Ba Ile ba Itlhahisa ka ho Rata—Naheng ea Ecuador

MORA e mong oabo rōna e mocha oa Italy o ne a le tlas’a khatello. O ne a sa tsoa qeta sekolong se phahameng ’me a fumane limmaraka tse holimo ho feta bana ba neng ba le sehlopheng se le seng le eena, ’me beng ka eena le matichere ba ne ba mo khothalletsa hore a hahamalle thuto e phahameng. Leha ho le joalo, lilemo pejana, Bruno o ne a ile a inehela ho Jehova, a mo tšepisa hore o tla etsa hore thato ea Molimo e be eona e tlang pele bophelong ba hae. O ile a etsa qeto efe? O re: “Ke ile ka bolella Jehova ka thapelo hore ke tla phelela boinehelo ba ka ’me ke etse hore e be eena ea tlang pele bophelong ba ka. Empa ke ile ka boela ka mo bolella hore ha ke batle bophelo bo bolutu, empa ke batla hore ke khone ho etsa lintho tse fapa-fapaneng tšebeletsong ea hae.”

 Lilemo tse seng kae hamorao, Bruno o ile a ea naheng ea Ecuador, Amerika Boroa. O re: “Jehova o ile a araba thapelo ea ka ho feta kamoo ke neng ke lebeletse kateng.” Ha a fihla Ecuador, o ile a makala ha a kopana le bacha ba bang ba bangata ba neng ba falletse moo ho ea sebeletsa Jehova ka botlalo.

BACHA BA ILENG BA ‘LEKA JEHOVA’

Joaloka bacha ba bang ba likete lefatšeng lohle, Bruno o ile a amohela memo ea Jehova e reng: “Ka kōpo, ntekeng, . . . hore na ebe nke ke ka le bulela likhoro tsa moroallo tsa maholimo ’me ke le tšollele tlhohonolofatso.” (Mal. 3:10) Kaha ba ne ba rata Molimo, ba ile ba etsa qeto ea hore ba ‘leke Jehova’ ka hore ba sebelise nako ea bona, matla a bona le matlotlo a bona ka ho rata ho ea thusa naheng eo ho hlokahalang baboleli ba bangata ba ’Muso.

Nakoana ka mor’a hore basebetsi bana ba ratang mosebetsi oa bona ba fihle kabelong ea bona e ncha, ba ile ba hlokomela hore “kotulo e khōlō, empa basebetsi ha ba bakae.” (Mat. 9:37) Ka mohlala, Jaqueline oa Jeremane o ile a ngolla lekala la Ecuador a re: “Ke se ke sebelelitse Ecuador ka lilemo tse ka holimonyana ho tse peli, empa ke se ke e-na le lithuto tsa Bibele tse 13, tse ’nè tsa tsona li ba teng libokeng kamehla. Ruri eo ke ntho e thabisang!” Chantal oa Canada o re: “Ka 2008, ke ile ka fallela sebakeng se seng se lebōpong la Ecuador moo ho neng ho e-na le phutheho e le ’ngoe feela. Hona joale ho na le liphutheho tse tharo sebakeng seo le bo-pula-maliboho ba fetang 30. Ruri hoa hlolla ho bona batho ba bangata hakana ba tsoela pele moeeng!” O phaella ka ho re: “Ke sa tsoa fallela motseng o mong o bophahamong ba limithara tse 2 743, Lithabeng Tsa Andes.  Motse oo o na le baahi ba fetang 75 000 empa ho na le phutheho e le ’ngoe feela. Ruri ke tšimo e behang litholoana! Ke thabela tšebeletso eo ke e etsang haholo.”

MATHATA AO BA THULANANG LE ’ONA

Ke ’nete hore ho sebeletsa naheng e ’ngoe ho na le mathata a ikhethang. Ha e le hantle, bacha ba bang ba ile ba kopana le mathata le pele ba fallela naheng e ’ngoe. Kayla oa United States o re: “Lintho tseo bara le barali babo rōna ba moo ke tsoang teng ba neng ba li bua le hoja e ne e se ka moea o mobe li ne li nyahamisa. Ba ne ba sa utloisise hore na ke hobane’ng ha ke batla ho ea bula maliboho naheng e ’ngoe. Seo se ne se etsa hore ka linako tse ling ke ipotse, ‘Na ebe ke etsa qeto e nepahetseng?’” Ho sa tsotella seo, Kayla o ile a etsa qeto ea ho falla. O re: “Ho lula ke rapela Jehova le ho buisana le bara le barali babo rōna ba hōlileng moeeng ho ile ha nthusa hore ke bone hore Jehova o hlohonolofatsa batho ba itelang.”

