RURI hoa thabisa ho bona bacha ba bangata ba Lipaki ba nolofatsa tsela eo ba phelang ka eona e le hore ba ka eketsa tšebeletso ea bona ea Bokreste. (Mat. 6:22) Ba etsa liphetoho life? Ba thulana le litšitiso life? E le hore re fumane likarabo, a re ke re mameleng ha ba bang bao hona joale ba sebeletsang Mexico ba re bolella.

Dustin le Jassa ba tsoang United States, ba ile ba nyalana ka January 2007. Nakoana ka mor’a moo, ba ile ba finyella toro ea bona ea nako e telele—e leng ea ho ba le seketsoana se tsamaisoang ka seile le ho lula ka har’a sona selemo ho pota. Seketsoana sa bona se ile sa emisa haufi le Astoria, Oregon, U.S.A., e leng toropo e ntle e pota-potiloeng ke maralla a nang le meru le lithaba tse koahetsoeng ke lehloa, e haufi le Leoatle la Pacific. Dustin o re: “Hohle moo re neng re sheba teng, e ne e le libaka tse ntle ka tsela e hlollang!” Banyalani bao ba ne ba bona eka ba phela bophelo ba itekanetseng, ba bile ba itšetlehile ka Jehova. Ba ile ba nahana ba re, ‘ho feta moo, re lula ka seketsoaneng se boholo ba limithara tse robeli, re sebetsa ka nakoana, re kopanela phuthehong e buang puo esele, ebile nako le nako re ba bo-pula-maliboho ba thusang.’ Empa ka mor’a nakoana ba ile ba hlokomela hore ba ne ba ntse ba ithetsa. Dustin o re: “Ho e-na le hore re tšehetse phutheho, re ne re qeta nako e ngata re ntse re lokisa seketsoana sa rōna. Re ne re tseba hore haeba re ne re hlile re batla ho etelletsa Jehova pele bophelong ba rōna, re ne re lokela ho etsa phetoho.”

 Jassa o phaella ka ho re: “Pele ke nyaloa ke ne ke lula Mexico, moo ke neng ke kopanela phuthehong e buang Senyesemane. Ke ile ka thabela ho sebeletsa moo ’me ke ne ke labalabela ho khutlela teng.” E le hore Dustin le Jassa ba matlafatse takatso ea bona ea ho sebeletsa naheng e ’ngoe, nakong ea borapeli ba lelapa ba ile ba bala lipale tsa bophelo tse neng li bua ka bara le barali babo rōna ba ileng ba fallela linaheng tse ling, moo masimo a neng a loketse kotulo. (Joh. 4:35) Dustin o re: “Re ne re batla ho thaba joaloka bona.” Ha metsoalle ea Dustin le Jassa e Mexico e ne e ba bolella hore ho na le sehlopha se sa tsoa thehoa se hlokang thuso, ba ile ba etsa qeto. Ba ile ba tlohela mesebetsi ea bona, ba rekisa seketsoana sa bona eaba ba fallela Mexico.

Dustin le Jassa ba ile ba lula toropong ea Tecomán—e ntseng e le haufi le Leoatle la Pacific empa e le bohōle ba lik’hilomithara tse ka bang 4 300 ka boroa ho Astoria. Dustin o re: “Ho e-na le ho hahloa ke moea o pholileng le ho boha lithaba tse ntle, re bataoloa ke mocheso ’me hohle moo motho a shebang teng o bona lifate tsa sirilamunu.” Qalong, ba ne ba sa khone ho fumana mosebetsi. Kaha ba ne ba se na chelete, ba ne ba ja raese le linaoa habeli ka letsatsi beke e ’ngoe le e ’ngoe. Jassa o re: “Empa nakong eo re neng re utloa hore ha re sa khona ho mamella lijo tseo, batho bao re neng re ithuta Bibele le bona ba ile ba qala ho re fa limango, libanana, li-papaya le mekotla e tletseng lisirilamunu!” Ha nako e ntse e ea, banyalani bao ba ile ba fumana mosebetsi sekolong se neng se ruta batho lipuo tse ling Inthaneteng se neng se le Taiwan. Hona joale chelete eo ba e fumanang mosebetsing oo, e ba thusa ho fumana boholo ba lintho tseo ba li hlokang letsatsi le leng le le leng.

