Armagedone—Batho ba Bang ba re ke Eng?

“Ea a bokella sebakeng seo ka Seheberu se bitsoang Armagedone.”—TŠENOLO 16:16, English Standard Version.

HA U utloa lentsoe “Armagedone,” ho tla eng kelellong ea hao? Mohlomong u nahana ka koluoa e khōlō. Le hoja lentsoe lena le hlaha hanngoe feela ka Bibeleng, le hlahella hangata mecheng ea phatlalatso ea litaba, ’me baeta-pele ba bolumeli le bona ba bua ka lona.

Na kutloisiso e tloaelehileng ka lentsoe Armagedone e lumellana le seo Bibele e se rutang? Ke habohlokoa hore u tsebe karabo. Hobane’ng? Hobane ho tseba ’nete ka Armagedone ho ka etsa hore u se ke ua tšoha lefeela, ha etsa hore u be le kutloisiso e nepahetseng ka bokamoso ’me ha u thusa hore u tsebe se nepahetseng ka Molimo.

Ak’u hlahlobe lipotso tsena tse tharo, ebe u bapisa kutloisiso e tloaelehileng ka Armagedone le seo ha e le hantle Bibele e se rutang.

  1. NA ARMAGEDONE KE KOLUOA E BAKOANG KE BATHO?

Hangata baqolotsi ba litaba le bafuputsi ba sebelisa lentsoe “Armagedone” ho hlalosa likoluoa tse bakoang ke batho. Ka mohlala, ho ’nile ha hlalosoa Ntoa ea I le ea II ea Lefatše e le Armagedone. Ka mor’a lintoa tseo, moloko oa batho o ’nile oa tšoenyeha ka hore United States le Soviet Union li tla loantšana ka libetsa tsa athomo. Mecha ea phatlalatso e ile ea bitsa ntoa eo e ka ’nang ea qhoma “Armagedone ea nyutlelie.” Kajeno, bafuputsi ba tšoenyehileng ka hore tšilafalo e tla etsa hore boemo ba leholimo bo mpefale le ho feta, ba lemosa ka “Armagedone ea tlelaemete” e atamelang ka potlako.

Seo ba se bolelang: Batho ba na le matla a feletseng a ho laola bokamoso ba lefatše le ba ntho e ’ngoe le e ’ngoe e phelang ho lona. Haeba mebuso e sa sebetse lintho ka bohlale, lefatše le tla senyeha ka tsela e ke keng ea lokisoa.

Seo Bibele e se rutang: Molimo a ke ke a lumella batho hore ba senye lefatše. Bibele e bua ’nete ha e re Jehova * ha aa ka a bōpela lefatše “lefeela.” Empa, o le etselitse hore “le be le baahi.” (Esaia 45:18) Ho e-na le hore a tlohelle lefatše le senngoe ka ho feletseng ke batho, Molimo o tla “felisa ba senyang lefatše.”—Tšenolo 11:18.

2. NA ARMAGEDONE KE KOLUOA EA TLHAHO?

Ka linako tse ling baqolotsi ba litaba ba re likoluoa tse khōlō tsa tlhaho ke “Armagedone.” Ka mohlala, ka 2010, tlaleho e ’ngoe e ile ea bua ka “‘Armagedone’ ea Haiti.” E ne e bua ka mahlomola a bileng teng naheng eo, tšenyo le ho shoa ha batho ba bangata ka lebaka la ho reketla ho hoholo ha lefatše ho ileng ha siea naha eo e ranthane. Baqolotsi ba litaba le ba etsang lifilimi ha ba sebelise lentsoe lena feela ha ba bua ka lintho tse seng li etsahetse empa hape ba le sebelisa ha ba bua ka lintho tseo ba tšohang hore li tla etsahala. Ka mohlala, ba ’nile ba sebelisa lentsoe “Armagedone” ho hlalosa seo ba nahanang hore se tla etsahala ha lipolanete tse nyenyane li thula lefatše.

Seo ba se bolelang: Armagedone e tla bolaea feela e sa khethe ea nang le molato le ea se nang oona. Ha ho letho leo u ka le etsang ho itšireletsa.

Seo Bibele e se rutang: Armagedone e ke ke ea bolaea batho feela e sa khethe. Ho e-na le hoo, ha Armagedone e fihla, e tla timetsa bohle ba khopo. Bibele e tšepisa hore haufinyane “ea khopo ha a sa tla hlola a e-ba teng; ka sebele u tla lebisa tlhokomelo sebakeng sa hae, ’me o tla be a le sieo.”—Pesaleme ea 37:10.

3. NA MOLIMO O TIMETSA LEFATŠE KA ARMAGEDONE?

Batho ba bangata ba kenang likereke ba lumela hore ho tla ba le ntoa ea makhaola-khang pakeng tsa ba lokileng le ba sa lokang, e tla fella ka ho timela ha lefatše la rōna. Phuputsong e entsoeng United States ke Princeton Survey Research Associates, ho fumanoe hore batho ba baholo ba etsang liphesente tse 40 ba lumela hore lefatše le tla timela “ntoeng ea Armagedone.”

Seo ba se bolelang: Batho ba ne ba sa etsetsoa  ho phela lefatšeng ho ea ho ile, kapa hona hore lefatše le ne le sa bōpeloa ho ba teng ka ho sa feleng. Ha Molimo a bōpa motho, sepheo sa hae e ne e le hore a tle a shoe ha nako e ntse e e-ea.

Seo Bibele e se rutang: Bibele e beha taba ka ho hlaka ha e re Molimo “o thehile lefatše holim’a libaka tsa lona tse tiisitsoeng; le ke ke la sisinngoa ho isa nakong e sa lekanyetsoang, kapa ka ho sa feleng.” (Pesaleme ea 104:5) Bibele ha e bua ka baahi ba lefatšeng, e re: “Ba lokileng ba tla rua lefatše, ba tla lula ho lona ka ho sa feleng.”—Pesaleme ea 37:29.

Ka tsela e hlakileng, Bibele e hanyetsana le kutloisiso e tloaelehileng ka Armagedone. Joale, seo e leng ’nete ke sefe?

[Mongolo o botlaaseng ba leqephe]