“[U na] le moralo oa tsebo le oa ’nete Molaong.”​—BAR. 2:20.

1. Ke hobane’ng ha e le habohlokoa hore re utloisise seo Pauluse a se boletseng ka Molao oa Moshe?

HA E ne e se ka mangolo a bululetsoeng a moapostola Pauluse, ho ne ho ke ke ha e-ba bonolo hore re utloisise bohlokoa ba likarolo tse ngata tsa Molao oa Moshe. Ka mohlala lengolong la hae leo a neng a le ngoletse Baheberu, o hlalosa ka ho hlaka kamoo Jesu joaloka ‘moprista ea phahameng le ea tšepahalang’ a ka fanang ka “sehlabelo sa poelano” hang le ka ho ke keng ha phetoa ’me a etsa hore ba bontšang tumelo ho sona ba fumane “topollo e sa feleng.” (Baheb. 2:17; 9:11, 12) Pauluse o ile a hlalosa hore tabernakele e ne empa feela e le ‘seriti sa lintho tsa leholimo’ le hore Jesu e ile ea e-ba Mokena-lipakeng oa “selekane se molemo” ho feta seo Moshe e neng e le mokena-lipakeng oa sona. (Baheb. 7:22; 8:1-5) Mehleng ea Pauluse, tlhaloso e joalo ea Molao e ne e le ea bohlokoa haholo ho Bakreste, ’me e ntse e le ea bohlokoa. E re thusa hore re utloisise hantle bohlokoa ba litokisetso tseo Molimo a re etselitseng tsona.

2. Bakreste ba Bajuda ba ne ba e-na le monyetla ofe oo Balichaba ba neng ba se na oona?

² Ha Pauluse a ne a ngolla Bakreste ba Roma, lintlha tse ling tseo a neng a li ngotse o ne a li lebisitse ho litho tsa phutheho tseo e neng e le Bajuda ba neng ba rutiloe Molao oa Moshe. O ile a bontša hore kaha Bakreste bao ba ne ba tseba Molao oa Molimo, ba ne ba e-na le monyetla oa ho ba le “moralo oa tsebo le oa ’nete Molaong” mabapi le Jehova le melao-motheo ea hae e lokileng. Kaha Bakreste ba Bajuda ba ne ba utloisisa ‘moralo oo oa ’nete’ ba bile ba o hlompha haholo joaloka Bajuda ba tšepahalang ba tlileng pele ho bona, seo se ile sa ba thusa hore ba tataise ba be ba rute batho ba neng ba sa tsebe Molao oo Jehova a neng a o file sechaba sa hae.—Bala Baroma 2:17-20.

 SERITI SA SEHLABELO SA JESU

3. Re rua molemo joang ha re ithuta ka mahlabelo a Bajuda ba boholo-holo?

³ Moralo oa ’nete oo Pauluse a buileng ka oona e ntse e le oa bohlokoa e le ho re thusa hore re utloisise merero ea Jehova. Melao-motheo ea Molao oa Moshe e ntse e le oa bohlokoa haholo. Re ntse re nahanne ka seo, a re ke re tšohleng karolo e le ’ngoe feela ea Molao oo—e leng kamoo mahlabelo a fapa-fapaneng le linyehelo li ileng tsa tataisetsa Bajuda ba ikokobelitseng ho Kreste kateng le ho ba thusa hore ba utloisise hore na Molimo o ne a lebeletse hore ba etse’ng. Kaha lintho tsa motheo tseo Jehova a li hlokang ho bahlanka ba hae ha ho mohla li fetohang, re tla boela re bone hore melao ea Molimo eo a neng a e file Baiseraele mabapi le mahlabelo le linyehelo e tla re thusa hore re hlahlobe tsela eo re etsang tšebeletso ea rōna e halalelang ka eona.—Mal. 3:6.

4, 5. (a) Molao oa Moshe o ile oa hopotsa bahlanka ba Molimo eng? (b) Mahlabelo e ne e le “seriti” sa eng?

