O Batla Hore re Atlehe
Atamela ho Molimo
O Batla Hore re Atlehe
BATSOALI ba lerato ba labalabela ho bona bana ba bona ba atleha, ba phela bophelo bo monate le bo khotsofatsang. Ntate oa rōna ea leholimong, e leng Jehova, le eena o batla hore bana ba hae ba lefatšeng ba atlehe. Tsela eo a re bontšang ka eona hore oa re tsotella ebile oa re rata, ke ka ho re bolella hore na re etse’ng e le hore re atlehe. Ka mohlala, nahana ka mantsoe ao a ileng a a bolella Joshua, a tlalehiloeng ho Joshua 1:6-9.
Nahana ka sebaka se bontšitsoeng setšoantšong. Ka mor’a lefu la Moshe, Joshua ke eena eo e bang moeta-pele e mocha oa Iseraele, e leng sechaba se baloang ka limilione. Baiseraele ba lokisetsa ho kena naheng eo Molimo a e tšepisitseng baholo-holo ba bona. Molimo o fa Joshua keletso e itseng. Haeba a ka e mamela, e tla mo thusa hore a atlehe. Empa keletso ena ha a fane ka eona molemong oa Joshua feela. Haeba re e mamela, le rōna re ka atleha.—Baroma 15:4.
Jehova o bolella Joshua hore a be sebete ’me a be matla—ha a mo bolelle hanngoe, empa o mo bolella ka makhetlo a mararo. (Temana ea 6, 7, 9) Ho hlakile hore Joshua o tla hloka sebete le matla e le hore a atlehe ho etella sechaba seo pele ho se kenya Naheng e Tšepisitsoeng. Empa o lokela ho etsa’ng e le hore a be sebete ’me a be matla?
Joshua a ka fumana sebete le matla ha a bala mangolo a ileng a ngoloa ka tšusumetso ea Molimo. Jehova o re: “Hlokomela ho etsa ka molao oohle oo mohlanka oa ka Moshe a u laetseng oona.” (Temana ea 7) Nakong ena ho ka etsahala hore ebe Joshua o na le libuka tse ’maloa feela tsa Bibele tse seng li ngotsoe. * Leha ho le joalo, taba ea hore o na le Lentsoe la Molimo ha e bolele hore joang kapa joang o tla atleha. E le hore le mo ruise molemo, Joshua o lokela ho etsa lintho tse peli.
Taba ea pele, kamehla Joshua o lokela ho etsa hore Lentsoe la Molimo le kene ka ho teba pelong ea hae. Jehova o re: “U e bale ka lentsoe le tlaase bosiu le motšehare.” (Temana ea 8) Buka e ’ngoe e re: “Molimo o ne a laela Joshua hore a hopole Molao oa Hae ka ho o ‘buela tlaase,’ ho o ‘nahanisisa’ kapa ho o ‘thuisa.’” Ho bala Lentsoe la Molimo letsatsi le letsatsi, le ho nahanisisa ka lona ho tla thusa Joshua hore a sebetsane ka katleho le mathata a larileng ka pele.
Taba ea bobeli, Joshua o tlameha ho sebelisa seo a ithutang sona Lentsoeng la Molimo. Jehova o re ho eena: “Hlokomela ho etsa ka sohle se ngoliloeng ho [lona]; etsoe ka ho etsa joalo u tla atlehisa tsela ea hao.” (Temana ea 8) Ho atleha ha Joshua ho itšetlehile ka hore a etse thato ea Molimo. Na ho ka ba le tsela e molemo ho feta ee? Kamehla motho ha a etsa thato ea Molimo o tla atleha.—Esaia 55:10, 11.
Joshua o ile a mamela keletso ea Jehova. Ka hona, e ile ea e-ba morapeli oa Jehova ea tšepahalang ea ileng a phela bophelo bo thabisang le bo khotsofatsang.—Joshua 23:14; 24:15.
Na le uena u batla ho phela bophelo bo khotsofatsang joaloka Joshua? Jehova o batla hore u atlehe. Empa ho ba le Bibele feela ha hoa lekana. Motho e mong ea tšepahalang eo e leng khale e le Mokreste o fana ka keletso ena: “Bala Bibele u be u etse hore e thopothele pelong ea hao.” Haeba u etsa hore lentsoe la Molimo le thopothele ka ho teba pelong ea hao ’me u sebelisa seo u ithutileng sona, feela joaloka Joshua, “u tla atlehisa tsela ea hao.”
[Mongolo o botlaaseng ba leqephe]
^ ser. 7 Mangolo ao Joshua a neng a e-na le ’ona a susumelitsoeng ke Molimo e ka ’na eaba a ne a akarelletsa libuka tse hlano tseo Moshe a li ngotseng (Genese, Exoda, Levitike, Numere le Deuteronoma), buka ea Jobo le pesaleme e le ’ngoe kapa tse peli.