Dustin le Jassa ba ikutloa joang ka tsela e ncha eo ba phelang ka eona? Ba re: “Ho falla ha rōna ke ntho ea bohlokoa ka ho fetisisa eo re e entseng. Kamano ea rōna le Jehova le kamano eo re nang le eona ka borōna e matla ho feta kamoo re neng re ka nahana kateng. Letsatsi le leng le le leng re etsa lintho tse ngata hammoho—re ea tšebeletsong ea tšimo, rea buisana hore na re ka etsa’ng ho thusa batho bao re ithutang Bibele le bona hammoho le ho lokisetsa liboka. Re boetse re lokolohile likhatellong tseo re neng re e-na le tsona pele.” Ba phaella ka ho re: “Hona joale re lemohile ntho eo pele re neng re sa e utloisise ka botlalo—e leng bonnete ba tšepiso ena e fumanoang Pesalemeng ea 34:8 e reng, ‘Latsoang ’me le bone hore Jehova o molemo.’”

Bara le barali babo rōna ba fetang 2 900—ba lenyalong le ba masoha, bao boholo ba bona ba leng lilemong tsa bo-20 le bo-30—ba falletse hore ba eo sebeletsa Mexico libakeng tseo ho ntseng ho hlokahala baboleli ba ’Muso ba bangata. Ke hobane’ng ha Lipaki tsee li khethile ho etsa mosebetsi oo, le hoja ho se bonolo ho o etsa? Ha sehlopha sa bona se ne se botsoa potso eo, se ile sa fana ka mabaka a mararo a ka sehloohong. Ke afe?

 Ho bontša lerato ho Jehova le ho batho ba bang. Leticia o ile a kolobetsoa ha a le lilemo li 18. O re: “Ha ke ne ke inehela ho Jehova, ke ne ke utloisisa hore seo se ne se bolela hore ke lokela ho mo sebeletsa ka pelo ea ka eohle le ka moea oa ka oohle. Joale, e le ho bontša hore ke rata Jehova ka pelo ea ka eohle, ke ne ke batla ho sebelisa nako ea ka e ngata le matla a ka tšebeletsong ea hae.” (Mar. 12:30) Hermilo, eo hona joale a nyetseng Leticia, o ne a le lilemo li ka holimonyana ho 20 ha a ne a fallela moo ho neng ho hlokahala baboleli ba ’Muso ba bangata. O re: “Ke ile ka hlokomela hore ho thusa batho ba bang hore ba fumane lintho tseo ba li hlokang moeeng e ne e ka ba tsela e molemo ka ho fetisisa ea ho bontša lerato ho moahelani.” (Mar. 12:31) Kahoo, o ile a tloha toropong e neng e atlehile moruong ea Monterrey moo a neng a sebetsa bankeng a bile a phela hamonate eaba o fallela toropong e nyenyane.

E le hore re ka ba le bophelo ba sebele le thabo e tšoarellang. Nakoana ka mor’a hore Leticia a kolobetsoe, o ile a felehetsa morali e mong oabo rōna oa pula-maliboho ea nang le boiphihlelo ho ea toropong e ka thōko moo ba ileng ba etsa mosebetsi oa boboleli nako e etsang khoeli. Leticia o re: “Ke ne ke hloletsoe. Ha ke bona kamoo batho ba neng ba amohela molaetsa oa ’Muso kateng, ke ile ka thaba haholo. Mafelong a khoeli eo ke ile ka re, ‘Sena ke sona seo ke batlang ho se etsa ka bophelo ba ka!’” Ka ho tšoanang, Essly, e leng morali’abo rōna oa lesoha eo hona joale a leng lilemo li ka holimonyana ho 20, o ile a hoheloa ke thabo eo a ileng a e bona ho batho ba neng ba le tšebeletsong ea mofuta oo. Ha a ne a ntse a le sekolong se phahameng, o ile a kopana le Lipaki tse ’maloa tse chesehang tse neng li sebeletsa moo ho neng ho hlokahala baboleli ba ’Muso ba bangata. O re, “Ha ke ne ke bona kamoo bara le barali babo rōna ba neng ba thabile kateng, le ’na ke ile ka utloa ke batla ho phela bophelo bo joalo.” Baralib’abo rōna ba bangata ba ile ba nka bohato bo tšoanang le ba Essly. Ha e le hantle, baralib’abo rōna ba masoha ba fetang 680 ba Mexico ba sebeletsa moo ho hlokahalang baboleli ba ’Muso ba bangata. Ruri oo ke mohlala o motle oo ba o behelang bacha le batho ba baholo!

