Na U Hlile U Ananela Mpho ea Molimo ea Lenyalo?

“E se eka Jehova a ka le fa mpho, ’me le fumane sebaka sa phomolo e mong le e mong ntlong ea monna oa hae.”—RUTHE 1:9.

BATLA LIKARABO:

Ke hobane’ng ha re ka bolela hore bahlanka ba Molimo ba nako e fetileng ba ne ba ananela mpho ea hae ea lenyalo?

Re tseba joang hore Jehova oa tsotella hore na re khetha molekane oa mofuta ofe?

Ke keletso efe ea Bibele e mabapi le lenyalo eo u batlang ho e sebelisa bophelong ba hao?

1. Hlalosa hore na Adama o ile a etsa’ng ha a ne a fuoa mosali.

“QETELLONG enoa ke lesapo la masapo a ka le nama ea nama ea ka. Enoa o tla bitsoa Mosali, hobane o nkiloe ho monna.” (Gen. 2:23) Ruri monna oa pele e leng Adama, o ile a thaba haholo ha a ne a fuoa mosali! Ha ho makatse hore ebe o ile a qala ho mo roka! Ka mor’a hore Jehova a robatse Adama boroko bo tebileng, O ile a bōpa mosali eo e motle ka e ’ngoe ea likhopo tsa hae. Hamorao Adama o ile a mo reha lebitso la Eva. Molimo o ile a ba kopanya ka lenyalo. Kaha Jehova o ile a sebelisa khōpo ea Adama ho bōpa Eva, ba ne ba e-na le kamano e haufi ho feta ea monna le mosali ofe kapa ofe oa mehleng ea kajeno.

2. Ke hobane’ng ha banna le basali ba e-ba le kamano e haufi?

² Jehova o bōpile batho ba e-na le bokhoni ba hore ba rate batho ba bong bo fapaneng. Lerato lena le etsa hore banna le basali ba be le kamano e haufi. The World Book Encyclopedia e re: “Monna le mosali ba nyalanang, ba na le tšepo ea hore ba tla kopanela liphate le hore ba tla ratana kamehla.” Sena ke se ’nileng sa etsahala hangata har’a batho ba Jehova.

BA NE BA ANANELA MPHO EA LENYALO

3. Isaka o ile a fumana mosali joang?

³ Abrahama ea tšepahalang o ne a hlompha lenyalo haholo. Ka lebaka leo, o ile a romela mohlanka oa hae e moholo Mesopotamia hore a e’o batlela Isaka mosali. Thapelo ea mohlanka eo e ile ea hlahisa litholoana tse molemo. Rebeka ea neng a tšaba Molimo e ile ea e-ba mosali ea ratehang oa Isaka, ’me o ile a kenya letsoho tokisetsong ea Jehova ea ho sireletsa peō ea Abrahama. (Gen. 22:18; 24:12-14, 67) Sena ha sea lokela ho etsa hore re fihlele qeto ea hore batho ba lokela ho batlela ba bang balekane haeba ba sa koptjoa ho etsa joalo—ho sa tsotellehe hore na ba etsa seo ka sepheo se setle  kapa che. Mehleng ea kajeno, batho ba bangata ba ikhethela balekane. ’Nete ke hore manyalo ha a raloe leholimong, empa Molimo a ka tataisa Bakreste tabeng ena hammoho le likarolong tse ling tsa bophelo haeba ba rapella tataiso ea hae ba bile ba tataisoa ke moea oa hae.—Bagal. 5:18, 25.

4, 5. Ke eng e u kholisang hore Moshulame le molisana ba ne ba ratana?

⁴ Moroetsana e motle oa Moshulame oa Iseraele ea boholo-holo o ne a sa batle hore metsoalle ea hae e mo susumelletse hore e be e mong oa basali ba bangata ba Morena Solomone. O ile a re: “Lōna barali ba Jerusalema, ke le hlapantšitse hore le se ke la leka ho tsosa kapa ho susumetsa lerato ka ho ’na ho fihlela lona le batla.” (Sefela 8:4) Moshulame o ne a rata molisana e mong. Ka boikokobetso o ile a re: “’Na ke safrone feela ea thota e lebōpong la leoatle, khahla ea likhohlo.” Molisana le eena o ne a mo rata ’me o ile a mo araba a re: “Joaloka khahla har’a litlama-tlama tse meutloa, kharebe ea ka e joalo har’a barali”! (Sefela 2:1, 2) Ba ne ba ratana e le kannete.

