2 Fumana Tsebo e Nepahetseng ea Molimo

“Sena se bolela bophelo bo sa feleng, ho tsoela pele ba rua tsebo ka uena, Molimo a le mong feela oa ’nete.”—Johanne 17:3.

LITŠITISO KE LIFE? Ba bang ba re Molimo ha a eo. Ba bang ba lumela hore Molimo hase motho empa ke matla a maholohali. Ba lumelang hore ke motho oa sebele, bona ba ruta lithuto tse hanyetsanang mabapi le hore na ke mang le hore na o na le litšobotsi life.

U KA HLŌLA LITŠITISO JOANG? Tsela e ’ngoe eo u ka tsebang Molimo ka eona ke ka ho sheba lintho tseo a li entseng. Moapostola Pauluse o ile a re: “Litšobotsi tsa [Molimo] tse sa bonahaleng li bonoa ka ho hlaka ho tloha pōpong ea lefatše ho ea pele, hobane li lemohuoa ka lintho tse entsoeng, esita le matla le Bomolimo ba hae ba ka ho sa feleng.” (Baroma 1:20) Ka ho hlahlobisisa pōpo, u ka ithuta ho hongata ka bohlale le matla a ’Mōpi oa rōna.—Pesaleme ea 104:24; Esaia 40:26.

 Leha ho le joalo, e le hore motho ka mong a ka fumana tsebo e nepahetseng ea hore na ke Molimo oa mofuta ofe, o lokela ho ipalla Lentsoe la Molimo, Bibele ’me a itlhahlobele lona. U se ke ua lumella batho ba bang hore ba laole tsela eo u nahanang ka eona. Ho e-na le hoo, latela keletso ena ea Bibele: “Le khaotse ho ba ka sebōpeho sa tsamaiso ena ea lintho, empa le fetohe ka ho fetola likelello tsa lōna, e le hore le ka ipakela e le lōna thato ea Molimo e molemo le e amohelehang le e phethahetseng.” (Baroma 12:2) Ka mohlala, nahana ka linnete tse latelang tseo Bibele e li senolang ka Molimo.

Molimo o na le lebitso. Qalong lebitso la Molimo le ne le hlaha ka makhetlo a likete ka Bibeleng. Liphetolelong tse ngata le hlaha ho Pesaleme ea 83:18, e reng: “Ba tle ba tsebe hore uena, eo lebitso la hao e leng Jehova, u rena u ’notši lefatšeng lohle.”—Bibele ea Sesotho.

Jehova Molimo o ameha maikutlo ke lintho tseo batho ba li etsang. Ka mor’a hore Jehova a lokolle Baiseraele bokhobeng ba Egepeta, ka linako tse ling ba ne ba iphapanyetsa melao ea hae e bohlale. Ha ba ne ba mo fetohela, seo se ne se mo “utloisa bohloko.” Liketso tsa bona li ne li “utloisa Mohalaleli oa Iseraele bohloko.”—Pesaleme ea 78:40, 41.

Jehova o tsotella e mong le e mong oa rōna. Ha Jesu a bua le barutuoa ba hae o ile a re: “Na lirobele tse peli ha li rekisoe ka chelete ea tšepe ea bohlokoa bo bonyenyane? Empa leha ho le joalo ha ho le se seng sa tsona se tla oela fatše kantle le hore Ntat’a lōna a tsebe. Empa moriri oa lihlooho tsa lōna o baliloe kaofela. Ka hona le se ke la tšaba: le ba bohlokoa ho feta lirobele tse ngata.”—Matheu 10:29-31.

Molimo ha a khetholle merabe. Moapostola Pauluse o ile a bolella Bagerike ba Athene hore Molimo “o entse ho tsoa mothong a le mong sechaba se seng le se seng sa batho, ho lula holim’a lefatše lohle.” O ile a ba a bolela hore Molimo ha a “hōle le e mong le e mong oa rōna.” (Liketso 17:26, 27) Moapostola Petrose o ile a re: “Molimo ha a leeme, empa sechabeng se seng le se seng motho ea mo tšabang le ea sebetsang ho loka oa amoheleha ho eena.”—Liketso 10:34, 35.

HO NA LE MOPUTSO OFE? Ba bang “ba chesehela Molimo; empa eseng ho ea ka tsebo e nepahetseng.” (Baroma 10:2) Haeba u tseba seo ha e le hantle Bibele e se rutang, u tla qoba ho khelosoa ebile seo se tla u thusa ho ‘atamela ho Molimo.’—Jakobo 4:8.

Hore u fumane boitsebiso bo eketsehileng, bala khaolo ea 1, bukeng ea Ha e le Hantle ke Eng Seo Bibele e se Rutang?, * sehloohong se reng “Ke Eng Seo e Leng ’Nete ka Molimo?”

[Mongolo o botlaaseng ba leqephe]

[Setšoantšo se leqepheng la 6]

Tsela e ’ngoe ea ho fumana tsebo ea Molimo ke ka ho ithuta linthong tseo a li entseng