1, 2. (a) Ha e le hantle, ke’ng e ka ’nang ea susumetsa hore na re bona’ng? (b) Re ka kholiseha ka eng mabapi le ’Muso oa Molimo?

MOHLOMONG u hlokometse hore batho ba boneng ketsahalo e itseng, ba atisa ho e hlalosa ka litsela tse sa tšoaneng. Maemong a mang, motho a ka ’na a thatafalloa ho hopola hantle seo ngaka e mo boleletseng sona ha e qeta ho mo hlahloba. Kapa a ka ’na a se ke a bona linotlolo kapa likhalase tsa hae tsa mahlo, le hoja li le pel’a hae. E ka ’na eaba maemong ana kaofela ke hobane motho a na le seo litsebi li reng ke mofuta o mong oa bofofu—ho se hlokomele kapa ho lebala ntho hobane feela a ntse a sa nahane ka eona. Li re ena ke tsela e ’ngoe eo boko ba rōna bo sebetsang ka eona.

² Sena ke se etsahalang ka batho ba bangata kajeno ha ho tluoa tabeng ea ho hlokomela se boleloang ke liketsahalo tsa lefatše. Ba ka ’na ba lumela hore lefatše le fetohile haholo ho tloha ka 1914, empa ha ba utloisise bohlokoa ba liketsahalo tsena. Kaha re liithuti tsa Bibele, rea tseba hore ka kutloisiso e itseng ’Muso oa Molimo o qalile ho busa ka 1914 ha Jesu a hlomamisoa e le Morena leholimong. Empa rea tseba hore ho ameha ho hongata hore thapelo ea rōna e arajoe ha re re, “’Muso oa hao o ke o tle. Thato ea hao e ke e etsahale lefatšeng,  joalokaha e etsahala leholimong.” (Mat. 6:10) Ho hlakile hore seo se akarelletsa ho felisoa ha tsamaiso ena e khopo ea lintho. Ha e se e felisitsoe, thato ea Molimo e tla etsoa lefatšeng joalokaha e etsoa leholimong.

3. Ho ithuta Lentsoe la Molimo ho re tsoela molemo joang?

³ Kaha re lula re ithuta Lentsoe la Molimo, re khona ho bona hore hona joale boprofeta boa phethahala. Empa batho ba bangata ha ba lemohe seo! Ba phathahane ka lintho tseo ba batlang ho li etsa hoo ba sa boneng bopaki bo totobetseng ba hore Kreste o qalile ho busa ka 1914 le hore haufinyane o tla tlisa kahlolo ea Molimo. Empa ak’u ipotse potso ena: Haeba e se e le lilemo tse mashome u sebeletsa Molimo, na u ntse u falimehetse se boleloang ke liketsahalo tsa mehla ee ea rōna le ho ameha ka tsona joaloka lilemong tse fetileng? Esita le haeba u sa tsoa ba Paki, u amehile ka eng haholo? Ho sa tsotellehe hore na re araba lipotso tseo joang, a re hlahlobeng mabaka a mararo a bohlokoa ao ka ’ona re ka kholisehang hore haufinyane Morena eo Molimo a mo tlotsitseng o tla nka khato hape ho etsa hore thato ea Molimo e etsoe ka ho feletseng lefatšeng.

4, 5. (a) Jesu o ’nile a etsa’ng ho tloha ka 1914? (Sheba setšoantšo se qalong.) (b) Bapalami ba bararo ba lipere ba tšoantšetsa’ng, hona ho ’nile ha etsahala’ng?

⁴ Ka 1914, Jesu Kreste—ea hlalosoang a palame pere e tšoeu—o ile a behoa boreneng leholimong. O ile a qala hang-hang ho phetha tlhōlo ea hae tsamaisong e khopo ea lintho ea Satane. (Bala Tšenolo 6:1, 2.) Ho latela boprofeta bo ho Tšenolo khaolo ea 6, re ka lebella hore ha ’Muso oa Molimo o se o hlomiloe, lintho tse kang lintoa, khaello ea lijo, mafu a seoa le lintho tse ling tse bolaeang batho, li ate ka potlako. Lintho tsena li tšoantšelitsoe ke bapalami ba bararo ba lipere ba latelang Jesu Kreste.—Tšen. 6:3-8.