Batho ba bangata ba thatafalloa ke ho ithuta puo e ’ngoe. Siobhan oa Ireland o re: “Ke ne ke nyahama ha ke sa khone ho itlhalosa. Ke ile ka tlameha ho ithuta ho ba le mamello le ho ikitlaetsa ha ke ntse ke ithuta puo ea sebakeng seo ’me ha ke fosa ke ne ke itšehela.” Anna oa Estonia o re: “Ho ithuta Sepanishe ho ne ho le thata ho feta ho mamella mocheso, lerōle le lengata, le ho se hlape ka metsi a chesang. Ka linako tse ling, ke ne ke ee ke utloe eka nka tlohela. Ke ile ka tlameha ho tsepamisa kelello moo ke neng ke etsa hantle teng eseng liphosong tseo ke neng ke li etsa.”

Bothata bo bong boo batho ba thulanang le bona ke ho hlolohela hae. Jonathan oa United States o re: “Nakoana ka mor’a hore ke fihle sebakeng seo, ke ile ka ikutloa ke nyahame kaha ke ne ke le hōle le metsoalle le ba lelapa leso. Empa ke ile ka hlōla bothata boo ka hore ke ithute Bibele ka matla le ka hore ke tsepamise kelello mosebetsing oa boboleli. Ho e-s’o ee kae, liphihlelo tse thabisang tseo ke ileng ka ba le tsona tšebeletsong ea tšimo le metsoalle e mecha eo ke ileng ka ba le eona ka phuthehong e ile ea nthusa hore ke boele ke thabe.”

Bothata bo bong ke maemo ao batho ba phelang ho ’ona. Ho ka etsahala hore ebe maemo ao u tla phela ho ’ona a fapane le ao u a tloaetseng. Beau oa Canada o re: “Naheng eo u tsoang ho eona, u khella fatše litšebeletso tsa motheo tse kang motlakase le metsi. Empa sebakeng sena, litšebeletso tsena ha li lule li le teng kamehla.” Bofutsana, lipalangoang tse seng maemong a matle hammoho le batho ba sa  tsebeng ho bala le ho ngola ke lintho tse tloaelehileng linaheng tse ntseng li tsoela pele moruong. Ines oa Austria o mamella mathata ao ka hore a tsepamise kelello litšobotsing tse ntle tsa batho ba lulang sebakeng seo. O re: “Ke batho ba amohelang baeti, ba bonolo, ba thusang batho ebile ba ikokobelitse. Ntho ea bohlokoa ka ho fetisisa ke hore ba thabela ho ithuta ka Molimo haholo.”

“TLHOHONOLOFATSO HO FIHLELA HO SE HO SE LETHO LE HLOKOANG”

Le hoja bacha bana kaofela ba neng ba sebeletsa Ecuador ba ne ba itetse, ba ile ba hlokomela hore Jehova o ba fa “ka ho fetisisang ho feta lintho tsohle” tseo ba neng ba li lebeletse. (Baef. 3:20) Ka sebele, baa hlokomela hore ba fumane “tlhohonolofatso ho fihlela ho se ho se letho le hlokoang.” (Mal. 3:10) Maikutlo a bona ka mosebetsi oa boboleli ke ana:

Bruno: “Ke qalile tšebeletso ea ka mona Ecuador sebakeng se tsotehang sa Amazon. Hamorao, ke ile ka ea thusa ha ho ne ho atolosoa ofisi ea lekala ea Ecuador. Hona joale ke sebeletsa Bethele. Ha ke ne ke sa le Italy, ke ile ka etsa qeto ea ho etelletsa Jehova pele bophelong ba ka, ’me kannete o phethahatsa takatso ea ka ea hore ke khone ho etsa lintho tse fapa-fapaneng tšebeletsong ea hae.”

