“HLOKOMELANG”! Ana ke mantsoe a ngotsoeng ke moapostola Pauluse ha a ngolla Bakreste ba neng ba phela halofong ea ho qetela ea lekholo la pele la lilemo C.E. O ne a re ba hlokomele eng? “Mohlomong ho ka ba le e mong ea tla le nka joaloka phofu ea hae ka filosofi le thetso ea lefeela ho ea ka neano ea batho.”—Bakolose 2:8.

Ho sa tsotellehe temoso eo Pauluse a faneng ka eona, ho tloha lilemong tse bohareng tsa lekholo la bobeli la lilemo C.E., Bakreste ba bang ba ile ba qala ho sebelisa likhopolo tsa bo-rafilosofi ba boholo-holo ha ba hlalosa seo ba se lumelang. Hobane’ng? Ba ne ba batla hore ba amoheloe ke batho ba rutehileng ’Musong oa Roma e le hore ba sokolle batho ba bangata.

Justin Martyr, e leng e mong oa Bakreste bao ea neng a tumme haholo, o ne a lumela hore ’Muelli oa Molimo o ile a itlhahisa ho bo-rafilosofi ba Bagerike nako e telele pele Jesu a ka ba teng lefatšeng. Ho ea ka Justin le ba bang ba neng ba ruta likhopolo tse joalo, ho kenyelletsoa ha filosofi hammoho le lithuto tse iqapetsoeng Bokresteng ho ile ha etsa hore borapeli bona e be bo ka amoheloang ke batho bohle.

Tsela eo Justin Martyr a neng a ruta Bokreste ka eona e ile ea etsa hore ho be le batho ba bangata ba sokolohang. Leha ho le joalo, ho ruta thuto e le ’ngoe e iqapetsoeng ho ile ha etsa hore ho be le tse ling ’me seo sa etsa hore ho be le seo ho lumeloang hohle hore ke thuto ea bolumeli ba Bokreste. E le ho pepesa lithuto tsena tse iqapetsoeng, ak’u bapise seo libuka tse tla qotsoa tsa lipatlisiso li se buang le seo Bibele e se rutang.