Babali ba Batla ho Tseba

Na Diabolose ke Motho oa Sebele?

E, Bibele e ruta hore Satane Diabolose ehlile ke motho oa sebele. Leha ho le joalo, batho ba tšoaeang Bibele liphoso ba hanana le taba ea hore Diabolose ehlile ke motho oa sebele. Ba re Satane e mpa e le bokhopo feela bo ka hare ho batho.

Na re lokela ho makatsoa ke pherekano ee mabapi le hore na ha e le hantle Satane ke mang? Le hanyenyane. Ho tea mohlala: Senokoane se ka ’na sa phumola moo se ileng sa tšoara teng ha se ntse se etsa bonokoane e le ho pata mohlala, ’me kahoo sa ’na sa tsoela pele ka bonokoane ba sona se sa tšoaroe. Ka tsela e tšoanang, Satane ke nkokonono ea linokoane e sa batleng hore e lemohuoe ha e ntse e hlohlelletsa batho hore ba senyehe boitšoarong. Jesu o hlalosa Satane ka ho hlaka e le eena ea ikarabellang bakeng sa bokhopo bohle bo hlahelang batho. Jesu o ile a bitsa Satane “’musi oa lefatše lena.”—Johanne 12:31.

Diabolose o tsoa hokae? Lengeloi lena la lerabele, leo qalong le neng le bōpiloe e le sebōpuoa sa moea se phethahetseng leholimong, le ile la iketsa Diabolose ha le honohela borapeli boo batho ba neng ba bo etsetsa Molimo. Bibele e tlaleha puisano e ileng ea e-ba teng lefatšeng pakeng tsa Satane le Jesu, eo ho eona Diabolose a ileng a senola takatso ea hae ea boithati. Satane o ile a leka ho etsa hore Jesu a ‘itihele fatše ’me a mo etsetse ketso ea borapeli.’—Matheu 4:8, 9.

Ka tsela e tšoanang, Satane o ile a senola takatso ea hae ha a ne a buisana le Molimo, joalokaha ho tlalehiloe bukeng ea Jobo. O ne a tla etsa ntho leha e le efe e tla susumetsa batho hore ba furalle Molimo.—Jobo 1:13-19; 2:7, 8.

Ak’u nahane ka sena: Haeba Satane o ile a buisana le Jehova Molimo hammoho le Jesu Kreste, joale Satane e ne e ka ba bokhopo feela bo ka hare ho batho ba bang joang? Hohang Molimo le Mora oa hae ha ba na bokhopo ka hare ho bona! Ka hona, ho hlakile hore Satane ke motho oa sebele—sebōpuoa sa moea se khopo se sa hlompheng Jehova kapa eena Jesu.

Bobolu bo teng bathong bo bontša hantle hore Diabolose o teng. Mebuso ea lefatše lena e tlohella lijo hore li bole haeba li le ngata, ho e-na le hore e li fe baahi ba tsona ba bolaoang ke tlala. Mebuso e bokella libetsa tse ka bolaeang batho ka bongata e le hore ba ka timetsana. E silafatsa tikoloho ea lefatše. Leha ho le joalo, batho ba bangata ba ntse ba sa lemohe hore na ke mang ea etsang hore batho ba be le lehloeo le ho itšoara ka tsela e ka ba ntšang kotsi joalo. Hobane’ng?

Bibele e senola hore Satane ‘o foufalitse likelello tsa ba sa lumelang.’ (2 Bakorinthe 4:4) Satane o sebelisa mokhatlo oa hae o sa bonahaleng e le hore a laole batho ba sa elelloe. Ke “’musi oa bademona.” (Matheu 12:24) Feela Joalokaha molaoli oa sehlopha sa linokoane a ka okamela mokhatlo o moholo oa linokoane ntle le hore a tsejoe ke bohle ba mo sebeletsang, Satane le eena o sebelisa mokhatlo oa hae o bolotsana oa mangeloi a khopo ho laola matšoele a batho a sa elelloeng hore ke eena ea ba laolang kapa ea susumetsang batho.

Re ananela hakaakang hore ebe Bibele e senola Diabolose hammoho le mokhatlo oa hae! Joale re ka nka khato ho hanyetsa tšusumetso ea Diabolose. Bibele ea re lemosa: “Ipeheng tlas’a Molimo; empa le hanyetse Diabolose, ’me o tla le balehela.”—Jakobo 4:7.