Jesu o ne a Tla Re’ng?

Batho ba bangata ba hlomphang Molimo ba lumela hore bolumeli bo lokela ho kenella lipolotiking. Ba lumela hore bolumeli bo ka thusa haholo ho rarolla mathata a batho. Leha ho le joalo, batho ba bang ba hlomphang Molimo bona ba lumela hore bolumeli le lipolotiki ha lia lokela ho kopana. Uena u re’ng? Na mekhatlo ee e matla e lokela ho sebetsa ’moho?

JESU KRESTE o hlalosoa e le “motho ea bileng le tšusumetso e matla ka ho fetisisa nalaneng ea bolumeli ea moloko oa batho.” U nahana hore o ne a ka araba joang ha re ne re ka mo botsa potso e reng, Na bolumeli bo lokela ho sebelisana le lipolotiki? Ha a ne a le lefatšeng o ile a araba potso eo ka mantsoe a hae le ka liketso. Ka mohlala, Thutong ea hae e tsebahalang ea Thabeng, Jesu o ile a fa balateli ba hae lintlha tse tataisang tse neng li tla ba thusa hore na ba lokela ho phetha karolo efe sechabeng. A re ke re hlahlobe lintlha tse ling ho tsoa thutong eo e tsebahalang.

 E-bang le Tšusumetso e Ntle ho ba Bang

Jesu o ile a bolela hore na balateli ba hae ba lokela ho ba le boikutlo bofe ka lefatše. O ile a re: “Le letsoai la lefatše; empa haeba letsoai le tapa, botsoai ba lona bo tla khutlisoa joang? Le ke ke la hlola le sebelisetsoa letho haese ho lahleloa ka ntle hore le hatakeloe ke batho. Le leseli la lefatše. . . . Leseli la lōna le ke le khanye ka pel’a batho, e le hore ba ka bona mesebetsi ea lōna e metle ’me ba tlotlisa Ntat’a lōna ea maholimong.” (Matheu 5:13-16) Ke hobane’ng ha Jesu a ile a re balateli ba hae ba tšoana le letsoai le leseli?

Mantsoe ana a Jesu a bontša hore balateli ba hae ke letsoai, eseng la sehlotšoana sa batho, empa la moloko oohle oa batho. Ke leseli, eseng la palo e itseng ea batho, empa la bohle ba batlang ho bona ka ho hlaka. Ka ho sebelisa papiso ena, Jesu o ile a bontša ka ho hlaka hore o ne a sa batle hore balateli ba hae ba ikarole ho batho. Hobane’ng?

Hlokomela se latelang: Letsoai le ke ke la sireletsa lijo hore li se ke tsa bola haeba le sa tšeloe lijong. Lebone le ke ke la khantša kamore e lefifi haeba le sa behoe ka kamoreng eo. Kahoo, ha ho makatse hore ha ho mohla Jesu a ileng a laela barutuoa ba hae hore ba e’o lula sebakeng se itseng moo e leng bona feela. Kapa hona ho ba khothalletsa hore ba ikarole ho batho ba bang, ka hore ba lule mehahong e etselitsoeng bona feela. Ho e-na le hoo, joalokaha letsoai le lokela ho kopana le lijo ’me leseli le lokela ho khantša moo ho leng lefifi, le Bakreste ba lokela ho ba le tšusumetso e ntle ho batho ba bang.

“Hase Karolo ea Lefatše”

Leha ho le joalo, litaelo tsa Jesu tsa hore balateli ba hae ba lokela ho ba le litšebelisano le batho ba bang li etsa hore re ipotse potso ea bohlokoa mabapi le hore na Bakreste ba lokela ho ikutloa joang ka lipolotiki. Hobane’ng? Nakoana pele ho lefu la hae, Jesu o ile a rapella balateli ba hae ho Molimo, a re: “Ha ke u kōpe hore u ba ntše lefatšeng, empa ke kōpa hore u ba lebele ka lebaka la ea khopo. Hase karolo ea lefatše, feela joalokaha ke se karolo ea lefatše.” (Johanne 17:15, 16) Joale, Bakreste ba ka khona joang hore e se be karolo ea lefatše empa ka nako e tšoanang ba e-na le karolo eo ba e phethang sechabeng? E le hore re fumane karabo, a re ke re hlahlobe lipotso tse ling tse tharo:

• Jesu o ne a ikutloa joang ka lipolotiki?

• Bakreste bona ba lokela ho ikutloa joang ka lipolotiki kajeno?

• Lithuto tsa Bokreste li ama sechaba joang?

[Ntlha e Qolotsoeng e leqepheng la 4]

Jesu o ile a bontša ka ho hlaka hore o ne a sa batle hore balateli ba hae ba ikarole ho batho