Ruta Bana ba hao

Batho ba Ileng ba Ngola ka Jesu

NA LE thabela ho ithuta ka Jesu le le ’moho?— * Batho ba bang baa makala ha ba hlokomela hore Jesu ha aa ka a ngola letho ka Bibeleng. Leha ho le joalo, bangoli ba robeli ba Bibele ba re bolella ho hongata ka eena. Bangoli bana kaofela ba phetse ka nako e tšoanang le Jesu ’me ba re bolella seo a ileng a se ruta. Na u ka bolela mabitso a bangoli baa ba robeli?— Ke Matheu, Mareka, Luka le Johanne. Ba bang ba bane ke Petrose, Jakobo, Juda le Pauluse. Ke eng seo u se tsebang ka bangoli baa ba robeli?—

A re qale ka ho tšohla bangoli ba bararo bao hape e neng e le ba bang ba baapostola ba 12 ba Jesu. Na u tseba mabitso a bona?— Ke Petrose, Johanne le Matheu. Petrose o ile a ngolla Bakreste-’moho le eena mangolo a mabeli. O ile a ba bolella lintho tseo a li tsebang tseo Jesu a ileng a li etsa le tseo a ileng a li bua. Phetla lengolo la 2 Petrose 1:16-18 ka Bibeleng ’me u bale kamoo Petrose a hlalosang seo a ileng a se utloa ha Jehova Molimo a bua le Jesu a le leholimong.—Matheu 17:5.

Moapostola Johanne o ile a ngola libuka tse hlano tsa Bibele. O ne a lutse pel’a Jesu ha barutuoa ba ne ba e-na le Mong’a bona lijong tsa ho qetela. Johanne o ne a boetse a e-na le Jesu ha A e-shoa. (Johanne 13:23-26; 19:26) Johanne o ile a ngola e ’ngoe ea litlaleho tse ’nè tsa Bibele tse buang ka bophelo ba Jesu tse bitsoang Likosepele. O ile a boela a ngola Tšenolo eo Jesu a ileng a mo fa eona a ba a ngola mangolo a mararo ka Bibeleng a reheletsoeng ka eena. (Tšenolo 1:1) Mongoli oa boraro oa Bibele ea ileng a fetoha moapostola oa Jesu ke Matheu. E ne e le ’mokelli oa lekhetho.

Bangoli ba bang ba babeli ba Bibele ba ne ba tseba Jesu ka tsela e ikhethang. E ne e le banab’abo Jesu ka ’mè oa bona, e le bana ba Josefa le Maria. (Matheu 13:55) Ha baa ka ba fetoha barutuoa ba Jesu ha a ne a qala mosebetsi oa boboleli. Ba ne ba bile ba nahana hore e ka ’na eaba oa hlanya ka lebaka la ho chesehela boboleli. (Mareka 3:21) Baena baa ba Jesu e ne e le bo-mang?— E mong oa bona ke Jakobo. O ngotse buka ea Bibele ea Jakobo. E mong ke Judase, eo hape a bitsoang Juda. O ngotse buka ea Bibele ea Juda.—Juda 1.

Bangoli ba bang ba babeli ba ileng ba ngola ka bophelo ba Jesu ke Mareka le Luka. ’Mè oa Mareka, e leng Maria, o ne a e-na le ntlo e khōlō Jerusalema, eo Bakreste ba pele, ba akarelletsang moapostola Petrose, ba neng ba kopana ho eona. (Liketso 12:11, 12) Lilemo pele ho moo, bosiung boo ka bona Jesu a ileng a tšoara Paseka ea ho qetela le baapostola ba hae, mohlomong Mareka o ile a ba sala morao ha ba ea tšimong ea Gethesemane. Ha Jesu a tšoaroa, masole a ile a qhautsa Mareka empa a baleha ’me a siea seaparo sa hae.—Mareka 14:51, 52.

Luka e ne e le ngaka e rutehileng eo ho bonahalang eka e ile ea e-ba morutuoa ka mor’a lefu la Jesu. O ile a ithuta ka hloko ka bophelo ba Jesu ’me a ngola pale e hlakileng le e nepahetseng e buang ka bona.  Hamorao, Luka e ile ea e-ba mphato oa moapostola Pauluse eo a neng a tsamaea le eena ’me o ile a boela a ngola buka ea Bibele ea Liketso.—Luka 1:1-3; Liketso 1:1.

Pauluse ke mongoli oa Bibele oa borobeli ea ileng a ngola ka Jesu. O ile a rutoa ke ’muelli oa molao ea tummeng Gamaliele. Pauluse, eo ka nako eo a neng a bitsoa Saule, o ne a hōlisitsoe ke Bafarisi a bile a rutiloe ke bona ’me o ne a hloile barutuoa ba Jesu, kahoo o ile a kenya letsoho ha ba bolaoa. (Liketso 7:58–8:3; 22:1-5; 26:4, 5) Na ua tseba hore na ho tlile joang hore Pauluse a ithute ’nete ka Jesu?—

Ha e le hantle, Pauluse o ne a e-ea Damaseka a il’o tšoara barutuoa ba Jesu, ha ka tšohanyetso a foufatsoa ke leseli le khanyang le tsoang leholimong. O ile a utloa lentsoe le re ho eena: “Saule, Saule, u ntlhorisetsa’ng?” E ne e le Jesu ea neng a bua le eena! O ile a re Pauluse a ee Damaseka. Eaba Jesu o laela morutuoa oa hae ea bitsoang Ananiase hore a e’o bua le Pauluse, kahoo Pauluse ea e-ba morutuoa oa Jesu. (Liketso 9:1-18) Pauluse o ile a ngola libuka tse 14 tsa Bibele, ho tloha ho Baroma ho ea ho Baheberu.

Na u se u qalile ho bala libuka tsa Bibele tse buang ka Jesu kapa ho na le ea u ballang tsona?— Har’a tsohle tseo u ka li etsang bophelong, ntho e ’ngoe e molemo ka ho fetisisa ke hore u qale hona joale ha u sa le mocha ho ithuta Bibele le seo e se buang ka Jesu.

[Mongolo o botlaaseng ba leqephe]

LIPOTSO:

▪ Ke baapostola bafe ba Jesu ba ileng ba ngola Bibele?

▪ Ke bangoli bafe ba babeli ba Bibele bao e neng e le banab’abo Jesu ka ’mè oa bona?

▪ E ka ’na eaba ke hobane’ng ha Mareka a ne a tseba Jesu, empa e ▪ ka ’na eaba ke hobane’ng ha Luka a ne a sa mo tsebe?

Ho tlile joang hore Pauluse a fetohe morutuoa oa Jesu?

[Litšoantšo tse leqepheng la 25]

Juda

Mareka

Petrose

Matheu

Pauluse

Jakobo

Luka

Johanne