⁵ Joalokaha ho boletsoe esale pele, khotso e ile ea ‘tlosoa lefatšeng,’ le hoja batho ba ne ba tšepisa hore lichaba li tla momahana le ho rerisana. Ho ka boleloa hore Ntoa ea I ea Lefatše e bile qalo ea lintoa tse ikhethang, e leng se pakoang ke lintho tse etsahalang morao tjena lefatšeng. Ho sa tsotellehe khatelo-pele e entsoeng litabeng tsa moruo le tsa saense ho tloha ka 1914, lefatše le ntse le le kotsing ka lebaka la khaello ea lijo. Ho feta moo, ke mang ea ka latolang hore selemo le selemo, batho ba limilione ba ntse ba bolaoa ke mafu a seoa le likoluoa tsa tlhaho? Lintho tsena li etsahala ka tsela eo li e-s’o ka li etsahala ka eona pele. Na u nka ka botebo se boleloang ke seo?

6. Ke bo-mang ba neng ba etse hloko ho phethahala ha boprofeta ba Bibele, hona seo se ile sa ba susumelletsa hore ba etse’ng?

⁶ Batho ba bangata ba ile ba ferekana ha ho qhoma Ntoa ea I ea Lefatše le mokakallane oa Spain. Empa Bakreste ba tlotsitsoeng ba ne ba lebeletse hore ka 1914 Linako Tsa Balichaba, kapa “linako tse behiloeng tsa lichaba,” li tla fela. (Luka 21:24) Ba ne ba sa tsebe hantle hore na ho tla etsahala’ng. Leha ho le joalo, ba ne ba tseba hore 1914 e tla ba selemo sa bohlokoa mabapi le bobusi ba Molimo. Hang ha ba lemoha hore boprofeta ba Bibele boa phethahala, ba ile ba bolella ba bang ka sebete hore Molimo o se a qalile ho busa. Boiteko ba bona ba ho phatlalatsa molaetsa oa ’Muso bo ile ba etsa hore ba hlorisoe haholo. Ho hlorisoa ha bona lichabeng tse ngata le hona ho ne ho phethahatsa boprofeta. Ka lilemo tse mashome tse ileng tsa latela, lira tsa ’Muso li ile tsa “rera khathatso ka molao-taelo.” Li ile tsa boela tsa sebelisa mabifi, tsa koalla  barab’abo rōna lichankaneng esita le ho ba bolaea ka ho ba fanyeha, ho ba thunya kapa ho ba khaola lihlooho.—Pes. 94:20; Tšen. 12:15.

7. Ke hobane’ng ha batho ba bangata ba sa lemohe se boleloang ke liketsahalo tsa lefatše?

⁷ Kaha ho na le bopaki bo bongata ba hore ’Muso oa Molimo o se o hlonngoe leholimong, ke hobane’ng ha batho ba bangata ba sa lumele seo? Ke hobane’ng ha ba sa khone ho amahanya lintho tse etsahalang lefatšeng le boprofeta ba Bibele boo e leng khale batho ba Molimo ba bo phatlalatsa? Na ebe ke hobane batho ba bangata ba tsepamisa likelello feela linthong tseo ba ka li bonang? (2 Bakor. 5:7) Na ba amehile haholo ka lintho tseo batho ba li etsang hoo ba sa boneng seo Molimo a se etsang? (Mat. 24:37-39) Kapa na ba bang ba bona ba ferekanngoa ke mashano ao Satane a a phatlalatsang? (2 Bakor. 4:4) Ho hlokahala hore motho a be le tumelo le temoho e le hore a bone lintho tseo Molimo a li etsang. Ruri rea thaba hore ebe re lemoha se hlileng se etsahalang!

