NA KA linako tse ling u ee u ikutloe joaloka Will kapa Rachel? Ba batla ho buisana empa hangata puisanong ea bona ba qetella ba sa thaba. Bothata?

Banna le basali ba bua ka tsela e fapaneng ’me e mong le e mong o na le lintho tse ikhethang tseo a li hlokang. Basali ba ka labalabela ho tšolla maikutlo a bona ka bolokolohi le hona khafetsa. Athe banna ba bangata bona, ba leka ho boloka khotso ka ho batla ho rarolla bothata kapele ebile ba leka ho qoba litaba tse ka tsosang khang. Joale u ka sebetsana joang le ho se tšoane hoo ’me u khone ho buisana hantle le monna oa hao kapa mosali oa hao? U ka etsa seo ka hore u hlomphe molekane oa hao.

Motho ea hlomphang o nka batho ba bang e le ba bohlokoa ’me o leka ho utloisisa maikutlo a bona. Mohlomong u ithutile u sa le monyenyane hore u hlomphe batho ba nang le boikarabelo kapa ba nang le tsebo ho u feta. Leha ho le joalo, lenyalong teng bothata ke hore u lokela ho hlompha motho eo e ka ’nang eaba lea lekana—e leng molekane oa hao. Linda, ea seng a nyetsoe lilemo tse robeli, o re: “Ke ne ke tseba hore Phil o khona ho mamela a sa fele pelo ebile o na le kutloisiso ho mang kapa mang ea buang le eena. Ke ne ke batla hore le ’na a ntšoare joalo.” Mohlomong u mamela metsoalle kapa batho bao u sa ba tsebeng u sa ba felle pelo ebile u bua le bona ka tlhompho. Empa na molekane oa hao le eena u mo nahanela joalo?

Ho se hlomphe ho baka tsitsipano ka lapeng ’me ho etsa hore ho qetelle ho e-na le qabang e mpe. ’Musi ea bohlale o ile a re: “Ho molemo ho itjella likokotoana, ho itjella tsona ka khotso, ho e-na le ho phela tlung e nang le khōra le liqabang.” (Liproverbia 17:1, Bibele—Phetolelo e Ncha) Bibele e bolella banna hore ba tšoare basali  ba bona ka tlhompho. (1 Petrose 3:7) “Mosali” le eena o “lokela ho ba le tlhompho e tebileng ho monna oa hae.”—Baefese 5:33.

Le ka buisana joang ka tsela e nang le tlhompho? Hlahloba tse ling tsa likeletso tse fumanoang Bibeleng.

Bothata:

Batho ba bangata ba rata ho bua ho feta ho mamela. Na u e mong oa bona? Bibele e hlalosa hore mang kapa mang ea ‘arabang taba pele a e utloa’ ke leoatla. (Liproverbia 18:13) Ka hona, pele u bua, mamela. Hobane’ng? Kara, ea seng a nyetsoe lilemo tse 26, o re: “Ha ke rate hore hang ha monna oa ka a utloa bothata ba ka a be a se a leka ho bo rarolla. Ha ho hlokahale le hore a lumellane le ’na kapa a leke ho fumana hore na bothata boo bo bakiloe ke eng. Ke batla feela hore a ’mamele a be a utloisise kamoo ke ikutloang kateng.”

Ka lehlakoreng le leng, banna le basali ba bang ha ba lokolohe ho itlhalosa ebile ha ba phutholohe ha balekane ba bona ba ba qobella hore ba ntše maikutlo a bona. Lorrie, ea sa tsoa nyaloa, o ile a hlokomela hore monna oa hae o nka nako e telele pele a ka ntša maikutlo a hae. O re: “Ho hlokahala hore ke se fele pelo ’me ke emele hore a be a ntše maikutlo a hae.”

Tharollo:

Haeba uena le mohats’a hao le tlameha ho bua ka taba e itseng eo le ka ’nang la fapana ka maikutlo, bua ka eona nakong eo bobeli ba lōna le phomotseng ’me le iketlile. U ka etsa’ng haeba mohats’a hao a sa batle ho bua? Hlokomela hore “monahano oa motho o tšoana le metsi a ka selibeng se tebileng, empa ea nang le temohisiso o khona ho a kha.” (Liproverbia 20:5, Today’s English Version) Haeba u nyolla nkho ka selibeng u potlakile, u ka ’na ua qhala metsi a mangata. Ka tsela e tšoanang, haeba u qobella molekane oa hao hore a bue, a ka ’na a batla ho ikemela, eba u sentse monyetla oa ho etsa hore a phutholohe. Ho e-na le hoo, mo botse lipotso ka bonolo le ka tsela e hlomphang, ’me u se ke ua fella molekane oa hao pelo haeba a sa ntše maikutlo a hae kapele kamoo u neng u ka rata kateng.

Ha molekane oa hao a bua, ‘potlakela ho utloa, u liehe ho bua, u liehe ho halefa.’ (Jakobo 1:19) Motho ea mamelang ka hloko ha a mamele mantsoe a buuoang feela, empa o leka ho utloisisa tsela eo motho ea buang a ikutloang ka eona. Ha molekane oa hao a bua, leka ho utloisisa hore na o ikutloa joang. Tsela eo u mamelang molekane oa hao ka eona e tla mo bontša kamoo u mo hlomphang kateng—kapa kamoo u sa mo hlompheng kateng.

