Joalokaha ho boletse Lois Didur

U ’nile ua bua mantsoe a kang aa ka makhetlo a makae bophelong ba hao, ‘Ekare nka be ke sa etsa qeto ena’? Ha e le hantle, ka mor’a hore ke qete lilemo tse 50 ke le tšebeletsong ea nako e tletseng, ha ho letho le lebe leo ke ileng ka thulana le lona ka lebaka la ho ba ka letsohong le letona la Jehova. E-re ke u bolelle hore na ke hobane’ng ha ho le joalo.

KE HLAHILE ka 1939 ’me ke hōletse sebakeng sa mahaeng sa Saskatchewan, Canada, hammoho le bo-ausi ba ka ba bararo, moena oa ka hammoho le khaitseli ea ka. Bophelo ba polasing bo ne bo le monate. Ka letsatsi le leng, Lipaki Tsa Jehova li ile tsa etela Ntate, ’me ke ile ka li botsa hore na Molimo o na le lebitso. Li ile tsa re bontša lebitso Jehova Pesalemeng ea 83:18. Seo se ile sa etsa hore ke batle ho tseba haholoanyane ka Molimo le Lentsoe la hae.

Lilemong tseo, bana ba mapolasing ba ne ba kena sekolo sa mahaeng se nang le phaposi e le ’ngoe, moo ho neng ho ruteloa bana bohle ho ea fihla sehlopheng sa borobeli. Ba ne ba palama lipere ha ba e-ea sekolong kapa ba tsamaea ka maoto lik’hilomithara tse ngata. Tichere e ne e hlokomeloa ke malapa a sa tšoaneng seterekeng sa moo sekolo se leng teng. Ka selemo se seng e ne e le nako ea hore batsoali ba ka e be bona ba hlokomelang tichere e ncha e leng John Didur.

Mohlankana eo le eena o ne a rata Lentsoe la Molimo, empa ke ne ke sa tsebe seo. Ka lekhetlo le leng, ke ne ke thoholetsa bokomonisi le puso ea bososhiale tseo Ntate a neng a li buella. John o ile a buela fatše a re: “Ha ho na motho ea nang le tokelo ea ho busa motho e mong. Ke Molimo feela ea nang le tokelo eo.” Seo se ile sa etsa hore ho be le lintho tse ngata tse thahasellisang tseo re buisanang ka tsona.

Kaha John o ne a hlahile ka 1931, o ne a ile a utloa ka mathata ao batho ba ileng ba feta ho ’ona nakong ea ntoa. Ha ho ne ho qhoma Ntoa ea Korea ka 1950, John o ile a botsa baruti ba bangata ka seabo sa bona ntoeng. Kaofela ha bona ba ile ba bolela hore ha ho phoso hore Bakreste ba be le seabo ntoeng. Hamorao, o ile a botsa Lipaki Tsa Jehova potso e tšoanang. Li ile tsa mo bontša  hore na Bakreste ba lekholong la pele la lilemo ba ile ba latela tataiso efe ea Mangolo mabapi le ntoa. John o ile a kolobetsoa ka 1955. Selemong se latelang le ’na ke ile ka kolobetsoa. Bobeli ba rōna re ne re tseba hore re batla ho sebelisa bophelo le matla a rōna ho sebeletsa Jehova. (Pes. 37:3, 4) Ka July 1957, ’na le John re ile ra nyalana.