⁵ Kaha Moshulame le molisana ba ne ba rata Molimo, ka sebele tlamahano ea bona ea lenyalo e ne e tla ba matla. Ha e le hantle, Moshulame o ile a re ho moratuoa oa hae oa molisana: “Mpehe joaloka tiiso pelong ea hao, joaloka tiiso letsohong la hao; hobane lerato le matla joaloka lefu, ho tsitlella boinehelo bo khethehileng ha ho inehele joaloka Sheole. Mocheso oa lona ke mocheso oa mollo, lelakabe la Jah [kaha le tsoa ho eena]. Metsi a mangata ha a khone ho tima lerato, leha e le hore linōka li ka le hohola. Haeba motho a ne a tla fana ka lintho tsohle tsa bohlokoa tsa ntlo ea hae bakeng sa lerato, ruri batho ba ne ba tla li nyelisa.” (Sefela 8:6, 7) Na bahlanka ba Molimo ha baa lokela ho lebella boemo le boitlamo bo tšoanang ho balekane ba bona ba lenyalo?

MOLIMO OA TSOTELLA HORE NA RE KHETHA’NG

6, 7. Re tseba joang hore Molimo oa tsotella hore na re khetha molekane oa mofuta ofe?

⁶ Jehova oa tsotella hore na u khetha molekane oa mofuta ofe. Mabapi le baahi ba Kanana, Baiseraele ba ile ba fuoa taelo ena: “U se ke ua etsa selekane sa lenyalo le tsona. U se ke ua fana ka morali oa hao ho mora oa hae, ’me u se ke ua nkela mora oa hao morali oa hae. Etsoe o tla khelosa mora oa hao hore a se ke a ntatela, ’me ka sebele ba tla sebeletsa melimo e meng; ruri bohale ba Jehova bo tla le tukela, ’me o tla le felisa ka potlako.” (Deut. 7:3, 4) Lilemo tse makholo hamorao, moprista Esdrase o ile a re: “Le entse ka ho se tšepahale ka hore ebe le ile la fana ka bolulo ho basali basele e le ho ekelletsa molatong oa Iseraele.” (Esdr. 10:10) Ha moapostola Pauluse a bua le Bakreste-’moho le eena o ile a re: “Mosali o tlamiloe ka nako eohle ha monna oa hae a phela. Empa haeba monna oa hae a ka robala lefung, o lokolohile ho nyaloa ke eo a mo batlang, e mpe e be feela Moreneng.”—1 Bakor. 7:39.

⁷ Haeba mohlanka ea inehetseng oa Jehova a ne a ka nyalana le motho ea sa lumelang, seo e ne e tla be e le ho se mamele Molimo. Baiseraele ba mehleng ea Esdrase ba ile ba bontša ho hloka tumelo ka hore ebe ba ile ba fana ka “bolulo ho basali basele,” ’me e ne e tla ba phoso ho khella fatše se boletsoeng ka ho hlaka ka Mangolong. (Esdr. 10:10; 2 Bakor. 6:14, 15) Mokreste ea nyalanang le motho eo eseng Mokreste ha a behe mohlala o motle ebile ha a ananele mpho ea Molimo ea lenyalo. Haeba motho a kena lenyalong le joalo ka mor’a hore a kolobetsoe, a ka lahleheloa ke litokelo tsa hae ka phuthehong. Hape e tla be e le ntho e sa utloahaleng hore motho a lebelle hore Jehova a mo hlohonolofatse empa a boele a rapele a re: ‘Jehova, ha kea ka ka u mamela ka boomo, leha ho le joalo, ke kōpa hore u ’ne u ntlhohonolofatse.’

