Re Ithuta’ng ho Jesu

Mabapi le Bokamoso ba Batho?

Na Jesu o ile a tšepisa hore ho na le ba tla phela leholimong?

Ka sebele, ho joalo! Jesu ka boeena o ile a tsosoa bafung, ’me a nyolohela leholimong hore a il’o ba le Ntate oa hae. Empa pele a shoa a ba a tsosoa, o ile a re ho baapostola ba hae ba tšepahalang ba 11: “Ka tlung ea Ntate ho na le libaka tse ngata tsa bolulo. . . . Ke il’o le lokisetsa sebaka.” (Johanne 14:2) Leha ho le joalo, ba tla ea leholimong ba ne ba tla ba ’maloa. Jesu o ile a hlakisa ntlha ena ha a ne a re ho barutuoa ba hae: “Le se ke la tšaba, mohlatsoana, hobane Ntat’a lōna o amohetse ho le fa ’muso.”—Luka 12:32.

“Mohlatsoana” o il’o etsa’ng leholimong?

Ntate o batla hore sehlotšoana sena se buse le Jesu leholimong. Re tseba see joang? Ka mor’a hore a tsosoe, Jesu o ile a senolela moapostola Johanne hore ba bang ba tšepahalang ba ne ba tla “busa e le marena holim’a lefatše.” (Tšenolo 1:1; 5:9, 10) Tsena ke litaba tse monate. E ’ngoe ea lintho tse ka sehloohong tseo moloko oa batho o li hlokang ke ’muso o tsamaisang lintho hantle. ’Muso oo Jesu a tla beng a busa ho oona o tla finyella eng? Jesu o ile a re: “Pōpong e entsoeng bocha, ha Mor’a motho a lula teroneng ea hae e khanyang, lōna ba ntatetseng le lōna le tla lula literoneng tse leshome le metso e ’meli.” (Matheu 19:28) Puso ea Jesu le balateli ba hae e tla etsa hore ‘pōpo e etsoe bocha,’ kapa e tla nchafatsa maemo hore e be a phethahetseng joaloka ao banyalani ba pele ba neng ba le ho ’ona pele ba etsa sebe.

 Jesu o ile a tšepisa moloko oohle oa batho eng?

Moloko oa batho o bōpetsoe ho phela lefatšeng, ho fapana le Jesu, ea ileng a bōpeloa ho ea phela leholimong. (Pesaleme ea 115:16) Kahoo, Jesu o ile a re: “Lōna le tsoa libakeng tse tlaase; ’na ke tsoa libakeng tse holimo.” (Johanne 8:23) Jesu o ile a bolela hore moloko oa batho o tla ba le bokamoso bo hlollang lefatšeng. Ka nako e ’ngoe o ile a re: “Ho thaba ba maikutlo a bonolo, kaha ba tla rua lefatše.” (Matheu 5:5) O ne a bua ka se boletsoeng pesalemeng eo Molimo a ileng a susumetsa hore e ngoloe, e reng: “Ba bonolo ba tla rua lefatše, ka sebele ba tla fumana thabo e phethehileng khotsong e ngata. Ba lokileng ba tla rua lefatše, ba tla lula ho lona ka ho sa feleng.”—Pesaleme ea 37:11, 29.

Kahoo “mohlatsoana” o eang leholimong hase oona feela o tla fumana bophelo bo sa feleng. Jesu o ile a boela a bua ka tšepo eo batho bohle ba ka bang le eona. O ile a re: “Molimo o ratile lefatše haholo hoo a ileng a fana ka Mora oa hae ea tsoetsoeng a ’notši, e le hore e mong le e mong ea bontšang tumelo ho eena a se ke a timetsoa empa a be le bophelo bo sa feleng.”—Johanne 3:16.

Molimo o tla imolla moloko oa batho joang mahlomoleng?

Jesu o ile a bolela hore Molimo o tla imolla moloko oa batho linthong tse peli tse ba hateletseng, ha a re: “Joale lefatše lena lea ahloloa; joale ’musi oa lefatše lena o tla lahleloa ntle.” (Johanne 12:31) Ntho ea pele, batho ba sa tšabeng Molimo, ba bakang mahlomola, ba tla ahloloa ’me ba felisoe. Ea bobeli, Satane o tla lahleloa ntle ’me a ke ke a hlola a khelosa moloko oa batho.

Ho tla etsahala’ng ka batho ba ileng ba phela empa ba shoa ba sa fumana monyetla oa ho ithuta ka Molimo le ka Kreste ’me ba sa ka ba bontša tumelo ho bona? Jesu o ile a re ho senokoane se seng se ileng sa bolaoa le eena: “U tla ba le ’na Paradeiseng.” (Luka 23:43) Motho eo hammoho le ba bang ba limilione, o tla fumana monyetla oa ho ithuta ka Molimo ha Jesu a mo tsosetsa lefatšeng la paradeise. Joale o tla fumana monyetla oa ho ba har’a ba bonolo le ba lokileng ba tla fumana bophelo bo sa feleng lefatšeng.—Liketso 24:15.

Hore u fumane boitsebiso bo eketsehileng, bala khaolo ea 3 le ea 7 bukeng ea Ha e le Hantle ke Eng Seo Bibele e se Rutang? *

[Mongolo o botlaaseng ba leqephe]

[Setšoantšo se leqepheng la 23]

“Ba lokileng ba tla rua lefatše, ba tla lula ho lona ka ho sa feleng.”—Pesaleme ea 37:29