Bibele e Fetola Batho

Ho tlile joang hore motho ea neng a rata lithuthuthu, lithethefatsi hammoho le lipapali a khethe ho ba mosebeletsi oa nako eohle ea bolelang litaba tse molemo? Ke eng e ileng ea susumetsa motho ea neng a ipabola ka ho becha hore a tlohele ho iketsa lekhoba la hona ’me a fumane mosebetsi o motle hore a phelise lelapa la hae? Ke eng e susumelitseng moroetsana ea neng a hōlisitsoe e le Paki ea Jehova, a mpa a kheloha melao ea Bibele, hore a boele a nahanisise ka tsela eo a phelang ka eona? Ak’u bale u utloe hore na batho bana ba re’ng.

PALE EA BOPHELO

LEBITSO: TERRENCE J. O’BRIEN

LILEMO: 57

NAHA EA HESO: AUSTRALIA

PELE: KE NE KE SEBELISA LITHETHEFATSI KE BILE KE RATA LITHUTHUTHU

BOPHELO BA KA BA NAKONG E FETILENG: Ha ke sa le ngoana, ke ne ke lula motseng o phetheselang oa Brisbane, e leng motse-moholo oa Queensland. Lelapeng leso re ne re le Mak’hatholike, empa ha ke le lilemo li robeli re ile ra khaotsa ho ea kerekeng eaba ka mor’a moo ho hang ha re sa bua ka bolumeli. Ha ke le lilemo li leshome, lelapa leso le ile la fallela Gold Coast, Australia. Re ne re lula pel’a leoatle, kahoo ha ke sa le mocha ke ne ke qeta nako e ngata ke sesa le ho palama maqhubu.

Leha ho le joalo, bophelo ba ka bo ne bo se monate ha ke ntse ke le ngoana. Ntate o ile a re tlohela ha ke le lilemo li robeli. ’Mè o ile a nyaloa hape ’me ba ne ba lula ba noa ba bile ba qabana khafetsa. Bosiung bo bong ke ile ka ikana ke lutse betheng ea ka ka mor’a hore batsoali ba ka ba loane hampe ka re haeba ho ka etsahala hore ke nyale, nke ke ka loana le mosali oa ka le khale. Le hoja ka lapeng ho ne ho e-na le mathata joalo, lelapa leso lona—leo e neng e le la bana ba tšeletseng hammoho le ’mè le ntate ea re hōlisitseng—le ile la lula le momahane.

Ha ke le haufi le ho tšoara lilemo tse 20, lithaka tsa ka tse ngata li ile tsa qala ho tsoa taolong. Li ile tsa tsuba matekoane, koae le lithethefatsi tse ling, tsa ba tsa noa joala haholo. Le ’na ke ile ka etsisa lithaka tsa ka, ka phela bophelo ba boitaolo. Ke ne ke rata le ho palama lithuthuthu. Le hoja ke ile ka hlaheloa ke likotsi tse ngata tse mpe, ke ile ka lula ke ntse ke rata lithuthuthu ’me ka etsa qeto ea ho haola le Australia eohle ka sethuthuthu.

Le hoja ke ne ke lokolohile, hangata ke ne ke  tetebela habohloko ha ke nahana ka maemo a lefatše le ka tsela eo batho ba bangata ba sa tsotelleng mathata a hlahelang batho kateng. Ke ne ke labalabela ho tseba ’nete ka Molimo, ka bolumeli le ka maemo a lefatše. Empa ha ke botsa baruti ba babeli ba K’hatholike, likarabo tsa bona li ile tsa ’nyahamisa. Ke ile ka botsa baruti ba ’maloa ba Baprostanta lipotso tse tšoanang, empa likarabo tsa bona le tsona ha lia ka tsa nkhotsofatsa. Joale motsoalle oa ka o ile a etsa hore ke kopane le Eddie, e leng e mong oa Lipaki Tsa Jehova. Ke ile ka qoqa le Eddie ka makhetlo a mane ’me ka linako tsohle o ne a sebelisa Bibele ha a nkaraba. Ka mor’a puisano ea rōna ea pele feela, ke ile ka tseba hore joale ke fumane ntho e ikhethang. Leha ho le joalo, ka nako eo ke ne ke utloa ho sa hlokahale hore ke fetole bophelo ba ka ka tsela leha e le efe.

