Ke Fumane Thabo le Hoja ke Holofetse

Joalokaha ho boletse Paulette Gaspar

Le hoja ke ne ke le boima bo loketseng ba lik’hilograma tse ka bang tharo ha ke ne ke hlaha, ngaka e ile ea lemoha hore ke ne ke e-na le bothata bo tebileng. Masapo a ka a ile a robeha nakong ea peleho. Ha e le hantle, ke tšoeroe ke lefu le bitsoang “osteogenesis imperfecta,” e leng lefu la masapo a robehang le feela. Ke ile ka potlakisetsoa kamoreng ea ho buuoa, empa lingaka li ne li se na tšepo ea hore ke tla phela. Li ne li lebeletse hore ke tla shoa le pele lihora tse 24 li fela.

KE HLAHETSE Canberra, e leng motse-moholo oa Australia, ka la 14 June, 1972. Ho sa tsotellehe se neng se lebeletsoe, letsatsi leo le ile la likela ke ntse ke phela. Empa joale ke ile ka tšoaroa ke nyumonia. Kaha lingaka li ne li nahana hore ke tlil’o shoa, ha lia ka tsa mpha moriana leha e le ofe etsoe li ne li se li ipoleletse hore “se etsahalang se mpe se etsahale.” Ha e le hantle se ile sa fela sa etsahala ’me ha kea ka ka shoa.

E tlameha ebe ho ne ho nyolosetsa haholo bakeng sa batsoali ba ka nakong eo. Kaha ho ne ho bonahala eka nke ke ka phela, basebetsi ba bang ba sepetlele ba ile ba eletsa batsoali ba ka hore ba se ke ba beha pelo ea bona haholo ho ’na le hoja ba ne ba sa bue seo ka pelo e mpe. Ha e le hantle, likhoeling tse tharo tse qalang tseo ke li qetileng ke le sepetlele, batsoali ba ka ba ne ba sa lumelloa le ho ntšoara feela. Ke ne nka ’na ka robeha neng kapa neng ha ba ntšoara. Ha ho hlaka hore ekare ke tla phela, lingaka li ile tsa eletsa batsoali ba ka hore ba nkise lehaeng la bana ba holofetseng.

Empa batsoali ba ka ba ile ba etsa qeto ea ho nkisa lapeng. Lebaka ke hobane ’Mè o ne a sa tsoa qala ho ithuta Bibele le Lipaki Tsa Jehova. Seo a ithutileng sona se ile sa etsa hore a hlakeloe le ho feta hore ke boikarabelo ba hae hore a ntlhokomele. Leha ho le joalo, kaha ’Mè o ne a lokela ho sebelisa matla ’ohle a hae ho ntlhokomela ka linako tsohle, ’me seo se mo thefula maikutlong se bile se mo khathatsa, e tlameha ebe ho ne ho se bonolo ho eena hore a be le nako ea ho etsa hore re be le kamano e lerato ea ’mè le ngoana. Ke ne ke isoa sepetlele hangata. Masapo a ka a ne a ka robeha leha ke hlapisoa feela. Leha ke thimola feela, lesapo le ne le ka ’na la tletlerana.

Ke Ile ka Tetebela Maikutlong

Ke ile ka hōla ke lula setulong sa batho ba holofetseng. Ke ne nke ke ka khona ho ithuta ho tsamaea. Ho sa tsotellehe mathata ’ohle a ka, batsoali ba ka ba ile ba ntlhokomela ka tsela e tsoileng matsoho.

Ho phaella moo, ’Mè o ile a leka sohle se matleng a hae ho nthuta molaetsa o tšelisang oa Bibele. Ka mohlala, o ile a nthuta hore nakong e tlang, Molimo o tla etsa lefatše paradeise eo ho eona batho bohle ba tla phela hantle moeeng, kelellong le ’meleng. (Pesaleme ea 37:10, 11; Esaia 33:24) Leha ho le joalo, ’Mè o ile a mpolella ka tsela e hlakileng hore hajoale ho tla ba thata hore  ke thabele bophelo ho fihlela ha nako eo ea Molimo e fihla.

Qalong ke ile ka ea sekolong sa bana ba holofetseng. Matichere a ka a ne a sa mpotse le ho mpotsa hore na ke rerile ho etsa’ng bophelong ’me le ’na ke ne ke se na sepheo seo ke batlang ho se finyella. Ha e le hantle, ho ea sekolong ka bohona ho ne ho nkimela. Bana ba bangata sekolong ba ne ba sa ntšoare hantle. Hamorao ke ile ka ea sekolong se tloaelehileng. Ke ile ka fumana hore ho ithuta ho etsa lintho joaloka bana ba bang ho ne ho nkimela maikutlong, ’meleng le kelellong. Leha ho le joalo, ke ne ke ikemiselitse ho qeta lilemo tse 12 tsa sekolo.

