1. Jehova o ikutloa joang ka mosebetsi, hona see se mo susumelletsa ho etsa’ng?

JEHOVA o thabela mosebetsi oa hae. (Pes. 135:6; Joh. 5:17) E le hore libōpuoa tsa hae tse bohlale le tsona li latsoe thabo le khotsofalo e tlisoang ke ho finyella ntho e itseng, Jehova o li file mosebetsi o khathollang le o khotsofatsang. Ka mohlala, o ile a sebetsa le Mora oa hae oa letsibolo ha a bōpa lintho. (Bala Bakolose 1:15, 16.) Bibele e re pele Jesu e e-ba motho oa nama, o ne a e-na le Molimo leholimong e “le mosebetsi ea hloahloa.”—Liprov. 8:30.

2. Ke’ng e bontšang hore haesale libōpuoa tsa moea li e-na le mosebetsi oa bohlokoa le o khotsofatsang?

² Bibele e na le mehlala e bontšang hore Jehova o ’nile a fa bara ba hae ba moea mosebetsi o itseng. Ka mor’a hore Adama le Eva ba etse sebe ’me ba lelekoe lehaeng la bona la Paradeise, Molimo o ile “a beha likerubime le lehare le halimang la sabole le iphetholang le sa khaotse bakeng sa ho lebela tsela e eang sefateng sa bophelo.” (Gen. 3:24) Tšenolo 22:6 eona e re Jehova “o ile a romela lengeloi la hae ho bontša makhoba a hae lintho tse tla etsahala haufinyane.”

3. Ha Jesu a le lefatšeng, o ile a etsisa mohlala oa Ntate oa hae joang?

³ Ha Jesu a ne a le lefatšeng e le motho ea phethahetseng, o ile a thabela ho etsa mosebetsi oo Jehova a mo fileng oona. Jesu o ile a etsisa mohlala oa Ntate oa hae, ’me a abela barutuoa ba hae mosebetsi oa bohlokoa. O ile a etsa hore ba chesehele seo ba ka se finyellang, ’me a re ho bona: “Kannete-nete ke re ho lōna, Ea bontšang tumelo ho ’na, eo ka ho tšoanang o tla etsa mesebetsi eo ke e etsang; ’me o tla etsa mesebetsi e meholo ho ena, hobane ke ea ho Ntate.” (Joh. 14:12) Ha a totobatsa ho potlaka ha mosebetsi oo, Jesu o ile a re: “Re tla etsa mesebetsi ea ea nthomileng ha e sa ntse e le motšehare; bosiu boa tla ba ha ho se motho ea ka sebetsang.”—Joh. 9:4.

4-6. (a) Ke hobane’ng ha re ananela hore ebe Noe le Moshe ba ile ba phetha mosebetsi oo Jehova a ba fileng oona? (b) Ke’ng e tšoanang ka mesebetsi eo Molimo a e fang batho?

⁴ Le pele Jesu a tla lefatšeng, batho ba ne ba filoe mosebetsi o ba tlisetsang khotsofalo. Le hoja Adama le Eva ba ile ba hlōleha ho phetha mosebetsi oo ba o filoeng, ho na le batho ba bang ba ileng ba etsa seo Molimo a ba laetseng sona. (Gen. 1:28) Noe o ne a filoe litaelo tse tobileng tsa hore na a hahe areka joang e le hore a pholose batho le liphoofolo Moroallong. O ile a latela ka hloko seo Jehova a mo laetseng sona. Re teng kajeno ka lebaka la boiteko ba hae bo hlokolosi!—Gen. 6:14-16, 22; 2 Pet. 2:5.

⁵ Moshe o ile a fuoa litaelo tse tobileng tsa hore na a hahe tabernakele le ho hlophisa baprista joang ’me a fela a etsa seo a se laetsoeng. (Ex. 39:32; 40:12-16) Le kajeno re rua molemo tseleng eo a ileng a phetha kabelo ea hae ka botšepehi ka eona. Joang? Moapostola Pauluse o ile a hlalosa hore likarolo tseo tsa Molao li ne li tšoantšetsa “lintho tse molemo tse tlang ho tla.”—Baheb. 9:1-5, 9; 10:1.

