KE HLAHETSE Queensland, Australia, ka 1955. Nakoana ka mor’a moo, ’mè oa ka e leng Estelle, o ile a qala ho ithuta Bibele le Lipaki Tsa Jehova. Selemong se hlahlamang a kolobetsoa, ’me ntate oa ka e leng Ron, a amohela linnete lilemo tse 13 hamorao. Ke ile ka kolobetsoa ka 1968 motseng o mong oa mahaeng o Queensland.

Ho tloha ha ke sa le monyenyane, esale ke rata ho bala libuka le ho ithuta lipuo tse ling. Ha ke ne ke tsamaea le batsoali ba ka ka koloi, ke ne ke lula setulong se ka morao ebe kea ipalla. E ka ’na eaba batsoali ba ka ba ne ba tšoenngoa ke hore ebe ha ke shebe botle ba naha. Empa ho rata ho bala ho ile ha nthusa hore ke pase hantle sekolong. Ke ile ka ba ka fuoa likhau tse ’maloa ha ke le sekolong se phahameng motseng oa Glenorchy, o sehlekehlekeng sa Tasmania.

Ha ke le moo, ke ile ka tlameha ho etsa qeto ea bohlokoa. Ho khetha hore na ke amohela litlhapiso tsa ho ea univesithi kapa che. Le hoja ke ne ke rata ho bala le ho ithuta, ke leboha hore ebe ’mè oa ka o ile a nthuta ho rata Jehova ho feta motho kapa ntho leha e le efe. (1 Bakorinthe 3:18, 19) Kahoo, ke ile ka etsa qeto ea hore hang ha ke qeta sekolong, ke tla bula maliboho, ’me batsoali ba ka ba ntumella.  Ke ile ka nka bopula-maliboho ka January 1971, ke le lilemo li 15.

Ke ile ka qeta lilemo tse robeli tse latelang ke le pula-maliboho Tasmania. Ha ke ntse ke le moo, ka nyala moroetsana ea motle oa Tasmania, ea bitsoang Jenny Alcock. Re ile ra qeta lilemo tse ’nè re le bo-pula-maliboho ba khethehileng mathōkong a Smithton le Queenstown.

Ka 1978, ’na le mosali oa ka re ile ra ea kopanong ea machaba e neng e tšoaretsoe Port Moresby, Papua New Guinea. Ke sa hopola moromuoa e mong a fana ka puo ka Sehiri Motu. Le hoja ke ne ke sa utloisise seo a se buang, ke ile ka ba le takatso ea ho ba moromuoa, ke ithute puo e ’ngoe e le hore ke khone ho khothatsa barab’abo rōna ka ho ba fa lipuo ka puo ea bona. Qetellong, ke ile ka lemoha hore na nka sebelisa lerato la ka la ho ithuta puo joang ho sebeletsa Jehova.

Ha re khutlela hae, u ka inahanela hore na re ile ra thaba hakaakang ha re fumana memo ea ho ea sebeletsa re le baromuoa. Re ile ra fihla sehlekehlekeng sa Funafuti, se Tuvalu, ka January 1979. Ho ne ho e-na le bahoeletsi ba bararo feela ba kolobelitsoeng Tuvalu.

Ho ne ho se bonolo ho ithuta Setuvalu. Buka feela e neng e le teng ka Setuvalu ke “Testamente e Ncha.” Ho ne ho se na lidikishinari kapa litlelase tsa puo eo, kahoo ra etsa qeto ea ho ithuta mantsoe a 10 ho isa ho a 20 ka letsatsi. Empa ha nako e ntse e ea, re ile ra hlokomela hore ha re utloisise hantle mantsoe ao re ithutang ’ona. Ho fapana le ho bolella batho hore ho sebelisana le bademona ho fosahetse, re ne re re ha baa lokela ho bekha ka likala le ho sebelisa melamu! Empa re ile ra lokela ho tsoela pele re ithuta puo eo, kaha re ne re qalile lithuto tse ’maloa tsa Bibele. Lilemo tse ngata hamorao, e mong oa batho bao re ileng ra qala ho ithuta Bibele le bona, o ile a re ho rōna: “Rea thaba hore ebe joale le se le khona ho bua puo ea rōna. Qalong re ne re sa utloe seo le se buang!”