Selemo le selemo letsatsing leo re nyalaneng ka lona, re ne re e-ba kopanong. Re ne re thabela ho ba har’a batho ba likete ba hlomphang lenyalo. Kopano ea machaba ea pele eo re ileng ra ba ho eona ke ea 1958. Re ile ra ea New York City ka koloi re le bahlano ho tloha Saskatchewan. Leeto la rōna le ile la nka beke, ’me re ne re tsamaea motšehare ebe bosiu re robala ka tenteng. Nahana feela hore na re ile ra makala hakae ha mora e mong oabo rōna eo re ileng ra kopana le eena Bethlehem, Pennsylvania, a ne a re re ka ea robala ha hae bosiung boo! Ka lebaka la mosa oo oa hae, re ile ra fihla New York City re hloekile. Kopano eo e khōlō e ile ea totobatsa thabo e ikhethang eo motho a bang le eona ha a sebeletsa Jehova! Mantsoe ana a mopesaleme ke ’nete ha a ne a ngola a re, “ho na le thabo letsohong la hao le letona ka ho sa feleng.”—Pes. 16:11.

BOPULA-MALIBOHO

Selemo hamorao ka 1959, re ile ra ba bo-pula-maliboho ’me ra lula k’haraveneng e nyenyane eo re ileng ra e beha holim’a leralla le haufi le polasi e ’ngoe Saskatchewan. Motho o ne a bona sebaka se bohōle ba lik’hilomithara tse ngata ’me boholo ba sebaka seo e ne e le tšimo ea rōna.

Ka letsatsi le leng re ile ra fumana lengolo le tsoang ofising ea lekala le neng le re tšoaretse litaba tse monate. Ke ile ka potlakela ho le isa ho John ea neng a ntse a lokisa terekere. Lengolo leo le ne le re memela hore re e’o ba bo-pula-maliboho ba khethehileng Red Lake, Ontario. Kaha re ne re sa tsebe hore na sebaka seo se hokae, re ile ra ntša limmapa tsa rōna ka potlako hore re shebe hore na se hokae.

Ruri se ne se fapane hōle le mapolasi a neng a e-na le sebaka se seholo! Joale re ile ra ba har’a meru e meholo le metse e menyenyane e hahiloeng haufi le merafo ea khauta. Ha re ntse re batla sebaka sa bolulo letsatsing la pele, ngoananyana e mong o ile a utloa ha re ntse re bua le moahisani oa bona. O ile a mathela lapeng ho ea bolella ’mè oa hae, ’me ’mè oa hae o ile a re fa sebaka sa ho robala bosiung boo. Bethe eo re ileng ra robala ho eona e ne e le phaposing e ka tlaase e litsoeng ka mobu. Letsatsing le hlahlamang re ile ra fumana sebaka sa bolulo; e ne e le ntlo e entsoeng ka lipalo e nang le likamore tse peli. E ne e se na metsi ka tlung, e se na thepa ha ese paola feela. Re ile ra reka linthonyana tse seng kae lebenkeleng le rekisang thepa e seng e sebelisitsoe ’me kapele feela re ile ra nama leoto.

Ho ne ho se na phutheho sebakeng seo, e neng e le haufi e ne e le lik’hilomithara tse 209. Batho ba bangata ba neng ba sebetsa merafong ea khauta ba ne ba e-tsoa Europe, ’me ba ne ba re botsa hore na re ka ba batlela Bibele ka lipuo tsa habo bona. Ho e-s’o ee kae re ile ra ba le lithuto tsa Bibele tse 30 tse tsoelang pele hantle. Nakong ea likhoeli tse tšeletsoeng ho ile ha thehoa phutheho e nyenyane.

Monna oa mosali e mong eo re neng re ithuta le eena o ile a letsetsa moprista a mo kōpa hore a ke a tl’o kenya mosali oa hae tseleng. Ha moprista a se a tlile, o ile a bolela hore e ’ngoe ea lintho tseo re lokelang ho li ruta batho ke thuto ea Boraro-bo-bong. Mosali eo o ile a ntša Bibele ea bona ea K’hatholike eaba o kōpa moprista hore a e sebelise ho tšehetsa lintho tseo a neng a li bua. Moprista o ile a lahlela Bibele eo lehlakoreng le leng la tafole, a bolela hore ha ho hlokahale hore a tšehetse letho. Ha a se a tsamaea, o ile a bua ka Seukraine a re ba re leleke ’me ba se ke be ba hlola ba re lumella ho khutla. O ne a sa tsebe hore John o tseba Seukraine!