Beau: “Ke na le kamano e haufi haholo le Jehova kaha mona Ecuador ke sebelisa nako eohle ea ka ke etsa mesebetsi e amanang le borapeli. Ka nako e tšoanang, ke boetse ke khona ho ea libakeng tse ntle—e leng ntho eo esale ke e batla.”

Anna: “Ke ne ke sa nahane hore le hoja ke le lesoha nka thabela ho phela bophelo bo kang ba baromuoa. Empa hona joale kea tseba hore seo se ka khoneha. Kaha Jehova oa ntlhohonolofatsa, ke thabela ho etsa mosebetsi oa ho etsa barutuoa, ke haha Liholo Tsa ’Muso ebile ke etsa metsoalle e mecha.”

Elke: “Ha ke ne ke le naheng ea heso ea Austria, ke ne ke atisa ho rapela Jehova hore a nthuse hore ke be le ha e se e le thuto e le ’ngoe feela ea Bibele. Mona ke na le lithuto tsa Bibele tse 15! Ke khotsofala haholo ha ke bona kamoo batho bao ke ithutang le bona ba thabang kateng ha ba ntse ba tsoela pele moeeng.”

Joel: “Ke ntho e thabisang haholo ha motho a fihla sebakeng seo a sa se tsebeng moo a il’o sebeletsa Jehova. U ithuta ho mo tšepa haholo, ’me hoa thabisa ho bona kamoo a hlohonolofatsang boiteko ba hao kateng! Selemong sa pele ke fihlile mona ke tsoa United States, bahoeletsi ba sehlopha seo ke sebeletsang ho sona ba ile ba eketseha ho tloha ho ba 6 ho ea ho ba 21. Batho ba neng ba tlile Sehopotsong ba ne ba le 110.”

NA LE UENA U KA KHONA?

Bara le barali babo rōna ba bacha, na maemo a lōna a le lumella ho ea sebeletsa naheng eo ho hlokahalang baboleli ba bangata ba ’Muso? Ke ’nete hore pele motho a etsa qeto e khōlō hakaalo, ho tla hlokahala hore a hlophise lintho hantle. Ka holimo ho tsohle, motho o lokela ho rata Jehova le baahelani ba hae haholo e le hore a ka nka bohato boo. Haeba u e-na le lerato le joalo ebile u tšoaneleha ka litsela tse ling, rapela Jehova ka tieo hore a u thuse hore u khone ho ea sebeletsa naheng e ’ngoe. Ho feta moo, buisana le batsoali ba hao ba Bakreste le baholo ba phutheho ka seo u batlang ho se etsa. Le uena u ka ’na ua etsa qeto ea hore u ka rata ho etsa tšebeletso ena e halalelang, e thabisang le e khotsofatsang.

[Ntlha e Qolotsoeng e leqepheng la 3]

“Ho lula ke rapela Jehova le ho buisana le bara le barali babo rōna ba hōlileng moeeng ho ile ha nthusa hore ke bone hore Jehova o hlohonolofatsa batho ba itelang.”—Kayla oa United States

[Lebokose/Setšoantšo se leqepheng la 6]

Kamoo u ka itokisetsang ho sebeletsa naheng e ’ngoe

• Etsa thuto ea botho kamehla

• Hlahloba Tšebeletso ea Rōna ea ’Muso ea August 2011, leqepheng la 4-6

• Buisana le batho ba kileng ba sebeletsa naheng e ’ngoe

• Etsa lipatlisiso ka setso le histori ea naha eo

• Fumana thupelo ea motheo ea puo ea naha eo

[Lebokose/Setšoantšo se leqepheng la 6]

Batho ba bang ba sebeletsang linaheng tse ling ba iphelisa ka . . .

• hore ba sebetse likhoeli tse ’maloa selemo le selemo naheng ea habo bona

• hore ba hirise matlo, lifolete kapa likhoebo tsa bona

• hore ba sebetse ka Inthanete

[Litšoantšo tse maqepheng a 4, 5]

1 Jaqueline oa Jeremane

2 Bruno oa Italy

3 Beau oa Canada

4 Siobhan oa Ireland

5 Joel oa United States

6 Jonathan oa United States

7 Anna oa Estonia

8 Elke oa Austria

9 Chantal oa Canada

10 Ines oa Austria