Lebaka Leo Bibele e Leng Molemo Kajeno

“Mangolo ’ohle a ngotsoe ka tšusumetso ea moea oa Molimo, ’me a na le thuso . . . ea ho tsamaisa [batho].”—2 Timothea 3:16, Bibele—Phetolelo e Ncha.

HO THEOSA le makholo a lilemo, Bibele e ’nile ea susumelletsa batho ba litso tse ngata hore ba ntlafatse tsela eo ba phelang ka eona. Lengolo le qotsitsoeng ka holimo le hlalosa hore na ke hobane’ng ha Bibele e le matla ka tsela ena—ke hobane e na le bohlale bo tsoang ho Molimo. Le hoja Bibele e ngotsoe ke batho, e re bolella maikutlo a Molimo. Bibele e re: “Batho ba ile ba bua ho tsoa ho Molimo ha ba ntse ba khannoa ke moea o halalelang.”—2 Petrose 1:21.

Bibele ke buka e nang le likeletso tse molemo bonyane ka litsela tse peli. Ea pele, e re thusa hore re be le boikutlo bo nepahetseng ba hore na hantle-ntle tsela e molemo ea bophelo ke efe. Ea bobeli, ke hore e na le matla a ho susumetsa batho hore ba etse liphetoho tse hlokahalang e le hore ba phele ka tsela eo e molemo. A re ke re tšohleng litšobotsi tsena tse peli tsa Bibele.

Tsela ea ho Lemoha Lintho Tsa Bohlokoa Tse ka Hahamalloang

Tšepiso ea Molimo e hlahang ka Bibeleng, e re: “Ke tla etsa hore u be le temohisiso ’me ke u rupele ka tsela eo u lokelang ho tsamaea ka eona. Ke tla u fa keletso leihlo la ka le le holim’a hao.” (Pesaleme ea 32:8) Hlokomela hore hase feela hore Molimo o fana ka keletso empa o boetse o fana ka temohisiso, e leng bokhoni ba ho utloisisa taba ka mahlakoreng ’ohle, eseng feela ho e okola ka holimo. Ho lemoha lintho tseo ka sebele e leng tsa bohlokoa tseo re ka li hahamallang bophelong ho ka re sireletsa hore re se ke ra itšenyetsa nako ka ho lelekisa lelea.

Ka mohlala, ntho eo batho ba bangata ba e lelekisang bophelong ke ho hlahella ka mahetla kapa ho hafa ka nkatana. Ho na le libuka tse ngata tse fanang ka likeletso mabapi le hore na batho ba ka sebelisa matšoephelele joang hore ba phahamele ba bang kapa e be barui. Ka lehlakoreng le leng, Bibele e re bolella ho re: “Tlhōlisano ea e mong khahlanong le e mong . . . ke lefeela le ho lelekisa moea.” “Ea ratang silevera a ke ke a khotsofalla silevera.” (Moeklesia 4:4; 5:10) Na keletso ee e ka re tsoela molemo mehleng ee?

Ho tea mohlala e le ho bontša hore na keletso eo ea Bibele e molemo hakae, a re hlahlobeng se ileng sa etsahalla Akinori oa Japane. Ka mor’a ho loana ea khumamela hore a theole ba bang lithutong, Akinori o ile a finyella sepheo sa hae sa ho fumana lengolo univesithing e ’ngoe e itlhommeng pele a ba a iphumanela mosebetsi femeng e ’ngoe e emeng hantle. Ho ne ho bonahala eka lintho li mo tsamaela hantle. Leha ho le joalo, katleho eo ha ea ka ea etsa hore a thabe joalokaha a ne a lebeletse. Ho e-na le hoo, bophelo ba hae bo ile ba soahlamanngoa ke khatello ea  maikutlo le mokhathala. Metsoalle ea hae mosebetsing ha ea ka ea mo tšelisa ho hang. O ile a tetebela maikutlo hoo e ileng ea e-ba lekhoba la tahi a ba a nahana ho ipolaea. Eaba o qala ho ithuta Bibele le Lipaki Tsa Jehova. Seo a ileng a ithuta sona se ile sa etsa hore a fetole lintho tseo a nkang e le tsa bohlokoa bophelong. Nakoana hamorao maloetse a neng a bakiloe ke ho tetebela maikutlong a ile a qala ho ea moriting. Ho e-na le ho etsa lintho a susumetsoa ke boikhohomoso le ho batla ho hlahella ka mahetla, Akinori o ile a iponela ka mahlo hore maele a Bibele a nepile ha a re: “Pelo e nang le khotso e phelisa motho hantle.”—Liproverbia 14:30, Bibele—Phetolelo e Ncha.