⁴ Likarolo tse ngata tsa Molao oa Moshe li ile tsa hopotsa Bajuda hore e ne e le baetsalibe. Ka mohlala, motho ea neng a tšoere setopo sa motho o ne a lokela ho itlhoekisa. E le hore a etse seo, o ne a lokela ho nyehela khomo e phetseng hantle e khunoana, e hlajoe e be e chesoe. Molora oa eona o ne o bolokoa e le hore ho etsoe “metsi a tlhoekiso,” ao motho ea neng a hloekisoa a neng a fafatsoa ka ’ona ka letsatsi la boraro le la bosupa ka mor’a hore a silafale. (Num. 19:1-13) E le ho hopotsa Bajuda hore batho bohle ba ne ba tsoaloa ba sa phethahala ba bile ba e-na le sebe, mosali ea neng a sa tsoa beleha o ne a lokela ho lula a sa hloeka nakong eo, ’me ka mor’a moo o ne a tlameha ho etsa sehlabelo sa ho koahela libe.—Lev. 12:1-8.

⁵ Ho ne ho hlokahala hore ho etsoe mahlabelo a liphoofolo ho koahela libe maemong a mang a mangata bophelong ba letsatsi le letsatsi. Ho sa tsotellehe hore na motho o ne a hlokomela kapa che, mahlabelo ao—hammoho le a ileng a nyeheloa hamorao tempeleng ea Jehova—e ne e le “seriti” sa sehlabelo se phethahetseng sa Jesu.—Baheb. 10:1-10.

HO BA LE MAIKUTLO A NEPAHETSENG KA MAHLABELO

6, 7. (a) Ke’ng eo Baiseraele ba ileng ba nahana ka eona e ileng ea ba thusa ha ba khetha linyehelo tsa bona tsa sehlabelo, hona see se ne se tšoantšetsa’ng? (b) Re ka ’na ra ipotsa lipotso life?

⁶ Molao oa bohlokoa mabapi le phoofolo le ha e le efe eo ho neng ho etsetsoa Jehova sehlabelo ka eona e ne e le hore e be e “phetseng hantle” ka litsela tsohle—eseng e foufetseng, e lemetseng, e holofetseng kapa e kulang. (Lev. 22:20-22) Ha Baiseraele ba ne ba nyehela litholoana kapa lijo-thollo ho Jehova, e ne e lokela ho ba ‘litholoana tsa pele,’ “tse ntlehali” tsa tseo ba li kotutseng. (Num. 18:12, 29) Jehova o ne a sa amohele nyehelo ea boleng bo tlaase. Ha Baiseraele ba ne ba etsa mahlabelo ka liphoofolo tse ntlehali, sena se ne se tšoantšetsa hore sehlabelo sa Jesu e ne e tla ba se hloekileng le se se nang sekoli le hore Jehova o ne a tla tela se neng se le molemohali le seo e neng e le sa bohlokoa ho eena e le hore a rekolle batho.—1 Pet. 1:18, 19.

⁷ Haeba motho ea neng a etsa sehlabelo a ne a ananela lintho tse molemo tseo Jehova a neng a mo etsetsa tsona e le kannete, na o ne a ke ke a thabela ho nyehela lintho tse ntlehali tseo a neng a e-na le tsona? Motho ke eena ea neng a  ikhethela hore na o tla etsa mahlabelo ka lintho tsa boleng bofe. Leha ho le joalo, o ne a tseba hore Molimo o ne a ke ke a thabisoa ke nyehelo e nang le sepha hobane seo se ne se tla bontša hore motho eo o nka sehlabelo seo e le ho phetha molao feela kapa e le moroalo. (Bala Malakia 1:6-8, 13.) Sena se lokela ho re thusa hore re nahane ka tšebeletso eo re e etsetsang Molimo ka hore re ipotse: ‘Ke hobane’ng ha ke sebeletsa Jehova? Na e ke ke ea e-ba hantle hore ke hlahlobe tsela eo ke etsang tšebeletso ea ka ka eona le sepheo seo ke mo sebeletsang ka sona?’

8, 9. Ke hobane’ng ha re lokela ho nahana ka maikutlo ao Baiseraele ba neng ba lokela ho ba le ’ona ha ba nyehela mahlabelo?

