Na Bibele ke Lentsoe la Molimo?

“Lengolo lohle le bululetsoe ke Molimo ’me le molemo bakeng sa ho ruta, bakeng sa ho khalemela, bakeng sa ho otlolla lintho, bakeng sa ho laea ka ho loka, e le hore motho oa Molimo a ka tšoaneleha ka botlalo, a hlomelloa ka ho feletseng bakeng sa mosebetsi o mong le o mong o molemo.”​—2 TIMOTHEA 3:16, 17.

MANTSOE ana a Pauluse ke a matla hakaakang ha a ne a bua ka bohlokoa bo boholo ba Bibele! Ka ho hlakileng, o ne a bua ka ho toba ka karolo ea Bibele e neng e le teng ka nako eo—e leng mangolo ao ka linako tse ling batho ba a bitsang Testamente ea Khale. Empa ha e le hantle, mantsoe ao a hae a sebetsa libukeng tsohle tse 66 tsa Bibele, ho akarelletsa le tse ngotsoeng ke barutuoa ba tšepahalang ba Jesu lekholong la pele la lilemo C.E.

Na u nka Bibele e le ea bohlokoa joaloka Pauluse? Na u lumela hore bangoli ba Bibele ba ne ba hlile ba bululetsoe ke Molimo? Bakreste ba lekholong la pele la lilemo ba ne ba lumela seo. Tumelo eo ha ea ka ea fela leha lilemo tse makholo li ntse li feta. Ka mohlala, John Wycliffe, moruti oa Lenyesemane oa lekholong la bo14 la lilemo, o ne a nka Bibele e le “’nete e ke keng ea hanyetsoa.” Ha The New Bible Dictionary e bua ka mantsoe ao a Pauluse a qotsitsoeng ka holimo, e re “ka lebaka leo, taba ea hore e bululetsoe [ke Molimo] e tiisa hore sohle seo Bibele e se buang ke ’nete.”

Ho Fetola Maikutlo Mabapi le Bibele

Leha ho le joalo, mehleng ena batho ha ba sa tšepa matla ao Bibele e nang le ’ona. Buka ea The World’s Religions, e re “Bakreste kaofela [ba ntse] ba lumela hore ba nka Bibele e le eona e nang le matla a ho ba tataisa liketsong tsa bona le linthong tseo ba li lumelang.” Empa liketso tsona ha li bontše joalo. Batho ba bangata mehleng  ena ba nka Bibele e le “melao ea batho e ke keng ea tšeptjoa.” Le hoja ba lumela hore bangoli ba Bibele e ne e le batho ba nang le tumelo e matla, ba nka feela hore bangoli bao e ne e le batho ba nang le liphoso, ba ileng ba sebetsa ka thata ho hlalosa ’nete e tebileng ea lintho tsa moea, empa ba ne ba haelloa ke tsebo le leseli leo re nang le lona kajeno.

Bonneteng, ke batho ba fokolang feela mehleng ena ba hlileng ba lumellang Bibele ho tataisa tsela eo ba nahanang ka eona le eo ba etsang lintho ka eona. Ka mohlala, ke hangata hakae u utloang batho ba re melao ea Bibele ea boitšoaro e siuoe ke nako ebile ha e sa sebetsa mehleng ee? Batho ba bangata ha ba tšabe ho bebofatsa melao ea Bibele hammoho le melao-motheo ea eona—kapa ba bile ba e hlokomoloha ka ho feletseng haeba ba bona ho le molemo ho etsa joalo. Ba bang ba ipolelang hore bona ke Bakreste, ba ithiba litsebe ka boomo ho seo Bibele e se buang ka bohlola, bofebe, ho se tšepahale le botahoa.​—1 Bakorinthe 6:9, 10.

Ke hobane’ng ha ba etsa joalo? Mathoasong a lekholo la bo20 la lilemo, e mong oa baepolli ba lintho tsa khale, Sir Charles Marston, bukeng ea hae e bitsoang The Bible Is True, o ile a fana ka lebaka le leng la sena. O ile a re batho, ba sa nahane le ho nahana, ba ile ba tatela ho “amohela likhopolo-taba tsa bangoli ba kajeno” ba belaellang ho nepahala ha Bibele. Na ho joalo le kajeno? U lokela ho nka maikutlo le likhopolo tsa bangoli ba khellang fatše ho tšepahala ha Bibele joang? A re ke re bone hore na sehlooho se latelang se tšohla taba ena joang.