8-10. (a) Se boletsoeng ho 2 Timothea 3:1-5 se ’nile sa phethahala joang? (b) Ke hobane’ng ha re ka bolela hore batho ba tloha bobeng ho ea bobeng bo fetisisang?

⁸ Lebaka la bobeli leo ka lona re tsebang hore haufinyane ’Muso oa Molimo o tla laola lintho tse etsahalang lefatšeng ke hore: Batho ba tloha bobeng ho ea bobeng bo fetisisang. E se e le lilemo tse ka bang lekholo joale, lintho tse boletsoeng esale pele ho 2 Timothea 3:1-5 li etsahala. Li ntse li ata le ho mpefala le ho feta. Na u lemoha kamoo boprofeta boo bo phethahalang ka matla kateng? A re ke re hlahlobeng mehlala e seng mekae e bontšang sena.—Bala 2 Timothea 3:1, 13.

⁹ Ak’u nahane ka lintho tseo batho ba neng ba li nka li nyarosa lilemong tsa bo-1940 kapa bo-1950, u li bapise le tse etsahalang kajeno mesebetsing, boithabisong, lipapaling kapa litabeng tsa feshene. Liketso tse mabifi le tsa boitšoaro bo bobe li atile kajeno. Batho ba batla ho hlahella e le ba mabifi, ba sa hloekang kapa ba sehlōhō ho feta motho leha e le ofe  e mong. Mananeo a thelevishene ao lilemong tsa bo-1950, a neng a nkoa e le a sa amoheleheng, hona joale hothoe a loketse hore a ka shebelloa ke lelapa. Batho ba bangata baa elelloa hore basodoma ba hlahella haholo boithabisong le litabeng tsa feshene, ’me ba buella tsela eo ba phelang ka eona. Ruri rea leboha hore ebe re tseba tsela eo Molimo a talimang lintho ka eona!—Bala Juda 14, 15.

¹⁰ Mokreste a ka boetse a nahana ka lintho tseo ha bacha ba ne ba li etsa lilemong tsa bo-1950 ho neng ho nkoa hore ke borabele, ebe o li bapisa le se etsahalang kajeno. Batsoali ba ne ba atisa ho tšoenyeha ka hore na bana baa tsuba, baa noa, kapa hona hore na ba tantša ka tsela e tsoileng tseleng. Kajeno re lula re utloa litaba tse nyarosang: Moithuti ea lilemo li 15 o thunya bao a kenang le bona ka tlelaseng, o bolaea ba babeli ’me o lematsa ba 13. Bacha ba tahiloeng ba bolaea ngoanana ea lilemo li robong ka sehlōhō, ’me ba khakhatha ntate oa hae le motsoal’ae. Ho tlalehoa hore bacha naheng e ’ngoe ea Asia ke bona ba entseng liketso tse ngata tsa tlōlo ea molao moo lilemong tse leshome tse fetileng. Na ho na le motho ea ka hanang hore maemo a mpefetse?

11. Ke hobane’ng ha batho ba bangata ba sa lemohe hore lintho li ntse li mpefala?

¹¹ Moapostola Petrose o ne a nepile ha a re: “Matsatsing a ho qetela ho tla tla basomi ka ho soma ha bona, ba tsoela pele ho ea ka litakatso tsa bona ba re: ‘Ho kae ho ba teng hoo ho tšepisitsoeng ha hae? Ka sebele, ho tloha letsatsing la ha baholo-holo ba rōna ba robala lefung, lintho tsohle li tsoela pele hantle feela joaloka ho tloha tšimolohong ea pōpo.’” (2 Pet. 3:3, 4) E ka ’na eaba ke’ng ha batho ba bang ba itšoara ka tsela ee? Ho bonahala eka ha batho ba tloaetse boemo bo itseng, ha ba bo nkele hloohong haholo. Ho hlepha ha boitšoaro sechabeng ho ka ’na ha se ke ha bonahala ho nyarosa joalokaha motsoalle ea haufi a ka fetoha ka tšohanyetso. Leha ho le joalo, ho hlepha hona ha boitšoaro butle-butle ho kotsi.