 NTATE OA RŌNA EA LEHOLIMONG O TSEBA SE MOLEMONG OA RŌNA

8. Hlalosa hore na ke hobane’ng ha re lokela ho latela tataiso eo Molimo a faneng ka eona mabapi le lenyalo.

⁸ Moetsi oa mochine o tseba hantle hore na o sebetsa joang. Haeba mochine oo o lokela ho kopanngoa, a ka bolela hore na seo se lokela ho etsoa joang. Ho tla etsahala’ng haeba re sa latele litaelo tsa hae, ebe re ikopanyetsa mochine oo ka tsela eo re e batlang? Ho ka etsahala hore litholoana tsa seo e tla ba tse bosula—haeba mochine oo o tla hle o sebetse. Kahoo, haeba re e-na le takatso ea ho kena lenyalong leo re tla thaba ho lona, re lokela ho latela litaelo tseo Jehova e leng Moetsi oa lenyalo a faneng ka tsona.

9. Ke hobane’ng ha re ka bolela hore Jehova oa utloisisa hore batho ba ka jeoa ke bolutu le hore ba ka thaba lenyalong?

⁹ Jehova o tseba ntho e ’ngoe le e ’ngoe ka batho le ka lenyalo. O ile a etsa hore batho ba be le takatso ea ho kopanela liphate e le hore ba ‘ate ’me ba ngatafale.’ (Gen. 1:28) Molimo oa utloisisa hore batho ba ka jeoa ke bolutu kaha pele a bōpa mosali oa pele o ile a re: “Ha ho hotle hore motho a be mong; ke tla mo etsetsa mothusi ea tšoanang le eena.” (Gen. 2:18, Byington) Jehova o boetse oa hlokomela hore batho ba lenyalong ba ka thaba.—Bala Liproverbia 5:15-18.

10. Bakreste ba lenyalong ba lokela ho tataisoa ke eng mabapi le ho kopanela liphate?

¹⁰ Ka lebaka la sebe le ho se phethahale tseo batho ba li futsitseng ho Adama, ha ho na lenyalo le phethahetseng kajeno. Leha ho le joalo, haeba bahlanka ba Jehova ba mamela Lentsoe la Molimo, ba ka ba le thabo ea ’nete lenyalong. Ka mohlala, nahana ka keletso ea Pauluse e hlakileng mabapi le ho kopanela liphate lenyalong. (Bala 1 Bakorinthe 7:1-5.) Mangolo ha a bolele hore batho ba lenyalong ba lokela ho kopanela liphate feela ka morero oa hore ba be le bana. Haeba batho ba lenyalong ba kopanela liphate, seo se ka ba khotsofatsa ’meleng le maikutlong. Leha ho le joalo, ho hang mekhoa e tsoileng tseleng ha e khahlise Molimo. Karolong ena ea bohlokoa bophelong ba bona, banna le basali ba Bakreste ba lokela ho tšoarana ka mosa ’me ba bontšane lerato la ’nete. Ho hlakile hore ba lokela ho qoba liketso life kapa life tse sa khahliseng Jehova.

11. Ruthe o ile a hlohonolofatsoa joang ka lebaka la ho etsa lintho ka tsela ea Jehova?

¹¹ Batho ba lokela ho thabela lenyalo. Lelapa la Mokreste e lokela ho ba sebaka sa ho phomola le moo ho renang khotso. Nahana ka se ileng sa etsahala lilemong tse 3 000 tse fetileng, ha Naomi ea tsofetseng oa mohlolohali hammoho le lingoetsi tsa hae tsa bahlolohali e leng Orpa le Ruthe, ba ne ba le tseleng ba tsoa Moabe  ba ea Juda. Naomi o ile a phehella basali bao ba bacha hore ba khutlele ho batho ba habo bona. Ruthe oa Momoabe o ile a khomarela Naomi, a tšepahala ho Molimo oa ’nete ’me a tšepisoa ‘moputso o phethahetseng o tsoang ho Jehova, eo a ileng a batla setšabelo tlas’a mapheo a hae.’ (Ruthe 1:9; 2:12) Kaha Ruthe o ne a ananela mpho ea Molimo ea lenyalo haholo, o ile a nyaloa ke Boaze ea holileng, eo e neng e le morapeli oa ’nete oa Jehova. Ha a tsosoa lefatšeng le lecha la Molimo, o tla thabela ho tseba hore e ile ea e-ba nkhono oa Jesu Kreste. (Mat. 1:1, 5, 6; Luka 3:23, 32) Ruri o ile a hlohonolofatsoa haholo ka lebaka la ho etsa lintho ka tsela ea Jehova!