KAMOO BIBELE E FETOTSENG BOPHELO BA KA KATENG: Nakong eo ke ntseng ke haola le Australia, ke ile ka buisana le Paki e ’ngoe eo ke ileng ka kopana le eona tseleng. Empa ha ke khutlela Queensland, ke ile ka qeta likhoeli tse tšeletseng ke sa kopane le Lipaki.

Joale, ka letsatsi le leng ha ke ne ke le tseleng ke tsoa mosebetsing, ke ile ka bona banna ba babeli ba apereng hantle ba nkileng mekotla ba tsamaea tseleng, eaba ke nahana hore e tlameha ebe ke Lipaki Tsa Jehova. Ke ile ka ea ho bona, ’me ka fumana hore e fela e le Lipaki Tsa Jehova eaba ke kōpa hore ba nthute Bibele. Kapele feela ke ile ka qalella ho ea libokeng tsa Lipaki ka ba ka ea kopanong e khōlō e neng e tšoaretsoe Sydney ka 1973. Leha ho le joalo, ha lelapa leso le utloa hore ke ithuta Bibele—haholo-holo ’mè oa ka—le ile la utloa bohloko haholo. Ka lebaka lena le a mang, ke ile ka emisa ho kopana le Lipaki. Joale ke ile ka qeta selemo ke phathahane ka ntho e ’ngoe eo ke e ratang haholo, e leng papali ea krikete.

Empa hamorao ke ile ka hlokomela hore nako feela eo ke neng ke thabile e le kannete bophelong ke ha ke ne ke ithuta Bibele le Lipaki Tsa Jehova. Ke ile ka ikopanya le tsona hape ea ba ke qalella ho ea libokeng. Hape ke ile ka tlohela metsoalle ea ka e neng e sebelisa lithethefatsi hampe.

Ntho e ileng ea hla ea ntšusumeletsa hore ke etse liphetoho tsena ke seo ke ileng ka ithuta sona ka motho ea hlahang ka Bibeleng, e leng Jobo. Bill, e leng Paki e ’ngoe e neng e se e hōlile, e neng e le mosa empa e tseba ho tiisa ka hanong, o ne a ithuta Bibele le ’na kamehla. Ka mor’a hore re ithute ka pale ea Jobo, Bill o ile a mpotsa hore na ke mang e mong eo Satane a mo qositseng ka hore ha a sebeletse Molimo ka pelo eohle. (Jobo 2:3-5) Ke ile ka bolela batho bohle bao ke ba tsebang ka Bibeleng ’me Bill o ne a ntse a araba ka bonolo a re, “u nepile, le bona.” Qetellong o ile a ncheba ka har’a lithaka tsa mahlo eaba o re, “Satane o cho joalo le ka uena!” Ke ile ka makala. Pele ho thuto eo, ke ne ke tseba hore seo ke ithutang sona ke ’nete. Empa joale ke ile ka utloisisa hore na ke hobane’ng ha ho hlokahala hore ke nke khato ka seo ke ithutang sona. Likhoeli tse ’nè hamorao ke ile ka kolobetsoa hore ke be e mong oa Lipaki Tsa Jehova.

MELEMO EO KE E FUMANENG: Ke sehoa ke letsoalo ha ke nahana hore na bophelo ba ka bo ka be bo le joang hona joale hoja ke ne ke sa ka ka ithuta ho phela ka melao ea Bibele. Kea kholoa nka be ke shoele. Batho ba bangata bao e neng e le metsoalle ea ka ba ile ba shoa ka lebaka la lithethefatsi le joala. Ba ne ba boetse ba sa thaba manyalong a bona. Ke nahana hore bophelo ba ka bo ka be bo tšoana le ba bona.

Joale ke se ke nyetse ’me ’na le mosali oa ka, Margaret, re sebeletsa ofising ea lekala ea Lipaki Tsa Jehova e Australia. Ha ho na le ea mong  lelapeng leso eo e seng e le morapeli oa Jehova. Leha ho le joalo, ka lilemo tse ngata, ’na le Margaret re ile ra thabela ho ithuta Bibele le batho ba bangata hammoho le banyalani ba ileng ba fetola bophelo ba bona joalokaha ke entse. Sena se ile sa etsa hore re be le metsoalle e mengata e molemo. Ho feta moo, Margaret, eo eena a hōtseng e le Paki, o nthusitse haholo hore ke tšepahalle kano eo ke e entseng ka lilemo tse ka bang 40 tse fetileng. Esale re thabile lenyalong la rōna ka lilemo tse fetang 25. Hase kamehla re lumellanang ka ntho e ’ngoe le e ’ngoe, empa ho tla fihlela joale ha re e-s’o ka re loana. Re le babeli re lumela hore Bibele ke eona e re thusitseng.