U nka hore ntho ea bohlokoa eo motho a lokelang ho e lelekisa bophelong ke efe? U utloa eka u ka ba le thabo e khaphatsehang haeba u ka finyella eng bophelong? Na ke ho atleha lenyalong? Kapa na ke ho hōlisa bana ba hao hantle hore ba tle ba tsebe ho itjara ka moso? Na ke ho ba le metsoalle e mengata? Kapa ke ho phela hamonate? Tsena kaofela ke lintho tse ntle tseo motho a ka ratang ho li finyella. Ha e le hantle, Bibele e re khothalletsa hore re etse lintho tsena, le hoja e sa re e be tsona tse ka sehloohong tseo re lokelang ho li hahamalla bophelong. Kaha Bibele e na le temohisiso linthong tse ka re tsoelang molemo, e re bolella ntho ea bohlokoa eo re tlamehang ho e etsa e le hore re phele ka tsela e khotsofatsang ha e re: “Tšaba Molimo oa ’nete ’me u boloke litaelo tsa hae. Etsoe sena ke sohle seo motho a tlamehang ho se etsa.” (Moeklesia 12:13) Haeba re sa etse sena seo re tlamehang ho se etsa, bophelo ha bo be le morero, boa re sulafalla ’me bo qetella bo re nyahamisitse. Ka lehlakoreng le leng, Bibele ea re kholisa: “Ho thaba ea tšepang Jehova.”—Liproverbia 16:20.

Kamoo Bibele e Susumetsang Batho Hore ba Fetohe

Moapostola Pauluse o ile a ngola a re: “Lentsoe la Molimo lea phela ’me le fana ka matla.” Joaloka sabole e bohale, e sehang ka nģa tse peli, le ka phunyelletsa ho ea fihla menahanong e tebileng ea motho esita le boikemisetsong ba hae. (Baheberu 4:12) Bibele e na le matla a ho fetola tsela eo batho ba phelang ka eona hobane e ba thusa hore ba lemohe seo ba hlileng ba leng sona, ho fapana le kamoo ba inkang ba le kateng. Ka mor’a moo, ba ratang se lokileng ho tsoa pelong ba tla lemoha hore ho ka ’na ha hlokahala hore ba etse liphetoho. Ka mohlala, ha Pauluse a ne a bua ka Bakreste ba phutheho ea boholo-holo ea Korinthe bao ka nako e ’ngoe e neng e le masholu, matahoa, bafebi, joalo-joalo, o ile a re: “Ke seo ba bang ba lōna ba neng ba le sona. Empa le hlatsoitsoe hore le hloeke . . . ka moea oa Molimo oa rōna.” (1 Bakorinthe 6:9-11) Le kajeno moea o halalelang oa Jehova o sa ntse o sebetsa ebile o sa ntse o le matla haholo, ’me o ka susumetsa batho hore ba etse liphetoho tse hlokahalang.

Monna e mong ea lulang Europe, ea bitsoang Mario, e ne e le motho ea mabifi, ea tsubang matekoane a bile a a rekisa. Ka nako e ’ngoe ha lepolesa le mo nkela lithethefatsi tsa hae, o ile a halefa hoo a ileng a le loantša a ba a pshatla koloi ea lona. Ho feta moo, Mario o ne a sa sebetse a bile a kene tloara! likolotong. Ha a lemoha hore a ke ke a rarolla mathata a hae ka boeena, o ile a lumela ho ithuta Bibele le Lipaki. Ha a ntse a tsoela pele ho ithuta, Mario o ile a qala ho itokisa ka tsela e makhethe, a khaotsa ho tsuba le ho rekisa lithethefatsi, a ba a tlohela ho ba mabifi. Ba bangata ba neng ba tseba mekhoa ea hae ea pele ba ile ba hlolloa. Ba ne ba mo emisa ebe baa botsa, “Mario, na ehlile ke uena?”

Ke eng e susumetsang batho ba kang Akinori le Mario hore ba fetole bophelo ba bona ’me ba qetelle ba khotsofetse ba bile ba thabile e le kannete bophelong? Ho hlakile hore ba thusitsoe ke thuto ea Bibele e ba entseng hore ba tsebe Molimo ka tsela eo ba neng ba sa mo tsebe ka eona pele. Molimo ke eena feela ea ka re fang thupelo e molemo eo re e hlokang hore re atlehe hona joale bophelong ’me re be le tšepo ea ho phela ka ho sa feleng nakong e tlang. Joaloka Ntate, ha Jehova Molimo a bua le rōna a sebelisa Bibele o re: “Mora oa ka, utloa ’me u amohele lipolelo tsa ka. Joale lilemo tsa bophelo li tla u atela. . . . Ha u tsamaea, mehato ea hao e ke ke ea patisana; ’me haeba u matha, u ke ke ua khoptjoa. Tšoara taeo; u se ke ua e tlohela. E sireletse, etsoe ke bophelo ba hao.” (Liproverbia 4:10-13) Ruri ha ho na keletso e molemo ho feta hore re batle tataiso ea ’Mōpi oa rōna!

