Babali ba Batla ho Tseba . . . 

Na Lipaki Tsa Jehova li folisa Batho ka Mohlolo?

▪ Lipaki Tsa Jehova ha ho mohla li kileng tsa folisa ka mohlolo. Joaloka Jesu, li lumela hore morero oa tsona o ka sehloohong ke ho bolela litaba tse molemo tsa ’Muso oa Molimo. Li boetse li lumela hore Bakreste ba ’nete ha ba khetholloe ka ho folisa ka mohlolo, empa ba khetholloa ka ntho e ’ngoe, eo e leng ea bohlokoa haholo.

Ke ’nete hore qenehelo eo Jesu Kreste a neng a e bontša ea ho folisa ba kulang lekholong la pele la lilemo C.E. ke ea bohlokoa haholo ho rōna kaofela. Ka ho etsa joalo o ne a re tiisetsa hore ha a busa e le Morena oa ’Muso oa Molimo, “ha ho moahi ea tla re: ‘Kea kula.’”—Esaia 33:24.

Empa mehleng ee teng? Batho ba folisang ba malumeli a ipolelang hore ke a Bokreste hammoho le ba malumeli ao e seng a Bokreste, ba bolela hore ba folisa batho ka mohlolo. Leha ho le joalo, Jesu o ile a lemosa ka matla ka batho ba neng ba tla re ba ‘entse mehlolo e mengata’ ka lebitso la hae. O tla re ho bona: “Ha kea ka ka le tseba . . . ntloheleng, lōna ba sebetsang bokhopo.” (Matheu 7:22, 23, Bibele ea Sesotho) Kahoo, na ka sebele mehlolo eo ba folisang ba bolelang hore baa e etsa mehleng ee ke pontšo ea hore ba amoheloa ke Molimo kapa ba hlohonolofatsoa ke eena?

Hlokomela seo Bibele e se buang ka ho folisa ho neng ho etsoa ke Jesu. Ha re bapisa tlaleho ea Mangolo le mekhoa ea kajeno ea lipholiso tsa mohlolo, re ka khona ho lemoha hore na lipholiso tsena li tsoa ho Molimo kapa che.

Ha ho mohla Jesu a ileng a folisa e le hore a hohele batho ba bangata hore ba mo latele kapa ba mo mamele. Ho fapana le hoo, o folisitse batho ba bangata moo a sa bonoeng ke bongata. Hangata o ne a bolella batho bao a ba folisitseng hore ba se ke ba bolella motho ka mohlolo oo.—Luka 5:13, 14.

Le ka mohla Jesu o ne a sa batle tefo ka ho etsa mehlolo. (Matheu 10:8) Mehlolo eo a neng a e etsa kaofela e ne e atleha. Bohle ba kulang ba neng ba tla ho eena o ne a ba folisa ka ho feletseng, ’me hore motho a fole ho ne ho sa itšetlehe ka hore na eena o na le tumelo hakae. (Luka 6:19; Johanne 5:5-9, 13) Ho feta moo, Jesu o ne a bile a tsosa bafu!—Luka 7:11-17; 8:40-56; Johanne 11:38-44.

Le hoja Jesu a ile a etsa mehlolo eo, morero oa hae e ne e se ho bokella balateli ka ho etsa mehlolo e ba tsukutlang maikutlo. Ho e-na le hoo, mosebetsi oa hae o ka sehloohong e ne e le ho bolela litaba tse molemo tsa ’Muso oa Molimo. Jesu o ile a rupela balateli ba hae hore ba etse barutuoa, ba tla bolella ba bang ka tšepo ea ho phela ba sa kule ’Musong oa Molimo.—Matheu 28:19, 20.

Ke ’nete hore ba bang ba balateli ba Jesu ba lekholong la pele la lilemo ba ne ba e-na le mpho e ikhethang ea ho folisa, empa limpho tseo li ne li tla fela. (1 Bakorinthe 12:29, 30; 13:8, 13) Bakreste ba ’nete ba mehleng ena ha ba khetholloe ka ho folisa, empa ba khetholloa ka ho momahana hammoho ka lerato le bontšang boitelo. (Johanne 13:35) Ho folisa ka mohlolo mehleng ena ha hoa etsa hore ho be le phutheho ea Bakreste ba merabe eohle le limelo tsohle ba momahantsoeng hammoho ke lerato le joalo.

Leha ho le joalo, ho na le sehlopha sa Bakreste ba momahantsoeng hammoho ke lerato le matla hoo ba sa lumeleng ho ntšana kotsi—kapa ho ntša motho leha e le ofe kotsi—esita le linakong tsa lintoa tse mahlo-mafubelu. Ke bafe? Ke Lipaki Tsa Jehova. Ba tsebahala lefatšeng ka bophara ka ho bonahatsa lerato le tšoanang le la Kreste. Ho kopanya batho ba merabe e sa tšoaneng, lichaba, litso le limelo tse sa tšoaneng ke mohlolo, empa seo sea etsahala ka lebaka la moea o halalelang oa Molimo. Ho ka ba molemo hore o ee ho tse ling tsa liboka tsa bona e le hore o iponele seo.

[Setšoantšo se leqepheng la 13]

Na ba folisang ka mohlolo kajeno (ka ho le letona) ba hlile ba tšehetsoa ke Molimo?