Empa ho na le ntho e ’ngoe e ileng ea re thusa ho ithuta puo ka potlako. Kaha ho ne ho se na matlo a hirisoang, re ile ra tlameha ho lula le lelapa le leng la Lipaki motseng o mong moo. Re ne re bua Setuvalu hohle, le ha re le hae. Ka mor’a ho qeta lilemo re sa bue Senyesemane, re ile ra hlokomela hore re se re tloaetse Setuvalu.

Nakoana ka mor’a hore re fihle moo, batho ba bangata ba ile ba qala ho bontša hore ba thahasella ’nete. Empa re ne re tla sebelisa’ng ho ithuta le bona? Re ne re se na likhatiso tsa puo ea bona. Ba ne ba tla tšoara thuto ea botho joang? Ha ba qala  ho tla libokeng, ba ne ba tla bina lipina life, ba ne ba tla beha lipuo joang, esita le hona ho lokisetsa liboka? Ba ne ba tla etsa’ng e le hore ba kolobetsoe? Batho bana ba ikokobelitseng ba ne ba hloka lingoliloeng tsa puo ea bona tse tla ba ruta ka Jehova! (1 Bakorinthe 14:9) Re ile ra ipotsa, ‘Na re tla ke re be le lingoliloeng ka Setuvalu, e leng puo e buuoang ke batho ba ka tlaase ho 15 000?’ Jehova o ile a araba lipotso tsena, a re bontša lintho tse peli: (1) Hore o batla hore batho ba ‘lihlekehlekeng tse hōle’ ba ithute ka eena, le (2) hore batho bao lefatše le nkang hore ‘ba ikokobelitse ba bile ba tlaase’ ba itšireletse lebitsong la hae.—Jeremia 31:10; Sofonia 3:12.

Ka 1980, ofisi ea lekala e ile ea re abela ho fetolela lingoliloeng ka Setuvalu. Re ile ra qala ho fetolela, le hoja re ne re lemoha hore ha re tsebe puo ka ho lekaneng. (1 Bakorinthe 1:28, 29) Qalong, re ile ra reka mochine oa khale ’musong e le hore re hatise ka letsoho lingoliloeng tse tla ithutoa libokeng. Ha nako e ntse e ea re ile ra fetolela buka ea ’Nete e Isang Bophelong bo sa Feleng ka Setuvalu, ’me ra e hatisa ka mochine oo o monyenyane. Ke sa ntse ke hopola monko o bohale oa enke le mocheso o matla o neng o etsa hore ho be thata ho hatisa lingoliloeng tseo ka letsoho. Ka nako eo, re ne re se na motlakase!

Ho ne ho se bonolo ho fetolela ka Setuvalu, kaha re ne re sa khone ho sheba mantsoe dikishinaring kapa ho etsa lipatlisiso libukeng tsa Setuvalu. Empa ka linako tse ling re ne re fumana thuso ka tsela eo re sa e lebellang. Hoseng ho hong ke ile ka kokota ka phoso lelapeng la monna-moholo e mong ea neng a hanyetsa ’nete. Monna-moholo eo e ne e kile ea e-ba tichere, ’me a nkhopotsa hore ha a batle ha re ntse re mo etela. A ntan’o re: “Ke batla ho u bolella ntho e le ’ngoe feela. Tsela eo le fetolelang lintho ka eona, ha e ea hlaka. Hase tsela eo re hlalosang lintho ka eona ka Setuvalu.” Ke ile ka botsa ba bang, ’me ka fumana hore o bua ’nete. Kahoo, ra etsa liphetoho e le hore re ntlafatse phetolelo ea rōna. Ke ile ka makatsoa ke hore ebe Jehova o  re thusitse a sebelisa monna enoa ea hanyetsang ’nete, eo ho totobetseng hore o bala lingoliloeng tsa rōna!