12, 13. (a) Ke hobane’ng ha re sa lokela ho nyahamisoa ke lintho tse etsahalang lefatšeng? (b) Ke’ng eo re lokelang ho e lemoha e tla re thusa ho sebetsana le maemo ao ho leng ‘thata ho sebetsana le ’ona’?

¹² Moapostola Pauluse o ile a re lemosa hore “matsatsing a ho qetela,” ho ne ho tla ba le maemo a ‘thata ho sebetsana le ’ona.’ (2 Tim. 3:1) Empa hase hore re ke ke ra khona ho sebetsana le ’ona, kahoo ha rea lokela ho iphapanyetsa ’nete. Ka thuso ea Jehova, moea oa hae le phutheho ea Bokreste, re ka atleha ho hlōla ho soetseha le tšabo leha e le efe eo re ka bang le eona. Re ka lula re tšepahala. “Matla a fetang se tloaelehileng” ke a Molimo, eseng a rōna.—2 Bakor. 4:7-10.

¹³ Ke habohlokoa ho ela hloko hore Pauluse o ile a qala boprofeta boo bo mabapi le matsatsi a ho qetela ka poleloana e reng, “tseba sena.” Poleloana eo e tiisa hore mantsoe a e latelang a tla feela a phethahale. Ha ho potang hore batho ba sa tšabeng Molimo ba tla tsoela pele ho tloha bobeng ho ea bobeng bo fetisisang ho fihlela Jehova a ba felisa. Bo-rahistori ba tlalehile hore lichabeng tse ling, boitšoaro ba batho bo ile ba nyehla ka sekhahla ’me ka mor’a moo lichaba tseo tsa fela. Leha ho le joalo, ha ho mohla boitšoaro ba batho lefatšeng ka bophara bo kileng ba nyehla ka tsela eo bo nyehlileng ka eona kajeno. Batho ba bangata ba ka ’na ba iphapanyetsa se boleloang ke sena, empa liketsahalo tsena tse ikhethang tse etsahetseng ho tloha ka 1914 li lokela ho re fa tšepo ea hore haufinyane ’Muso oa Molimo o tla nka bohato bo matla.

14-16. Ke lebaka lefe le leng le etsang hore re lumele hore ’Muso oa Molimo o tla ‘tla’ haufinyane?

¹⁴ Ho na le lebaka la boraro le etsang hore re be le tšepo. Lintho tse seng li  etsahetse har’a batho ba Molimo li bontša hore bofelo bo atametse. Ka mohlala, pele ’Muso oa Molimo o hlongoa leholimong, batlotsuoa ba tšepahalang ba ne ba sebeletsa Molimo ka cheseho. Ba ile ba etsa’ng ha seo ba neng ba se lebeletse ka 1914 se sa phethahale? Ba bangata ba bona ba ile ba tšepahala le hoja ba ne ba tobana le liteko le mahloriso ’me ba tsoela pele ho sebeletsa Jehova. Ho theosa le lilemo, batlotsuoa ba bangata kapa bohle ba phethile tšebeletso ea bona lefatšeng.

¹⁵ Boprofeteng ba hae bo mabapi le qetello ea tsamaiso ena ea lintho, Jesu o ile a re: “Ho hang moloko ona o ke ke oa feta ho fihlela lintho tsena tsohle li etsahala.” (Bala Matheu 24:33-35.) Re lumela hore ha Jesu a re “moloko ona,” o ne a bua ka lihlopha tse peli tsa Bakreste ba tlotsitsoeng. Sehlopha sa pele ke sa batlotsuoa ba neng ba le teng ka 1914, ba ileng ba lemoha pontšo ea ho ba teng ha Kreste selemong seo. Hase feela hore ba ne ba phela ka 1914, empa ba ne ba tlotsitsoe ka moea e le bara ba Molimo selemong seo kapa pele ho sona.—Bar. 8:14-17.