⁶ Molimo o fa bahlanka ba hae mesebetsi e sa tšoaneng ho latela morero oa hae o tsoelang pele ho phethahala. Leha ho le joalo, kamehla mosebetsi oo a ba fang oona o oa mo tlotlisa ’me o ruisa batho molemo. Sena e bile ’nete ka mosebetsi oo Jesu a o entseng pele e e-ba motho oa nama le ha a se a le lefatšeng. (Joh. 4:34; 17:4) Le kajeno, mosebetsi oo re o abetsoeng o tlotlisa Jehova. (Mat. 5:16; bala 1 Bakorinthe 15:58.) Ka tsela efe?

7, 8. (a) Bolela hore na Bakreste ba fuoe tlotla ea ho etsa mosebetsi ofe. (b) Ha Jehova a fana ka tataiso, re lokela ho etsa’ng?

⁷ Mohlomong u tla lumela hore ke taba e hlollang hore ebe Jehova o fa batho ba sa phethahalang tlotla ea hore e be basebetsi-’moho le eena. (1 Bakor. 3:9) Ba sebetsang kahong ea Liholo Tsa Kopano, Liholo Tsa ’Muso le liofisi tsa makala ba kopanela mosebetsing oa kaho, feela joaloka Noe le Moshe. Ebang u thusa ho lokisa Holo ea ’Muso phuthehong ea heno kapa ho haha mohaho oa ntlo-khōlō o Warwick, New York, ananela tlotla eo ea tšebeletso. (Sheba setšoantšo se qalong.) Ke tšebeletso e halalelang. Leha ho le joalo, Bakreste ba bangata ba khothalletsoa ho kopanela mosebetsing oa moea oa kaho. Le oona o reretsoe ho tlotlisa Jehova le ho ruisa batho ba mamelang molemo. (Lik. 13:47-49) Mokhatlo oa Molimo o fana ka tataiso ea kamoo re ka etsang mosebetsi ona ka tsela e molemohali kateng. Ka linako tse ling, sena se ka ’na sa hloka hore re fuoe likabelo tse ncha.

⁸ Esale bahlanka ba tšepahalang ba Jehova ba labalabela ho latela tataiso ea puso ea Molimo. (Bala Baheberu 13:7, 17.) Qalong re ka ’na ra se ke ra utloisisa ka ho feletseng hore na ke hobane’ng ha re laeloa ho etsa mosebetsi ka tsela e itseng. Empa re tseba melemo e tlisoang ke ho latela tataiso ea Jehova ha a etsa liphetoho leha e le life tseo a bonang li loketse.

9. Baholo ba behela phutheho mohlala ofe tabeng ea ho etsa mosebetsi?

 ⁹ Tsela eo baholo ba etellang pele ka eona ka phuthehong e bontša hore ba na le takatso e matla ea ho etsa thato ea Jehova. (2 Bakor. 1:24; 1 Bathes. 5:12, 13) Ba bontša hore ba ikemiselitse ho sebetsa ka thata le ho tsamaisana le liphetoho tse etsoang. Ba labalabela ho latela litsela tse ncha tseo re lokelang ho li sebelisa ha re phatlalatsa ’Muso oa Molimo o hlomiloeng. Le hoja e ka ’na eaba ba bang qalong ba ne ba le leqe ho paka ka thelefono, ho paka boema-kepeng kapa ho etsa bopaki ba phatlalatsa, hamorao ba ile ba lemoha liphello tse ntle tse tlisoang ke seo. Ka mohlala, bo-pula-maliboho ba bane ba Jeremane ba ile ba etsa qeto ea ho sebetsa tšimo ea khoebo e neng e se e sa sebetsoe. Michael o re: “Re ne re qetile lilemo tse ngata re sa sebetse tšimo ea mofuta ona, kahoo re ne re tšohile. E tlameha ebe Jehova o ne a hlokometse seo, kaha o ile a etsa hore re natefeloe ke tšebeletso hoseng hoo. Ruri re ile ra thabisoa ke hore ebe re ile ra latela tataiso e fanoeng Tšebeletsong ea Rōna ea ’Muso ’me ra itšetleha ka Jehova!” Na u labalabela ho leka litsela tse ncha tsa ho paka tse khothalletsoang tšimong ea lōna?