⁸ Haeba Moiseraele a ne a etsa sehlabelo ka boithatelo a bontša hore o ananela ka tieo seo Jehova a mo etselitseng sona, e le nyehelo ea secheso, kapa a kōpa kamohelo ho Jehova, mohlomong ho ne ho ke ke ha e-ba thata hore a khethe phoofolo e nepahetseng. Motho eo o ne a tla thabela ho fa Jehova phoofolo e ntlehali. Kajeno Bakreste ha ba etse mahlabelo a sebele a boletsoeng Molaong oa Moshe; leha ho le joalo, ba etsa mahlabelo ka hore ba sebelise nako ea bona, matla a bona le matlotlo a bona ho sebeletsa Jehova. Moapostola Pauluse o ile a re ho ‘bolela phatlalatsa’ tšepo eo Bakreste ba nang le eona le “ho etsa se molemo le ho arolelana lintho le ba bang” ke mahlabelo a thabisang Molimo. (Baheb. 13:15, 16) Maikutlo ao bahlanka ba Jehova ba bang le ’ona ha ba mo sebeletsa a bontša hore ba ananela lintho tsohle tseo Molimo a ba fileng tsona. Kahoo, maikutlo ao batho ba etsang tšebeletso ea Bokreste ba bang le ’ona le sepheo seo ba sebeletsang Molimo ka sona kajeno, a tšoana le a batho ba neng ba etsa mahlabelo a boithatelo mehleng ea boholo-holo.

⁹ Leha ho le joalo, ho etsahala’ng boemong boo ho bona Molao oa Moshe o neng o hloka hore ho etsoe nyehelo ea sebe kapa motho a etse nyehelo ea molato ka lebaka la bofokoli bo itseng boo a nang le bona? Kaha motho o ne a tlameha ho nyehela sehlabelo seo, na u nahana hore ho ne ho tla ba thata hore a se nyehele ka boithatelo? Na ho ne ho ka etsahala hore ebe mahlabelo ao a ne a nyeheloa ka lekhonono? (Lev. 4:27, 28) Ho ne ho ke ke ha e-ba joalo haeba motho ea neng a a nyehela a ne a hlile a batla ho boloka kamano ea hae le Jehova e le ntle.

10. Re ka bontša boitelo joang ha ho na le ntho e phoso eo re e entseng?

¹⁰ Ka ho tšoanang le kajeno, re ka ’na ra khopisa mor’abo rōna ea itseng re sa nahana kapa re sa hlokomele. Letsoalo la hao le ka ’na la u bolella hore ho na le ntho e phoso eo u e entseng. Haeba kannete re batla ho thabisa Jehova, re tla etsa boiteko bohle ba hore re lokise taba eo? Seo se ka bolela ho kōpa tšoarelo ka tieo ho motho eo re mo khopisitseng, kapa ha re entse phoso e tebileng, re kōpe thuso ho  balebeli ba lerato ba Bakreste. (Mat. 5:23, 24; Jak. 5:14, 15) Kahoo, ho hloka boitelo ho lokisa taba le motho eo re mo foselitseng kapa ha re foselitse Molimo. Leha ho le joalo, ha re etsa “mahlabelo,” re ntlafatsa kamano ea rōna le Jehova hammoho le mor’abo rōna ’me re ba le letsoalo le hloekileng. Ka lebaka leo, sena se re tiisetsa hore tsela ea Jehova ke eona e molemohali.

11, 12. (a) Mahlabelo a kopanetsoeng e ne e le eng? (b) Ke’ng eo re ka ithutang eona mahlabelong a kopanetsoeng?

¹¹ Mahlabelo a mang ao ho buuoang ka ’ona Molaong oa Moshe e ne e le linyehelo tse kopanetsoeng. Mahlabelo ana a ne a bontša hore motho o na le khotso le Jehova. Motho ea neng a etsa nyehelo eo o ne a ja nama ea phoofolo eo ea sehlabelo hammoho le ba lelapa la hae; ho ka etsahala hore ebe ba ne ba e jella ho e ’ngoe ea likamore tsa ho jela tempeleng. Moprista ea neng a nyehela mahlabelo ao, o ne a fuoa karolo e ’ngoe ea nama eo, hammoho le baprista ba bang ba neng ba sebetsa tempeleng. (Lev. 3:1, NW, ftn.; 7:31-33) Lebaka leo motho a neng a etsa sehlabelo ka lona e ne e le hore a be le kamano e ntle le Molimo. Ho ne ho le joalokaha eka motho ea neng a etsa sehlabelo, ba lelapa la hae, moprista hammoho le Jehova, ba ne ba ja hammoho ka khotso ba bile ba thabile.