Ho phela bophelo bo nang le morero le bo khotsofatsang. Ha Essly a qeta sekolong se phahameng, o ile a tšepisoa lihlapiso tsa ho ea univesithi. Lithaka tsa hae li ile tsa mo khothalletsa hore a amohele lihlapiso tseo e le hore a ka phela hoo ho ka thoeng ke “bophelo bo tloaelehileng”—hore a be le lengolo la thuto e phahameng la univesithi, a fumane mosebetsi o lefang haholo, a be le koloi a be a nke le maeto a bone libaka. Leha ho le joalo, ha aa ka a mamela keletso ea bona. Essly o re: “Boholo ba metsoalle ea ka ea Bakreste e ile ea phehella lintho tsena ’me ke ile ka hlokomela hore e ne e se e sa etelletse lintho tsa moea pele bophelong ba eona. Ke ile ka boela ka bona kamoo e neng e ferekana kateng ha e ne e thulana le mathata ka lebaka la ho kenella linthong tsa lefatše lena. Ke ne ke batla ho sebelisa bocha ba ka ho sebeletsa Jehova ka botlalo.”

 Essly o ile a etsa lithuto tsa tlatsetso e le hore a ka khona ho sebetsa a tsebe ho iphelisa ha e le pula-maliboho, ’me o ile a fallela sebakeng se neng se hloka baboleli ba ’Muso ba bangata ka potlako. O ile a ba a ithuta lipuo tse neng li buuoa ke matsoalloa a Otomi le a Tlapaneco. Hona joale ha a hopola lilemo tse tharo tseo a sebelitseng libakeng tse ka thōko ka tsona, o re: “Ho sebeletsa moo ho hlokahalang baboleli ba ’Muso ba bangata ho ntliselitse khotsofalo e khōlō ’me ke na le morero oa sebele bophelong. Ka holimo ho tsohle, ho entse hore ke be le kamano e matla haholo le Jehova.” Phillip le Racquel, e leng banyalani ba lilemo li ka holimonyana ho 30 ba tsoang United States, ba lumellana le seo. Ba re, “Lefatše le fetoha kapele hoo batho ba bangata ba utloang hore bophelo ba bona ha boa tsitsa. Empa ho sebeletsa moo re ntseng re fumana batho ba bangata ba mamelang molaetsa oa Bibele ho entse hore bophelo ba rōna bo be le morero. Ruri seo sea khotsofatsa!”

Ka sebele, ho sebeletsa moo ho hlokahalang baboleli ba ’Muso ba bangata ho ka ba le mathata a hona. Bothata bo bong e ka ba hore na u tla itlhokomela joang licheleteng. E le hore u ka etsa seo, u lokela ho ikemisetsa ho ikamahanya le maemo a sebaka seo u sebeletsang ho sona. Verónica, eo e leng pula-maliboho e nang le boiphihlelo o re: “Sebakeng se seng moo ke neng ke sebeletsa teng, ke ne ke pheha ke bile ke rekisa lijo tse chipi. Sebakeng se seng ke rekisa liaparo ke bile ke kuta batho moriri. Hona joale, ke etsa mosebetsi oa ho hloekisa malapeng ebile ke ruta batsoali ba bacha hore na ba lokela ho buisana le bana ba bona joang.”