10. Ke liphetoho life tse entsoeng morao tjee tsamaisong ea mokhatlo?

¹⁰ Ka linako tse ling, ho hlokahala hore ho etsoe liphetoho tsamaisong ea mokhatlo. Morao tjena, liofisi tse ’maloa tsa makala li ’nile tsa kopanngoa. Le hoja liphetoho tseo li hloka hore bara le barali babo rōna ba sebeletsang makaleng ao ba etse liphetoho, ka mor’a nakoana melemo e tlisoang ke liphetoho tseo e ile ea totobala. (Moek. 7:8) Ruri bara le barali bana babo rōna ba thabela ho phetha karolo ea bona mosebetsing oo batho ba Jehova ba tsoelang pele ho o etsa!

11-13. Ba bang ba ile ba tobana le boemo bofe ka lebaka la liphetoho tse entsoeng tsamaisong ea mokhatlo?

¹¹ Re ka ithuta thuto ea bohlokoa ho ba ileng ba ameha ka ho toba ha ho kopanngoa makala. Ba bang ba ne ba qetile lilemo tse mashome ba sebeletsa mahaeng ao a Bethele. Banyalani ba bang ba sebelelitseng lehaeng le lenyenyane la Bethele, Amerika Bohareng, ba ile ba kōptjoa hore ba ee Bethele ea Mexico, e nang le batho ba bangata ho feta eo ba tsoang ho eona ka makhetlo a ka bang 30. Rogelio o re: “Ho siea ba lelapa le metsoalle ho ne ho le boima haholo.” Mor’abo rōna e mong ea bitsoang Juan ea ileng a kōptjoa hore a ee Mexico, o re: “Ho tšoana le ho tsoaloa hape; motho o lokela ho theha maqhama a macha. O lokela ho ithuta mekhoa e mecha le tsela e ncha ea ho nahana.”

¹² Basebeletsi ba Bethele ba linaheng tse ling tsa Europe ba ileng ba kōpuoa ho fallela ofising ea lekala ea Jeremane le bona ba ile ba thatafalloa. Motho ea ratang lithaba o tla utloisisa hore na batho ba tsoang Switzerland ba ile ba thatafalloa hakaakang ha ba tlameha ho siea lithaba tse ntle tsa Alpine. Ba tsoang Austria bona ba ne ba hloloheloa tsela e iketlileng eo ba neng ba phela ka eona moo.

¹³ Ba fallelang naheng e ’ngoe ba ile ba tlameha ho itloaetsa sebaka se secha, ho sebetsa le bara le barali babo rōna bao ba sa ba tsebeng, ’me mohlomong ba be ba ithute mosebetsi o mong. Seo se bolela hore ba ile ba lokela ho itloaetsa phutheho e ncha le ho bolela tšimong e ncha, kapa mohlomong le ho ithuta puo e ’ngoe. Ho etsa liphetoho tseo ho ka ’na ha se ke ha e-ba bonolo. Empa basebeletsi ba bangata ba Bethele ba ile ba ikemisetsa ho etsa liphetoho tseo. Ke hobane’ng ha ba ile ba ikemisetsa ho etsa seo?

14, 15. (a) Ba bangata ba bontšitse joang hore ba ananela tlotla ea ho sebeletsa Jehova, ho sa tsotellehe hore na ba sebeletsa hokae? (b) Ba re behetse mohlala ofe o motle?

 ¹⁴ Grethel o re: “Ke ile ka lumela ha ke kōpuoa kaha seo se ne se bontša hore lerato la ka ho Jehova ha lea itšetleha ka naha, mohaho, kapa tokelo e itseng ea tšebeletso.” Dayska o re: “Ke ile ka amohela seo ka thabo ha ke hopola hore ke Jehova ea mphang kabelo eo.” André le Gabriela ba lumellana le bona, ba re: “Sena se ile sa re fa monyetla o mong hape oa hore re sebeletse Jehova, re sa eteletse pele litakatso tsa rōna. Re ile ra ipolella hore, ‘Ha Jehova a fetola lintho, ho molemo hore re latele tataiso ea hae ho e-na le ho e hanyetsa.’”

