōna bao mosebetsi oa bona e neng e le ho rema lifate, ba ileng ba mo thusa hore a kenele tšebeletso ea bopula-maliboho bo thusang a sa le mocha. Ka lerato mosali oa hae Krista, o ile a bolela kamoo a susumelitsoeng kateng ke litho tse seng li hōlile tsa lelapa la Bethele tse ileng tsa bontša hore li ‘tšepahala ho se senyenyane,’ joalokaha Jesu a re eletsa.—Luka 16:10.

Robert Ciranko, eo e leng mothusi oa Komiti ea Bongoli, o ile a bua ka batsoali ba ’mè oa hae le ba ntate oa hae, bao e neng e le bajaki ba Mahungary ebile e le Bakreste ba tlotsitsoeng. Ha e sa le moshanyana, o ile a khahloa ke ho bona hore mokhatlo oa Jehova o moholo haholo ho feta phutheho ea habo ha a ne a ile likopanong tse khōlō lilemong tsa bo-1950. Mosali oa hae Ketra, o ile a bolela hore o ithutile ho tšepahala ha e ne e le pula-maliboho phuthehong e ’ngoe e neng e  tšoenngoa ke bokoenehi le mathata a mang. O ile a mamella ’me hamorao o ile a abeloa hore a e’o sebeletsa e le pula-maliboho ea khethehileng phuthehong e ’ngoe moo a ileng a angoa pelo ke bonngoe boo phutheho eo e neng e e-na le bona.

Ho ile ha latela Manfred Tonak ea ileng a fana ka tlaleho ea Ethiopia. Naha ena e qalile khale mehleng ea ha ho ne ho ngoloa Bibele, ’me hona joale e hlohonolofalitsoe ka baboleli ba litaba tse molemo ba fetang 9 000. Bongata ba bona bo lula motse-moholo Addis Ababa kapa haufi le oona. Kahoo, libaka tse hōle li hloka baboleli ba ’Muso ba eketsehileng. E le hore ho ka rarolloa bothata bona, ho ile ha kōptjoa Lipaki tse ling tsa Ethiopia tse lulang linaheng tse ling hore li tl’o bolela litaba tse molemo libakeng tse hōle tsa naha eo. Tse ngata li ile tsa tla, tsa khothatsa Lipaki tse ling tse lulang naheng eo, ’me tsa fumana batho ba mamelang molaetsa.

Taba e ’ngoe e ileng ea e-ba ka sehloohong lenaneong lena ke neheletsano e neng e bua ka linyeoe tsa Lipaki Tsa Jehova, Russia. Aulis Bergdahl, eo e leng setho sa Komiti ea Lekala la Russia, o ile a bua ka histori ea ho hlorisoa ha Lipaki Russia, haholo-holo Moscow. Philip Brumley, oa Lefapha la Molao lekaleng la United States, o ile a bua ka tsoelo-pele e thabisang e bileng teng likhoeling tsa morao-rao ha Lekhotla la Europe la Litokelo Tsa Botho (ECHR [European Court of Human Rights]) le ne le mamela liqoso tse robong tseo Lipaki li neng li qosoa ka tsona. Lekhotla le ile la e-ba ntsoe-leng hore liqoso tseo tsohle li ne li se na bopaki bo lekaneng, ’me linyeoeng tse ’maloa le ile la ba la etsa matsapa a ho hlalosa ka botlalo hore na ke hobane’ng ha mabaka a neng a fanoa a fosahetse. Ha re ntse re emetse ho bona litholoana tsa seo, Mor’abo rōna Brumley o ile a bontša hore o na le tšepo ea hore qeto ena ea Lekhotla e ka ’na ea e-ba le tšusumetso e itseng linyeoeng tsa linaha tse ling.

Ka mor’a litaba tsena tse monate, Mor’abo rōna Lett o ile a etsa tsebiso ea hore ECHR e lumetse ho mamela nyeoe e nkileng nako e telele ea Lipaki Tsa Jehova le ’Muso oa Fora ea hore mokhatlo o lefe lekhetho. Lekhotla lena le hlomphuoang haholo le amohela linyeoe tse seng kae feela tse tlisoang ho lona. Ho fihlela joale, ECHR e se e mametse linyeoe tsa Lipaki Tsa Jehova tse 39, ’me li hlōtse tse 37 tsa tsona. Mor’abo rōna Lett o ile a khothalletsa batho bohle ba Molimo hore ba lule ba rapella taba ena ho Jehova Molimo.

Mor’abo rōna Richard Morlan, eo e leng morupeli ea tšoarang Sekolo sa Baholo ba Phutheho, o ile a fana ka tlaleho ea ho qetela. O ile a bua ka cheseho ka sekolo sena ’me a bontša hore baholo ba neng ba ile ho sona ba ile ba se ananela haholo.

Lipuo Tse Ling Tse Ileng Tsa Fanoa ke Litho Tsa Sehlopha se Busang

Guy Pierce oa Sehlopha se Busang o ile a fana ka puo e tsoang botebong ba pelo e neng e tsepame  haholo temaneng ea selemo ea 2011 e reng, “Tšabela lebitsong la Jehova.” (Sof. 3:12) O ile a bontša hore le hoja ena e le nako e thabisang ka litsela tse ngata ho batho ba Jehova, e boetse ke nako ea ho nka lintho ka botebo. Letsatsi le leholo la Jehova le haufi; leha ho le joalo, batho ba ntse ba tsoela pele ho batla setšabelo bolumeling ba bohata, mekhatlong ea lipolotiki, maruong, ba iphapanyetsa lintho tse etsahalang le lintho tse ling tse kang tseo. E le hore re fumane setšabelo sa ’nete, re lokela ho ipiletsa lebitsong la Jehova, e leng se akarelletsang hore re tsebe Motho ea emeloang ke lebitso leo, re mo hlomphe ka botebo, re mo tšepe re be re mo rate ka sohle seo re nang le sona.

