Lengolo le Tsoang Russia

Leeto le Eang “Qetellong ea Lefatše”

SEFOFANE sa rōna se senyenyane se ile sa phahama butle-butle ho tloha Yakutsk, ’me ha se le holim’a Phula ea Tuymaada, se ne se se se phahame ka ho feletseng. Sefofane sa rōna se ile sa feta holim’a matamo le matša a mangata-ngata a libōpeho tse sa tšoaneng a letseng qhoqhoane, sa ba sa feta holim’a mekoloko ea lithaba tsa Verkhoyanskiy, tseo litlhōrō tsa tsona li kupelitsoeng ke lehloa le chabetsoeng ke letsatsi. Ka mor’a ho tsamaea lik’hilomithara tse 900, sefofane se ile sa lula motseng oa Deputatskiy.

Lena e ne e le leeto la ka la pele maetong ao ke ileng ka a nka ho ea Rephabliking ea Sakha, e boetseng e tsejoang e le Yakutia, e leng sebaka se setle le hoja boemo ba sona ba leholimo bo le bobe, ’me e le sebaka se seholo ho feta Linaha Tsa Europe Bophirimela kaofela. Sebakeng sena, hlabula mocheso o ka phahamela likhatong tse 40 tsa Celsius, ha mariha teng mohatsela o theohela likhatong tse 70 tlas’a ntlha ea khoamo, ’me ho fumanoa mesaletsa ea liphoofolo tse kileng tsa phela khale tse seng li sa fumanehe. Le hoja ho se ho fetile lilemo tse ’maloa ho tloha ha ke qetela ho etela sebakeng sena, ke sa ntse ke hopola joalokaha eka ke maobane metsana ea moo e ratoang ke moholi o teteaneng, khanya e kang ea mafube ea libakeng tseo tse ntlheng e ka leboea ea lefatše hammoho le Mayakut a thabileng, a khonang ho phela maemong a thata joalo a leholimo.

Ha rea ka ra fella motseng oa Deputatskiy. ’Na le motho eo ke neng ke tsamaea le eena, re ne re lokela ho etela le metse e meng. Motse oa pele e ne e le Khayyr, o lik’hilomithara tse 300 ha u leba ka leboea, haufi le Leoatle la Laptev, le Siberia leboea. Ke hobane’ng ha re ile ra etsa qeto ea ho nka leeto lee? Pejana ho moo, e mong oa Lipaki Tsa Jehova o ne a ile a etela metseng ena ’me a fumana ho e-na le batho ba bangata ba ratang ho tseba ho hongata ka Bibele. Ho ne ho hlakile hore rōna ba lulang Yakutsk, e ka bang bohōle ba lik’hilomithara tse sekete, ke rōna ba haufi le bona! Re ile ra nka hore batho bana ba hloka ho khothatsoa le ho thusoa.

Ha re fihla motseng oa Deputatskiy, re ile ra fumana monna e mong ea neng a khanna koloi e eang Khayyr, eaba o re a ka re palamisa ’me re mo lefe chelete e nyenyane. Re ne re batla re le leqe ha re bona koloi ea hae—e ne e le mokeretla oa moetso oa Masoviet o neng o bile o nkha peterole. Leha ho le joalo, re ile ra re metsi a lekoa ka lere, eaba re tloha motseng oo le eena mantsiboeeng ao. Re ne re sa tsebe hore likhōlō li sa tla.

Litulo tsa koloi eo li ne li bata, eka li letse qhoqhoane joaloka ka ntle, ’me ka mor’a nakoana re ile ra lemoha hore li ne li ke ke tsa futhumala. Hang ha monyetla o hlaha re ile ra mo kōpa hore a eme eaba re phahlolla mekotla ea rōna ra ntša liphahlo tse mofuthu tse boea tseo re ileng ra ititiela ka tsona. Empa serame sona se ile sa ’na sa re qotha.

Monna ea neng a re khannela, eo e neng e le khale a li bona oa libakeng tsa ka Leboea, ke ha a ntse a ithabetse feela. Ka tšohanyetso ke ha a re botsa, “Na le kile la bona khanya e kang ea mafube ea libakeng  tsee tse ntlheng e ka leboea ea lefatše?” Ho hang ke ne ke e-s’o e bone, ka hona a emisa koloi, ’me ra tsoa re babaila. Ka nakoana, re ile ra ba ra lebala hore hoa bata. Ke ile ka hapeha maikutlo le ho tsota khanya ea mefuta e sa tšoaneng e neng eka ke likharetene tse ntseng li menoa le ho menolloa holimo sepakapakeng—pono e hlollang ruri e bonahalang eka e etsahala hona ka holim’a lihlooho tsa rōna mona!

