KA LA 7 September, 1950, ke ile ka ba setho sa lelapa la Bethele ea Brooklyn. Ka nako eo, litho tsa lelapa la Bethele li ne li le 355, e le bara le barali babo rōna ba litso tse sa tšoaneng ba pakeng tsa lilemo tse 19 le 80. Boholo ba bona e ne e le batlotsuoa.

’Mè ke eena ea nthutileng ho sebeletsa ‘Molimo oa rōna ea thabileng.’ (1 Tim. 1:11) O qalile ho sebeletsa Jehova ke sa le moshanyana. Ka la 1 July, 1939, ha ke le lilemo li leshome, ke ile ka kolobetsoa kopanong ea potoloho e neng e tšoaretsoe Columbus, Nebraska, U.S.A. Re ne re bokane re le batho ba ka bang lekholo ka holong e hiriloeng, re tlil’o mamela khatiso ea puo ea Joseph Rutherford e nang le sehlooho se reng, “Bofascista Kapa Tokoloho.” Ha puo e ntse e tsoela pele, mahoohoo a ile a lika-liketsa holo e nyenyane eo re neng re bokane ka ho eona. A ile a itšohlometsa ka hare, a emisa seboka ’me a re leleka sebakeng seo. Re ile ra ea polasing ea mor’abo rōna e neng e le haufi le moo, eaba re mamela karolo e setseng ea lenaneo. Ha ke sa tla lebala letsatsi leo ke kolobelitsoeng ka lona!

’Mè o ile a leka ka matla ho nkhōlisetsa ’neteng. Le hoja Ntate a ne a re hlokomela ebile e le motho ea lokileng, o ne a sa thahaselle litaba tsa bolumeli kapa ho ntataisa bomoeeng. ’Mè hammoho le Lipaki tse ling tse neng li kopanela phuthehong ea Omaha, ba ile ba nkhothatsa haholo.

Ha ke le mothating oa ho qeta sekolong se phahameng, ke ile ka lokela ho etsa qeto ea hore na ke batla ho etsa’ng bophelong. Ha likolo li koaloa, ke ne ke nka bopula-maliboho bo thusang, hammoho le lithaka tsa ka.

Mor’abo rōna John Chimiklis le Ted Jaracz bao ka nako eo e neng e le masoha ba bile ba sa tsoa fumana mangolo sehlopheng sa bosupa sa Sekolo sa Gileade, ba ne ba abetsoe mosebetsi oa potoloho sebakeng sa heso. Ke ile ka makala ha ke utloa hore ba sa tsoa feta lilemo tse 20. Ke ne ke le lilemo li 18 ka nako eo, ’me ke le haufi le ho qeta sekolong. Ke sa ntse ke hopola ha Mor’abo rōna Chimiklis a mpotsa hore na ke batla ho etsa’ng bophelong. Ha ke mo bolella, o ile a mphehella a re: “U hle u kene hang-hang tšebeletsong ea nako e tletseng. Ho  tseba mang hore na e tla u fihlisa kae!” Keletso eo hammoho le mohlala oa bara bao babo rōna, li ile tsa nkama ka ho teba. Ka hona, hang ha ke qeta sekolo ka 1948, ke ile ka ba pula-maliboho.

Ka July 1950, ’na le batsoali ba ka re ile ra ea kopanong ea machaba e neng e tšoaretsoe Yankee Stadium, New York City. Ke ile ka ea sebokeng sa batho ba thahasellang ho sebeletsa Bethele hona kopanong eo. Ke ile ka ngola lengolo ka kōpa ho sebeletsa Bethele.

Le hoja Ntate a ne a se khahlanong le hore ke be pula-maliboho ke ntse ke lula lapeng, o ile a nkōpa hore ke lefelle lijo le bolulo. Kahoo, ka letsatsi le leng mathoasong a August, ha ke le tseleng ea ho ea batla mosebetsi, ke ile ka qala ka ho sheba mangolo posong. Ke ile ka fumana lengolo le tsoang Brooklyn. Le ne le tekennoe ke Nathan H. Knorr, ’me le re: “Re fumane kōpo ea hao ea ho sebeletsa Bethele. Ke lumela hore u tla lula Bethele ho fihlela Morena a u nka. Kahoo, re ka rata hore u itlalehe Bethele e 124 Columbia Heights, Brooklyn, New York, ka la 7 September, 1950.”