PALE EA BOPHELO

LEBITSO: MASAHIRO OKABAYASHI

LILEMO: 39

NAHA EA HESO: JAPANE

PELE: KE NE KE RATA HO BECHA

BOPHELO BA KA BA NAKONG E FETILENG: Ke hōletse motseng oa Iwakura, e leng motse o monyenyane o ka etsang leeto la halofo ea hora ka terene ho tloha Nagoya. Ke hopola hore ’Mè le Ntate e ne e le batho ba mosa haholo. Leha ho le joalo, ke ile ka tseba ka mor’a nako hore Ntate e ne e le le-yakuza, kapa oa kenke ea litlokotsebe, eo ka nako e itseng a neng a hlokometse lelapa leso la litho tse hlano ka chelete ea bolotsana. O ne a lula a tahiloe letsatsi le leng le le leng, ’me o ile a hlokahala ha ke le lilemo li 20, a bolaoa ke lefu la ho thatafala ha sebete.

Ntate e ne e le Mokorea, ka hona hangata batho ba motse oo re neng re lula ho oona ba ne ba re khesa. Taba ena le mathata a mang li ile tsa etsa hore lilemo tsa ka tsa bocha li be bosula. Ke ile ka amoheloa sekolong se phahameng empa ke ne ke sa ee kamehla ’me ke ile ka se tlohela ka mor’a selemo. Mapolesa a ne a e-na le tlaleho ea ka ’me taba eo hammoho le hore ke ne ke se Mojapane hantle, e ile ea etsa hore ho be thata hore ke fumane mosebetsi. Ke ile ka qetella ke o fumane empa ke ile ka lematsa mangole a ka, kahoo ke ne ke se ke sa khone ho etsa mosebetsi o boima.

Ke ile ka iphelisa ka ho bapala pachinko, e leng papali ea chelete e sebelisang mochine o tšoanang le oa pinball. Ka nako eo, ke ne ke lula le ngoanana ea neng a batla hore ke fumane mosebetsi o molaong ke tle ke tsebe ho mo nyala. Empa ke ne ke etsa chelete e ngata ka ho becha, ’me ke ne ke sa batle ho fetola tsela eo ke neng ke phela ka eona.

KAMOO BIBELE E FETOTSENG BOPHELO BA KA KATENG: Ka letsatsi le leng, re ile ra eteloa ke e mong oa Lipaki Tsa Jehova ’me o ile a re siela buka ea Life—How Did It Get Here? By Evolution or by Creation? Ha ho mohla nkileng ka ipotsa potso ena. Leha ho le joalo, ka mor’a hore ke e bale, ke ile ka lumela ho ithuta Bibele ka ho eketsehileng. Kamehla ke ne ke ipotsa hore na ho etsahala’ng ha motho a e-shoa. Likarabo tse utloahalang tseo ke ileng ka li fumana ho tsoa Bibeleng tsa potso ena le tsa lipotso tse ling, li ile tsa etsa hore ke utloe eka makhakhapha a oele mahlong a ka.

Ke ile ka utloa ho hlokahala hore ke phele ho latela seo ke neng ke ithuta sona Bibeleng. Kahoo ke ile ka tiisa lenyalo la ka, ka tlohela ho tsuba,  ka kuta moriri oa ka o molelele oo ke neng ke o daile hore o be bosoeu bo bosehla, ka ba ka ntlafatsa tsela eo ke neng ke shebahala ka eona. Ke ile ka ba ka khaotsa ho becha.

Ho ne ho se bonolo ho etsa liphetoho tsena. Ka mohlala, nka be ke sa ka ka khona ho tlohela ho tsuba ka bonna. Empa ka lebaka la ho rapela ka thata le ho tšepa hore Jehova Molimo o tla nthusa, ke ile ka khona ho tlohela. Bothata bo bong boo ke ileng ka kopana la bona ke ba mosebetsi oo ke ileng ka o fumana ha ke qeta ho tlohela papali ea pachinko. Ke ne ke fumana halofo feela ea chelete eo ke neng ke e fumana ha ke ne ke becha, empa e le mosebetsi o boima le o khathatsang kelello. Mantsoe a mang a Bibele a ileng a nkhothatsa nakong eo e thata ke a Bafilipi 4:6, 7. A re: “Le se ke la tšoenyeha ka letho, empa nthong e ’ngoe le e ’ngoe ka thapelo le thapeli hammoho le liteboho likōpo tsa lōna tse matla li ke li tsebisoe Molimo; ’me khotso ea Molimo e fetang monahano oohle e tla lebela lipelo tsa lōna le matla a lōna a kelello ka Kreste Jesu.” Maemong a mangata, ke ile ka bona hore mantsoe ao ke ’nete.