Khatiso ea pele ea Setuvalu e ileng ea fuoa batho ke sememo sa Sehopotso. Ka mor’a moo ra ba le pampitšana ea Kingdom News No. 30, e ileng ea lokolleloa hong le ea Senyesemane. Ruri re ile ra thaba hore ebe re na le sengoliloeng seo re ka se fang batho ka puo ea habo bona! Ha nako e ntse e ea, re ile ra ba le libukana esita le libuka tse ling ka Setuvalu. Ka 1983, lekala la Australia le ile la qala ho hatisa Molula-Qhooa ka Setuvalu. Makasine oo o ne o e-na le maqephe a 24 ’me o tsoa hang ka mor’a likhoeli tse tharo. Na batho ba Tuvalu ba ne ba rata libuka le limakasine tsee? E, kaha ke batho ba ratang ho bala. Nako le nako ha re lokolla khatiso e ncha, seteishene sa seea-le-moea sa ’muso se ne se e phatlalatsa litabeng, ka nako e ’ngoe e bile e ba ntlha-khōlō ea letsatsi! *—Sheba naletsana.

Mosebetsi oa phetolelo o ne o etsoa joang? Re ne re qala ka ho ngola ka pene pampiring. Ka mor’a moo, re thaepa boitsebiso ka makhetlo ho fihlela bo se bo loketse ho romeloa lekaleng la Australia. Ebe baralib’abo rōna ba babeli ba lekaleng ba bo kenya k’homphieutheng, le hoja ba sa tsebe puo eo. Ba ne ba qoba liphoso ka hore ba bapise boitsebiso boo ba bo kentseng k’homphieutheng. Ka mor’a moo, lekala le ne le hlophisa khatiso, ka hore le kenyelletse litšoantšo boitsebisong boo. Le ntan’o re romela maqephe ao ka sefofane. Re ne re a hlahloba ebe ha re qeta re a khutlisetsa morao hore a il’o hatisoa.

Mosebetsi oa phetolelo o se o ntlafetse haholo! Hona joale lithimi tsa bafetoleli li thaepa boitsebiso le ho lokisa liphoso k’homphieutheng. Hangata, motho ea hlophisang lingoliloeng o ba sebakeng seo bafetoleli ba leng ho sona. Ka mor’a moo, bafetoleli ba romela boitsebiso ka Inthanete lekaleng le hatisang. Ha ho sa hlokahala hore motho a mathele posong ho ea romela boitsebiso.

Ho theosa le lilemo, ’na le Jenny re ’nile ra abeloa ho sebeletsa likarolong tse ling tsa Pacific. Ha re tloha Tuvalu re ile ra abeloa ho ea lekaleng la Samoa ka 1985. Ha re le moo, re ile ra sebetsa le bafetoleli ba Sesamoa, Setonga, Setokelau, hammoho le Setuvalu. * (Sheba naletsana.) Joale, ka 1996, re ile ra abeloa ho sebeletsa lekaleng la Fiji, moo re ileng ra sebetsa le bafetoleli ba Sefiji, Sekiribati, Senaurua, Serotumane le Setuvalu.

Ke lula ke tsota tsela eo bafetoleli ba ratang mosebetsi oa bona ka eona, le hoja o se bonolo ebile o khathatsa. Ho tšoana le Jehova, bara le barali bana babo rōna ba tšepahalang ba batla hore batho ba utloe litaba tse molemo ka puo ea bona. (Tšenolo 14:6) Ka mohlala, ha re qala ho hlophisetsa hore Molula-Qhooa o fetoleloe ka Setonga, ke ile ka kopana le baholo bohle ba Tonga, eaba kea ba botsa hore na ke mang ea ka koetlisetsoang ho ba mofetoleli. Moholo e mong ea neng a e-na le mosebetsi o lefang hantle e le mak’henike, o ile a tlohela mosebetsi ka le hlahlamang, ’me a qala ho fetolela  hang-hang. Ke ile ka khothatsoa ke tumelo ea hae e matla, kaha o ne a e-na le lelapa ’me a sa tsebe hore na o tla fumana chelete hokae ea ho le hlokomela. Empa Jehova o ile a mo hlokomela hammoho le lelapa la hae, a qeta lilemo tse ngata e le mofetoleli.