Ha Ntate a fihla a tsoa mosebetsing letsatsing leo, ke ile ka mo bolella hore ke fumane mosebetsi. O ile a re, “Ke hantle, u o fumane hokae?” Eaba ke re, “Bethele ea Brooklyn, ke tla fumana $10.00 ka khoeli.” Seo se ile sa mo makatsa, empa a re haeba ke sona seo ke ikhethelang ho se etsa, ke ithukhubetse e le hore ke atlehe. Nakoana ka mor’a moo, o ile a kolobetsoa kopanong e neng e tšoaretsoe Yankee Stadium ka 1953!

Ntho e ileng ea nthabisa ke hore, motsoalle oa ka eo ke neng ke bula maliboho le eena, Alfred Nussrallah, o ile a bitsoa Bethele ka eona nako eo, kahoo, re ile ra tsamaea ’moho. Hamorao o ile a nyala, ’me eena le mosali oa hae Joan, ba ea Gileade, ka mor’a moo, ea e-ba baromuoa Lebanone, ’me ba etsa le mosebetsi oa potoloho United States.

Ha ke fihla Bethele, ke ile ka sebetsa sebakeng seo ho kopanngoang libuka ho sona, ’me ke li rōka. Buka ea pele eo ke ileng ka e rōka e ne e le ea What Has Religion Done for Mankind? Ka mor’a likhoeli tse ka bang robeli ke sebetsa moo, ke ile ka abeloa ho ea sebetsa Lefapheng la Tšebeletso, ’me ka sebetsa le Mor’abo rōna Thomas J. Sullivan. Ke ne ke thabela ho sebetsa le eena, ’me kaha o ne a hōlile moeeng, a bile a tseba lintho tse ngata ka lebaka la phihlelo e ngata eo a nang le eona ka mokhatlong, seo se ile sa nthuisa molemo haholo.

Ka mor’a hore ke qete lilemo tse tharo ke sebetsa Lefapheng la Tšebeletso, Max Larson, eo e neng e le molebeli oa fektheri, o ile a mpolella hore Mor’abo rōna Knorr o batla ho mpona. Ke ile ka ipotsa hore na ke entse’ng. Ho ile ha re nk’hu! ha Mor’abo rōna Knorr a re o ne a mpa feela a batla ho tseba hore na ke ikemiselitse ho tsoa Bethele haufinyane. O ne a batla motho ea ka sebetsang ofising ea hae ka nakoana ’me a batla ho bona hore na nka khona ho jara boikarabelo boo. Ke ile ka re ha kea ikemisetsa ho tsamaea Bethele. Ka hona, ke ile ka ba le tlotla ea ho sebetsa ofising ea hae ka lilemo tse 20.

Hangata ke ee ke re, ke ne nke ke ka khona ho lefella koetliso eo ke e fumaneng ka ho sebetsa le Mor’abo rōna Sullivan, Knorr le ba bang ba kang Milton Henschel, Klaus Jensen, Max Larson, Hugo Riemer le Grant Suiter. *

Barab’abo rōna bao ke sebelitseng le bona ba ne ba hlophisitsoe hantle bakeng sa mosebetsi oo ba  neng ba o abetsoe. Mor’abo rōna Knorr o ne a khothetse ’me ntho feela eo a neng a batla ho e bona ke hore mosebetsi oa ’Muso o hōle kahohle kamoo ho ka khonehang. Batho bohle ba neng ba sebetsa ofising ea hae, ba ne ba nolofalloa ho bua le eena. Esita le haeba re sa bone lintho ka ho tšoana, re ne re bua ka bolokolohi ’me a tsoela pele ho re tšepa le ka mor’a moo.