¹² Kahoo, na ho na le tlotla e ka bang khōlō ho feta hore ka tsela ea tšoantšetso motho a meme Jehova hore a tl’o ja le eena ebe Jehova o amohela memo eo? Ho hlakile hore motho eo o ne a tla fa moeti eo oa hae ea hlomphehang se molemohali. Tokisetso ea mahlabelo a kopanetsoeng, e leng karolo ea Molao ea moralo oa ’nete, e ne e bontša hore ka sehlabelo se seholo sa Jesu, batho bohle ba batlang ho ba le khotso le ’Mōpi oa bona, ba ka etsa joalo. Kajeno, re ka ba metsoalle ea Jehova ha re ntse re ithaopela ho tela matlotlo a rōna le matla a rōna tšebeletsong ea hae.

LITEMOSO MABAPI LE MAHLABELO

13, 14. Ke hobane’ng ha Jehova a sa ka a amohela sehlabelo seo Morena Saule a neng a batla ho mo etsetsa sona?

¹³ Ho hlakile hore mahlabelo a boletsoeng Molaong oa Moshe a ne a lokela ho fanoa ka maikutlo a nepahetseng e le hore Jehova a a amohele. Leha ho le joalo, Bibele e na le mehlala e re lemosang ea mahlabelo ao Molimo a neng a sa a amohele. Ke’ng e ileng ea etsa hore a se ke a a amohela? A re ke re tšohleng liketsahalo tse peli.

¹⁴ Moprofeta Samuele o ile a bolella Morena Saule hore nako e ne e se e fihlile ea hore Jehova a lihe kahlolo khahlanong le Baamaleke. Saule o ne a lokela ho timetsa sechaba seo sa ba lireng hammoho le liphoofolo tsa bona. Ka mor’a hore Saule a hlōle sechaba seo o ile a lumella masole a hae hore a se ke a bolaea Agage, e leng morena oa Baamaleke. Saule o ile a boela a boloka liphoofolo tsa bona tse ntle ka  ho fetisisa li phela e le hore a ka etsetsa Jehova sehlabelo ka tsona. (1 Sam. 15:2, 3, 21) Jehova o ile a etsa’ng? O ile a lahla Saule kaha ha aa ka a mamela. (Bala 1 Samuele 15:22, 23.) Re ithuta’ng ketsahalong ee? Re ithuta hore, e le hore Molimo a amohele mahlabelo a rōna, re lokela ho mamela litaelo tsa hae.

15. Boitšoaro bo bobe ba Baiseraele ba bang ba neng ba etsa mahlabelo mehleng ea Esaia bo ile ba bontša’ng?

¹⁵ Ho na le mohlala o tšoanang le oo bukeng ea Esaia. Mehleng ea Esaia, Baiseraele ba ne ba etsetsa Jehova mahlabelo ho phetha molao feela. Leha ho le joalo, boitšoaro ba bona bo bobe bo ile ba etsa hore mahlabelo a bona e be a se nang thuso. Jehova o ile a re: “Mahlabelo a lōna a mangata a ntsoela molemo oa eng? Ke khathetse ke linyehelo tse feletseng tsa secheso tsa lipheleu le mafura a liphoofolo tse fepehileng hantle; ha kea khahloa ke mali a lipohoana le likonyana tse tona le liphooko. . . . Khaotsang ho tlisa linyehelo tse ling hape tsa lijo-thollo tsa lefeela. Libano—li manyala ho ’na.” Bothata e ne e le eng? Molimo o ile a re: “Esita le hoja le etsa lithapelo tse ngata, ha kea mamela; matsoho a lōna a tletse tšollo ea mali. Itlhatsoeng; itlhoekiseng; tlosang bobe ba mesebetsi ea lōna ka pel’a mahlo a ka; khaotsang ho etsa bobe.”—Esa. 1:11-16.