KELETSO E MOLEMO E KA ETSANG HORE LENYALO LE ATLEHE

12. Motho a ka fumana keletso e molemo mabapi le lenyalo hokae?

¹² Mothehi oa lenyalo o re bolella seo re lokelang ho se tseba mabapi le hore na lenyalo le ka atleha joang. Ha ho na motho ea nang le tsebo e kang ea hae. Bibele ke eona feela eo kamehla e fanang ka keletso e nepahetseng mabapi le lenyalo. Ka lebaka leo, motho ofe kapa ofe ea fanang ka keletso o lokela ho itšetleha ka Bibele. Ka mohlala, moapostola Pauluse o ile a bululeloa hore a ngole a re: “E mong le e mong oa lōna ka bomong a ke a rate mosali oa hae joalokaha a ithata; ka lehlakoreng le leng, mosali o lokela ho ba le tlhompho e tebileng ho monna oa hae.” (Baef. 5:33) Keletso eo ea Bibele e hlakile, ha ho na Mokreste ea holileng moeeng ea ka bolelang hore ha a e utloisise. Potso ke hore na Mokreste o tla mamela Lentsoe la Jehova kapa che. O tla le mamela haeba a hlile a ananela mpho ea Molimo ea lenyalo. *

13. Ke sefe se ka etsahalang haeba batho ba sa mamele keletso e ho 1 Petrose 3:7?

¹³ Monna oa Mokreste o lokela ho tšoara mosali oa hae ka lerato. Moapostola Petrose o ile a ngola a re: “Lōna banna, le tsoele pele ho lula le bona ka mokhoa o tšoanang ho ea ka tsebo, le ba abela tlhompho joaloka sejana se fokolang haholo, se setšehali, kaha le boetse le majalefa le bona a mohau o sa tšoanelang oa bophelo, e le hore lithapelo tsa lōna li se ke tsa sitisoa.” (1 Pet. 3:7) Lithapelo tsa monna li ka sitisoa haeba a sa mamele keletso ea Jehova. Ho ka etsahala hore balekane ka bobeli ba be le mathata moeeng, e leng se ka ’nang sa etsa hore ba imeloe kelellong, ba qhoelisane ka mantsoe ba be ba tšoarane hampe.

14. Mosali ea lerato a ka thusa lelapa la hae joang?

¹⁴ Mosali ea tataisoang ke Lentsoe la Jehova le moea oa hae o halalelang a ka loanela hore lelapa la hae le be le khutso le thabo. Ho bonolo hore monna ea tšabang Molimo a rate mosali oa hae a be a mo sireletse nameng le moeeng. Mosali oa Mokreste o batla ho ratoa, kahoo o bonahatsa litšobotsi tse etsang hore monna oa hae a mo rate haholo. Liproverbia 14:1 e re: “Mosali ea bohlale e le kannete o hahile ntlo ea hae, empa oa leoatla o e heletsa ka matsoho a hae.” Mosali ea bohlale le ea lerato o kenya letsoho ho thusa lelapa la hae hore le atlehe le be le thabe. O boetse o bontša hore o ananela mpho ea Molimo ea lenyalo haholo.