Ho tšoana le bafetoleli bana, barab’abo rōna ba Sehlopha se Busang ba amehile haholo ka ho hlahisa lingoliloeng ka lipuo tsohle, esita le tse buuoang ke batho ba seng bakae feela. Ka mohlala, batho ba bang ba ile ba botsa hore na hoa hlokahala hore lingoliloeng li fetoleloe ka Setuvalu. Ke ile ka khothala ha ke bala karabo e latelang ea Sehlopha se Busang: “Ha re bone ho hlokahala hore mosebetsi oa ho fetolela ka Setuvalu o emisoe. Le hoja e ka ’na eaba batho ba tšimong ea Setuvalu baa fokola ka palo ha ba bapisoa le ba lipuo tse ling, ba ntse ba lokela ho bolelloa litaba tse molemo ka puo ea bona.”

Ka 2003, ’na le Jenny re ile ra tlosoa Lefapheng la Phetolelo, Fiji, ra isoa Lefapheng la Litšebeletso Tsa Phetolelo, Patterson, New York. E ne eka rea lora! Re ile ra sebetsa le thimi e thusang hore lingoliloeng tsa rōna li fetoleloe ka lipuo tse eketsehileng. Ka lilemo tse peli tseo re li qetileng re sebetsa le Lefapha la Litšebeletso Tsa Phetolelo, re ile ra abeloa ho koetlisa lithimi tsa bafetoleli linaheng tse sa tšoaneng.

Joale a re khutleleng sebokeng sa bohlokoa seo ke buileng ka sona qalong. Ka selemo sa 2000, Sehlopha se Busang se ile sa hlokomela hore lithimi tsa bafetoleli lefatšeng ka bophara li hloka koetliso mosebetsing oa tsona. Bafetoleli ba bangata ba ne ba sa koetlisetsoa phetolelo. Ka mor’a seboka seo le Komiti ea Bongoli, Sehlopha se Busang se ile sa etsa qeto ea hore bafetoleli lefatšeng lohle ba koetlisoe. Bafetoleli ba ne ba lokela ho thusoa ho utloisisa Senyesemane, hore na ba ka rarolla mathata a phetolelo joang le hore na ba ka sebelisana hammoho joang.

Ho bile le phello efe ka mor’a koetliso ee? Phetolelo e ile ea ntlafala. Palo eo lingoliloeng tsa rōna li fetoleloang ka eona e eketsehile ho feta leha e le neng pele. Ka 1979, ha re ne re abeloa ho ea sebeletsa re le baromuoa, Molula-Qhooa o ne o fumaneha ka lipuo tse 82 feela. Ebile lipuong tse ngata, Molula-Qhooa o ne o tsoa likhoeli tse seng kae ka mor’a oa Senyesemane. Empa hona joale Molula-Qhooa o fetoleloa ka lipuo tse fetang 240, ’me o tsoela hong le oa Senyesemane ka lipuo tse ngata. Batho ba ka bala boitsebiso bo ba rutang ’nete ea Bibele ka lipuo tse fetang 700. Lilemong tsa ho feta, ho ne ho sa bonahale eka sena se ka etsahala.

Ka 2004, Sehlopha se Busang se ile sa etsa qeto ea hore ho fetoleloe Bibele ea Phetolelo ea Lefatše le Lecha ka lipuo tse ling tse eketsehileng le hona kapele kamoo ho ka khonehang. Ka lebaka la qeto eo, hona joale batho ba bangata ba bala Phetolelo ea Lefatše le Lecha ka puo ea bona. Ha e le hantle, ka 2014, Bibele ena kapa likarolo tse ling tsa eona, e ne e fumaneha ka lipuo tse 128, ho akarelletsa tse ’maloa tse buuoang Pacific Boroa.

