A RE etseng eka re phela lilemong tse 3 500 tse fetileng. Re motseng oa Jeriko, naheng ea Kanana. Ngoananyana e mong ea bitsoang Rahaba o lula motseng ona. O ile a hlaha ka mor’a hore Moshe a etelle Baiseraele pele ho ba ntša bokhobeng Egepeta ’me a ba tšelise moo ho omileng Leoatleng le lefubelu! Ha ho na li-ea-le-moea, lithelevishene kapa Inthanete, empa Rahaba oa tseba hore mohlolo ona o etsahetse—le hoja o etsahetse hōle haholo le moo a lulang teng. Na ua tseba hore na o tsebile seo joang?— *

Ha ho pelaelo hore batho ba nkang maeto a malelele ke bona ba ileng ba phetela ba bang mehlolo ena. Ha Rahaba a ntse a hōla, o hopola seo Jehova a ileng a se etsetsa batho ba hae. Joale o utloa lintho tse ling tse hlollang ka Baiseraele. Ba se ba kene Kanana ka mor’a hore ba qete lilemo tse 40 lefeelleng, ’me Molimo o ba thusitse hore ba hlōle lichaba tse ba loantšang. Joale Rahaba o utloa hore Baiseraele ba se ba le haufi le Jeriko, ba hlomme litente tsa bona ka mose ho Nōka ea Jordane.

Mantsiboeeng a mang ho fihla batho ba babeli ha Rahaba, kaha baa tseba hore o sebetsa moo baeti ba ka lulang teng. Kahoo, oa ba amohela. Bosiu, morena oa Jeriko oa utloela hore lihloela tsa Baiseraele li tlile Jeriko ’me li ile ntlong eo Rahaba a sebetsang ho eona. Ka hona, morena o romela manģosa a hae ho Rahaba ’me ’ona a mo bolella hore a ntše banna bao ba tlileng ho eena. Na ua tseba hore na Rahaba o se a tseba eng le hore na o se a entse eng ka seo?—

Le pele manģosa a morena a fihla, Rahaba o se a tseba hore baeti ba hae ke lihloela tsa Baiseraele. Kahoo o ba pata marulelong, ’me joale ha manģosa a morena a fihla oa a bolella: “E, banna bao ba ile ba fela ba tla ho ’na . . . Eitse ha ho koaloa heke ha ho se ho le lefifi banna bao ba tsoa.” Rahaba oa ba phehella: “Ba lelekiseng.”

U nahana hore ke hobane’ng ha Rahaba a ile a sireletsa lihloela tseo?— Ha a bua le tsona, o re: “Ke fela ke tseba hore ka sebele Jehova o tla le fa naha  ena . . . Etsoe re utloile kamoo Jehova a ileng a pshesa metsi a Leoatle le Lefubelu ka pel’a lōna ha le tsoa Egepeta.” O boetse o utloile ka lintoa tseo Molimo a entseng hore Baiseraele ba li hlōle ha ba loana le lira tsa bona.

Ho Baheberu 11:31, Bibele e re bolella hore ka sebele Jehova o ile a rata taba ea hore Rahaba o sirelelitse lihloela tseo. Hape o ile a thaba ha Rahaba a kōpa lihloela tseo a re: ‘Ke bile mosa ho lōna, ka hona ke kōpa le ntlhapanyetse hore ha le hapa Jeriko, le tla pholosa Ntate, ’Mè le bana beso.’ Lihloela tseo li tšepisa hore li tla etsa joalo hafeela Rahaba a ka phetha litaelo tsa tsona. Na ua tseba hore na litaelo tseo li ne li re’ng?—

Lihloela tseo li re: ‘Nka thapo ena ’me u e tlame fensetereng ea hao, ebe u bokella beng ka uena kaofela ntlong ena ea hao. Haeba u etsa joalo, e mong le e mong ea ka har’a eona o tla sireletseha.’ Rahaba o etsa sona seo lihloela li mo bolellang sona. Na ua tseba hore na ka mor’a moo ho etsahala’ng?—

Baiseraele ba fihla ka ntle ho marako a Jeriko. Ka matsatsi a tšeletseng ba pota-pota motse oo ba thōtse, hanngoe ka letsatsi. Ka letsatsi la bosupa, ba o pota ka makhetlo a supileng ’me ba qala ho hoeletsa. Marako a qala ho heleha—ntle le mane moo ho fasitsoeng thapo e khubelu fensetereng! Rahaba le lelapa labo bona baa pholoha.—Joshua 2:1-24; 6:1-5, 14, 15, 20-25.

Re ithuta’ng ho seo Rahaba a se entseng?— Ha aa ka a mamela feela litaba tse amanang le seo Molimo a neng a se etsa ho sireletsa batho ba hae, empa o ile a ba a ba thusa ha a fumana monyetla oa ho etsa joalo. Ka sebele Rahaba o ile a khetha ho sebeletsa Jehova le batho ba hae! Na le uena u tla etsa joalo?— Re tšepa hore ke sona seo u tla se etsa.