16. Ke’ng e etsang hore Molimo a amohele sehlabelo kapa a se ke a se amohela?

¹⁶ Jehova o ne a sa khahloe ke mahlabelo a neng a etsoa ke baetsalibe ba sa bakeng. Leha ho le joalo, Molimo o ne a amohela lithapelo le linyehelo tsa batho bao ka tieo ba neng ba loanela ho phela tumellanong le litaelo tsa hae. Moralo oa Molao o ile oa ruta batho bao hore e ne e le baetsalibe le hore ba ne ba hloka tšoarelo ea libe. (Bagal. 3:19) Ho hlokomela seo ho ne ho thusa motho hore a bake. Ka ho tšoanang, le kajeno re lokela ho hlokomela hore ke sehlabelo sa Kreste feela se ka etsang hore Jehova a re tšoarele libe. Haeba re utloisisa re bile re ananela sena, joale Jehova o tla “thabisoa” ke seo re mo etsetsang sona tšebeletsong ea hae.—Bala Pesaleme ea 51:17, 19.

BONTŠA TUMELO SEHLABELONG SA JESU!

17-19. (a) Re ka bontša Jehova joang hore re ananela sehlabelo sa thekollo sa Jesu? (b) Re tla tšohla’ng sehloohong se latelang?

¹⁷ Ntho eo re fetang batho ba phetseng mehleng ea pele ho Bokreste ka eona ke hore ha re bone “seriti” sa merero ea Molimo feela. (Baheb. 10:1) Melao e mabapi le mahlabelo e ile ea khothalletsa Bajuda hore ba be le maikutlo a neng a tla ba thusa hore ba be le kamano e ntle le Molimo—ba ananele ka tieo seo a neng a ba etsetsa sona, ba batle ho nyehela lintho tsa bona tse ntlehali, ba be ba hlokomele hore ba hloka topollo. Kajeno, Mangolo a Segerike a Bakreste a re thusa ho utloisisa hore Jehova o tla felisa sebe le lefu ka ho sa feleng ka sehlabelo sa thekollo sa Jesu, le hore esita le hona joale sehlabelo seo se ka re thusa hore re be le letsoalo le letle. Ruri sehlabelo sa Jesu sa thekollo ke tokisetso e babatsehang!—Bagal. 3:13; Baheb. 9:9, 14.

¹⁸ Ho hlakile hore e le hore re rue molemo sehlabelong sa thekollo, ha hoa lekana hore re utloisise feela hore na se bolela’ng. Moapostola Pauluse o ile a ngola a re: “Molao o fetohile motataisi oa rōna ea isang ho Kreste, e le hore ho ka boleloa hore re lokile ka lebaka la tumelo.” (Bagal. 3:24) Tumelo e joalo e tlameha ho ba le mesebetsi. (Jak. 2:26) Kahoo, Pauluse o ile a khothalletsa Bakreste ba lekholong la pele la lilemo ba neng ba e-na le moralo oa tsebo o boletsoeng Molaong oa Moshe hore ba sebelise tsebo eo. Ka ho etsa joalo, boitšoaro ba bona bo ne bo tla lumellana le melao-motheo ea Molimo eo ba neng ba e ruta batho ba bang.—Bala Baroma 2:21-23.

¹⁹ Le hoja kajeno ho sa hlokahale hore Bakreste ba boloke Molao oa Moshe, ba ntse ba lokela ho hlahisa mahlabelo a amohelehang ho Jehova. Sehloohong se latelang, re tla tšohla hore na re ka etsa sena joang.

[Lipotso Tsa Sehlooho se Ithutoang]

[Ntlha e Qolotsoeng e leqepheng la 17]

Ha ho mohla lintho tsa motheo tseo Jehova a li hlokang ho bahlanka ba hae li fetohang

[Setšoantšo se leqepheng la 18]

Ke phoofolo efe eo u ka beng u ile ua e nyehela ho Jehova?

[Setšoantšo se leqepheng la 19]

Jehova o amohela batho ba nyehelang mahlabelo ao a a amohelang