SELEMO sena ke sa bo100 ka mor’a hore ho bontšoe “Photo-Drama of Creation,” ka lekhetlo la pele, e leng filimi e neng e reretsoe ho matlafatsa tumelo ea batho Bibeleng e le Lentsoe la Molimo. “Photo-Drama” e ile ea totobatsa hore Jehova ke ’Mōpi, nakong eo tumelo ea batho ba bangata e neng e fokolisitsoe ke thuto ea ho iphetola ha lintho, ho tšoaea-tšoaea Bibele liphoso le ho e belaella.

Charles T. Russell ea neng a etella Liithuti Tsa Bibele pele, o ne a lula a batla litsela tse atlehang le tse ka potlakisang ho ajoa ha ’nete ea Bibele. Liithuti Tsa Bibele li ne li se li qetile lilemo tse fetang tse mashome a mararo li aba lingoliloeng. Joale li ile tsa haptjoa maikutlo ke mokhoa o mocha, e leng tlhahiso ea lifilimi.

Lilemong tsa bo-1890 batho ba ile ba bontšoa filimi e se nang mantsoe. Ka 1903, ho ile ha bontšoa filimi ea bolumeli kerekeng e ’ngoe New York City. Indasteri ea lifilimi e ne e sa tsoa qala ka 1912, ha ka sebete Russell a qala ho hlophisa filimi ea “Photo-Drama.” O ile a hlokomela hore mokhoa ona oa puisano o ne o ka fetisa ’nete ea Bibele ka tsela eo lingoliloeng li neng li ke ke tsa e fetisa ka eona.

Filiming ena ea “Photo-Drama” e neng e nka lihora tse robeli, ’me e bontšoa ka likarolo tse ’nè, ho ne ho fanoa ka lipuo tse 96 tse khutšoanyane tsa Bibele tse neng li fanoa ke sebui seo batho ba bangata ba neng ba tloaetse lentsoe la sona. Ho ne ho e-na le ’mino oa classic o neng o tsamaisana le likarolo tse ngata tsa filimi eo. Batho ba nang le bokhoni ba ne ba bapala lirekoto tsa mantsoe le tsa ’mino likeramafonong, ba etsa hore mantsoe le ’mino li tsamaisane le li-slide le litšoantšo tse bontšang lipale tse tsebahalang tsa Bibele.

Likarolo tse ngata tsa filimi eo le li-slide tsa khalase li ne li nkiloe li-studiong tsa khoebo. Bataki ba Philadelphia, New York, Paris le London ba ile ba taka litšoantšo li-slideng tsa khalase le lifiliming.  Batho ba sebetsang Lefapheng la Botaki Bethele le bona ba ile ba taka litšoantšo tse ngata, boholo ba tsona e le tsa li-slide tse pshatlehileng. Ho phaella likarolong tse rekiloeng tsa filimi, litho tsa lelapa la Bethele li ile tsa nkoa litšoantšo haufi le Yonkers, New York, li bapala karolo ea Abrahama, Isaka le ea lengeloi le ileng la thibela Abrahama ho etsa mora oa hae sehlabelo.—Gen. 22:9-12.

Motsoalle e mong oa Mor’abo rōna Russell o ile a bolella bo-ralitaba hore mokhoa ona o tla “susumelletsa batho ba bangata hore ba thahaselle Mangolo ho feta ntho leha e le efe [e kileng] ea etsoa ho ntšetsa pele bolumeli.” Na baruti ba ne ba tla thoholetsa boiteko boo bo babatsehang ba ho thusa batho ba bangata ba lapileng moeeng? Ho e-na le ho bo thoholetsa, baruti ba Bokreste-’mōtoana ba ile ba nyatsa “Photo-Drama,” ba bang ba bile ba sebelisa litsela tse poteletseng le tse tobileng ho thibela batho ho e shebella. Sebakeng se seng, mokhatlo oa baruti o ile oa khaola motlakase.

Leha ho le joalo, batho ba ne ba tla ka bongata liholong ho tla shebella “Photo-Drama” mahala. “Photo-Drama” e ne e shebelloa metseng e ka bang 80 ka letsatsi, United States. Batho ba bangata ba ile ba hlolloa ha ba qala ho bona ‘filimi e nang le mantsoe.’ Ba ile ba shebella ha tsuonyana e qhotsoa le palesa e thunya. Ho ile ha sebelisoa boitsebiso ba saense ba mehleng eo ho totobatsa bohlale bo hlollang ba Jehova. Joalokaha ho boletsoe qalong, ha ’mohi e mong a bona Mor’abo rōna Russell a etsa selelekela sa “Photo-Drama,” o ile a re, “eo ke eena Mor’abo rōna Russell eo ke mo tsebang!”

Ha Tim Dirks eo e leng mongoli le rahistori oa lifilimi a hlalosa “Photo-Drama,” o ile a re “ke filimi ea pele eo ho eona mantsoe a neng a tsamaisana le litšoantšo le li-slide tsa khalase.” Lifilimi tse ling tse ileng tsa etsoa pele ho “Photo-Drama” li ne li sebelisitse e meng ea mekhoa ena, le hoja e ne e se kaofela ha eona ka nako e le ’ngoe, haholo-holo filiming e buang ka Bibele. Ha ho le e ’ngoe ea tsona e ileng ea shebelloa ke batho ba ka bang limilione tse robong ba Amerika Leboea, Europe, Australia le New Zealand selemong sa pele feela!

“Photo-Drama” e ile ea qala ho bapaloa ka la 11 January, 1914, New York City. Likhoeli tse supileng hamorao ho ile ha qhoma Ntoa ea I ea Lefatše. Empa batho ba bangata lefatšeng ka bophara ba ile ba tsoela pele ho bokana ho tla shebella “Photo-Drama,” ’me ba tšelisoa ke litšoantšo tse hlakileng tse bontšang litlhohonolofatso tse tla tlisoa ke ’Muso. Ruri ho bontšoa ha filimi ea “Photo-Drama” e bile ntho e babatsehang haholo ka 1914.