Nakoana ka mor’a moo, re ile ra tloha Red Lake kaha John o ne a il’o koetlisetsoa mosebetsi oa potoloho. Leha ho le joalo, hoo e ka bang selemo hamorao ha John a ne a fana ka puo ea kolobetso kopanong e ’ngoe ea setereke, monna oa mosali eloa eo re neng re ithuta le eena e ne e le e mong oa ba eang kolobetsong! Se ileng sa etsahala  ha moprista a ne a tlile ha hae se ile sa etsa hore a batlisise ka Bibeleng.

HO BA MAPHATHAPHATHE MOSEBETSING OA HO POTOLOHA

Ha re ntse re etsa mosebetsi oa ho potoloha, re ile ra thabela ho lula le malapa a fapa-fapaneng. Re ile ra ba le kamano e haufi le batho bao ba ileng ba re fa bolulo ’me ba phela le rōna. Ka lekhetlo le leng re ne re lula phaposing e ka holimo e se nang lintho tsa ho futhumatsa nakong ea mariha. Hoseng ka meso, re ne re ee re utloe morali’abo rōna ea hōlileng a kena ka kamoreng ea rōna a patile mohoasa ’me a fihle a bese setofo se senyenyane. Hamorao o ne a re tlisetsa basekomo le metsi a chesang hore re itlhatsoe re itokisetse letsatsi leo. Tsela eo a neng a etsa lintho ka bonolo ka eona a ntse a khutsitse e ile ea nthuta lintho tsa bohlokoa haholo.

Mosebetsi oa ho potoloha o ile oa etsa hore ke be le kamano e haufi haholo le Jehova. Potoloho e ’ngoe eo re neng re e etela ea Alberta e ne e akarelletsa motse o nang le merafo karolong e Leboea le Hōle, ’me ho ne ho e-na le morali’abo rōna ea lulang moo. Mokhatlo oa Jehova o ne o talima morali eo oabo rōna oa motoaitoai joang? Likhoeli tse ling le tse ling tse tšeletseng re ne re kena sefofaneng re mo etela ’me re ne re qeta beke re e-ea tšimong le eena re bile re tšoara liboka le eena feela joalokaha re ne re etsa liphuthehong tsa metseng e meholo. Seo se ne se re hopotsa hore na Jehova o tsotella e mong le e mong oa bahlanka ba hae ba kang linku tse nyenyane hakae.

Re ile ra lula re ntse re buisana le batho ba bangata ba ’nileng ba re amohela malapeng a bona. Seo se nkhopotsa e ’ngoe ea limpho tsa pele tseo John a ileng a mpha tsona—e leng lebokose le mebala-bala le neng le tšetse lipampiri tsa ho ngolla. Re ne re thabela ho ngolla metsoalle re sebelisa lipampiri tseo. Le kajeno ke ntse ke nka lebokose leo la ka e le la bohlokoa haholo.

Ha re ne re le potolohong e ’ngoe Toronto, mora e mong oabo rōna oa Bethele ea Canada o ile a re letsetsa a re botsa hore na re ka rata ho sebeletsa Bethele. O ne a batla hore re mo fe karabo neng? “Letsatsing le hlahlamang haeba re ne re ka khona!” Re ile ra mo araba.

TŠEBELETSO EA BETHELE

Kamehla ha kabelo ea rōna e ne e fetoha, re ne re bona likarolo tse sa tšoaneng tsa thabo e tsoang letsohong la Jehova. Seo se ile sa tsoela pele ha re ne re e-ea Bethele ka 1977. Ho ba har’a ba bang ba batlotsuoa ho ile ha re thusa hore re bone botho ba bona bo sa tšoaneng hammoho le kamoo ba nkang Lentsoe la Molimo e le la bohlokoa kateng.