Ka letsatsi le leng, Mor’abo rōna Knorr o ile a nkabela seo ho neng ho ka ’na ha thoe ke mosebetsi o sa reng letho. Ka mohlala, o ile a mpolella hore ha e sa le molebeli oa fektheri, Mor’abo rōna Rutherford o ne a ee a mo founele a re: “Mor’eso Knorr, ke kopa u ntlele le rabara ha u tla lijong tsa motšehare. Kea e hloka.” Mor’abo rōna Knorr o re ntho ea pele eo a neng a e etsa ke ho ea setorong ebe o nka rabara, o e tšela pokothong. Ebe motšehare o e isa ofising ea Mor’abo rōna Rutherford. E ne e le ntho e nyenyane, empa e ne e le thuso ho Mor’abo rōna Rutherford. Ka mor’a moo, Mor’abo rōna Knorr o ile a re ho ’na: “Ke ne nka rata hore u mpehele lipentšele tse betliloeng tafoleng ea ka. Ke kōpa u mpehele tsona hoseng ho hong le ho hong.” Ka lilemo tse ngata, ke ’nile ka etsa bonnete ba hore lipentšele tsa hae li betliloe.

Mor’abo rōna Knorr o ne a lula a hatisa bohlokoa ba ho mamela ka hloko ha re koptjoa ho etsa mosebetsi o itseng. Ka letsatsi le leng, o ile a mpolella ka ho hlaka hore ke etsa ntho e itseng, empa ka se ke ka mamela hantle. Ka lebaka leo, ke ile ka mo hlabisa lihlong. Ke ile ka soaba haholo, kahoo, ka mo ngolla mela e se mekae ke mo bolella hore ke soabile haholo ke seo ke se entseng ’me ke nahana hore ho ka ba molemo hore a nkise lefapheng le leng. Hamorao hoseng hoo, Mor’abo rōna Knorr o ile a tla tafoleng ea ka ’me a re, “Robert, ke fumane lengolo la hao. Ke ’nete hore u entse phoso. Re buile ka eona, ’me ke kholisehile hore u tla ba seli nakong e tlang. Ka hona, mohoma temeng.” Ke ile ka ananela haholo tsela e mosa eo a ileng a ntšoara ka eona.

Ka mor’a ho sebeletsa Bethele ka lilemo tse robeli, ho ne ho se ntho eo ke e nahanang ha e se ho tsoela pele ke sebeletsa teng. Leha ho le joalo, seo se ile sa fetoha. Ha ke le kopanong ea machaba e neng e tšoaretsoe Yankee Stadium le Polo Grounds ka 1958, ke ile ka bona Lorraine Brookes eo ke neng ke kopane le eena ka 1955, ha a ntse a bula-maliboho Montreal, Canada. Ke ile ka khahloa ke tsela eo a neng a ikutloa ka eona ka tšebeletso ea nako e tletseng le boikemisetso ba hae ba ho ea hohle moo mokhatlo oa Jehova o ka mo romelang. Takatso ea Lorraine e ne e le ho ea Sekolong sa Gileade. Ka 1956, ha a le lilemo li 22, o ile a amoheloa sehlopheng sa bo27. Ka mor’a ho abeloa lengolo, o ile a romeloa Brazil ho ea ba moromuoa teng. ’Na le Lorraine re ile ra nchafatsa maqhama lipakeng tsa rōna ka 1958, ’me a lumela ha ke re ke batla ho mo nyala. Re ne re rerile ho nyalana selemong se latelang ’me re be baromuoa.

Ha ke bolella Mor’abo rōna Knorr ka boikemisetso ba ka, o ile a nkhothalletsa hore re nyalane ka mor’a lilemo tse tharo, ebe re sebeletsa Bethele ea Brooklyn. Mehleng eo, e le hore batho ba ka  amoheloa Bethele ka mor’a hore ba nyalane, ho ne ho lokela hore e mong a be a sebelelitse Bethele ka lilemo tse leshome kapa ho feta ’me e mong a be a sebelelitse bonyane ka lilemo tse tharo. Kahoo, pele re nyalana Lorraine o ile a lumela ho sebeletsa Bethele ea Brazil ka lilemo tse peli ebe o sebeletsa ho ea Brooklyn selemo se le seng.

