Babali ba Batla ho Tseba . . .

Na ke Lokela ho ba Karolo ea Bolumeli bo Itseng?

▪ Na u utloa u sa batle ho ba setho sa bolumeli hobane u tennoe ke boikaketsi le likhohlano tsa ba kenang kereke hammoho le baruti? Haeba ho joalo, e ka ’na eaba maele ana a Sefora a hlalosa tsela eo u ikutloang ka eona, ha a re, “Ea pel’a kereke hangata o hōle le Molimo.”

Mohlomong u hlompha Bibele ebile u lumela hore mebuso le batho ka kakaretso ba lokela ho hlompha tokelo ea motho ea ho ba bolumeling bo itseng. Empa u ka ’na ua ipotsa, ‘Na ka sebele Molimo o re ba batlang ho mo rapela ka tsela eo a tla e amohela ba lokela ho ba karolo ea bolumeli bo itseng?’

Karabo e bonolo feela ke hore ho joalo. Ke hobane’ng ha re ka kholiseha hore ho hlile ho joalo? Hona na bolumeli leha e le bofe boa amoheleha?

Hlokomela mohlala oa Jesu. Na e ne e le setho sa bolumeli bo itseng? Ha Jesu a sa le monyenyane o ile a kopanela le Bajuda ba habo le batho ba bang bolumeling boo ka tloaelo litho tsa bona li neng li e-ea tempeleng e Jerusalema ho ea rapela. (Luka 2:41-43) Ha Jesu a se a hōlile, o ile a ikopanya le Bajuda-’moho le eena ho rapela Molimo synagogeng ea moo a neng a lula teng. (Luka 4:14-16) Ha a ne a bua le mosali oa bolumeli bo fapaneng le ba hae, Jesu o ile a re: “Re rapela seo re se tsebang.” (Johanne 4:22) Mona Jesu o ile a itšenola ka ho hlaka hore ke setho sa bolumeli ba Sejuda.

Hamorao Jesu o ile a re kaha sechaba sa Bajuda ha sea mo amohela, Molimo le eena o ne a ke ke a amohela mofuta oa bona oa borapeli o sa hloekang. (Matheu 23:33–24:2) Leha ho le joalo, o ile a bontša hore ba batlang ho rapela Molimo ka tsela eo a tla e amohela e lokela ho ba litho tsa bolumeli bo itseng. O ile a re ho balateli ba hae: “Bohle ba tla tseba ka sena hore le barutuoa ba ka, haeba le e-na le lerato har’a lōna.” (Johanne 13:35) Morutuoa oa Kreste o ne a lokela ho ikopanya le barutuoa-’moho le eena borapeling e le hore a bontše lerato. Ha e le hantle, Jesu o ile a bontša ka ho hlaka hore ho na le litsela tse peli feela tsa bolumeli. O ile a re tsela e ’ngoe “e pharaletse ebile e khōlō” ’me ke “e isang timetsong.” Empa a re: “Heke e isang bophelong e moqotetsane le tsela e isang teng e patisane, ’me ke ba seng bakae ba e fumanang.”—Matheu 7:13, 14.

Ka hona ho hlakile hore hase malumeli ’ohle a amohelehang. Bibele e re lemosa ka “ba tla bonahala eka ba na le bolumeli, athe ba lahlile matla a bolumeli.” Lentsoe la Molimo le tsoela pele ka ho re, “ba joalo u ba furalle.” (2 Timothea 3:5, Bibele—Phetolelo e Ncha) Ka lehlakoreng le leng re rua molemo o moholo ka ho khetholla ba leng tseleng e isang bophelong le ka ho ikopanya le bona. Hona joale rea khothatsoa ebile rea matlafatsoa, re bile re na le tšepo e tiileng ka bokamoso.—Baheberu 10:24, 25.

U ka hlokomela joang hore na ke sehlopha sefe sa bolumeli se tseleng eo e patisaneng? Ho ka ba molemo hore u hlahlobe likarabo tse thehiloeng Bibeleng tse khaolong ea 15 ea buka ea Ha e le Hantle ke Eng Seo Bibele e se Rutang? * Likarabo tseo li tla u thusa hore u etse khetho ea hore na u ka ba setho sa bolumeli bofe u itšetlehile ka seo Bibele e se rutang.

[Mongolo o botlaaseng ba leqephe]