Re ile ra thabela mokhoa o mocha oa bophelo ba Bethele. Ka mohlala, re ne re se re beha liaparo tsa rōna ka har’a shelefo eseng ka har’a sutuk’heise ebile re ne re abetsoe ho ba phuthehong e le ’ngoe. Hape ke ne ke boetse ke thabela mosebetsi oo ke o filoeng hammoho le ho bontša batho ba etetseng Bethele sebaka. Ke ne ke ba hlalosetsa ka mosebetsi o etsoang Bethele, ke utloe maikutlo a bona ke be ke arabe le lipotso tsa bona.

Lilemo li ile tsa feta ka potlako, ’me ka 1997, John o ile a memeloa ho ea Sekolong sa Litho Tsa Komiti ea Lekala, Patterson, New York. Ka mor’a moo, re ile ra botsoa hore na re ka thabela ho ea Ukraine. Re ile ra khothalletsoa hore re nahane ka taba eo ka hloko re be re rapele ka eona. Mantsiboeeng a letsatsi leo re ile ra fihlela qeto ea hore re tla ea Ukraine.

PHETOHO E ’NGOE—UKRAINE

Re ile ra ba teng kopanong e khōlō ea machaba St. Petersburg, Russia, ka 1992, ’me ka 1993 re ile ra ea ho e neng e tšoaretsoe Kiev, Ukraine. Likopano tseo li ile tsa etsa hore re rate bara le barali babo rōna ba Europe Bochabela haholo. Sebaka sa rōna se secha sa bolulo Lviv, Ukraine, se ne se le mokatong oa bobeli mohahong oa khale. Lifensetere li ne li shebile jareteng e neng e e-na le serapa se senyenyane le mokoko o moholo o ’mala o mokhubelu hammoho le sehlopha sa likhoho tsa lithole. Ke ne ke utloa eka ke lula polasing Saskatchewan. Re ne re lula re le 12 lehaeng leo. Hoseng ho hong le ho hong re ne re kena koloing re feta har’a toropo ho ea mosebetsing Bethele.

 Re ne re ikutloa joang ka ho ba Ukraine? Re ile ra ameha maikutlo ha re ne re le har’a batho ba bangata ba ’nileng ba thulana le liteko, ho thibeloa ha mosebetsi le ho koalloa chankaneng. Leha ho le joalo, ba ile ba lula ba e-na le tumelo e matla. Ha re ne re ba babatsa ba ne ba re, “Re ne re etsetsa Jehova.” Ha ho mohla ba ileng ba utloa eka ba lahliloe kherehloa. Esita le hona joale, ha u ka re u leboha motho e mong ka lebaka la mosa oo a u bontšitseng oona, a ka ’na a re, “Leboha Jehova,” e le ha a bontša hore oa hlokomela hore Jehova ke eena Mohloli oa lintho tsohle tse molemo.

Batho ba bangata ba Ukraine, ba tsamaea ka maoto ha ba e-ea libokeng, kahoo ba na le nako ea ho buisana le ho khothatsana. Leeto la bona le ka ’na la nka hora kapa ho feta. Ho na le liphutheho tse fetang 50 Lviv, ’me tse 21 tsa tsona li sebelisa moaho o moholo e le Holo ea ’Muso. Ka Sontaha ke ntho e ntle haholo ho bona bara le barali babo rōna ba ntse ba kena butle-butle ba tla libokeng.

Re ile ra tloaela bara le barali babo rōna kapele kaha ke batho ba bonolo le ba ratang ho thusa batho ba bang. Ha ho e-na le ntho eo ke sa e utloisiseng ka puo ea bona, ba bontša mamello e khōlō. Hangata mahlo a bona a bontša seo ba se buang.