Eitse ka malungoalungoana ha re ntse re haola le lithota tse tletseng lehloa, eaba rea qaoa. Re ile ra thusa mokhanni ho qaolla koloi—e ileng ea boela ea qaoa hape ka makhetlo a ’maloa litseleng tse neng li pakellane lehloa le entseng liforo ha re ntse re atamela motse oa Khayyr. E bile ha letsatsi le chaba moo ke ileng ka lemoha hore moo re neng re nahana hore ke “litsela,” ha e le hantle e ne e le linōka tse letseng qhoqhoane! Qetellong, hoo e ka bang har’a mpa ea motšehare re ile ra fihla Khayyr ka mor’a lihora tse 16 re tlohile Deputatskiy. Le hoja re ne re lebeletse hore re tla kula ka mor’a ho hatsela nako e telele hakaalo, letsatsing le hlahlamang re ile ra tsoha re khatholohile hamonate. Ke menoana ea maoto a ka feela e neng e shoele bohatsu, mohlomong ka lebaka la ho ba serameng ka nako e telele. Baahi ba moo ba ile ba mpha mafura a bere hore ke itšilile ka ’ona.

Ka tloaelo, re ee re etele batho malapeng a bona e le hore re bue le bona ka litaba tse molemo. Leha ho le joalo, ha re le Khayyr, hang ha baahi ba motse ba utloa hore re teng, ba ne ba itlisa ho rōna! Letsatsi le leng le le leng ka libeke tse peli le halofo, re ile ra ithuta Bibele le batho ba moo, ka linako tse ling ho tloha hoseng ho fihlela bosiu haholo. Re ne re thabetse ho kopana le batho ba bangata hakaalo, ba ratang baeti ba bile ba rata litaba tse amanang le Bibele. Basali-baholo ba bangata ba Yakut ba ne ba re ho rōna: “Re na le tumelo ho Molimo. Hore ebe le tlile mona qetellong ea lefatše, ho bontša hore Molimo o teng!”

Re ne re khahloa ke mekhoa ea bophelo ea batho ba moo. Ka mohlala, batho ba bokella litene tsa leqhoa joalokaha eka ba roalla patsi ebe ba li beha pel’a matlo. Neng kapa neng ha ba hloka metsi, ba inkela leqhoa le leng le leholo ebe ba le tšela ka ketleleng e khōlō e mollong e le hore le qhibilihe. Baahi ba moo ba ne ba re phomosetsa ka tlhapi ea Arctic e lutlisang mathe e bitsoang chir, e monate ha e jeoa e le stroganina, e leng limenyemenye tsa moo. Hang ha e qeta ho tšoasoa, tlhapi eo e kenngoa moo ho batang hore ebe leqhoa, e ntoo bekoa joaloka lihoapa, e qopetsoe ka har’a motsoako oa letsoai le pepere, ebe e jeoa ka eona nako eo. Baahi ba moo ba ne ba boetse ba rata ho re phetela lipale tse amanang le mesaletsa ea lintho tsa khale, tse joaloka manaka a litlou tsa litonanahali le lifate tse itseng tseo ba atisang ho li fumana sebakeng seo.

Ha ke tloha Khayyr, ke ile ka nka leeto la lik’hilomithara tse makholo, ’me boholo ba nako ke ne ke tsamaea ka sefofane, e le hore nka ea etela batho ba thahasellang Bibele metseng e meng e oelang tlas’a Yakutia. Ka sebele batho ba moo ba botsoalle ebile ba rata batho ba bang! Ka nako e ’ngoe ke ile ka kopana le moshanyana e monyenyane ea ileng a tseba hore ke tšaba ho tsamaea ka sefofane. E le ha a nkhothatsa, o ile a nketsetsa karete. O ile a toroea lirobele tse peli le sefofane se senyenyane eaba o ngola mantsoe a reng: “Sasha, ha u tsamaea ka sefofane, u se ke ua tšoha hore u tla oa. Matheu 10:29.” Ruri ke ile ka ameha maikutlo ha ke bala lengolo leo! Moo ke ile ka bala mantsoe a Jesu mabapi le lirobele, a reng: “Ha ho le se seng sa tsona se tla oela fatše kantle le hore Ntat’a lōna a tsebe.”

Ke phetile lintho tse fokolang haholo ho tse ngata tse hlollang tsa Yakutia. Sebaka seo se batang hoo serame sa teng se kenellang masapong se tla lula se nkhopotsa batho ba moo ba mofuthu le ba ratehang, bao kannete ba lulang “qetellong ea lefatše.”

[Litšoantšo tse leqepheng la 25]

Re fumane batho ba Yakut e le batho ba botsoalle le ba ratang baeti