MELEMO EO KE E FUMANENG: Ha ke ne ke qala ho ithuta Bibele le Lipaki Tsa Jehova, mosali oa ka o ne a sa batle. Empa hamorao ha a bona liphetoho tse khōlō tseo ke neng ke li etsa boitšoarong ba ka, o ile a ba le ’na ha ke ithuta Bibele eaba o qalella le ho ea libokeng tsa Lipaki Tsa Jehova le ’na. Hona joale re Lipaki Tsa Jehova re le babeli. Ka sebele ke tlhohonolofatso e khōlō hore ebe re sebeletsa Molimo re le ’moho!

Pele ke ithuta Bibele, ke ne ke nahana hore ke thabile. Empa hona joale ke tseba hantle hore ho ba le thabo ea sebele ho joang. Ho phela ho latela melao-motheo ea Bibele ha ho bonolo, empa ke kholisehile hore ke tsela e molemo ka ho fetisisa ea ho phela.

PALE EA BOPHELO

LEBITSO: ELIZABETH JANE SCHOFIELD

LILEMO: 35

NAHA EA HESO: UNITED KINGDOM

PELE: KE NE KE PHELELA MENATE EA MAFELO-BEKE

BOPHELO BA KA BA NAKONG E FETILENG: Ke hōletse Hardgate, e leng torotsoana e haufi haholo le motse oa Glasgow, Scotland. Ha ke le lilemo li supileng, ’mè oa ka ea neng a sa tsoa ba Paki ea Jehova, o ile a qalella ho nthuta Bibele. Leha ho le joalo, ha ke le lilemo li 17, ke ne ke thabela ho qeta nako e ngata le metsoalle ea ka eo ke kenang sekolo le eona—ke tsamaea li-nightclub, ke mamela ’mino oa rock o morethetho o boima ke bile ke noa joala. Ke ne ke sa nahane ka ntho leha e le efe e amanang le Molimo kapa Bibele. Ho teng ke hore ke ne ke phelela menate ea mafelo-beke. Empa ntho e ’ngoe le e ’ngoe e ile ea fetoha ha ke le lilemo li 21.

Ke ile ka etela batho ba bang bao ke amanang le bona, Ireland Leboea. Ha ke le moo ke ile ka  bona mokoloko oa Maprostanta o bitsoang Orange Walk. Lehloeo le tebileng le khethollano, tseo ke ileng ka li bona pakeng tsa Maprostanta le Mak’hatholike nakong ea mokoloko oo, li ile tsa ntšosa haholo. Ha e le hantle li ile tsa etsa hore ke qale ho nahana ka tsela e ’ngoe. Ke ile ka hopola lintho tseo ’mè oa ka a ileng a nthuta tsona ka Bibeleng ’me ke ne ke tseba hore ha ho mohla Molimo a ka amohelang ba iphapanyetsang melao ea hae e lerato. Joale ka lemoha hore esale ke ntse ke lelekisa menate ke tlohetse ho phela kamoo Molimo a batlang hore ke phele kateng. Ke ile ka etsa qeto ea hore ha ke khutlela hae Scotland ke tla batlisisa hantle hore na Bibele e ruta eng.

KAMOO BIBELE E FETOTSENG BOPHELO BA KA KATENG: Ka lekhetlo la pele ha ke boela ke qalella ho ea libokeng tsa Lipaki Tsa Jehova tsa moo ke neng ke lula teng, ke ne ke ikutloa ke sa phutholoha ke bile ke tšohile. Empa, batho kaofela moo ba ile ba etsa hore ke ikutloe ke phutholohile. Nakong eo ke neng ke qala ho sebelisa lintho tseo ke ithutileng tsona ka Bibeleng, setho se seng se mosa sa phutheho se ile sa etsa botsoalle le ’na. Ka sebele se ile sa nthusa hore ke ikutloe ke le setho sa phutheho hape. Metsoalle ea ka ea pele e ile ea tsoela pele ho ’mema hore re ee li-nightclub, empa ke ile ka e joetsa hore ke ne ke hlile ke tiile ha ke re ke batla ho phela ho latela melao ea Bibele. Qetellong e ile ea emisa ho buisana le ’na.

