HA HO motho ea tsebang lebitso la hae mehleng ena. O tsebahala feela ka hore e ne e le morali oa Jafeta. A re ke re hlahlobe Bibele ’me re ithute ka batho bana ba babeli. Re tla bona hore morali oa Jafeta o ne a ratoa ke Molimo hammoho le metsoalle ea hae.

Re ka bala ka Jafeta le morali oa hae ka Bibeleng ho Baahloli khaolo ea 11. Kaha Jafeta e ne e le mohlanka oa Molimo ea tšepahalang, ha ho pelaelo hore o ne a tloaetse ho tšohla Mangolo le morali oa hae.

Jafeta o phetse pele sechaba sa Molimo, sa Baiseraele, se kōpa hore se busoe ke motho. Jafeta e ne e le mohlabani ea matla. Kahoo, Baiseraele ba ile ba mo kōpa hore e be molaoli oa bona ha ba il’o loana le Baammone, e leng sechaba sa boahelani seo e leng khale se loantšana le Baiseraele.

Jafeta o ne a batla hore Molimo a mo thuse hore a hlōle Baammone, kahoo o ile a etsa kano. Jafeta o ile a re haeba Jehova a ka etsa hore a hlōle ntoa, o tla fa Jehova motho oa pele ea tla tsoa ka tlung ea hae ha a khutlela hae. Motho eo o ne a tla sebeletsa tabernakeleng ea Molimo bophelo bohle ba hae—e leng sebaka seo batho ba neng ba rapela Molimo ho sona mehleng eo. Na ua tseba hore na ke mang ea ileng a tsoa pele?— *

 U nepile, ke morali oa Jafeta! Jafeta o ile a utloa bohloko haholo. E ne e le ngoana ea mong to! eo a nang le eena. Empa o ne a itlamme ho Jehova ’me o ne a lokela ho phethahatsa kano eo. Hang-hang morali oa hae o ile a re: “Ntate, haeba u ahlamisitse molomo oa hao ho Jehova, nketse ho ea ka se tsoileng molomong oa hao.” Eaba o kōpa hore a tlohelloe ka likhoeli tse peli e le hore a ee thabeng a e’o llela teng. Ke hobane’ng ha a ne a hloname? Hobane ho phethahatsa kano ea ntate oa hae ho ne ho bolela hore a ke ke a nyaloa le hore a ke ke a ba le bana. Leha ho le joalo, ha aa ka a nka lintho tseo a li ratang e le tsona tsa bohlokoa haholo. O ne a batla ho mamela ntate oa hae le ho tšepahala ho Jehova. Na u nahana hore o ile a thabisa Jehova esita le ntate oa hae?—

Ka hona, Jafeta o ile a tlohela morali oa hae hore a tsamaee le metsoalle ea hae ka likhoeli tse peli. Ha a khutla, ntate oa hae o ile a phethahatsa kano ea hae ka ho mo romela tabernakeleng ea Molimo e Shilo hore a lule teng bophelo ba hae kaofela. Selemo se seng le se seng, baroetsana ba Iseraele ba ne ba e-ea Shilo ho ea khothatsa morali oa Jafeta.

Na u tseba bana ba mamelang batsoali ba bona le ba ratang Jehova?— Ho molemo hore u tsebe bana bao haholoanyane le hore u be motsoalle oa bona. Haeba u etsisa morali oa Jafeta ’me u mamela u bile u tšepahala, u tla ba le metsoalle e metle. U tla thabisa batsoali ba hao ’me le Jehova o tla u rata.