Jesu o re rutile hore na re mamele joang. Ka mohlala, ha monna e mong ea kulang a kōpa Jesu hore a mo thuse, ha aa ka a rarolla bothata boo ba hae hang-hang. O ile a qala ka ho mamela kōpo e tiileng ea monna eo. Eaba seo a se utloileng se mo ama ka ho teba. Qetellong o ile a folisa monna eo. (Mareka 1:40-42) Latela mohlala oo ha mohats’a hao a bua. Hopola hore e ka ’na eaba o itlhokela kutloelo-bohloko, eseng tharollo ea kapele. Ka hona, mamela ka hloko. Ikenye lieteng tsa hae. Joale ka mor’a moo, ke hona o ka nkang bohato ka seo molekane oa hao a se hlokang. U tla be u bontša hore u hlompha molekane oa hao ha u etsa joalo.

Bothata:

Linda, ea qotsitsoeng pejana o re: “Lipale tsa thelevishene li etsa eka ke bophelo bo tloaelehileng ho bua hampe ka molekane esita le hona ho mo hlapaola kapa ho mo phoqa.” Ba bang ba hōletse malapeng ao ho neng ho sa hlomphanoe ha ho buuoa. Joale hamorao ha ba se ba nyetse kapa ba nyetsoe, ba thatafalloa ke ho qoba mokhoa oo oa lapeng. Ivy, ea lulang Canada, o re: “Ke hōletse lelapeng le neng le tloaetse ho phoqana, ho kharumelana le ho hobosana.”

Tharollo:

Ha u bua le ba bang ka molekane oa hao, bua ka ntho “efe kapa efe e molemo bakeng sa ho haha kamoo tlhokahalo e ka bang kateng, e le hore e ka fana ka se molemo ho ba e utloang.”  (Baefese 4:29) Ba bolelle lintho tse tla etsa hore ba hlomphe molekane oa hao.

Esita leha le le babeli feela le molekane oa hao, loantša boikutlo ba ho batla ho mo phoqa kapa ho mo bitsolla. Iseraele ea boholo-holo, Mikale o ile a halefela monna oa hae, Morena Davida. O ile a bua ka tsela e somang eaba o mo bolella hore o itšoere ‘feela joaloka e mong oa banna ba lithoto.’ Mantsoe ao a hae a ile a hlaba Davida, ’me Molimo le eena ha aa ka a khahlisoa ke ’ona. (2 Samuele 6:20-23) Re ithuta’ng ho see? Ha u bua le molekane oa hao, khetha mantsoe ka hloko. (Bakolose 4:6) Phil, ea seng a nyetse lilemo tse robeli, oa lumela hore ho ntse ho e-na le moo ba sa utloaneng teng le mohats’a hae. O hlokometse hore ka linako tse ling lintho tseo a li buang ke tsona tse mpefatsang litaba. O re: “Ke hlokometse hore ho batla ho ‘hlōla’ ha ho e-na le khang ha ho thuse. Ke bone hore ho matlafatsa kamano ea rōna ke hona ho khotsofatsang le ho molemo.”

’Mè e mong ea neng a se a hōlile oa mohlolohali mehleng ea boholo-holo o ile a khothalletsa lingoetsi tsa hae hore li “fumane sebaka sa phomolo e mong le e mong ntlong ea monna oa hae.” (Ruthe 1:9) Ha monna le mosali ba sielana seriti, ba etsa hore lehae la bona e be “sebaka sa phomolo.”

Bothata:

Ba bang ba banyalani ba bacha ba ’nile ba etsa phoso ea ho nahana hore ha Bibele e re banyalani e tla ba “nama e le ’ngoe,” e bolela hore ba lokela ho ba le maikutlo a tšoanang kapa botho bo tšoanang. (Matheu 19:5) Leha ho le joalo, ka potlako feela ba fumana hore maikutlo a joalo e ne e le toro. Ha ba se ba nyalane, ho se be le maikutlo a tšoanang hangata ho etsa hore ba qabane. Linda o re: “Phapang e khōlō pakeng tsa rōna ke hore Phil hase motho ea tšoenyehang hakaalo joaloka ’na. Ka linako tse ling o khona ho khoba matšoafo ha ’na ke tšoenyehile, ebe seo sea nkoatisa kaha ke bona eka ha a tsotelle ntho eo joaloka ’na.”

Tharollo:

Amohelanang kamoo le leng kateng ’me e mong le e mong a hlomphe maikutlo a molekane oa hae. Ho tea mohlala: Mahlo a hao a sebetsa ka tsela e fapaneng le litsebe tsa hao; empa li sebelisana hantle e le hore u tšele ’mila ka tsela e sireletsehileng. Adrienne, ea seng a nyetsoe lilemo tse ka bang 30, o re: “Hafeela maikutlo a sa tšoaneng a rōna a sa tlōle Lentsoe la Molimo, ’na le monna oa ka ha rea lebella hore re bone lintho ka leihlo le le leng kamehla. Etsoe re banyalani, ha rea etsoa ka liphatsa li le ling tsa lefutso.”

Ha molekane oa hao a e-na le maikutlo a fapaneng le a hao kapa a itšoara ka tsela e sa tšoaneng le ea hao, u se ke ua nahana feela ka se batloang ke uena. Nahanela maikutlo a molekane oa hao. (Bafilipi 2:4) Kyle, monna oa Adrienne, o re: “Hase kamehla ke utloisisang kapa ke lumellanang le maikutlo a mosali oa ka. Empa ke lula ke ikhopotsa hore ke mo rata ho feta maikutlo a ka. Hafeela a thabile, le ’na kea thaba.”

Tlhompho ke e ’ngoe ea lintho tse etsang hore lenyalo e be le thabileng le le tšoarellang. Linda, o re: “Ho hlompha ho etsa hore motho a khotsofale a be a ikutloe a sireletsehile lenyalong. Ke ntho eo joang kapa joang batho ba lokelang ho loanela ho ba le eona.”