Ka ho khetheha, ha ke le sekolong se phahameng, ke ile ka nahana kamoo liithuti-’moho le ’na li feletsoeng ke tšepo kateng bophelong li bileng li sa thabang. Ke ile ka boela ka nahana ka lintho tseo ’Mè a neng a nthutile tsona ka Bibeleng. Ke ne ke tseba hore seo a mpoleletseng sona ke ’nete. Empa ka nako eo, lithuto tsa Bibele li ne li e-s’o tebe pelong ea ka. Ka nako e itseng ke ile ka etsa qeto ea hore nke ke leke ho phelela menate le menyaka ’me ke tlohele ho tšoenyeha ka bokamoso.

Ha ke le lilemo li 18, ke ile ka tloha lapeng ’me ka ea lula le batho ba bang ba holofetseng. Sena se ne se thabisa se bile se tšosa. Ke ne ke khahliloe ke ho fumana bolokolohi boo ke neng ke se na bona, ho itaola le ho ba le metsoalle le ho phelela menate. Metsoalle ea ka e mengata e ile ea nyaloa. Le ’na ke ile ka lakatsa eka nka nyaloa ’me ka ba le monna ea mpontšang lerato. Empa ka lebaka la ho holofala, ho ne ho ke ke ha e-ba bonolo hore ke fumane motho ea ka ’nyalang. Sena se ile sa ntetebetsa maikutlong.

Leha ho le joalo, ha ho mohla ke ileng ka beha Molimo molato ka boemo ba ka. Ke ne ke ithutile ’me ke tseba hantle hore ho hang Molimo o ne a ke ke a etsa ntho leha e le efe e hlokang toka. (Jobo 34:10) Ke ile ka leka ho amohela boemo ba ka kamoo bo leng kateng. Ho ntse ho le joalo, ke ile ka tetebela habohloko maikutlong.

Ke Ile ka Hlaphoheloa Butle-butle

Ka lehlohonolo, ’Mè o ile a hlokomela boemo boo ke neng ke le ho bona eaba o kōpa moholo e mong oa phutheho ea lulang haufi le moo ke lulang teng hore a nthuse. Moholo eo o ile a ntetsetsa ’me a ’memela hore ke ee libokeng tsa Bokreste Holong ea ’Muso ea Lipaki Tsa Jehova ea sebakeng seo. Ho phaella moo, morali e mong oabo rōna phuthehong eo o ile a qala ho ithuta Bibele le ’na beke e ’ngoe le e ’ngoe.

Ha ke ntse ke hopotsoa linnete tsa Bibele tseo ’Mè a neng a ile a nthuta tsona lilemong tse fetileng, ke ile ka qala ho talima bophelo ka tsela e fapaneng. Ke ne ke thabela ho ba le Bakreste-’moho le ’na. Leha ho le joalo, ke ne ke ithutile ho se ntše maikutlo a ka e le hore ke tle ke se ke ka tšoana ke utloa bohloko. Ke nahana hore sena ke sona se neng se nthatafalletsa hore ke hle ke ikutloe ke rata Molimo. Ho ntse ho le joalo, ke ne ke tseba hore ke lokela ho nehela bophelo ba ka ho eena. Ka hona, ka December 1991, ke ile ka kolobetsoa e le ho bontša hore ke inehetse ho eena.

Ke ile ka tloha ntlong eo ke neng ke lula le batho ba bang ba holofetseng ho eona, eaba ke lula ke le mong. Sena se ile sa e-ba le melemo le mathata a sona. Ka mohlala, ke ne ke jeoa ke bolutu haholo. Hape ke ne ke tšaba hore banna ba ka ’na ba nkenela. E se khale, ke ile ka boela ka tetebela habohloko maikutlong. Le hoja ke ne ke lula ke bososela ’me ke bonahala eka ke thabile, ho hang ke ne ke sa thaba. Ruri ke ne ke hloka motsoalle ea molemo le eo nka mo tšepang.

Ke nahana hore Jehova Molimo o ile a mpha motsoalle oa mofuta oo. Ka lerato baholo ka phuthehong ba ile ba lokisetsa hore Suzie, e leng morali’abo rōna e mong ea nyetsoeng, a tsoele pele ho ithuta Bibele le ’na. Suzie ha e ea ka ea e-ba feela mosuoe. E ile ea e-ba motsoalle oa ka ea haufi-ufi eo ke mo ratang haholo.