Ho tloaela setso le mekhoa ea sebaka se seng ho ka ba thata haholo-holo haeba u phela har’a batho bao e leng matsoalloa a sebaka seo se ka thōko. Ke boemo boo Phillip le Racquel ba ileng ba thulana le bona ha ba ne ba sebeletsa tšimong eo ho eona ho buuoang puo ea Senahuatl. Phillip o re: “Setso sa sebakeng seo se ne se fapane haholo le sa rōna.” Ke’ng e ileng ea ba thusa hore ba tloaele maemo a sebakeng seo? Phillip o re: “Re ile ra tsepamisa likelello tsa rōna litšobotsing tse ntle tseo re ileng ra li bona ho batho ba Manahuatl—e leng kamano e mofuthu eo malapa a neng a e-na le eona, botšepehi boo ba neng ba bo bontša le ho fana ha bona.” Racquel o phaella ka ho re: “Re ile ra ithuta lintho tse ngata ka ho lula moo le ka ho sebetsa hammoho le bara le barali babo rōna bao e neng e le matsoalloa a moo.”

Haeba u ka rata ho sebeletsa libakeng tse ka thōko moo ho hlokahalang baboleli ba ’Muso ba bangata, ke sefe seo u ka se etsang hona joale ho itokisetsa tšebeletso eo? Bara le barali babo rōna ba nang le boiphihlelo tšebeletsong eo ba re: Pele u ka falla, qala ka ho nolofatsa tsela eo u phelang ka eona ’me u ithute ho khotsofala. (Bafil. 4:11, 12) Ke sefe hape seo u ka se etsa’ng? Leticia o re: “Ke ne ke qoba mosebetsi oa boipheliso o neng o ntlama ho lula sebakeng se le seng nako e telele. Ke ne ke batla hore ke khone ho fallela kae kapa kae neng le neng ha ke batla.” Hermilo o re: “Ke ile ka ithuta ho pheha, ho hlatsoa liaparo le ho li aena.” Verónica o re: “Ha ke ne ke ntse ke lula lapeng le batsoali ba ka le banab’eso, ke ne ke thusa ka ho hloekisa ’me ke ile ka ithuta le ho pheha lijo tse chipi empa e le tse matlafatsang. Ke ile ka boela ka ithuta ho baballa lintho.”

Levi le Amelia ba tsoang United States ba bileng ba nang le lilemo tse robeli ba nyalane, ba re bolella kamoo lithapelo tse tobileng li ileng tsa ba thusa kateng hore ba il’o sebeletsa Mexico. Levi o re: “Re ile ra hakanya hore na re ne re ka hloka chelete e kae e le hore re ka sebeletsa naheng e ’ngoe selemo eaba re kōpa Jehova hore a re thuse ho fumana chelete e kaalo.” Ka mor’a likhoeli tse ’maloa ba ile ba khona ho boloka chelete eo, eo ba neng ba e boletse thapelong ea bona ’me ba ile ba falla ntle ho tšenyo ea nako. Levi o re: “Jehova o ne a arabile kōpo ea rōna e tobileng, kahoo, joale e ne e le nako ea hore rōna re phethahatse seo re se kōpileng.” Amelia o phaella ka ho re: “Re ne re nahana hore re tla lula mona selemo se le seng feela, empa hona joale re se re lutse lilemo tse supileng ebile ha ke kholoe hore re sa tla tloha! Ho lula mona ho re fa monyetla oa hore re bone thuso ea Jehova ka ho toba. Letsatsi le leng le le leng re bona kamoo a leng molemo kateng.”

Adam le Jennifer, bao e leng banyalani ba tsoang United States, ba sebeletsang tšimong ea batho ba buang Senyesemane Mexico, le bona thapelo e ile ea phetha karolo ea bohlokoa bophelong ba bona. Khothalletso ea bona ke ena: “U se ke ua emela hore u be le maemo a tsitsitseng. Rapela mabapi le takatso ea hao ea ho sebeletsa naheng e ’ngoe, e be u sebeletsa ho seo u se rapeletseng. Nolofatsa bophelo ba hao, ngolla ofisi ea lekala e naheng eo u ka ratang ho sebeletsa ho eona ebe u nka bohato ka mor’a hore u bale litšenyehelo!” * Ha u etsa seo, u tla fumana bophelo bo thabisang u be u matlafale moeeng.