E ’ngoe ea lintho tseo ke li hopolang ka ho khetheha ke kopano e neng e tšoaretsoe Tuvalu ka 2011. Ho ne ho bile le komello e khōlō naheng eo ka likhoeli tse ngata. Barab’abo rōna ba ne ba bile ba nahana hore ba tlohele ho tšoara kopano. Empa  ka lehlohonolo, pula ea qala ho tšoloha ka matla mantsiboeeng ao re fihlileng ka ’ona. Kahoo, ra khona ho tsoela pele ka kopano ea rōna! Ke ile ka ba le tlotla ea ho lokolla Phetolelo ea Lefatše le Lecha ea Mangolo a Segerike a Bakreste ka Setuvalu! Le hoja barab’abo rōna ba buang puo eo ba fokola ka palo, ba ile ba amohela mpho eo e ntle e tsoang ho Jehova. Eitse ha kopano eo e fela, pula ea boela ea tšoloha. Kahoo bohle ba fumana metsi a mangata a ’nete le a pula!

Ka masoabi, mosali oa ka ea ratehang Jenny o ne a se a le sieo. O ile a hlokahala ka 2009, ka mor’a ho qeta lilemo tse leshome a loantšana le kankere. Re ne re se re qetile lilemo tse 35 re nyalane. Ha a tsosoa bafung, o tla thabela ho utloa hore Bibele e ile ea lokolloa ka Setuvalu.

Jehova o ntlhohonolofalitse ka mosali e mong ea motle, e leng Loraini Sikivou. Loraini le Jenny ba ne ba sebetsa hammoho Bethele ea Fiji, ’me Loraini le eena e le mofetoleli. Kahoo, ke boetse ke na le mosali ea sebeletsang Jehova ka botšepehi ea bileng a ratang puo joaloka ’na!

Ho theosa le lilemo, ke bone kamoo Ntate oa rōna ea lerato, Jehova, a hlokomelang batho ba lipuo tsohle kateng, esita le ba lipuo tse buuoang ke batho ba seng bakae feela. (Pesaleme ea 49:1-3) Ke hlokometse kamoo batho ba thabang kateng ha ba qala ho fumana lingoliloeng ka puo ea bona le ha ba binela Jehova ka puo ea bona. Linakong tse kang tsena, ke nahana ka lerato le tebileng leo Jehova a re ratang ka lona. (Liketso 2:8, 11) Ke sa ntsane ke hopola mantsoe a ileng a buuoa ke mor’abo rōna e mong ea hōlileng oa Motuvalu, e leng Saulo Teasi. Ka mor’a ho bina pina ea ’Muso ka puo ea hae ka lekhetlo la pele, o ile a re: “Ke kōpa u bolelle Sehlopha se Busang hore ekare lipina tsena li monate haholo ka Setuvalu ho feta ka Senyesemane.”

Ka September 2005, ke ile ka hlolloa ha ke khethoa hore ke sebeletse ke le setho sa Sehlopha se Busang sa Lipaki Tsa Jehova. Le hoja ke se ke se mofetoleli, ke leboha Jehova hore ebe o ntse a ntumella ho tsoela pele ke tšehetsa mosebetsi oa phetolelo lefatšeng ka bophara. Ke thabela ho tseba hore Jehova o hlokomela litlhoko tsa batho ba hae bohle, esita le ba lulang lihlekehlekeng tse hōle bohareng ba Leoatle la Pacific! Ka sebele, ho joalokaha mopesaleme a ile a bua, a re, “Jehova ke morena! Lefatše le ke le thabe. Lihlekehleke tse ngata li nyakalle.”—Pesaleme ea 97:1.