¹⁵ Ha ho kopanngoa makala, basebeletsi ba bang ba Bethele ba ile ba abeloa ho ea mosebetsing oa bopula-maliboho. Sena ke se ileng sa etsahalla basebeletsi ba ’maloa ba Bethele ha makala a Denmark, Norway le Sweden a kopanngoa hore a etse ofisi ea lekala ea Scandinavia. Har’a bona ke Florian le Anja ba ileng ba re: “Re nka hore kabelo ea rōna e ncha ke phetoho e thabisang. Re thabela ho sebelisoa ke Jehova ho sa tsotellehe hore na re hokae. Ka sebele re ikutloa re hlohonolofalitsoe haholo!” Le hoja ho ka ’na ha se ke ha hlokahala hore ba bangata ba rōna re etse liphetoho tse joalo, na re ka etsisa bara le barali baa babo rōna ba etelletsang mesebetsi e amanang le ’Muso pele? (Esa. 6:8) Kamehla Jehova o hlohonolofatsa ba ananelang tlotla ea ho mo sebeletsa, ho sa tsotellehe hore na ba sebeletsa hokae.

16. (a) Bagalata 6:4 e re re lokela ho etsa’ng? (b) Ke tlotla efe e khōlō ka ho fetisisa eo motho leha e le ofe a ka bang le eona?

¹⁶ Batho ba sa phethahalang ba rata ho ipapisa le ba bang, empa Lentsoe la Molimo le re khothalletsa hore re tsepamise kelello ho seo re khonang ho se etsa. (Bala Bagalata 6:4.) Ba bangata ba rōna ha re na matla a bolaoli ka mokhatlong. Ebile hase kaofela ha rōna re ka bang bo-pula-maliboho kapa baromuoa kapa ra sebeletsa Bethele. Ha ho pelaelo hore ho kenela tšebeletso  ena ke tlotla e babatsehang! Empa re lokela ho lula re hopola hore tlotla e khōlō ka ho fetisisa eo motho leha e le ofe a ka bang le eona ke eo bohle re kopanelang ho eona. Ke ea ho ba basebetsi-’moho le Jehova tšebeletsong ea Bokreste. Ena ke tlotla eo re lokelang ho e ananela!

17. Ke boemo bofe bo tla ’ne bo tsoele pele hafeela lefatše la Satane le ntse le le teng, empa ke hobane’ng ha see se sa lokela ho re nyahamisa?

¹⁷ Hafeela lefatše la Satane le ntse le le teng, re ka ’na ra se ke ra khona ho sebeletsa Jehova ka botlalo. Re ka ’na ra sitisoa ke boikarabelo ba lelapa, ho kula, kapa maemo a mang a itseng. Empa seo ha sea lokela ho re nyahamisa. U se ke ua halala tlotla eo u nang le eona ea ho sebetsa le Molimo ka hore u pakele lebitso la hae le ho tsebahatsa ’Muso oa hae ha monyetla o mong le o mong o hlaha. Habohlokoa le ho feta ke hore u sebetse le eena ho isa bohōleng boo u ka bo khonang ’me u rapelle hore a hlohonolofatse barab’eno ba khonang ho etsa se eketsehileng tšebeletsong. Hopola hore bohle ba rorisang lebitso la Jehova ke ba bohlokoa mahlong a hae!

18. Re lokela ho ikemisetsa ho behella eng ka thōko, hona hobane’ng?

¹⁸ Ho sa tsotellehe mefokolo le ho se phethahale ha rōna, Jehova o thabela ho re sebelisa re le basebetsi-’moho le eena. Ruri re ananela tlotla ea ho sebetsa le Molimo oa rōna matsatsing ana a ho qetela! Kahoo, re lokela ho ikemisetsa ho behella ka thōko ho se hokae lintho tse ngata tseo re li thahasellang, re ntse re hopola hore lefatšeng le lecha, Jehova o tla re lumella ho thabela “bophelo ba sebele”—re phela ka ho sa feleng ka thabo le ka khotso.—1 Tim. 6:18, 19.

19. Jehova o re tšepisa bokamoso bofe?

¹⁹ Kaha re lintšing tsa lefatše le lecha, nahana ka seo Moshe a ileng a se bolella Baiseraele nakoana pele ba kena Naheng e Tšepisitsoeng: “Jehova Molimo oa hao o tla etsa hore u ateloe haholo mosebetsing o mong le o mong oa letsoho la hao.” (Deut. 30:9) Ka mor’a Armagedone, ba ’nileng ba sebetsa le Molimo ba tla rua lefatše leo ba le tšepisitsoeng. Ka nako eo, re tla lokela ho etsa mosebetsi o mocha oo re tla o fuoa—e leng oa ho etsa lefatše paradeise e ntle!