Ka mor’a moo, David Splane oa Sehlopha se Busang ka cheseho o ile a fana ka puo e nang le sehlooho se susumetsang maikutlo se reng, “Na U se U Kene Phomolong ea Molimo?” O ile a bontša hore phomolo ea Molimo ha e bolele hore motho a lule feela a sa sebetse, kaha haesale Jehova le Mora oa hae ba ntse ba “tsoela pele ho sebetsa” nakong ea letsatsi leo la phomolo la tšoantšetso e le hore morero oa Molimo mabapi le lintho tse bōpiloeng o phethahale. (Joh. 5:17) Kahoo, re ka kena phomolong ea Molimo joang? Ho khaotsa ho etsa sebe le mesebetsi ea ho itokafatsa e mpa e le e ’ngoe ea litsela tseo re ka arabang potso ena ka tsona. Re lokela ho bontša tumelo ’me re phele re ntse re nahana ka morero oa Molimo, re etse sohle seo re ka se khonang ho kenya letsoho morerong oo. Ka linako tse ling, ho ka ba thata haholo ho etsa seo, empa re lokela ho amohela keletso e tsoang mokhatlong oa Jehova ’me re mamele tataiso ea oona. Mor’abo rōna Splane o ile a ipiletsa ho bamameli hore ba etse sohle seo ba ka se khonang hore ba kene phomolong ea Molimo.

Puo ea ho qetela e ileng ea fanoa ke Mor’abo rōna Anthony Morris oa Sehlopha se Busang, e ne e e-na le sehlooho se reng, “Ke’ng eo re e Letetseng?” A bua ka tsela e bontšang ho potlaka le ka boikutlo bo mofuthu bo kang ba ntate, Mor’abo rōna Morris o ile a hopotsa bamameli ka boprofeta bo ntseng bo tla phethahala le liketsahalo tseo batho bohle ba tšepahalang ba li letetseng ka tjantjello. Sena se akarelletsa mohoo o reng, “Khotso le tšireletseho!” le ho timetsoa ha bolumeli ba bohata. (1 Bathes. 5:2, 3; Tšen. 17:15-17) Mor’abo rōna Morris o ile a lemosa hore re khaotse ho re, “E tlameha ebe ke Armagedone,” ha re bona lintho tse hlahang litabeng tse sa phethahatseng boprofeta bona. O ile a khothalletsa hore re lule re thabile, re be le mamello ’me re be le moea oa ho leta oo ho buuoang ka oona ho Mikea 7:7. Leha ho le joalo, ka nako e tšoanang o ile a khothalletsa bohle hore ba atamele haufi le Sehlopha se Busang, joaloka masole a kenellang moo ntoa e leng matla teng. O ile a re, “E se eka lipelo tsa lōna li ka ba matla, lōna bohle ba letetseng Jehova.”—Pes. 31:24.

Qetellong, ho ile ha etsoa litsebiso tse thabisang tseo e leng tsa bohlokoa ka ho fetisisa historing. Geoffrey Jackson oa Sehlopha se Busang o ile a etsa tsebiso ka litlhophiso tse mabapi le khatiso ea Molula-Qhooa o ithutoang o ngotsoeng ka Senyesemane se nolofalitsoeng, o etselitsoeng batho ba sa tsebeng ho bala Senyesemane hantle, oo ho tla bonoa hore na o tla tsamaea joang. Ka mor’a moo, Mor’abo rōna Stephen Lett o ile a etsa tsebiso ea hore Sehlopha se Busang se tla lokisetsa hore balebeli ba setereke ba United States le basali ba bona ba etsetsoe maeto a bolisa. O ile a boela a tsebisa hore Sekolo sa ho Koetlisetsoa Bosebeletsi se se se tla bitsoa Sekolo sa Bibele sa Barab’abo Rōna ba Masoha. O ile a re haufinyane se tla tlatsetsoa ke sekolo se secha se bitsoang Sekolo sa Bibele sa Banyalani ba Bakreste. Sekolo sena se tla fa banyalani thupelo e eketsehileng, e le hore mokhatlo oa Jehova o ka ba sebelisoa haholoanyane. Mor’abo rōna Lett o ile a boela a tsebisa hore Sekolo sa Balebeli ba Tsamaeang le Basali ba Bona le Sekolo sa Litho Tsa Komiti ea Lekala le Basali ba Bona se se se tla tšoareloa Patterson habeli ka selemo, ’me ho tla lokisetsoa hore le ba kileng ba e-ba teng ho sona nakong e fetileng ba ee lekhetlo la bobeli.

Lenaneo leo le ile la phethoa ka tsela e amang maikutlo ha John E. Barr ea lilemo li 97, ea sebelelitseng e le setho sa Sehlopha se Busang ka nako e telele, ka boikokobetso a etsa thapelo e tlohang botebong ba pelo. * Qetellong ea seboka seo, e mong le e mong o ile a tloha moo a utloa hore ka sebele leo e bile letsatsi la bohlokoa ka ho fetisisa historing.

[Mongolo o botlaaseng ba leqephe]

[Ntlha e Qolotsoeng e leqepheng la 19]

Bohle ba neng ba le teng ba ile ba thabela lipuisano tse buang ka lipale tsa bophelo

[Ntlha e Qolotsoeng e leqepheng la 20]

Jehova o hlohonolofalitse mosebetsi oa boboleli Ethiopia