Suzie o ile a nkoetlisa hore ke bolelle ba bang seo ke ithutang sona ha ke le tšebeletsong ea ntlo le ntlo le ha ke iqoqela feela le batho. Joale ke ile ka qala ho ananela ka ho tebileng litšobotsi tsa Molimo. Le hoja ke ne ke se ke kolobelitsoe, ke ne ke e-s’o ka ke rata Molimo ka ho tebileng. Ka lekhetlo  le leng ke ile ka ba ka nahana hore ke khaotse ho mo sebeletsa. Ke ile ka phetlela Suzie sefuba, eaba o nthusa hore ke fete bothateng boo bo tebileng.

Suzie o ile a boela a nthusa hore ke hlokomele hore lebaka le ka sehloohong le etsang hore ke se ke ka thaba ke hobane ke ne ke tloaelane le batho ba sa rateng Jehova haholo. Ka hona, ke ile ka qala ho ba motsoalle oa batho ba hōlileng tsebong, haholo-holo ba hōlileng lilemong. Hape kaha ’na le ’Mè re ne re sa utloane hakaalo, ke ile ka qala ho loanela hore ke be le kamano e ntle le eena hammoho le abuti oa ka. Ke ile ka hlolloa ha ke fumana hore ke ba le thabo eo ho hang ke neng ke e-s’o ka ke e-ba le eona. Ka ho khetheha Jehova, hammoho le bara le barali beso ba moea le lelapa leso, e ile ea e-ba mohloli oa thabo le matla a ka.—Pesaleme ea 28:7.

Mosebetsi o Mocha

Ka mor’a ho ea kopanong e ’ngoe moo ke ileng ka utloa puo e neng e hatisa thabo e fumanoang ke Bakreste ba bangata ba tšebeletsong ea nako e tletseng, ke ile ka nahana, ‘Khele, ntho eo e ke ke ea mpalla! Bonneteng ke ile ka lemoha hore ke tla thulana le bothata bo boholo ka lebaka la ho kula. Empa ka mor’a ho rapella taba ena le ho nahanisisa ka eona, ke ile ka etsa qeto ea ho tlatsa foromo ea ho ba mosuoe ea rutang batho ba bang Bibele ka nako eohle, eaba ka April 1998, ke qala tšebeletso eo.

Ke khona joang ho etsa mosebetsi oa ho bolela le hoja ke holofetse? Ka tlhaho ke motho ea ratang ho iketsetsa lintho ebile ha ke rate ho imetsa batho, ho itšetleha ka lipalangoang tsa bona kapa ho lebella hore ba nthuse ka litsela tse ling. Kahoo, Suzie le monna oa hae, Michael ba ile ba mpha leano lena: Reka sethuthuthu! Empa ke ne ke tla khanna sethuthuthu joang? Joalokaha setšoantšo sena se bontša, sethuthuthu sena se etselitsoe ’na ka ho khetheha. Ebile ha ho hlokahale hore ke theohe setulong sa ka sa batho ba holofetseng ka ’melenyana oa ka oa boima ba lik’hilograma tse 19 ha ke se palama kapa ke se theoha!

Sethuthuthu sa ka se mpha bolokolohi ba hore ke etele batho ’me ke ithute Bibele le bona ka linako tse lumellanang le maemo a bona hammoho le a ka. Bonneteng, ke rata ho palama sethuthuthu ’me ke thabela ho otloa ke moea hamonate sefahlehong—e leng e ’ngoe ea lintho tse sa reng letho tse thabisang bophelong!

Ke thabela ho qalisa moqoqo le batho seterateng, ’me ka kakaretso ke batho ba ntlhomphang le ba ’nahanelang. Ke rata ho thusa ba bang ho ithuta Bibele. Ke hopola ka le leng ha ke ne ke le tšebeletsong ea ntlo le ntlo ’me ke tsamaea le motho ea molelele. O ile a lumelisa mong’a ntlo, eaba mong’a ntlo eena o ncheba a hloletsoe ’me a botsa motho eo ke tsamaeang le eena a re: “Na o tseba ho bua?” Bobeli ba rōna re ile ra shoa ke litšeho. Ka mor’a hore ke mo bolelle litaba tse molemo, mosali eo o ne a se na pelaelo ea hore kannete ke tseba ho bua!

Hona joale ke thabela bophelo ebile ke ithutile ho rata Jehova Molimo. Ke leboha ’Mè haholo hore ebe o nthutile ’nete ea Bibele, ’me ka kholiseho ke letetse nako e ntseng e atamela ea hore Molimo a “[etse] hore lintho tsohle li be ncha,” ho akarelletsa le ’melenyana oa ka.—Tšenolo 21:4, 5.

[Ntlha e Qolotsoeng e leqepheng la 30]

“Ke ile ka leka ho amohela boemo ba ka kamoo bo leng kateng. Ho ntse ho le joalo, ke ile ka tetebela habohloko maikutlong”