SEFATE sa mohloaare se sothehileng se ka ’na sa bonahala eka ha se khahlehe ha se bapisoa le sefate se setle sa kedare ea Lebanone. Leha ho le joalo, lifate tsa mohloaare li khona le ho phela maemong a thata. Tse ling li se li phetse lilemo tse ka bang sekete. Methapo ea sefate sena e tebela tlaase mobung, ebile se ka boela sa hlōmela le haeba se ka rengoa. Hafeela methapo e ntse e phela, se tla hlōmela hape.

Monna ea tšepahalang Jobo o ne a kholisehile hore le haeba a ka shoa o tla boela a phele. (Jobo 14:13-15) O ile a etsa mohlala ka sefate, mohlomong sefate sa mohloaare, ho bontša hore o kholisehile hore Molimo a ka mo tsosa bafung. Jobo o ile a re: “Etsoe le sefate se na le tšepo. Haeba se rengoa, se tla hlōmela hape.” Ha se utloa pula ka mor’a komello, sefate sa mohloaare se a hlaphoheloa ’me se “hlahisa lekala joaloka semela se secha.”—Jobo 14:7-9.

Feela joalokaha molemi a labalabela ho bona sefate sa mohloaare se renngoeng se hlōmela hape, Jehova Molimo o labalabela ho tsosa bahlanka ba hae le batho ba bang. (Matheu 22:31, 32; Johanne 5:28, 29; Liketso 24:15) Ak’u inahanele kamoo re tla thaba kateng ha re amohela baratuoa ba rōna ba tsositsoeng bafung!