Lilemo tsa pele tse peli re lebelletsane re li qetile re buisana ka mangolo feela. Ho founa ho ne ho bitsa haholo ’me ho se na e-mail mehleng eo! Ha re chata ka la 16 September, 1961, re ile ra ba le tlotla ea ho beheloa puo ea lenyalo ke Mor’abo rōna Knorr. Bonneteng, lilengoana tseo re ileng ra li leta li ne li bonahala li le telele. Empa hona joale ha re nahana ka thabo le khotsofalo eo re nang le eona ka lilemo tsena tse ka holimo ho 50 re nyalane, ha re ikoahlaee le hanyenyane hore ebe re ile ra leta!

Ka 1964, ke ile ka fuoa tokelo ea ho ba molebeli ea etelang makala. Ka nako eo, basali ba ne ba sa lumelloe ho tsamaea le banna ba bona maetong ao. Leha ho le joalo, ka 1977 seo se ile sa fetoloa ’me basali ba qala ho tsamaea le banna ba bona. Selemong seo, ’na le Lorraine re ile ra tsamaea le Grant le Edith Suiter ha ba etela liofisi tsa makala Jeremane, Austria, Greece, Cyprase, Turkey le Iseraele. Ka kakaretso, ke etetse linaha tse 70 lefatšeng ho pota.

Ha re etetse Brazil ka 1980, leeto la rōna le ile la akarelletsa ho ea motseng oa Belém, o equator, moo Lorraine a neng a sebelelitse teng ha e sa le moromuoa. Re ile ra boela ra fapohela barab’abo rōna ba Manaus. Ha re le sebokeng se neng se tšoaretsoe lebaleng la lipapali, re ile ra bona batho ba lutseng hammoho empa ba sa lumelisane ka mokhoa o tloaelehileng oa Brazil, oa hore basali ba sunane marameng le hore barab’abo rōna ba tšoarane ka matsoho. Lebaka e ne e le lefe?

E ne e le barab’abo rōna ba ratehang ba tsoang motseng oa balepera o neng o le ka har’a moru oa Amazon. Molemong oa hore ba se ke ba tšoaetsa batho ba bang, ba ne ba qoba ho itsoakanya le bona. Empa ba ile ba re ama lipelo ’me ha re sa tla lebala thabo e neng e le lifahlehong tsa bona! Ruri mantsoe a Esaia a reng: “Bahlanka ba ka ba tla hoeletsa ka thabo ka lebaka la boemo bo botle ba pelo,” a ile a ipaka ho ba ’nete.—Esa. 65:14.

Kamehla ’na le mosali oa ka re nahana ka lilemo tse ka holimo ho mashome a tšeletseng tseo re li qetileng re le tšebeletsong ea Jehova. Re thaba haholo ha re nahana ka litlhohonolofatso tseo re ’nileng ra li fumana ka lebaka la ho lumela ho tataisoa ke Jehova ka mokhatlo oa hae. Le hoja ke se ke sa khone ho ea linaheng tse ling joaloka pele, ke ntse ke khona ho etsa mosebetsi oa ka oa ho ba mothusi oa Sehlopha se Busang, ’me ke sebetsa le Komiti ea Bahokahanyi hammoho le Komiti ea Tšebeletso. Ke ananela haholo tlotla ea ho kenya letsoho mosebetsing o etsoang ke mokhatlo oa barab’abo rōna oa lefatšeng ka bophara. Kamehla re ema le ho makala ha re bona bahlankana le baroetsana ba bangata ba kenetseng tšebeletso ea nako e tletseng ba e-na le boikutlo bo kang ba Esaia, ea ileng a re: “Ke ’na enoa! Roma ’na!” (Esa. 6:8) Letšoele lena le paka bonnete ba mantsoe ao ke ileng ka a bolelloa ke molebeli ea tsamaeang khale koana ha a ne a re: “U hle u kene hang-hang tšebeletsong ea nako e tletseng. Ho tseba mang hore na e tla u fihlisa kae!”