¹⁶ Sehlopha sa bobeli se kenyelelitsoeng ‘molokong ona’ ke batlotsuoa ba phetseng ka nako e le ’ngoe le ba sehlopha sa pele. Hase feela hore ba phetse ka nako e le ’ngoe le bona, empa ba ne ba se ba tlotsitsoe ka moea o halalelang ha bao ba sehlopha sa pele ba ntse ba le lefatšeng. Kahoo, hase batlotsuoa bohle kajeno ba etsang “moloko ona” oo Jesu a buileng ka oona. Kajeno, ba sehlopheng seo sa bobeli ba se ba hōlile. Leha ho le joalo, mantsoe a Jesu a ho Matheu 24:34 a re tiisetsa hore bonyane ba bang ‘molokong oo ba ke ke ba feta’ pele ba bona qaleho ea matšoenyeho a maholo. Sena le sona se lokela ho re kholisa hore haufinyane Morena oa ’Muso oa Molimo o tla felisa ba khopo ’me a tlise lefatše le lecha la ho loka.—2 Pet. 3:13.

17. Ke qeto efe eo re ka e etsang re ipapisitse le mabaka a mararo ao re a tšohlileng?

¹⁷ Ke qeto efe eo re ka e etsang re ipapisitse le mabaka a mararo ao re a tšohlileng? Jesu o ile a re ha re tsebe ebile re ke ke ra tseba letsatsi kapa eona hora. (Mat. 24:36; 25:13) Empa joalokaha Pauluse a boletse, “nako” eona rea e tseba. (Bala Baroma 13:11.) Re phela nakong eo, e leng matsatsing a ho qetela. Haeba re ela hloko boprofeta ba Bibele le seo Jehova Molimo le Jesu Kreste ba se etsang, re ke ke ra sitoa ho bona bopaki bo kholisang ba hore ha e le hantle re phela qetellong ea tsamaiso ena ea lintho.

18. Ho tla etsahala’ng ka ba hanang ho ikokobelletsa ’Muso oa Molimo?

¹⁸ Haufinyane ba hanang ho ikokobelletsa bolaoli bo fuoeng Jesu Kreste, Mopalami ea hlōlang oa pere e tšoeu, ba tla tlameha ho lumela phoso ea bona. Ba tla tsieleha. Ka nako eo, ba bangata ba tla bokolla ba re: “Ke mang ea ka khonang ho ema?” (Tšen. 6:15-17) Tšenolo khaolo ea 7 e fana ka karabo. Batlotsuoa hammoho le batho ba bang ba nang le tšepo ea ho phela lefatšeng ba tla “ema” letsatsing leo, kaha Molimo oa ba amohela. Ka mor’a moo “bongata bo boholo” ba linku tse ling bo tla pholoha matšoenyeho a maholo.—Tšen. 7:9, 13-15.

19. Kaha ua elelloa hore haufinyane matsatsi a ho qetela a tla fela, ’me u se u nkile khato, u lebeletse eng ka tjantjello?

¹⁹ Haeba re tsepamisa likelello boprofeteng ba Bibele bo phethahalang nakong ena e ikhethang, ha re na ho ferekanngoa ke mashano a lefatše la Satane; kapa hona ho se utloisise se boleloang ke liketsahalo tsa lefatše. Haufinyane Kreste o tla phetha tlhōlo ea hae lefatšeng lena le sa tšabeng Molimo ka hore a loane ntoeng ea ho qetela ea ho loka. (Tšen. 19:11, 19-21) Nahana ka seo Bibele e re tiisetsang hore re tla se thabela ka nako eo!—Tšen. 20:1-3, 6; 21:3, 4.