 [Lebokose/Setšoantšo se leqepheng la 7]

Likeletso Tse Molemo Kajeno

Bibele e fana ka melao-motheo e bonolo empa e le e molemo e ka re tataisang likarolong tsohle tsa bophelo ba mehleng ena. Mehlala e meng ke ena:

• Ho ba le likamano tse ntle le batho ba bang

“Ka hona, lintho tsohle tseo le batlang hore batho ba le etse tsona, le lōna ka ho tšoanang le ba etse tsona.”—Matheu 7:12.

“Ea itšoarang joaloka e monyenyane har’a lōna kaofela ke eena e moholo.”—Luka 9:48.

“Latelang mokhoa oa ho amohela baeti.”—Baroma 12:13.

• Ho hlōla mekhoa e mebe

“Ea tsamaeang le batho ba bohlale o tla hlalefa, empa ea bang le litšebelisano le ba hlokang kelello lintho li tla mo tsamaela hampe.”—Liproverbia 13:20.

“U se ke ua ba har’a ba noang veine haholo.”—Liproverbia 23:20.

“U se ke ua ba le setsoalle le mang kapa mang ea ineheletseng bohale.”—Liproverbia 22:24.

• Ho theha lenyalo le tiileng

“E mong le e mong oa lōna ka bomong a ke a rate mosali oa hae joalokaha a ithata; ka lehlakoreng le leng, mosali o lokela ho ba le tlhompho e tebileng ho monna oa hae.”—Baefese 5:33.

“Le ikapese lerato le mofuthu la qenehelo, mosa, ho ikokobetsa kelellong, bonolo, le tiisetso. Tsoelang pele le mamellana le ho tšoarelana ka bolokolohi.”—Bakolose 3:12, 13.

• Ho thusa bana

“Koetlisa moshanyana ho ea ka tsela e mo loketseng; esita le ha a tsofala a ke ke a e kheloha.”—Liproverbia 22:6.

“Lōna, bo-ntate, le se ke la halefisa bana ba lōna, empa le tsoele pele ho ba hōlisa ka taeo le kelello e laoloang ke Jehova.”—Baefese 6:4.

• Ho qoba liqabang

“Karabo, ha e le bonolo, e leleka khalefo, empa lentsoe le utloisang bohloko le baka bohale.”—Liproverbia 15:1.

“Etellang pele ho bontšaneng tlhompho.”—Baroma 12:10.

Esita le haeba batho e le metsoalle, hangata ba ka qoba likhohlano tse amanang le lichelete ka hore ba ngole litumellano fatše. Kahoo, mohlanka oa Molimo ea bitsoang Jeremia o ile a ngola: “Ka ngola lengolo le tiisitsoeng ’me ka khomaretsa tiiso eaba ke nka lipaki ha ke qala ho bekha chelete likaleng.”—Jeremia 32:10.

• Ho ithuta ho ba le pono e nepahetseng ea lintho

“Lintho life kapa life tsa ’nete, . . . tse ratehang, . . . tse buuoang hantle, bokhabane bofe kapa bofe le ntho efe kapa efe e lokeloang ke thoriso, le tsoele pele ho nahana ka lintho tsena.”—Bafilipi 4:8.

Bibele e re khalemela hore re tlohele ho lula re lohotha ka lintho tse nyahamisang ebile e nyatsa “bakorotli ba belaelang ka tse ba hlahelang bophelong.” E re: “Thabang tšepong.”—Juda 4, 16; Baroma 12:12.

Hase feela hore ho phela ka melao-motheo ena ho tla etsa hore re be le khotso le khotsofalo hona joale, empa ho tla boela ho re thuse hore re phele ka tsela eo Molimo a batlang re phele ka eona ’me o tla re hlohonolofatsa. Bibele e re: “Ba lokileng ba tla rua lefatše, ba tla lula ho lona ka ho sa feleng.”—Pesaleme ea 37:29.

[Litšoantšo tse leqepheng la 5]

Ha Akinori e sa le rakhoebo (ka ho le letšehali), le kajeno ha a thabela ho bolella batho ’nete ea Bibele le mofumahali oa hae