‘Ke Tseba Hantle Bohloko Boo ba bo Utloang’
Atamela ho Molimo
‘Ke Tseba Hantle Bohloko Boo ba bo Utloang’
“OA HALALELA, oa halalela, oa halalela Jehova.” (Esaia 6:3) Mantsoe ana a bululetsoeng a bontša hore Jehova Molimo ha a na sekoli ebile o hloekile ka mokhoa o ke keng oa lekanngoa. Empa u ka ’na ua ipotsa, ‘Na ebe ho halalela ha Jehova ho etsa hore e be Molimo ea sa tsotelleng le ea sa atameleheng? Na ebe Molimo ea halalelang hakana a ka tsotella moetsalibe ea sa phethahalang joaloka ’na?’ A re ke re hlahlobeng mantsoe a khothatsang ao Molimo a ileng a a bua ho Moshe joalokaha a tlalehiloe ho Exoda 3:1-10.
Ka letsatsi le leng ha Moshe a ntse a lisitse linku o ile a bona pono e sa tloaelehang—sehlahla se meutloa se ne se tuka empa “se sa che.” (Temana ea 2) A hloletsoe ke sena, Moshe o ile a atamela e le hore a bone hantle se etsahalang. A sebelisa lengeloi, Jehova o ile a bua le Moshe a le ka har’a mollo a re: “U se ke ua atamela mona. Rōla meqathatso ea hao, hobane sebaka seo u emeng ho sona ke mobu o halalelang.” (Temana ea 5) Nahana feela—kaha Molimo o ne a le teng moo ka tsela ea tšoantšetso, esita le mobu o ile oa halalela!
Molimo ea halalelang o ne a e-na le lebaka la ho bua le Moshe. O ile a re: “Ntle ho pelaelo ke bone mahloreho a sechaba sa ka se Egepeta, ’me ke utloile mohoo oa sona ka lebaka la ba se qobellang ho sebetsa; hobane ke tseba hantle bohloko boo se bo utloang.” (Temana ea 7) Molimo o ne a sa iphapanyetsa mahlomola a batho ba hae le likōpo tsa bona tse tiileng. Ho e-na le hoo, o ile a ba utloela bohloko. Sena re se bona mantsoeng a Molimo a reng: “Ke tseba hantle bohloko boo [ba] bo utloang.” Buka e ’ngoe ea lipatlisiso ha e hlalosa mantsoe a reng, “Ke tseba hantle,” e re: “Polelo ena e bontša kutloelo-bohloko, ho nahanela, le qenehelo.” Mantsoe ao Jehova a ileng a a bua ho Moshe a bontša hore ke Molimo ea amehang le ea tsotellang e le kannete.
Molimo o ne a tla etsa joang? Ha aa ka a shebella feela ka mohau kapa a mamela ka qenehelo. O ile a susumelletseha hore a nke khato. Eaba o etsa qeto ea ho ntša batho ba hae Egepeta ho ba isa “naheng e phallang lebese le mahe a linotši.” (Temana ea 8) E le ho phethahatsa sena Jehova o ile a roma Moshe a re: ‘Ntša sechaba sa ka Egepeta.’ (Temana ea 10) Moshe o ile a tšepahalla thōmo ena eaba o ntša Baiseraele Egepeta ka 1513 B.C.E.
Jehova o ntse a e-s’o fetohe. Barapeli ba hae kajeno ba ka kholiseha hore o ntse a bona mahlomola a bona le hore o utloa lillo tsa bona ha ba kōpa thuso. O tseba hantle bohloko boo ba bo utloang. Empa hase feela hore Jehova o qenehela bahlanka ba hae ba inehetseng. Molimo ea mosa o boetse o susumelletseha ho ba thusa ‘hobane oa ba tsotella.’—1 Petrose 5:7.
Qenehelo ea Molimo e etsa hore re be le tšepo. Ka thuso ea Jehova, re ka leka ho phela ka melao ea hae e hloekileng le hoja re sa phethahala ’me ra ba ba amohelehang ho eena. (1 Petrose 1:15, 16) Morali e mong oabo rōna ea neng a e-na le bothata ba ho sithabela maikutlo le ho nyahama o ile a khothatsoa ke phihlelo eo Moshe a ileng a ba le eona ha a le sehlahleng se meutloa. O re: “Haeba Jehova a ka etsa hore le mobu feela o halalele, mohlomong ho na le tšepo bakeng sa ka. Khopolo ena e nthusitse haholo.”
Na see ha se u susumelletse hore u ithute ho eketsehileng ka Jehova Molimo ea halalelang? Re ka khona ho atamela haufi le Jehova kaha “o tseba sebōpeho sa rōna hantle, oa hopola hore re lerōle.”—Pesaleme ea 103:14.