Pele, ke ne ke nka Bibele e le buka feela ea melao. Hona joale maikutlo a ka a se a fetohile. Ke ile ka hlokomela hore batho ba hlahang ka Bibeleng ke batho ba sebele, ba nang le maikutlo le ba nang le moo ba fokolang teng joaloka ’na. Le bona ba ile ba etsa liphoso, leha ho le joalo Jehova Molimo o ile a ba tšoarela ha ba bontša hore ba hlile ba bakile. Ke ile ka kholiseha hore, le hoja ke ile ka furalla Molimo ha ke sa le monyenyane, o tla ntšoarela a be a lebale liphoso tsa ka tse fetileng haeba ke leka ka matla ho mo khahlisa.

Tsela eo ’Mè a neng a phela ka eona le eona e ile ea nkhahla haholo. Le hoja ke ile ka furalla Molimo, eena ha ho mohla a kileng a etsa joalo. Botšepehi ba hae bo sa fetoheng bo ile ba etsa hore ke hlokomele hore, ho sebeletsa Jehova e ne e se tšenyo ea nako. Ha ke ne ke bolela ka ntlo le ntlo le ’Mè ha ke sa le monyenyane, ke ne ke sa ho thabele ’me le ka mohla ke ne ke sa nahane hore nka qeta lihora tse ngata ke ruta batho Bibele. Hona joale ke entse qeto ea ho leka ho bona hore na mantsoe a Jesu a ho Matheu 6:31-33 e fela e le ’nete. O itse: “Le ka mohla le se ke la tšoenyeha ’me la re, ‘Re tla ja’ng?’ kapa, ‘Re tla noa’ng?’ kapa, ‘Re tla apara’ng?’ . . . Ntat’a lōna oa leholimo oa tseba hore le hloka lintho tsena tsohle. Joale, le ’ne le batle ’muso pele le ho loka ha hae, ’me lintho tsena tse ling tsohle le tla li ekeletsoa.” Nakoana ka mor’a hore ke kolobetsoe ke le e mong oa Lipaki Tsa Jehova, ke ile ka tlohela mosebetsi, ka batla o sa nkeng nako eohle ea ka eaba ke ba ’moleli ea qetang nako e ngata a bolela litaba tse molemo.

MELEMO EO KE E FUMANENG: Nakong eo ke neng ke phelela menate ea mafelo-beke ha ke sa le monyenyane, ho ne ho se mohla ke ikutloang ke khotsofetse. Ke ne ke sa tsebe hore na ke phelela’ng. Joale tjena ha ke se ke sebeletsa Jehova ka hohle kamoo nka khonang, ka sebele ke ikutloa ke khotsofetse. Bophelo ba ka bo na le morero. Joale ke se ke nyetsoe, ’me ’na le monna oa ka re potoloha le liphutheho tsa Lipaki Tsa Jehova beke le beke re li khothatsa. Ke nka mosebetsi ona e le ntho ea bohlokoa ka ho fetisisa bophelong ba ka. Ke leboha Jehova haholo hore ebe o ile a mpha monyetla o mong oa ho mo sebeletsa!

[Ntlha e Qolotsoeng e leqepheng la 27]

“Ka mor’a puisano ea rōna ea pele feela, ke ile ka tseba hore joale ke fumane ntho e ikhethang. Leha ho le joalo, ka nako eo ke ne ke utloa ho sa hlokahale hore ke fetole bophelo ba ka ka tsela leha e le efe”

[Ntlha e Qolotsoeng e leqepheng la 29]

“Nka be ke sa ka ka khona ho tlohela ho tsuba ka bonna. Empa ka lebaka la ho rapela ka thata le ho tšepa hore Jehova Molimo o tla nthusa, ke ile ka khona ho tlohela”

[Ntlha e Qolotsoeng e leqepheng la 30]

“Pele, ke ne ke nka Bibele e le buka feela ea melao. Hona joale maikutlo a ka a se a fetohile. Ke ile ka hlokomela hore batho ba hlahang ka Bibeleng ke batho ba sebele, ba nang le maikutlo le ba nang le moo ba fokolang teng joaloka ’na”