15. Ke keletso efe e hlahang ho Baefese 5:22-25?

¹⁵ Banna le basali ba latelang mohlala  oa Jesu mabapi le tsela eo a tšoarang phutheho ea hae ka eona ba bontša hore ba ananela mpho ea Molimo ea lenyalo. (Bala Baefese 5:22-25.) Ruri balekane ba hlohonolofatsoa haholo haeba ba ratana e le kannete ’me le ka mohla ba sa lumelle boikhohomoso kapa mokhoa o bontšang bongoana oa ho se buisane kapa mekhoa e meng eo e seng ea Bokreste hore e senye lenyalo la bona!

HO SE KE HA E-BA LE MOTHO EA BA AROLANG

16. Ke hobane’ng ha Bakreste ba bang ba lula e le masoha?

¹⁶ Le hoja batho ba bangata ba rera hore ka nako e itseng bophelong ba bona ba tla kena lenyalong, bahlanka ba bang ba Jehova ba lula e le masoha hobane ba sa fumane molekane ea ba khahlang kapa ea khahlang Jehova. Ba bang ba na le mpho ea Molimo ea bosoha, e ba fang monyetla oa hore ba ikakhele ka setotsoana tšebeletsong ea Jehova ba sa sitisoe ke lenyalo. ’Nete ke hore motho o lokela ho thabela bosoha a sa tlōle meeli eo Jehova a e behileng.—Mat. 19:10-12; 1 Bakor. 7:1, 6, 7, 17.

17. (a) Ke mantsoe afe a Jesu ao re lokelang ho a hopola mabapi le lenyalo? (b) Haeba Mokreste ofe kapa ofe a qala ho lakatsa molekane oa motho e mong, ke bohato bofe boo a lokelang ho bo nka ka potlako?

¹⁷ Ho sa tsotellehe hore na re masoha kapa re lenyalong, kaofela ha rōna re lokela ho hopola mantsoe a Jesu a reng: “Na ha lea ka la bala hore [Molimo] ea ba bōpileng tšimolohong o ba entse e le e motona le e motšehali ’me a re, ‘Ka lebaka lena monna o tla siea ntat’ae le ’m’ae ’me o tla khomarela mosali oa hae, ’me bao ba babeli e tla ba nama e le ’ngoe’? E leng hore ha ba sa le babeli, empa e se e le nama e le ’ngoe. Ka hona, seo Molimo a se kopantseng hammoho jokong ho se ke ha e-ba le motho ea se arolang.” (Mat. 19:4-6) Ho lakatsa molekane oa motho e mong ke sebe. (Deut. 5:21) Haeba Mokreste ofe kapa ofe a qala ho ba le maikutlo a joalo a ho lakatsa molekane oa motho e mong, o lokela ho nka bohato ka potlako ho ntša takatso eo e litšila ka metso, esita le haeba seo se ka mo utloisa bohloko haholo hobane a ile a lumella takatso eo ea boithati hore e hōle. (Mat. 5:27-30) Ke habohlokoa ho lokisa monahano oo le ho hlōla takatso eo ea boetsalibe ea pelo e bolotsana.—Jer. 17:9.

18. U nahana hore re lokela ho nka mpho ea Molimo ea lenyalo joang?

¹⁸ Esita le batho ba bangata ba tsebang hanyenyane ka Jehova Molimo kapa bao ho hang ba sa tsebeng letho ka eena le ka mpho ea hae e babatsehang ea lenyalo, ba bontšitse hore ba ananela tlamo ea lenyalo. Ruri rōna ba inehetseng ho “Molimo ea thabileng” Jehova, re lokela ho thabela lintho tseo a re fileng tsona re be re bontše hore re ananela mpho ea Hae ea lenyalo e le kannete!—1 Tim. 1:11.

[Mongolo o botlaaseng ba leqephe]

[Lipotso Tsa Sehlooho se Ithutoang]

[Ntlha e Qolotsoeng e leqepheng la 6]

Lenyalo le molemo le tlotlisa Jehova ’me le ka etsa hore motho e mong le e mong ea lelapeng leo a thabe

[Setšoantšo se leqepheng la 5]

Ruthe o ile a bontša hore o ananela mpho ea Molimo ea lenyalo

[Setšoantšo se leqepheng la 7]

Na ua bontša hore u hlile u ananela mpho ea Jehova ea lenyalo?