Mohlala oa hore e hlile bara le barali babo rōna baa tšepana ke se ileng sa etsahala nakong ea kopano ea machaba e neng e tšoaretsoe Kiev ka 2003. Re ne re sa tsoa theohela seteisheneng se ka tlas’a lefatše se phetheselang ha ngoananyana e mong e monyenyane a e-tla ho rōna ’me a buela fatše a re, “Ke lahlehile. Ha ke bone nkhono oa ka.” Ngoananyana eo o ile a bona libeche tsa rōna ’me ka lebaka la tsona a tseba hore re Lipaki. O ne a le sebete ’me ha aa ka a lla. Mohats’a molebeli oa potoloho ea neng a tsamaea le rōna o ile a isa ngoana eo Lefapheng la Malahleha ha re fihla lebaleng la kopano. Ho e-s’o ee kae ngoananyana eo o ile a kopana le nkhono oa hae. Ke ile ka angoa pelo haholo ke tsela eo ngoananyana eo a ileng a bontša hore o tšepa Lipaki ka eona esita le har’a matšoele ao a batho.

Bara le barali babo rōna ba tsoang linaheng tse ngata ba ile ba tla Ukraine ka May 2001 ha ho ne ho neheloa mehaho ea rōna e mecha ea lekala. Ka mor’a puo e khethehileng e ileng ea fanoa lebaleng la lipapali ka Sontaha hoseng, boieane ba bara le barali babo rōna bo ile ba nyoloha ka maoto ho ea bona mehaho e mecha ea Bethele. Eo ke ntho eo nke keng ka e lebala! Ke ile ka ameha maikutlo haholo ha ke bona bara le barali bao babo rōna ba neng ba khutsitse ’me ba tsamaea ba sa bake morusu. Sena se ile sa etsa hore ke boele ke ananele thabo e tlisoang ke ho sebeletsa Molimo.

PHETOHO E ILENG EA ETSAHALA KA POTLAKO

Ka masoabi, ka 2004, ho ile ha fumaneha hore John o na le kankere. Re ile ra ea Canada hore a e’o fumana phekolo. Mokhahlelo oa pele oa chemotherapy o ile oa imela ’mele oa hae haholo ’me o ile a qeta libeke tse ’maloa a le phaposing ea batho ba kulang haholo. Ka lehlohonolo ho ea le mailiili ho ile ha fela. Le hoja John a ne a sa khone ho bua, kamehla mahlo a hae a ne a bontša hore o ananela batho bohle ba neng ba tla ho tla mo bona.

Leha ho le joalo, ha aa ka a hlaphoheloa ’me o ile a hlokahala mafelong a selemo seo. Ke ne ke utloa eka ke lahlehetsoe ke setho se seng sa ka se seholo. Ruri ’na le John re ile ra thabela ho sebeletsa Jehova hammoho. Joale ke ne ke tla etsa joang? Ke ile ka etsa qeto ea ho khutlela Ukraine. Ke ananela haholo lerato le mofuthu la lelapa la Bethele la Ukraine hammoho le la phutheho ea moo.

Ha ho mohla re kileng ra ikoahlaela liqeto tseo re li entseng. Re phetse bophelo bo thabisang ’me re bile le metsoalle e molemo ka ho fetisisa. Kea tseba hore ho sa ntse ho e-na le lintho tse ngata tseo re tla ithuta tsona ka molemo oa Jehova, ’me ke tšepa hore ke tla mo sebeletsa ka ho sa feleng kaha ka sebele ke fumane ‘thabo letsohong la Jehova le letona.’

[Ntlha e Qolotsoeng e leqepheng la 6]

“Ha ho mohla re kileng ra ikoahlaela liqeto tseo re li entseng”

[Setšoantšo se leqepheng la 3]

Ha re ne re nyalana le John

[Setšoantšo se leqepheng la 4]

Ha ke ne ke le pula-maliboho ea khethehileng Red Lake, Ontario

[Setšoantšo se leqepheng la 5]

Ke na le John Ukraine, ka 2002